Sug Bekna Sulat ni Pablo tu nga Getaw
TESALONICA
Mendadi, ki pikumpungan kini nu nga sakup ni Kristu ditug lunsud Tesalonica, mikpetindeg dun si Pablo. Puꞌ ndaꞌ maiben dia si Pablo, pinungun nu Megbebayaꞌi melaun getaw suminakup tu Kaunutan si Isus miksekat di ginukit ni Pablo. Ndaꞌ maiben pelum, mikegawaꞌ dia si Pablo, sabaꞌ nu kesina diniin nu nga samanen getaw Judea. Minundas dayun ditug lain lunsud. Su saanan ni Pablo dia sala lunsud, misebuꞌan dun si Pablo saꞌ taꞌ alanduni kebetang nu nga sakup ni Kristu tu Tesalonica, kaas delendeman nug duma getaw, mabuꞌ sinuguꞌen daw sug limbangen si Timoteo meditu, adun pegipusipusenen su mipenggulaula dia. Benaꞌ mipuliꞌ si Timoteo ditu ni Pablo, iin pai kesulat ni Pablo di sulat kini.
Maꞌantu, ki sulat kini, piwit ni Pablo di nga samasakupen ditu Tesalonica adun pengulikseganen ilan sumalig pailan gusay dini Kristu. Mukaꞌ pigwalinen dinilan su gempenggulaula pa ditug binayaꞌ gebii buꞌ gendaw. Kini sug bekna gupia sinulat ni Pablo ndaꞌ mbeleng, ki tinaguꞌ nu nga sakup ni Kristu miuna dinita. Su Tesalonica, gembagel lunsud ditug benwa Macedonia begudiin (nemun piningalan dun Salonika, sakup Macedonia pa gusay).
1
1 Naan si Pablo mukaꞌ su ngag dumau si Silas buꞌ si Timoteo. Piwitan ku amu sulat, yamu nu pikumpungan nu nga sakup ni Isukristu ditug lunsud Tesalonica suminalabuuk na ditu Gamaꞌ ta Megbebayaꞌ mukaꞌ tu Kaunutan ta si Isukristu.
Penenebiin ku tu Megbebayaꞌ begayan amu niin tulungen mukaꞌ pianan ginaa.
Su Pigbetad mukaꞌ Kesalig nu nga Getaw Tesalonica
2 Mendadi yamu, mekpaladpalad ami lelayun tu Megbebayaꞌ sabaꞌ diniu, launan niu, mukaꞌ tatap nami amu penenebiay. 3 Puꞌ milabuꞌ di ginaa nami su pinggulaula niu puun tu kesalig niu, su binaal niu miksekat tug lelaat niu sampay su kepagen pedetengen niu di kepuliꞌ dini nu Kaunutan ta si Isukristu. 4 Uu Mingumpated petailen nu Megbebayaꞌ, misuunan nami puꞌ mipemiliꞌ amu niin di nga getaw, adun mbaal amu niin piglegetawanen. 5 Puꞌ su kegukit nami diniu tu Gempia Petenday, kanaꞌ pibian laak di tinaluꞌ nami, segaga pibian dadema di ginuung nug Balakat nu Megbebayaꞌ, mukaꞌ sabaꞌ mituudan ami dun gupia. Misuunan niu puꞌ su pigbetad nami su saanan nami ditu niu, iini pigbetad nami dun, su kepia diniu. 6 Mukaꞌ dema, pinunggilingan niu ami mukaꞌ su Kaunutan ta si Isukristu. Pia piglegetan amu, pinembaꞌ niu su kegukit nami mukaꞌ liliag amu dun sug leliag bigay nug Balakat nu Megbebayaꞌ, 7 kaas mibaal namu lendasan tu ngag launan mikpetuud dia ngag benwa Macedonia mukaꞌ Grecia. 8 Su pitenday mekatag tu Kaunutan ta genat diniu, mileep na di ngag benwa. Kanaꞌ laak dig benwa Macedonia mukaꞌ Grecia, puꞌ pia tandaꞌ, midengeg na nilan ditu puꞌ suminalig amu gusay ditu Megbebayaꞌ. Mendadi ndaꞌ na nami kambat teluꞌay. 9 Pigukit nu nga getaw dia ngag benwa kia puꞌ pinembaꞌ niu ami saanan nami ditu niu, mukaꞌ tiliudan niu su nga sagya diwata, adun pektemuyen niu su tantu Megbebayaꞌ ndaꞌi gumulen. 10 Mukaꞌ pegelatan pa niu su kelusad puliꞌ nug Bataꞌen genat tug langit, si Isus su pitubuꞌen puliꞌ. Iini meglegawen dinita tu ginukuman nu Megbebayaꞌ sungu mateng.