Su Keduaꞌ Sulat ni Pablo tu nga Getaw
TESALONICA
Piuna di Keduaꞌ Sulat ni Pablo tu nga Getaw Tesalonica
Naa, kagina mipuitan na ni Pablo sulaten su nga samasakupen ditu Tesalonica, taꞌ mai piwitanen dun pelum ki sinulaten kini? Puꞌ kiin, su nga sakup ni Kristu dia Tesalonica, migduaꞌduaꞌ dawig delendeman nilan mekatag di kelusad puliꞌ nu Kaunutan si Isukristu. Kaas mauyaꞌan ni Pablo pementekenen sug delendeman nilan ditu. Pigwalinen dinilan puꞌ su Kaunutan si Isus, ndiꞌ lumusad puliꞌ, subay duuni kuntranen mauna dateng. Tinituluꞌen dailan dema puꞌ subay penggengeten nilan su kesalig nilan tu Megbebayaꞌ pia taꞌ alanduni gikteb nu kelegetay nilan mukaꞌ kelegenay nilan.
1
1 Naan si Pablo, mukaꞌ su ngag dumau si Silas mukaꞌ si Timoteo, puitan ku amu sulat, yamu nu pikumpungan nu nga sakup ni Kristu ditug lunsud Tesalonica suminalabuuk na ditu Gamaꞌ ta Megbebayaꞌ mukaꞌ tu Kaunutan ta si Isukristu.
2 Penenebiin ku tu Gamaꞌ ta Megbebayaꞌ mukaꞌ tu Kaunutan ta si Isukristu, begayan amu niin tulung mukaꞌ pianan ginaa.
Mengukum si Kristu di Kelusaden puliꞌ dini
3 Naa yamu Mingumpated, gebii gendaw subay pekpeladpeladan nami su Megbebayaꞌ mekatag diniu. Bantang na daan mekpaladpalad ami diniin, puꞌ migisegi kesalig niu, miksamet dademai keglinelaatay niu. 4 Kaas saꞌ meksimba ami dia nga pikumpungan nu nga sakup ni Kristu, pingangyaꞌ nami amu dinilan, puꞌ miktigel amu di kegleget diniu, mukaꞌ ndaꞌ mpalini kekpetuud niu pia milegenan amu.
5 Naa, ki pigbetad niu mukaꞌ kektigel niu kia, iin su tuꞌus puꞌ melepengi ginukuman nu Megbebayaꞌ, kaas baalen amu niin bantang sumakup ditu Keglekaunutanen. Puꞌ sabaꞌ nu kesakup niu tu Keglekaunutanen, milegenan amu nemun. 6 Mukaꞌ penggulaulaan pa nu Megbebayaꞌ su gempia, puꞌ pelegetanen su nga mikpeleget diniu, 7 mukaꞌ peleliinen amu nga pilegetan, sampay yami pa pagid. Penggulaulaan nu Megbebayaꞌ saꞌ metuaꞌ puliꞌ su Kaunutan si Isus genat tug langit, tendugan nu nga ginuungan sesuguꞌen nu Megbebayaꞌ getaw langit mukaꞌ ligaꞌ gapuy, 8 adun pelebuꞌanen su nga mimilas tu Megbebayaꞌ mukaꞌ mimilas tu Gempia Petenday mekatag di Kaunutan ta si Isus. 9 Iini pelabuꞌ di nga memilas, pelaatan ilan di ndaꞌi tamanen, puꞌ peliuꞌen ilan nu Megbebayaꞌ tu Kaunutan ta, mukaꞌ tu kelengas nu pegbayaꞌen mukaꞌ ginuungen. 10 Mpenggulaula di gendaw nu ketuaꞌen puliꞌ, puꞌ iini metuaꞌ dun si Isukristu, pededengegen nu piglegetawanen, mukaꞌ pegbesaan dadema nu ngag launan mekpetuud kampuꞌ amu, puꞌ mituudan amu di ginukit nami.
11 Kaas tatap nami amu penenebiay, puꞌ baalen nu Megbebayaꞌ su pegbetaden niu mbantang di keꞌenggaten diniu. Penenebiin da nami dema, puun tu ginuungen pekpelasenen sug launan gempia delendeman niu sampay sug launan penggulaulaan niu puun tu kesalig niu. 12 Maꞌantu mpededengeg niui ngalan nu Kaunutan ta si Isus, mukaꞌ pededengegenen damu dema. Mpenggulaula pebian di tulung nu Megbebayaꞌ su pektemuyen ta mukaꞌ nu Kaunutan ta si Isukristu.