পবিত্র ইঞ্জিল শরিফ ৫ নম্বর ছিপারা
সাহাবি নামা
তরিকার খেজমতো সাহাবি অকল
পরিচিতি
পবিত্র আছমানি কিতাবর অউ সাহাবি নামা ছিপারার মাজে আমরা পাইমু, হজরত ইছা আল-মসীর সাহাবি আর উম্মত অকল আল্লাই পাক রুহর বলে পয়লা জেরুজালেম টাউন, বাদে বর্তমান ফিলিস্তিন দেশর এহুদিয়া আর শমরিয়া এলাকা, হেশে এশিয়া আর ইউরোপ মহাদেশর বউত জাগা অইয়া রোমান বাদশাইর রাজধানি রোম টাউন পর্যন্ত আইয়া কিলা আল্লাই খুশ-খবরি তবলিগ করছইন, আর কিলা অউ হকল জাগাত নয়া নয়া ইছাই জমাত জন্মিছে।
অউ ছিপারাত আছে, তবলিগ কামর সফরো বারইয়া সাহাবি অকলে আর হজরত ইছার উম্মত অকলে কত বেশি জুলুম-মছিবত পাইছইন, নিজর জাতি থাকি, ভিন জাতি থাকি আর নানান নমুনার মুর্তি পুজারির গেছ থাকি অউ দুখ-মছিবত, জেল-জুলুম, চাবুকর মাইর সইয্য করছইন। তা-ও তারা তবলিগ কাম করছইন আর আল্লা পাকে তারারে হামেশা কতো বড় বড় সাইয্য করছইন, তারার মাজদি নানান নমুনার কেরামতি জাইর অইছে। এরলাগি মানুষ দলে দলে আইয়া ইমান আনছে।
আমরা অউ ছিপারার ১ রুকু ৮ আয়াতো পাইমু, হজরত ইছায় সাহাবি অকলরে কইরা, “পাক রুহ তুমরার উপরে কাইম অইয়া হারলে তুমরা গাইবি বল পাইবায়, অউ বলে জেরুজালেম, আস্তা এহুদিয়া আর শমরিয়া এলাকা, আর দুনিয়ার হেশ সীমানা পর্যন্ত আমার সাক্ষি অইবায়।”
লেখক পরিচিতি আর সময়
আল্লা পাকর হুকুমে অউ সাহাবি নামা ছিপারা লেখছইন হজরত লুক (র:)। পবিত্র ইঞ্জিল শরিফ থাকি জানা যায়, হজরত লুকর পেশা আছিল হেকিমি ডাক্তর। তাইন হজরত ইছার সাহাবি হজরত পাউলুছর খেজমতো রইয়া নানান দেশর নানান জাতির গেছে আল্লার কালাম তবলিগ করতা। হজরত ইছা দুনিয়া থাকি বেহেস্তো তশরিফ নেওয়ার অনুমান ৩০ বছর বাদে অউ ছিপারা কিতাব আকারে লেখা অইছে। অউ সাহাবি নামা ছিপারা অইলো হজরত লুকর লেখা দুই নম্বর ছিপারা, এর আগে তাইন আল-লুক নামর ছিপারা লেখছলা।
এরমাজে আছে,
(ক) হজরত ইছার বেহেস্তো ফিরত যাওয়া ১:১-১১ আয়াত
(খ) জেরুজালেম ইছায়ী জমাতর জনম ১:১২-৫:৪২
(গ) এহুদিয়া আর শমরিয়া এলাকাত ইছায়ী জমাত ৬-১২ রুকু
(ঘ) হজরত পাউলুছর (রা:) পয়লা তবলিগি সফর ১৩:১-১৫:৩৫ আয়াত
(ঙ) হজরত পাউলুছর দুয়ারা তবলিগি সফর ১৫:৩৬-১৮:২৮
(চ) হজরত পাউলুছর তিন নম্বর সফর ১৯:১-২১:১৪
(ছ) বন্দি হালতে হজরত পাউলুছ ২১:১৫-২৮:৩১
হজরত ইছার বেহেস্তো ফিরত যাওয়া (১:১-১১)
1
মহামাইন্য থিওফিলাছ,
হজরত ইছারে বেহেস্তো তুলিয়া নেওয়ার আগ পর্যন্ত তাইন যেতা তালিম দিছইন আর যেতা যেতা করছইন ই হকলতাউ আমি আগর কিতাবো লেখছি। যে সাহাবি অকলরে তাইন বাছিয়া লইছলা, তানরে তুলিয়া নেওয়ার আগে পাক রুহ দিয়া এরার গেছে অছিয়ত করাই গেছইন। তান তকলিফ কাইমর বাদে তাইন যেন জিন্দা আছইন ইটার বউত কিছিমর আলামত দেখাইছইন। চাল্লিশ দিন ধরি তাইন সাহাবি অকলরে দেখা দিয়া আল্লার বাদশাইর বিষয়ে বাতচিত করছইন। ইছায় তারা হক্কলর লগে এখানো শরিক অইয়া অউ হুকুম দিলা, “তুমরা জেরুজালেম থাকি যাইও না, আমার গাইবি বাফর ওয়াদা করা যে দানর কথা তুমরা আগে আমার গেছে হুনছো, এর লাগি অনো বার চাও। হজরত এহিয়ায় তো পানির মাজে তৌবার গোছল করাইতা, অইলে বেশ দেরি অইতো নায় আল্লায় তুমরারে পাক রুহ দিয়া গোছল করাইবা।”
তারা হক্কল এখানো দলা অইয়া ইছারে জিকাইলা, “হুজুর, ই সময় কিতা বনি ইসরাইল অকলর আতো রাইজ্য ফিরত আনবা নি?” ইছায় জুয়াপ দিলা, “যে অখত বা জমানা আমার গাইবি বাফে তান নিজর এখতিয়ারো রাখছইন, ইতা তুমরা জানার গরজ নাই। অইলে পাক রুহ তুমরার উপরে কাইম অইয়া হারলে তুমরা গাইবি বল পাইবায়, অউ বলে জেরুজালেম, আস্তা এহুদিয়া আর শমরিয়া এলাকা, আর দুনিয়ার হেশ সীমানা পর্যন্ত আমার সাক্ষি অইবায়।” অউ মাতর বাদেউ সাহাবি অকলর চউখর ছামনে ইছারে তুলিয়া নেওয়া অইলো, আর তাইন মেঘর টুকরার আওড় অইগেলা। 10 ইছা যেবলা আছমানো উঠিরা ই সময় সাহাবি অকলে চউখ না ফিরাইয়া আছমানর বায় চাইরইলা, অউ সময় ধলা কাপড় ফিন্দা দুইজন বেটা মানুষ তারার কান্দাত উবাইয়া 11 কইলা, “ও গালিলর মানুষ অকল, ইখানো উবাইয়া আছমানর বায় চাইরিছো কেনে? যারে তুমরার গেছ থাকি তুলিয়া নেওয়া অইলো, অউ ইছারে যেলাখান তুমরা বেহেস্তো যাইতে দেখলায়, অউ লাখান তাইন ফিরিয়াও আইবা।”
জেরুজালেম ইছায়ী জমাতর জনম (১:১২-৫:৪২)
নয়া সাহাবি পছন্দ করা
12 অউ সাহাবি অকল জয়তুন নামর পাড়ো থাকি জেরুজালেমো ফিরিয়া আইলা। ই পাড় জেরুজালেম টাউন থনে থুড়া দুরই। 13 টাউনো ফিরিয়া তারা যে ঘরর উপরর তালাত রইতা হউ ঘরো গেলা। তারা অইলা পিতর, হান্নান, ইয়াকুব, আন্দ্রিয়াছ, ফিলিফ, থুমাছ, বর্থলময় আর মথি, আলফির পুয়া ইয়াকুব, মুক্তিযুদ্ধা সাইমন, আর ইয়াকুবর পুয়া ইহুদা। 14 ঘরো হামাইয়া হকলে মিলিয়া খাছ দিলে দোয়া করাত রইলা, এরার লগে আছলা ইমানদার বেটিন, ইছার মা মরিয়ম আর তান ভাইয়াইন।
15 হউ সময় একদিন পিতরে অনুমান একশো বিশজন মুমিন অকলর মাজে উবাইয়া কইলা, 16 “ভাই অকল, ইছারে যেরা ধরাত আইছিল তারারে পথ চিনাইয়া নিছিল ইহুদা, তার বেয়াপারে বউত আগে দাউদ নবীর মুখো পাক রুহে যেতা কইছলা, পাক কালামর ই কথা পুরা অওয়ার দরকার আছিল। 17 হে তো আমরারউ একজন আছিল, আর আমরার লগে তরিকার খেজমতর লাগি তারেও সাহাবি হিসাবে পছন্দ করা অইছিল।” 18 অউ নাপাকি কামর টেকা দিয়া হে একজরা জমি লইছিল, আর অউ জমিনো উপইত অইয়া পড়িয়া তার পেট ফাটিয়া আত-ভড় বারইলো। 19 জেরুজালেমর হকল মানষে ইতা হুনছিল, এরলাগি হকলে অউ জমিনরে ডাকইন ‘আকেলদামা’ বা লউর জমিন।
পিতরে আরো কইলা, 20 “অউ কথা পবিত্র জবুর শরিফো আছে:
 
তার বসত খানা খালি রউক,
হনো রওয়ার কেউ না থাকউক।
তার গদি আরক জনে পাউক।
 
21-22 এরলাগি এহিয়ায় যেবলা তৌবার গোছল করাইতা হউ সময় থাকি, ইছারে আমরার গেছ থনে তুলিয়া নেওয়ার আগ পর্যন্ত, যতদিন ইছা আমরার লগে চলা-ফিরা করছিলা, অতদিন যেরা আমরার দলো আছিল, এরার মাজ থনে ইছা যেন মুর্দা থাকি জিন্দা অইয়া উঠছইন, এর সাক্ষি হিসাবে অইন্য আরক জনরে আমরা সাহাবি অকলর দলো হারানি লাগবো।”
23 তেউ তারা অউ দুইজনরে উবা করাইলা, ইউছুফ বার্শাব্বা, তান আরক নাম ইউছতুছ; আর মাতিয়াছ। 24-25 বাদে তারা দোয়া করলা, “ও মাবুদ, তুমি হকলর দিলর খবর জানো, ইহুদায় তো তার নিজর জাগাত যাওয়ার লাগি খেজমত আর সাহাবি পদর কাম বাদ দিলাইছে, ইহুদার বদলা ই দুইজনর মাজে তুমি কারে পছন্দ করো আমরারে চিনাইয়া দেও।” 26 হেশে তারা দুইজনর নামে লটারি মারলে মাতিয়াছর নাম উঠলো; তেউ মাতিয়াছ অউ এগারো জন সাহাবির লগে যোগ অইলা।