পবিত্র ইঞ্জিল শরিফ ২০ নম্বর ছিপারা
আল-ইয়াকুব
পরিচিতি
আল্লা পাকর হুকুমে অউ ছিপারা লেখছইন হজরত ইছা আল-মসীর হাতন ভাই হজরত ইয়াকুব (রা:)। হজরত ইছা বেহেস্তো তশরিফ নেওয়ার অনুমান ১৩-১৮ বছর বাদে ইখান লেখা অইছে। অউ লেখক তো বনি ইসরাইল খান্দানর মুল বাফ হউ হজরত ইয়াকুব (আ:) নায়। আর হজরত ইছার বারোজন সাহাবির মাজর একজনর নাম আছিল জিবুদিয়ার পুয়া ইয়াকুব, এইনও অউ ছিপারার লেখক নায়। অইলে অউ লেখক তো জেরুজালেম জমাতর বড় মুরব্বি নেতা (সাহাবি নামা ১৫ রুকু)। তাইন আল-মসীর বেয়াপারে তবলিগ করার সময় নাফরমান ইহুদি অকলর আতো পবিত্র বায়তুল-মুকাদ্দছো শহীদ অইছলা।
অউ ছিপারা তিলাওত করলে, হজরত ইছা আল-মসীর উম্মত অকলে দুনিয়াবি জিন্দেগি কাটানির লাগি কুন লাখান ইমান-আকিদা, আমল-খাছলত করা জরুরি, অউ বেয়াপারে জানা যাইবো। এর তালিমর লগে হজরত ইছার “পাড়র উপরর তালিম” অর লগে পবিত্র ইঞ্জিল শরিফর মথি ছিপারার ৫-৭ রুকু বউত মিল আছে। অউ ছিপারার ১ রুকু ২৬ আয়াতো আছে, “যে মানষে নিজরে পরেজগার মনো করে, অইলে নিজর জিফরারে সামলায় না, হে তো তার নিজরে টগে, তার হক্কল এবাদতিউ মিছা।”
এরমাজে আছে,
(ক) আসল ইমান আর আমল ১-২ রুকু
(খ) জিফরা সামলানি আর আসল আখল-হেকমত ৩ রুকু
(গ) মাইর-দরবার, গিবত, বড়াই, জুলুম না করা ৪:১-৫:৬ আয়াত
(ঘ) ছবর, মুনাজাত আর হেদায়ত করা ৫:৭-২০
1
1 আমি ইয়াকুব, আল্লা আর হজরত ইছা আল-মসীর গুলাম, দুনিয়ার নানান দেশো ছিতরাইল বনি ইসরাইলর বারো গুষ্টির মানষরে ছালাম জানাইরাম।
ইমান আর হেকমত
2 ও আমার ভাই অকল, তুমরা যেবলা নানান জাতর পরিক্ষার মাজে পড়ো, ই সময় ইতা খুব খুশির বেয়াপার মনো করিও। 3 জানো তো, ইমানর পরিক্ষায় তুমরারে থির থাকার খেমতা বাড়াই দেয়। 4 আর ই থির থাকার খেমতারে কামো লাগাও, যাতে তুমরা কামিল আর খাটি অইয়া তুমরার কুনু কমতি না রয়।
5 তুমরার মাজে কেউরর যুদি আখলর কমতি থাকে, তে হে যানু আল্লার গেছে চায়, তেউ পাইব। তাইন কুনু বেজারি ভাব না আনিয়া হক্কলরেউ বেহিসাব দান করইন, খালি আতে ফিরাইন না। 6 অইলে হে মনো কুনু সন্দয় না রাখিয়া একিন করিয়া চাইতে অইবো। যে সন্দয় করে হে তো দরিয়ার ঢেউর লাখান, তারে আউলা-জাউলা বাতাসে উড়াইয়া লইয়া যায়। 7 ইলাখান মানষে যানু মাবুদর গেছ থনে কুন্তা পাওয়ার আশা না করে, 8 হে তো দু-দিলা মানুষ, তার হকল কামোউ অশান্তি।
গরিব আর ধনি
9 যে ইমানদার ভাই গরিব, তারে বড় বানাইছইন করিয়া হে নিজরে মুবারক মনো করউক। 10 আর যে ধনি, তারে হুরু বানাইছইন করিয়া হে-ও নিজরে মুবারক মনো করউক, কারন হে ঘাস ফুলর লাখান জরিয়া পড়িযিবো। 11 সুরুজ যেবলা উঠে, ই সময় তার তেজে ঘাস হুকাই যায়, ফুল জরিয়া পড়িযায়, আর তার সুন্দর নষ্ট অইযায়। ধনি মানুষও অলাখান তার ব্যস্ততার মাজে জরিয়া পড়িযিব।
12 মুবারক হউ জন, যে জন পরিক্ষার সময় মজবুত রয়। পরিক্ষাত কামিয়াব অইলে জয়র মালা হিসাবে হে আখের পাইবো। অউ মালা তান আশিক অকলরে দিবা করি স্বয়ং আল্লা পাকে ওয়াদা করছইন। 13 কুনু মানষে গুনার বায় এশকি অইয়া যানু না কয়, আল্লায় আমারে গুনার পথে টানিরা। কুনু নাফরমানির পথেউ আল্লারে টানা যায় না, তাইনও কেউররে ই পথে নেইন না। 14 অইলে মানষর নিজর দিলেউ টানিয়া নিয়া তারে ফান্দো ফালায়। 15 বাদে দিলর বদ নিয়ত পুরা অইলে গুনার বিচ পেটো লয়, আর গুনা বড় অইয়া মউতর জনম দেয়।
16 ও আমার মায়ার ভাই অকল, তুমরা অউ লাখান ভুল করিও না। 17 হক্কল ভালা আর নিখুত দান তো বেহেস্ত থনে লামিয়া আয়, যেইন আছমানি নুর অকল পয়দা করছইন, হউ আল্লার গেছ থনে আয়। অউ নুর অকল ছেবার লাখান ডুলাডুলি করলেও, তাইন ইলা করইন না। 18 তাইন নিজর খুশিয়ে আমরারে হক কালাম দিয়া তান বন্দা বানাইছইন, আমরা যানু আশরাফুল-মখলুকাত, সৃষ্টির সেরা মানুষ অই।
কালাম হুনিয়া আমল করা
19 ও আমার মায়ার ভাই অকল, মনো রাখিও, তুমরা আগে হুনো বাদে মাতো, জলদি গুছা করিও না। 20 মানষে গুছা করলে আল্লার দরবারো কুনু ভালা কাম করতো পারে না। 21 গতিকে তুমরা হকল জাতর হারাম আর নাফরমানি কাম বাদ দিলাও। তুমরার দিলর মাজে যে কালাম রুয়া অইছে, নরম দিলে অউ কালাম কবুল করো। তুমরারে তরানির খেমতা ই কালামর আছে।
22 আল্লার কালাম খালি হুনলেউ অইতো নায়, অলাখান আমলও করো। কালাম হুনিয়া যুদি আমল না করো, তে তুমরা নিজরে টগিরায়। 23 কেউ যুদি ই কালাম হুনিয়া আমল না করে, তে হে অউ মানষর লাখান, যে আয়নাত নিজর চেরা দেখিয়া যায়গি, 24 বাদে হরিয়া গিয়া ফাউরিলায় তার চেরা কিলাখান। 25 অইলে যে খাটি আইন মানষরে আজাদ করে, আর অউ আইনর বায় নজর রাখিয়া যেরা হামেশা জিয়াইল রয়, ইতা হুনিয়া হারি ফাউরে না, আমল করে, তারা হকল কামো মুবারক অইবো।
26 যে মানষে নিজরে পরেজগার মনো করে, অইলে নিজর জিফরারে সামলায় না, হে তো তার নিজরে টগে, তার হক্কল এবাদতিউ মিছা। 27 এতিম অকলরে আর ড়াড়ি বেটিন্তরে বিপদর সময় সায়-সাইয্য করা, এরলগে দুনিয়ার হকল নাফরমানি থাকি নিজরে পাক-ছাফ রাখাউ অইলো, আল্লার নজরো খাটি আর ছহি এবাদতি।