2
মাছর পেটো হজরত ইউনুছর (আ:) তৌবা
1 ইউনুছে মাছর পেটো থনে মাবুদ আল্লার দরবারো দোয়া করলা।
2 মছিবতো পইড়া মউলা ডাকিলাম তরে,
রহম করিয়া তুই জুয়াপ দিলে মোরে।
পাতালর পেটো বইয়া আমি কান্দিলাম,
কবুল করিলায় আরজ রহিম রহমান।
3 দরিয়ার মুরো বন্ধু মোরে ফালাইলায়,
তুমার পানির ঢেউয়ে আমায় ভাসাই লইয়া যায়।
4 মিলে না দিদার তুমার নাই কাণ্ডারি,
তাল্লাশি করিয়া মুকাম জিকির করি।
5 ঢেউওর মাজেতে পড়ি জান ধড়ফড় করে,
দরিয়ার লতা-পাতায় পেচিলিলো মোরে।
6 পাতালর তলে গিয়া মিলের না কিনার,
খরেদি চাইয়া দেখি দুয়ার নাই আর।
বন্দি অইয়া কান্দি আমি নিরাশ বদনে,
আজাদ করিলায় মউলা গইন গাড়া থনে।
7 জান আমার যায় যায় অইলো যখন,
কাতর অইয়া গো বন্ধু করিনু স্মরন।
ভিক্ষা মাংগিলাম কাংগাল দরবারে তুমার,
আরশো থাকিয়া দয়াল দেখাইলায় দিদার।
8 মুর্তিপুজা করে যারা না পাইব রহমত,
এলামি করিয়া তারা আরাইলো কুদরত।
9 শুকুর-গুজার করো ইউনুছ মাবুদ মেহেরবান,
তুমার দরবারে আমি করিমু কুরবান।
লিল্লা-ছদগা দান-খয়রাত সপিমু তরে,
নাজাতর মালিক-মউলায় বাচাও আমারে।
10 বাদে মাবুদে হউ মাছরে হুকুম দিলা, মাছে ইউনুছরে নিয়া হুকনা জমিনর উপরে বাইত করি ফালাই দিলো।