1 মাবুদে মুছা আর হারুনরে কইলা, 2 “তুমরা বনি ইছরাইলরে জানাও, কুনু বেটা মানষর পেসাবর রাস্তায় যুদি হামেশা ধাতু বার অয়, তে তার শরিল নাপাক। 3 তার শরিল থাকি ধাতু বারনিত রইলে বা শরিলো আটকি রইলেও হে নাপাক। 4 অলা নাপাক হালতে হে যে বিছনাত হুতিবো, বা যে জাগাত বইবো, হউ বিছনা আর হউ জাগাও নাপাক অইযিবো। 5 অউ ধাতু যাওরা নাপাক বেটার বিছনা যে জনে ছইবো, হে নিজর কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 6 অলাখান হউ বেটার বওয়ার জাগাত যে জন বইবো, হে-ও তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 7 আর ই ধাতু যাওরা বেটারে যে জনে ছইবো হে-ও তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 8 হউ ধাতু যাওরা বেটায় যুদি কুনু পাক-ছাফ মানষর গতরো ছেফ ফালায়, তে অউ জনেও তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 9 অউ ধাতু যাওরা বেটায় কুনু জাগাত যাইবার কালো গাড়ি-ঘোড়া কুনুতার সিটো বইয়া গেলে, ই সিট নাপাক অইযিবো। 10 অউ সিট কুনু মানষে ছইলে হে হাইঞ্জা পর্যন্ত নাপাক হালতে রইবো। অউ সিট যে জনে তুলবো, হে তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 11 অউ ধাতু যাওরা বেটায় পানিদি আত না ধইয়া যুদি কুনু মানষরে ছইলায়, তে যারে ছইবো, হে তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 12 আর ধাতু যাওরা বেটায় যুদি কুনু মাটির বাসন ছইলায়, তে ইতা ভাংগিলিতে অইবো, আর লাকড়িদি বানাইল কুনু জিনিস ছইলে, ইতা পানিদি ধইতে অইবো।

13 “হউ ধাতু যাওরা বেমারি বেটার বেমার যেদিন কমিযিবো, অউ দিন থাকি গনিয়া সাত দিনর দিন হে তার কাপড়-চুপড় ধইয়া দিয়া ফুতর পানিত নাইয়া হারি পাক-ছাফ অইবো। 14 বাদে আট দিনর দিন হে দুইটা ডুপি পাখি বা দুগু পারো লইয়া মাবুদর ছামনে মিলন-তাম্বুর দুয়ারর গেছে আজির অইয়া, ইমাম ছাবর আতো দিতে অইবো। 15 ইমামে হউ দুইটার এগুরে দিয়া গুনার কফরার কুরবানি, আর দুছরাটা দিয়া জালাইল কুরবানি আদায় করবা। ধাতু যাওরা বেটার নাপাকি হরানির নিয়তে, ইমাম ছাবে মাবুদর ছামনে অউ নমুনায় তার কফরা আদায় করবা।

16 “কুনু বেটা মানষর যৌবনর পানি বার অইগেলে হে তার আস্তা শরিলরে পানিদি ধইতে অইবো, আর হাইঞ্জা পর্যন্ত হে নাপাক হালতে রইবো। 17 অউ যৌবনর পানি কুনু কাপড় বা চামড়ার জিনিসো লাগিগেলে, ইতা পানিদি ধইতে অইবো, আর হাইঞ্জা পর্যন্ত ইতা নাপাক হালতে রইবো। 18 কুনু বেটায় তার বউর লগে মিলা-মিশার কালো যৌবনর পানি বার অইলে, তারা দুইওজনে পানিদি নাইতে অইবো, দুইওজন হাইঞ্জা পর্যন্ত নাপাক হালতে রইবো।

19 “কুনু বেটির মাসিক বেমারর লউ যাওয়ার সময় তাই সাত দিন নাপাক হালতে রইবো। অউ সময় ই বেটিরে যে জনে ছইবো, হে হাইঞ্জা পর্যন্ত নাপাক হালতে রইবো। 20 অউ বেটিয়ারা বেমারর সময় তাই যেতার উপরে বইবো বা হুতিবো, ইতা হকলতা নাপাক অইযিবো। 21 তাইর বিছনা যে জনে ছইবো, হে-ও তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 22 অউ বেমারি বেটি যেতার উপরে বইছে, ইতা যুদি কেউ ছইলায়, তে হে-ও তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 23 তাইর বিছনা বা চেয়ারো কেউ ছইলে, বা ইতার উপরে থওয়া কুন্তা ছইলেও, হে হাইঞ্জা পর্যন্ত নাপাক হালতে রইবো। 24 বেটিয়ারা বেমারি বেটির লগে কুনু বেটা মানুষ যুদি হুতে, আর তাইর মাসিকর লউ তার শরিলো লাগে, তে অউ বেটাও সাত দিন নাপাক হালতে রইবো। অউ সাত দিনর মাজে হে যে বিছনাত হুতিবো, ইতাও নাপাক অইযিবো।

25 “কুনু বেটি মানষর যুদি বউত দিন ধরি লউ যাওয়াত রয়, মাসিক বেমারর সাত দিন পারনির বাদেও যুদি লউ যাওয়াত রয়, তে যতদিন পর্যন্ত ইলা লউ যাইবো, অতদিন তাই নাপাক রইবো। 26 বেটিয়ারা মাসিক বেমারর লাখান অউ লউ যাইবার সময় তাই যেতাত হুতিবো বা বইবো, ইতা নাপাক অইযিবো। 27 ই বিছনা বা চেয়ার যে জনে ছইবো, হে-ও নাপাক অইযিবো। হে তার কাপড়-চুপড় ধইয়া দিয়া পানিদি নাইবো, তা-ও হাইঞ্জা পর্যন্ত হে নাপাক হালতে রইবো। 28 অউ বেটির লউ যাওয়া বন্দ অওয়ার বাদেও, তাই গনিয়া আরো সাত দিন বার চাইতে অইবো, এরবাদে তাই পাক-ছাফ অইবো। 29 আর আট দিনর দিন তাই দুইটা ডুপি পাখি বা পারো লইয়া মিলন-তাম্বুর দুয়ারর গেছে ইমাম ছাবর ধারো যাইবো। 30 ইমামে হউ দুইও পাখির মাজর এগুদি গুনার কফরার কুরবানি, আর দুছরাটা দিয়া জালাইল কুরবানি আদায় করবা। অউ নমুনায় ইমামে তাইর লউ যাইবার নাপাকি হরানির কফরা মাবুদর ছামনে আদায় করবা।

31 “ও মুছা আর হারুন, অউ নমুনায় তুমরা বনি ইছরাইল সমাজরে হকল নমুনার নাপাকি থাকি বাচাইও, আরনায় তারার মাজে রওয়া আমার পবিত্র বসত খানারে যুদি তারা নাপাক বানাইন, তে অউ নাপাকির দায় তো তারার মরন অইবো।”

32-33 তে বেটাইন্তর ধাতু যাওয়া বেমার, যৌবনর পানি বারনি, বেটিন্তর মাসিক বেমার, বেটা বা বেটিন্তর যেকুনু লাখান ধাতু যাওয়া, নাপাক বউর লগে মিলা-মিশা করা, ইতা যেকুনু জনর লাগি অউ নিয়ম জারি অইলো।