আছমানি কিতাব
হজরত মালাখি নবীর ছহিফা
পরিচিতি
নাজিলর সময়: হজরত ইছা আল-মসীর জন্মর ৪৭০-৪৬০ বছর আগে।
হজরত মালাখি (আ:) আছলা একজন নবী। তান উপরে নাজিল অওয়া অউ ছহিফা, পবিত্র কিতাবুল মুকাদ্দছর ইঞ্জিল শরিফ নাজিল অওয়ার আগ পর্যন্ত, নবী অকলর কিতাব-ছহিফার আখেরি ছহিফা। অউ ছহিফা নাজিল অইছে ছওয়াল-জুয়াপ করার লাখান, আলাদা এক কায়দায়।
ই ছহিফা নাজিল অওয়ার বউত বছর আগে বাবিলর বাদশায় জেরুজালেম টাউনরে দখল করছিলা। তাইন জেরুজালেমর বাসিন্দা বনি ইসরাইল অকলরে দেশান্তরি আর বন্দি করিয়া তান বাবিল দেশো নিছলাগি। অউ সময় পবিত্র বায়তুল-মুকাদ্দছরে ভাংগিয়া বিনাশ করছিলা। বনি ইসরাইলর গুনা আর নাফরমানির দায় আল্লায় তারারে অউ সাজা দিছলা। বাদে ইরান দেশর বাদশায় বাবিলর বাদশারে যুদ্ধত আরাইয়া, তারারে বন্দি থাকি আজাদ করিয়া হিরবার জেরুজালেমো আনছইন। তাইন বায়তুল-মুকাদ্দছরেও হিরবার বানানির ইজাজত দিলা যাতে আল্লার ঘরর লিল্লা-ছদগা, কুরবানি, এবাদত-বন্দেগি আগর নমুনায় চালু অয়।
অইলে এরবাদেও আল্লাওয়ালা অউ ইহুদি জাতি আস্তে আস্তে হিরবার আল্লার এবাদত-বন্দেগি থাকি দুনিয়ার বায় ফিরিগেলা, ইমানর কমজুরি পয়দা অইলো। অউ বয়ানি হজরত মালাখি (আ:) নবীর ছহিফার লাখান, হজরত নহিমিয়া (আ:) নবীর ছহিফার মাজেও মিলে। তারার নাফরমানির মাজে দেখা যায়, কাফির-মুশরিকর লগে বিয়া-শাদি, না-হক পথে টেকা-পয়সার লেন-দেন, যকাতর টেকা-পয়সা পবিত্র বায়তুল-মুকাদ্দছো না দেওয়া আর রুহানি আমল-তালিমর বেয়াপারে খাম-খিয়ালি করা। আছমানি ছহিফা অকলর মাজদি মাবুদে তান বন্দা অকলরে যেলা হুশিয়ার করছইন, এর আখেরি হুশিয়ারি অইলো অউ মালাখি (আ:) ছহিফা। হজরত মালাখির (আ:) উফাতর বাদ থাকি, হজরত এহিয়া (আ:) আর হজরত ইছা আল-মসীয়ে তশরিফ আনার আগ পর্যন্ত, অনুমান চাইরশো বছর ই দুনিয়াত আর কুনু নবীর আওয়াজ হুনা গেছে না।
এরমাজে আছে,
(ক) বনি ইসরাইলর বায় মাবুদর মহব্বত। ১:১-৫ আয়াত
(খ) ইমাম অকলর নাফরমানি। ১:৬—২:৯
(গ) আম মানষর নাফরমানি। ২:১০—৩:১৮
(ঘ) মাবুদর বদলাইর দিন। ৪ রুকু।
1
1 মালাখি নবীর উছিলায় বনি ইসরাইলর গেছে মাবুদর ওহী।
বনি ইসরাইলরে আল্লার মহব্বত
2 ও বনি ইসরাইল, আমি মাবুদে কইরাম, আমি তো হামেশা তুমরারে মহব্বত করি।
অইলে তুমরা কইরায়, “তুমি কিলা আমরারে মহব্বত করলায়?”
তে হুনো, ইস কিতা ইয়াকুবর ভাই আছিল না নি? অইলে আমি তো তুমরার খান্দানর মুরব্বি ইয়াকুবরে মহব্বত করছি, 3 আর ইসরে হরাইয়া রাখছি। আমি তার পাড় অকল বিনাশ করছি, তার ভিটা-মাটি মরুভুমির হিয়ালর আখড়া বানাইছি।
4 ইসর আওলাদ ইদোমী অকলে কইতো পারে, “আমরারে চুরমার করা অইলেও আমরা ই চুরমার করা হকলতা হিরবার বানাইলিমু।”
অইলে আমি আল্লা রাব্বুল আলামিনে কইয়ার, তারা ইতা বানাইলেও আমি ভাংগিলিমু, ইখানরে কওয়া অইবো, ‘নাফরমানির দেশ, যে দেশর মানষর লগে মাবুদে হামেশা গুছা করইন।’
5 ই হালত তুমরার নিজর চউখে দেখিয়া কইবায়, “ইসরাইল দেশর সীমানার বারেও মাবুদর তাক্কত কাইম আছে।”
ইমাম অকলর গাফলতি
6 ও ইমাম অকল হুনো, আমি আল্লা রাব্বুল আলামিনে কইয়ার, পুয়াইন্তে তারার বাফরে ইজ্জত করইন, চাকরেও তারার মালিকরে ডরাইন। অউ লাখান আমি একজন মালিক অইলে, আমার বায় ডর-খফ কুয়াই? আর আমি একজন বাফ অইলে আমার পাওনা ইজ্জত কুয়াই? তুমরাউ তো আমারে বেইজ্জত করছো।
অইলে তুমরা হিরবার কইরায়, “আমরা কিলা তুমারে বেইজ্জত করলাম?”
7 তুমরা তো আমার কুরবানি খানার উপরে নাপাক কুরবানি দিরায়।
দিয়া কইরায়, “আমরার কুরবানি নাপাক অইলো কিলা?”
তুমরা বুজাইরায় মাবুদর কুরবানি খানা কুন্তাউ নায়। 8 আমি আল্লা রাব্বুল আলামিনে জিকাইরাম, কুরবানির নিয়তে তুমরা যেবলা আন্দা পশু লইয়া আও, ইতা কুনু ঠিক অয় নি? আর লুলা-লেংড়া, বেমারি পশু কুরবানি দেও, ইতা ঠিক নি? তুমরার দেশর রাজারে অউলা পশু উপহার দিয়া দেখোছাইন, তাইন খুশি অইন নি? আর তুমরার আবদার রাখইন নি?
9 হুনো, আল্লা রাব্বুল আলামিনে কইরাম, তুমরা আমার দরবারো রহমত মাংগিলে কুনু লাভ অইবো নি? তুমরা যেবলা নিজর আতেউ অলাখান কুরবানি দেও, তে আমি আর তুমরারে রহম করমু কিলা? 10 হায়রে হায়! তুমরার মাজে একজনেও যুদি আমার বায়তুল-মুকাদ্দছর গেইট খানাইন বন্দ করিলতো, তুমরা আমার কুরবানি খানার উপরে বেকামায়া আগুইন না জালাইতায়, তে আমি খুশি অইলাম অনে। অখন তো আমি মাবুদ তুমরার উপরে খুশি নায়, আর তুমরার আত থনে কুনু লিল্লা-ছদগাও কবুল করতাম নায়।
11 হুনো, আল্লা রাব্বুল আলামিনে কইয়ার, দুনিয়ার এক মাথা থাকি আরক মাথা পর্যন্ত তামাম জাতির মাজে আমার কুদরতি শান কাইম অর। তামাম জমিনো আমার নামে আগর-খুশবয় জালানি অর, মানষে পাক-ছাফ লিল্লা-ছদগা দিরা। হকল জাতির মাজেউ তো আমার শান-শওকত কাইম আছে।
12 অইলে তুমরা আমার নামরে বেইজ্জত কররায়। তুমরা তো কইরায়, “মাবুদর কুরবানি খানা কুন্তাউ নায়, ই কুরবানির কুনু দামউ নাই।” 13 আমারে বেইজ্জতির নিয়তে কইরায়, “ইতা তো খামোখা কষ্ট দেওয়া!”
তে আল্লা রাব্বুল আলামিনে কইয়ার, তুমরা ডাকাতি করা, আর লুলা-লেংড়া, বেমারি পশু আনিয়া কুরবানি দিরায়, আমি কুনু অতা কুরবানি তুমরার আত থনে কবুল করমু নি?
14 আমি আল্লা রাব্বুল আলামিনে কইয়ার, কেউরর পালর মাজে নিখুত মেদা পশু আছে, অগুরে কুরবানি করার লাগি হে নিয়তও করছে, অইলে বাদে টগামি করি কুনু খুত-আলা পশু মাবুদর নামে কুরবানি দেয়, তার উপরে লান্নত পড়উক! আমি তো মহান বাদশা, তামাম জাতিয়ে আমারে তাজিম করে।