24
1 বালাম পীরে যেবলা বুজলা, বনি ইছরাইলরে দোয়া দেওয়াউ অইলো মাবুদর ইচ্ছা, বুজিয়া তাইন আগর লাখান আর ইস্তেখারা-আজিরাতর চেষ্টা করলা না। বরং তান নিজর মুখ মরুভুমির বায় ফিরাইল্লা। 2 ফিরাইয়া দেখলা, বনি ইছরাইলর নানান খান্দানর তাম্বু এক এক করি টাংগানি অইছে। অউ সময় তান উপরে আল্লার রুহ লামিয়া আইলা, 3 তাইন আল্লার দেওয়া অউ ওহী কইলা,
“বাউরর পুত বালামে কইরা,
চউখ যার খুলা আছে এইন অউ বুলি কইরা।
4 যে জনে আল্লার কালাম হুনরা,
সর্ব-শক্তিমানর দিদার পাইরা,
যেইন সইজদাত পড়িয়া বাতুনি খবর দেখইন,
এইন অখান কইরা।
5 ও ইয়াকুব বংশ, তুমার তাম্বু অকল খুব চকচকা!
ও বনি ইছরাইল, তুমার রওয়ার জাগা কত ভালা!
6 ইতা তো দেখার মত বড় খেজুর বাগানর লাখান,
গাংগর পারর হাজাইল-পাড়াইল বনর লাখান,
মাবুদর লাগাইল আগরর গাছর লাখান তরতাজা,
পানির ধারর দেবদারু গাছর লাখান সুন্দর।
7 তারার ভরা কলসি থাকি পানি উথলিয়া পড়বো,
বিচি আর চেরায় বউত পানি পাইবো।
তারার বাদশা অইবা অগাগ বাদশা থাকিও হিম্মতি,
তারার দেশ অইবো নামকরা ইজ্জতি।
8 আল্লায় মিসর থাকি তারারে বার করি আনছইন,
তাইন অইলা তারার পক্ষে বলআলা জংলি বয়রা,
তারার লগে যত জাতিয়ে লাগবা,
ইতারে তারা গিলিয়া খাইলিবা,
তারার আড্ডি-গুড্ডিরে গুড়া গুড়া করবা,
তীর-ধনুকদি তারারে গাথিবা।
9 সিংহর লাখান তারা খাপ ধরি হুতিবো,
তারারে লাড়ানির সাওস অইবো কুন বেটার?
তুমরারে যেরা দোয়া দিবা,
এরার উপরে দোয়া লামউক;
তুমরারে যেতায় লান্নত দিবা,
ইতার উপরে লান্নত পড়উক।”
10 ইতা হুনিয়া বাদশা বালাকে বালাম পীরর উপরে গুছায় আগুইন অইগেলা। তান নিজর আতর পিঠিত তাবড়াই তাবড়াই কিড়িমিড়ি খাইয়া কইলা, “আমি আপনারে আনাইলাম আমার দুশমনরে লান্নত দিবার লাগি, আর আপনে তারারে অউ লাগাইয়া তিন-তিনবার দোয়া দিলা। 11 আপনে আমার ছামন থাকি হরউক্কা, নিজর জাগাত যাউক্কা। আমি আপনারে বউত পুরুস্কার দিমু কইছলাম, অইলে মাবুদে দিলা না।”
12 তেউ বালাম পীরে বাদশা বালাকরে কইলা, “আপনার পাঠাইল মানষরে আমি আগেউ কইছি না নি, 13 বাদশায় যুদি সোনা-রুপায় ভরা তান আস্তা রাজবাড়ি খানউ আমারে দিলাইন, তেবউ আমি আমার নিজর ইচ্ছায় ভালা-বুরা কুন্তা করতাম পারতাম নায়, আমি মাবুদর বিরুদ্ধে যাইতাম নায়। মাবুদে আমারে যেলা হুকুম দিবা, আমি খালি অলাউ কইমু। 14 তে আমি অখন আমার মানষর গেছে ফিরত যাইরামগি, অইলে অউ জাতিয়ে ভবিষ্যতে আপনার জাতির লগে কিতা কিতা করবা, আপনার হুশিয়ারির লাগি ইতা আগাম জানাই দিয়ার।”
বালাম পীরর মুখো আল্লার চৌতা ওহী
15 বালাম পীরে আল্লার দেওয়া অউ আরক ওহী কইলা,
“বাউরর পুত বালামে কইরা,
চউখ যার খুলা আছে এইন অউ বুলি কইরা,
16 যে জনে আল্লার কালাম হুনরা,
যেইনর গেছে আল্লাতালার আখল-হেকমত আছে,
যেইন সর্ব-শক্তিমানর দিদার পাইরা,
যেইন সইজদাত পড়িয়া বাতুনি খবর দেখইন,
এইন অখান কইরা।
17 আমি তো হউ জনরে দেখিয়ার,
অখন ছামনে না থাকলেও দেখিয়ার।
তাইন আমার কাছাত না অইলেও,
আমার চউখ গিয়া তান উপরে পড়ছে।
ইয়াকুবর বংশত আইবা আছমানর এক তেরা,
বনি ইছরাইলর মাজেউ এক রাজ-লাঠি জন্মিবা।
এইন মোয়াব জাতির মাথা ফাটাইয়া দুই টুকরা করবা,
শিস নবীর আওলাদর কল্লা চুরমার করবা।
18 ইদোম দেশরে এনর দখলো আনবা,
তান দুশমনর অউ সেয়ীর পাহাড়রে কবজা করবা,
আর বনি ইছরাইল জাতিয়ে পয়লোয়ানি করবা।
19 ইয়াকুবর বংশর একজনে রাজ-গদি চালাইবা,
ঈর টাউনো যারা জিন্দা রইবা এইন তারারেও বিনাশ করিলিবা।”
20 অখনাইন কওয়ার বাদে বালাম পীরে চউখ মেলিয়া আমালেকী অকলরে দেখলা। দেখিয়া আল্লার অউ ওহী কইলা,
“আমালেক তো হকল জাতির মাজে আছিল পরধান,
অইলে তারার শেষ দশা অইবো সর্বনাশ।”
21 বাদে তাইন কেনী অকলরে দেখলা, দেখিয়া আল্লার অউ ওহী কইলা,
“তুমরার বসত খানা খুব মজবুত,
তুমরা তো পাথরর পাহাড়ো বাসা বানাইছো,
22 অইলে আগেদি তুমরার বিনাশ ঘটিবো,
তুমরারে বান্দিয়া আশিরিয়া দেশো নেওয়া অইবো।”
23 বাদে বালাম পীরে আল্লার দেওয়া অউ শেষ ওহী কইলা,
“হায়রে হায়! আল্লায় যেবলা অতা ঘটাইবা,
অউ সময় কেউ আর জিন্দা রইবো নি?
24 সাইপ্রাস দ্বীপর জাজ অকল আইবো,
আইয়া আশিরিয়ারে দুর্দশা দিবো,
আবেরর মানষরেও দমাইবো,
অইলে অউ দ্বীপ নিজেও বাদে বিনাশ অইযিবো।”
25 অখান কইয়া হারি বালাম পীর উঠিয়া নিজর ঘরো গেলাগি, বালাক বাদশাও তান পথে রওয়ানা দিলা।