1 লান্নতি অউ গজব থামি যাওয়ার বাদে মাবুদে মুছা আর ইমাম হারুনর পুয়া আলি-আজররে কইলা, 2 “বনি ইছরাইলর মাজে যেরার বয়স বিশ বছর বা এর বেশি, মানি যুদ্ধ করার যোইগ্য যেরা অইগেছে, এরারে যারযির গুষ্টি মাফিক গনো।” 3 এরলাগি যিরিহো টাউনর উল্টাবায় জর্দান গাংগর পারো মোয়াব দেশর যে তল জাগা আছে, হনো মুছা নবীয়ে আর ইমাম আলি-আজরে নেতা অকলরে কইলা, 4 “মাবুদে মুছা নবীরে যেলা হুকুম করছইন, অউলা তুমরা বিশ বছর বা এর বেশি বয়সি হকল বেটাইন্তরে গনো।” তেউ মিসর দেশ থাকি বনি ইছরাইলর যত বেটাইন বার অইয়া আইছলা, গনার সময় এরার বংশধরর নাম লেখা অইলো। এরা অইলা:

5 ইয়াকুব উরফে ইছরাইলর বড় পুয়া রুবেনর চাইরো পুয়ার বংশধর: রুবেনর বড় পুয়া হনোক থাকি হনোকী বংশ, ফালু থাকি ফালুয়ী বংশ, 6 হাছির থাকি হাছিরী বংশ, আর কর্মি থাকি কর্মিয়া বংশ। 7 এরা হকলউ রুবেন খান্দানর নানান বংশ। এরার মাজ থাকি গনিয়া তেতাল্লিশ আজার সাতশো তিশ জনরে পাওয়া গেলো। 8 ফালুর পুয়ার নাম ইলিয়াব, 9 ইলিয়াবর পুয়াইন অইলা নমুয়েল, দাথন আর আবিরাম। দাথন আর আবিরাম বনি ইছরাইলর দুইজন নেতা আছলা, তারা মুছা আর হারুনর বিপক্ষে লাগলা। আর কুরাহর দল যেবলা মাবুদর বিরুদ্ধে আছিল, অউ সময় এরাও কুরাহর দলো আছলা। 10 কুরাহর লগে অউ দুইজনরেও মাটিয়ে আ করি গিলিলিছিল আর তার দলর আড়াইশো জন আগুইনে জলিয়া মরছিল। ইতা বনি ইছরাইলর লাগি হুশিয়ারির নিশানা অইয়া রইলো। 11 অইলে কুরাহর পুয়াইন হি সময় মরছইন না, তারার বংশ জারি রইছে।

12 ইয়াকুবর পুয়া শিমিয়নর বংশধর অইলা, নমুয়েল থাকি নমুয়েলী বংশ, যামীন থাকি যামীনী বংশ, যাখীন থাকি যাখীনী বংশ, 13 জারাহ থাকি জারাহী বংশ আর শৌল থাকি শৌলী বংশ। 14 ইতা শিমিয়ন খান্দানর নানান বংশ। এরার মাজ থাকি গনিয়া বাইশ আজার দুইশো জন পাওয়া গেলো।

15 ইয়াকুবর পুয়া ছাদুর বংশধর অইলা, ছিফন থাকি ছিফনী বংশ, হগি থাকি হগিয়া বংশ, শূনি থাকি শূনিয়া বংশ, 16 ওজনি থাকি ওজনিয়া বংশ, এইরি থাকি এইরিয়া বংশ, 17 অরোদ থাকি অরোদী বংশ, আর অরেলি থাকি অরেলিয়া বংশ। 18 এরা অইলা ছাদু খান্দানর নানান বংশ। এরার মাজে গনা মানুষ অইলা চাল্লিশ আজার পাচশো জন।

19 ইয়াকুবর পুয়া এহুদার দুই পুয়ার নাম আছিল এইর আর ওনন, কেনান দেশো থাকার কালো এরা মারা গেছিল। 20 অইলে এহুদার আরো পুয়াইন আছলা, এরার বংশধর অইলা, শেলা থাকি শেলায়ী বংশ, ফিরোজ থাকি ফিরোজী, জারাহ থাকি জারাহী বংশ। 21 ফিরোজর বংশধর অইলা হাছির থাকি হাছিরী বংশ আর হামুল থাকি হামুলী বংশ। 22 এরা হকলউ এহুদা খান্দানর নানান বংশ। এরার মাজ থাকি গনিয়া ছিয়ত্তইর আজার পাচশো জনরে পাওয়া গেল।

23 ইয়াকুবর পুয়া ইছাখরর বংশধর অইলা, তোলা থাকি তোলায়ী বংশ, ফওয়া থাকি ফওয়াই বংশ, 24 যাশুব থাকি যাশুবী বংশ আর শিমরন থাকি শিমরনী বংশ। 25 এরা হকল ইছাখর খান্দানর নানান বংশ। এরার মাজ থাকি গনিয়া চৌষট্টি আজার তিনশো জনরে পাওয়া গেল।

26 ইয়াকুবর পুয়া সবুলনর বংশধর অইলা ছেরেদ থাকি ছেরেদী বংশ, এলন থাকি এলনী বংশ আর যহলেল থাকি যহলেলী বংশ। 27 এরা হকল সবুলন খান্দানর নানান বংশ। এরার মাজ থাকি ষাইট আজার পাচশো জনরে পাওয়া গেলো।

28 ইয়াকুবর পুয়া ইউছুফর পুয়াইন অইলা মানশা আর আফরাইম। 29 এরার মাজে, মানশার বংশধর অইলা, মাখীর থাকি মাখীরী বংশ, আর মাখীরর পুয়া গিলিয়দ থাকি গিলিয়দী বংশ। 30 গিলিয়দর বংশধর অইলা ইয়াজির থাকি ইয়াজিরী বংশ, হেলক থাকি হেলকী বংশ, 31 অছরিয়েল থাকি অছরিয়েলী বংশ, শেখম থাকি শেখমী বংশ, 32 শিমিদা থাকি শিমিদায়ী বংশ আর হেফর থাকি হেফরী বংশ। 33 হেফরর পুয়া জলাপখাদ, তার কুনু পুয়াইন আছলা না, খালি পুড়িন আছলা। পুড়িন্তর নাম অইলো, মহলা, নোয়া, হগলা, মিলকা আর তিরজা। 34 এরা হকলউ মানশা খান্দানর নানান বংশ। এরার মাজ থাকি গনিয়া বায়ান্ন আজার সাতশো জনরে পাওয়া গেল।

35 ইয়াকুবর পুয়া আফরাইমর বংশধর অইলা, শুথলহ থাকি শুথলহী, বেখর থাকি বেখরী আর তহন থাকি তহনী বংশ। 36 শুথলহর বংশ, এরন থাকি এরনী বংশ। 37 এরা হকল আফরাইম খান্দানর নানান বংশ। এরার মাজ থাকি গনিয়া বত্তিশ আজার পাচশো জনরে পাওয়া গেল। খান্দান হিসাবে এরা হকলউ ইউছুফর বংশধর।

38 ইয়াকুবর পুয়া বিন-ইয়ামিনর বংশধর অইলা, বেলা থাকি বেলায়ী বংশ, অশবেল থাকি অশবেলী বংশ, আহিরাম থাকি আহিরামী বংশ, 39 শুফম থাকি শুফমী বংশ, আর হুফম থাকি হুফমী বংশ। 40 বেলার পুয়াইন অর্দ আর নামানর মাজদি বেলার বংশধর অইলা, অর্দ থাকি অর্দী বংশ আর নামান থাকি নামানী বংশ। 41 এরা বিন-ইয়ামিন খান্দানর নানান বংশ। এরার মাজ থাকি পয়তাল্লিশ আজার ছয়শো জনরে পাওয়া গেল।

42 ইয়াকুবর পুয়া দানর বংশধর অইলা, শুহম থাকি শুহমী বংশ। এরাউ আছলা দান খান্দানর মানুষ। 43 এরার মাজ থাকি গনিয়া চৌষট্টি আজার চাইরশো জনরে পাওয়া গেল।

44 ইয়াকুবর পুয়া আশিরর বংশধর অইলা, ইমনা থাকি ইমনায়ী বংশ, যিছবি থাকি যিছবিয়া বংশ আর বরিয়া থাকি বরিয়ায়ী বংশ। 45 বরিয়ার বংশধর অইলা হেবর থাকি হেবরী বংশ, আর মল্কিয়েল থাকি মল্কিয়েলী বংশ। 46 আশিরর পুড়ির নাম আছিল ছেরা। 47 এরা হকলউ আশির খান্দানর নানান বংশ। এরার মাজ থাকি গনিয়া তেপ্পান্ন আজার চাইরশো জনরে পাওয়া গেল।

48 ইয়াকুবর পুয়া নপ্তালির বংশধর অইলা, যহসিয়েল থাকি যহসিয়েলী বংশ, গুনি থাকি গুনিয়া বংশ, 49 ইজের থাকি ইজেরী বংশ, আর শিল্লেম থাকি শিল্লেমী বংশ। 50 এরা হকলউ নপ্তালি খান্দানর নানান বংশ। এরার মাজ থাকি গনিয়া পয়তাল্লিশ আজার চাইরশো জনরে পাওয়া গেল।

51 তে গনার বাদে বনি ইছরাইলর মাজে যুদ্ধত যাওয়ার জুকা বেটাইন্তর পরিমান অইল, মোট ছয় লাখ এক আজার সাতশো তিশ জন।

52 মাবুদে মুছারে কইলা, 53 “গনা অউ মানুষ মাফিক আস্তা দেশর জমিন বাটিয়া দিতে অইবো, যাতে হকলে যারযির বাট পায়। 54 যে খান্দানর মানুষ বেশি অউ খান্দানরে বেশি আর যে খান্দানর মানুষ কম, অউ খান্দানরে কম জাগা দিবায়। পরতেক খান্দানর মানষে তার মানুষ হিসাবে জাগা-জমিন পাইবো। 55 আর কুন খান্দানে কুন জাগাত জমিন পাইবো, ইতা লটারি মারিয়া ঠিক করা অইবো। পরতেক বংশর পাওনা অংশ তার খান্দানর নামে দেওয়া এলাকার মাজেউ থাকবো। 56 খান্দানর মানুষ কম বা বেশি যেটাউ অউক, লটারি মারিয়া জাগা ঠিক করা অইবো।”

57 হকল হেশে লেবি খান্দানর বংশধর গনা অইলো। এরা অইলা, জারছুন থাকি জারছুনী গুষ্টি, কাহাত থাকি কাহাতী গুষ্টি আর মারারি থাকি মারারিয়া গুষ্টি। 58 লেবি খান্দানর কিছু নামকরা পরিবার আছিল, এরার মুল বাফর নাম অইলো লিবনি, হেবরন, মহলি, মুশি আর কুরাহ।

কাহাতর এক পুয়ার নাম আছিল ইমরান। 59 ইমরানর বউর নাম ইউখাবেজ, মিসর দেশো থাকতে লেবি খান্দানর মাজে এন জনম অইছিল। এন পেট থাকি ইমরানর পুয়াইন হারুন আর মুছা আর তারার বইন মরিয়মর জনম অইছিল। 60 হারুনর পুয়াইন অইলা নাদাব, আবিহু, আলি-আজর আর ইছামার। 61 অইলে মাবুদর হুকুম ভাংগিয়া দুছরা আগুইন দিয়া এবাদত করাত গিয়া নাদাব আর আবিহু অউ দুই জনর মরন অইছিল।

62 একমাস বা এর বেশি বয়সর লেবি খান্দানর বেটাইন্তর পরিমান আছিল তেইশ আজার। বনি ইছরাইলর ভিতরে এরারে কুনু জাগার মালিকানা দেওয়া অইছে না গতিকে বনি ইছরাইলর অইন্যান্য খান্দানর লগে এরারে একলগে গনাও অইছে না।

63 যিরিহো টাউনর উল্টাবায় জর্দান গাংগর ধারো মোয়াবর তল জাগাত দুছরা বার মানুষ গনার সময় মুছা নবী আর ইমাম আলি-আজরে বনি ইছরাইলরে গনলা। 64 অইলে পয়লা বার সিনাই মরুভুমিত মুছা আর ইমাম হারুনে বনি ইছরাইলর যারারে গনিছলা, অউ দুছরা বার গনার সময় এরার মাজর একজনও জিন্দা রইছইন না। 65 আসলে অতা বনি ইছরাইলর বেয়াপারে মাবুদে আগেউ কইছলা, তারা নিচ্চয় অউ মরুভুমিত মারা যাইবা। আর হাছাউ খালি যিফুন্নির পুয়া কালুত আর নূনর পুয়া ইউছা ছাড়া তারার মাজর দুছরা কেউ জিন্দা রইছিল না।