আল-জবুর ১৩
এবাদত-বন্দেগি পরিচালকর লাগি: হজরত দাউদর মিজমর।
1 ও মাবুদ, আর কতদিন? তুমি আমারে চিরকালউ ফাউরিয়া রইতায় নি?
তুমার পবিত্র মুখ খান আর কতদিন আমার গেছ থাকি লুকাই রাখতায়?
2 আর কতদিন আমি মনর চিন্তার ভার,
দিলর কষ্টর বোঝা পরতিদিন সইতাম নি?
আমার দুশমন অকল কতদিন আমার উপরে নাচিতো?
3 ও আল্লা, আমার বায়দি চাও, মাবুদ গো, আমার মিনতির জুয়াপ দেও,
আমার চউখো বল-রুশনি দেও, আরনায় আমি হয়তো আখেরি ঘুমো পড়িযিমু।
4 বাদে দুশমনে কইবা, “অখন তো আমরা জিতি গেছি,”
আর আমি অসহায়-মাজুর বনিগেলে আমার বিরুধি অকলে তো ফুর্তি-আমোদ করবা।
5 অইলে আমি ভরসা করি তুমার দয়ার উপরেউ,
তুমি জান বাচাইবায়, অতার লাগি আমার দিল খুশিয়ে ভরিগেছে।
6 আমি মাবুদর নামে গজল গাইমু,
আমার ভালাই তো তাইনউ করছইন॥