আল-জবুর ২০
এবাদত-বন্দেগি পরিচালকর লাগি: হজরত দাউদর মিজমর।
1 মছিবতর সময় মাবুদে তুমার ফরিয়াদ হুনউক্কা,
ইয়াকুবর আল্লার নাম তুমারে ছহি-ছালামতে রাখউক্কা।
2 তান পাক মোকাম থাকি তুমার লাগি সাইয্য পাঠাউক্কা,
পবিত্র ছিয়ন থাকি তুমারে বল-তাক্কত দেউক্কা।
3 তাইন তুমার হকল লিল্লা-ছদগারে মনো রাখউক্কা,
কবুল করউক্কা তুমার জালাইল কুরবানি।
(ছেলা)
4 তুমার দিলর আরজিরে কবুল করউক্কা,
মনর আশা অকল পুরন করউক্কা।
5 তুমি জয়ী অইলে আমরা খুশি-বাসির গজল গাইমু,
আমরার আল্লার নামে ঝান্ডা উড়াইমু,
মাবুদে তুমার হকল মিনতি পুরন করউক্কা।
6 আমি তো অখন জানিউ,
মাবুদে তান নিজর খেলাফতি পাওয়া জনরে বাচাইবা।
তান আপন ডাইন আতর বল-তাক্কতে যুদ্ধত জিতাইবা,
নিজর পবিত্র আরশ থাকি এন মিনতি হুনবা।
7 কেউরর ভরসা অইলো তার যুদ্ধর রথ,
আর কেউরর ভরসা তার ঘোড়াইন্তর উপরে,
আমরার ভরসা খালি আমরার আল্লা মাবুদর উপরে।
8 তারা তো উন্দা অইয়া লেটিযাইন,
অইলে আমরা সিধা অইয়া হামেশা খাড়া রই।
9 ও মাবুদ, বাদশারে জয়ী করউক্কা,
আমরার ডাক হুনিয়া জুয়াপ দেউক্কা॥