আল-জবুর ৭০
এবাদত-বন্দেগি পরিচালকর লাগি: হজরত দাউদর ইয়াদগারির মিজমর।
1 ও আল্লা, তুমার দোহাই দিয়ার আমার জান বাচাও,
মাবুদ গো, আমারে সাইয্য করাত জলদি আও।
2 আমার জানরে যেতায় নিতা চাইরা,
নিচা অউক তারার মাথা শরমিন্দা বনিয়া,
আমার খেতি অইলে যেতায় করবা খুশি,
বেইজ্জত বনিয়া তারা বাগি যাউক খরেদি।
3 আমার খেতিয়ে যেতায় কইন, অইছেরে অইছে,
মুখ লুকাইয়া হরউক অতা নিজর লাজ-শরমে।
4 অইলে খুশি-বাসি করউক তুমার আশিক বন্দার দলে,
তুমার দেখাইল বাচার পথ ভালা পাইন যেতা জনে,
হর-হামেশা জপি জপি ফুর্তি করউক তারা,
তুমিউ মহান মউলা, তুমিউ মহান আল্লা!
5 দুখি কাংগাল জন তো আমি বড়ই অভাবি,
আমার কাছাত জলদি আও মাবুদ এলাহি।
তুমিউ মোর সাইয্যকারি জান বাচানির ঠিকানা,
আমারে বাচাও গো মালিক দেরি করিও না॥