আল-জবুর ৯৮
1 মাবুদর নামে গীত-গজল গাও নয়া নয়া,
তাইন তো করছইন তাইজ্জুবি কাম যততা।
নিজর ডাইন আতর কুদরতি বল দিয়া,
করছইন কতো আচানক জয়র লিলা-খেলা।
2 মাবুদ তান উদ্ধার কাম জানাইছইন হকলরে,
তান হক কাম দেখাইছইন জাতি অকলর চখুর ছামনে।
3 তান দয়া-মায়া আর হক-হালালি,
ইয়াদ রাখছইন বনি ইছরাইলর লাগি,
দেখিছে জগতর হেশ সীমানার মানষে,
আমরার মাবুদর উদ্ধার করা কামরে।
4 ওরে জগতবাসি গাও খুশির গান মাবুদর নামে,
বাইদ্য-বাজনার তালে তালে জুরে জুরে,
তান গুনগান গাও তুমরা বড় গলায়ে।
5 বীনা-বেহালা বাজাইয়া তালে তালে গাও গান,
মাবুদর তারিফ করি গজল-গান গাও তান।
6 তুমরা জুরে জুরে চুংগা আর শিংগা বাজাইয়া,
আল্লা মালিকর ছামনে গাও খুশি করিয়া।
7 তান তারিফে গর্জিয়া উঠউক বড় গলায়,
দরিয়া আর তার মাজর হকলতায়,
এরলগে ফুর্তি করো জগতর সব বাসিন্দায়।
8 গাংগ অকলে খুশি করো আতর তালি দিয়া,
ফুর্তি করো একলগে পাহাড়-পর্বত মিলিয়া।
9 মাবুদর ছামনে গাও খুশিয়ে গলা ফাটাইয়া,
দুনিয়ার বিচার করাত স্বয়ং মাবুদ আইরা,
হক বিচার করবা তাইন হক-হালাল রইয়া,
হকল জাতির বিচার করবা হক-ইনছাফ দিয়া॥