2 O bai oḳol, tumra amar deoa talim mono rakia solrae, ar hoḳol befareu amare iad raḳrae, erlagi ami tumrar tarif ḳoriar. 3 Te ami sairam, tumra oḳan buzo, al-Mosiu oila hoḳol beṭaintor mata, beṭain oila beṭintor mata, ar Alla Pak oila al-Mosir mata. 4 Ebadot-bondegir shomoe ze beṭae mata guria dua-munazat ḳore, ba firaki mate, he to tar matare oshomman ḳore. 5 Olaḳan ze beṭie mata na guria dua-munazat ḳore, ba firaki mate, ou beṭieo tair matar oshomman ḳore, tai mata ḳamail beṭintor laḳan bonizae. 6 Kunu beṭie zudi mata na gure, te tair sul ḳamailauk. Oile beṭintor sul ḳamani shoromor bishoe mono oile, tair mata guria raḳouk. 7 Ebadot-bondegir shomoe mata guria raḳa beṭaintor lagi ṭik nae, Allae to beṭaintore tan nizor surote foeda ḳorsoin ar beṭaintor mazdiu Allar mohima zair oe, oile beṭintor mazdi beṭaintor mohima zair oe. 8 Foela beṭa manush Baba Adom to beṭi taki foeda oisoin na, oile foela beṭi manush mai Haoa nichchoe beṭa takiu foeda oisoin. 9 Ar beṭintor lagi beṭain foeda oisoin na, borong beṭaintor lagiu beṭin foeda oisoin. 10 Ou talim mafik firista oḳolor ḳota kial rakia, tabedari manar nishana hishabe hoḳol beṭinte mata guria raḳa zorur. 11 Ta-o malik Isar torikar beṭi manshe goror beṭar ufre borosha ḳoroin, ar beṭaeo ola beṭir ufre borosha ḳoroin. 12 Ḳaron, foela beṭa Adom taki zudio foela beṭi mai Haoa foeda, ta-o beṭin takiu hirbar beṭaintor zonom oe. Ashole hokkoltau to Allar foeda.

13 Tumra nizeu bisar ḳori deḳo, matat ḳafoṛ na dia kunu beṭie dua-munazat ḳora ṭik ni? 14 Ar shomazor hal-sal takiu to buza zae, beṭaintor matat lamba sul raḳa shoromor befar, 15 oile beṭinte lamba sul raḳle tarar shunam baṛe na ni? Nizore guria raḳar lagiu to tara i lamba sul faisoin. 16 Te ita loia ḳeu torko-bitorko ḳorle, amar forishkar zuaf oilo, ita saṛa dusra kunu niom amrar maze nai ar Allar zomator mazeo nai.

17 Oḳon ami ze befare foramish ditam sairam, i befare to tumra muṭeu tarif faoar zuka nae. Tumra zomato zela shorik o, itae tumrar kunu faeda oe na, borong ḳeti oe. 18 Ami huniar, tumra zebla zomato shorik o, ou shomoe tumrar maze doladoli taḳe, ar ita kisu ami bishasho ḳori. 19 Ashole to tumrar maze motor omil taḳbou, zate tumrar mazor ḳaṭi nikut manshor forisoe mile. 20 Huno, tumra zebla eḳano milia ebadot-bondegi ḳoro, ou shomoe to al-Mosir mezbanir niote ḳani bilani oe na. 21 Ḳaron tumra eḳzone aroḳzonor bae kial na ḳoriau ḳani ḳailao. Tumrar eḳzonor feṭo buk taḳe, ar aroḳzon ḳaia ṭal oizae. 22 Ḳana-fina ḳaibar lagi tumrar kunu gor-baṛi nai ni? Tumra ichcha ḳoria Allar zomatre elami ḳorrae ni? Ar zerar ḳanir kunta nai, tarare shorom dirae ni? Oḳon ami ar kita ḳoitam? Tumrar tarif ḳortam ni? Nauzubilla!

23 Ashole ami malik Isar ges taki ze talim faisi, ou talimu ami tumrare disi. Malik Isare ze rait dushmonor ato dorai deoa oisil, hou rait tain ḳanir ruṭi ato loila, 24 ar Allar shukria adae ḳorla, bade ou ruṭi ṭukraia ḳoila, “Ita to amar shoril, ou shoril tumrar lagi bilai deoa or, te amare mono raḳar lagi oula ḳorio.” 25 Ola ḳaoar bade tain shorbotor fiala loia ḳoila, “Amar lour zoriae Allar loge milonor ze noea usilla ḳaim oibo, ou fiala oilo er nishana. Tumra ou fiala taki ḳaoar shomoe amare iad ḳorar lagi hamesha ola ḳorio.” 26 Te tumra zotobar ou ruṭi ḳaibae ar ou fialar shorbot ḳaibae, malik Isa hirbar na aoa forzonto otobaru tan moutor ḳota elan ḳorrae.

27 Erlagi ḳam-ḳeali ḳoria ḳeu zudi i ruṭi ḳae ar fialar shorbot ḳae, te he malik Isar shoril ar lour birudde guna ḳoria dushi bonizae. 28 Ou ruṭi ḳaibar age ar fialar shorbot ḳaibar age, manshe nizore zasai ḳori deḳouk. 29 Ḳaron ita ḳaoar shomoe he zudi malik Isar shorilor befare na buze, te ita ḳaia he nizor ufre gozob ḍakia ane. 30 Otar lagiu tumrar mazor bout manush ḳomzur ar bemari asoin, emonki ḳeu ḳeu morsoin. 31 Amra nizor bisar nize ḳorille, malikor ator bisar taki rehai faimu. 32 Oile malike zebla amrar bisar ḳoroin, ou shomoe tain amrare shashon ḳoroin, zate duniar hoḳolor loge aḳerator din amrare dushi shaibosto ḳora na oe.

33 Erlagi O bai oḳol, tumra zebla mezbani ḳaoar lagi eḳano dola o, ou shomoe eḳe-oinnor bae kial ḳorio. 34 Eḳzonor zudi feṭo buk lagizae, te he baṛi taki ḳaia auk, zate tumra eḳano oae kunu shaza na fao. Te ami zebla tumrar gese aimu, ou shomoe bad-baki befare nosiot ḳormu.