Fobitro Injil Shorif 13 nombor sifara
Foyla Tisholonikia
Forisiti
Alla Pakor hukume ou sifara leḳsoin, Hozrot Isa al-Mosir sahabi Hozrot Paulus (ra:). Hozrot Isae behesto toshrif neoar onuman 17 bosor bade Tisholoniki zomator gese ou foyla bar siṭir aḳare ikan leḳa oise. Tisholoniki asil Makidonia deshor razdani. Hozrot Paulus ḳoyeḳ hafta ou zagat asla, tan loge asla Timoti namor eḳ imandar. Ou ṭauno Hozrot Isar ummot oḳlor eḳ zomat oisil, Hozrot Timotie ou zomator deḳa-huna ḳorta (Sahabi Nama 17 ruku deḳba).
Zulumor lagi Hozrot Paulus i zaga taki horia zaoar bade Hozrot Timotie ou zomator hal-hokikot tanre zanaisoin, zania tain i sohifa leḳsoin. I sifarar 4 ruku 14 ayato ase, “Hozrot Isae dusrabar toshrif anle, Isar ufre iman ania zerar mout oise, Allae tarare-o Isar loge milon ḳoria tan loge niba.” Otar lagi tarare shaosh deoa or.
Ermaze ase,
(1) Tisholoniki zomator iman 1:1-10 ayat
(2) Tisholoniki ṭauno Hozrot Paulusor agor sofor 2:1-16
(3) Tisholonikir muminre hirbar deḳar kial 2:17—3:13
(4) Shorilre fobitro rakia hushiar ro 4:1-12
(5) al-Mosi dusrabar aibar hal-hokikot 4:13—5:11
(6) Kuṛiami bad dia nek kam ḳoro 5:12-28
1
1 Ami Paulus, bai Silas ar Timotie Tisholoniki ṭaunor zomator gese leḳram. Tumra amrar gaibi baf Alla Pak ar Hozrot Isa al-Mosir afon zon oiso. Tumrar ufre rohomot ar shanti nazil ouk.
Tisholoniki zomator iman
2 Amra dua ḳorar bala hamesha tumrar zomator hoḳlor nam mono ḳoria Allar shukria adae ḳori. 3 Imanor lagi tumra ze ḳam ḳorrae, mohobbotor lagi tumra ze menot ḳorrae ar Hozrot Isa al-Mosir ufre asha-borosha ḳoria tumra ze sobor ḳorrae, ita amrar gaibi baf Allar dorbaro dua ḳorar shomoy hamesha mono ḳori.
4 O bai oḳol, Allar mayar bonda oḳol, amra zani, Allae-u tumrare fosond ḳorsoin. 5 Amrar kush-ḳobrir toblig kam to tumrar gese ḳali mukor ḳota-u roise na, borong Allai bol, Pak Ruhu, ar nichchit boroshar ufre salu oise. Tumrar balair lagi amra zebla tumrar loge roitam, ou shomoy kilan solchi, ita to tumra zano-u. 6 Tumra bout zulum-mosibotor maze-o Pak Ruhur deoa kushie amrar toblig kobul ḳoria, amrar ar malikor fote solrae. 7 Oula solia tumra Makidonia ar Gris deshor mumin oḳlor gese eḳ nishana oigeso. 8 Malikor kalam tumrar mazdi kali Makidonia ar Gris desho-u sitrise na, borong Allar ufre tumrar imanor ḳota hoḳol zagat-u sitrigese. I befare amra kunta matar zorur nae. 9 Hoḳol manshe-u to amrare ḳoira, tumra ḳoto ador ḳoria amrare kobul ḳorsilae, tara eoḳan ḳoira, tumra kila deb-debintor puja bad dia Allar foti oia, zinda hok Allar ebadot ḳorat aiso. 10 Ar murda oḳlor maz taki zenre zinda ḳori tula oise, hou Isa duniat aoar bar saitae faro. Tain oila Allar ḳas mayar zon Ibnulla, behest taki lamia aira, Allar ze gozob aia lamer, i gozob taki ou Isae amrare basaiba.