1 Hi shomoe ummot oḳolor foriman baṛteu asil, ar ummot oḳolor maze zeta Ihudi oḳole Iunani bashae matta, tara Ibrani bashae matra Ihudi oḳolor loge ḳaijja ḳorta lagla. Tara dush deḳaila, forteḳ din ḳani bilanir shomoe tarar ṛaṛi beṭinte kunta fain na. 2 Teu hou barozon sahabie hoḳol ummotre eḳ zagat dola ḳoria ḳoila, “Amra Allar kalamor toblig bad dia, ḳana-finar befare besto oaḳan ṭik nae. 3 Oile bai oḳol, tumrar maz taki oula shatzon shunamala manshore fosond ḳoro, zera Pak Ruhe ar hekmote fura kamiab ase, amra tarar ufre i ḳamor zimma dilaimu. 4 Ar amra kalamor ḳezmot ar dua ḳorar ḳamo ḳaim roimu.” 5 Teu hokkol manush shanti oila, tara Pak Ruh ar imane kamil Stifanre fosond ḳorla, tan loge Filif, Foḳor, Nikanor, Timun, Farmina ar Antiokia ṭaunor noea Ihudi Nikulaere basia nila. 6 Bade tara ou shatzonre sahabi oḳolor gese loia aile, sahabi oḳole dua ḳoria tarar ufre at raḳla.

7 Ar Allar kalam sitria sairobae fosigelo, teu Zeruzalemo ummotor foriman kub zoldi ḳori baṛto laglo, Ihudi imam oḳolor mazeo bout zone al-Mosir ufre iman anla.

8 Stifan Allar rohomot ar himmote kamil oia, manshor maze bout keramoti ar muzeza ḳam ḳorta lagla. 9 Ihudir ze mosidre azad-oa gulam oḳolor mosid ḍaḳa oito, hou mosidor ḳoezon manush, kunu kunu Kurini, Alekzandria, Kilikia ar Asiya deshor kisu manshe Stifanor loge ḳaijja-torko ḳorat lagla. 10 Oile Stifane Pak Ruhur bole kub aḳoldar manshor laḳan tarar loge matae, tara tan loge matia kulaito farsil na. 11 Teu tara ḳoezon baze manshore gush dia oḳan hikai dilo, “Tumra ḳoio, amra hunchi ou beṭae Hozrot Musa ar Allar birudde kufuri mat mater.” 12 Ota ḳori tara manshore, murobbi oḳolre, ar alim shomazre Stifanor birudde bigṛailo, ar tanre zobordosti ḳori doria deshor fotua komiṭir samne bisaro anlo. 13 Ar misa shakki oḳole ḳoila, “Ou beṭae hamesha Musar shoriotor birudde ar ou fobitro mukamor biruddeo mate. 14 Amra hunchi he ḳor, hou Nasarotor Isae i Baetul-Mukaddos bangilibo ar Musa nobie amrar lagi ze shoriot toia gesoin, ita bodlailibo.” 15 I shomoe zera fotua komiṭit boat asla tara hoḳole dian dori Stifanor bae saia deḳla, tan muk firistar mukor laḳan oigese.