Fobitro Injil Shorif 12 nombor sifara
al-Kolosia
Forisiti
Fobitro asmani kitabor ou al-Kolosia sifara, Alla Pakor hukume Hozrot Isa al-Mosir sahabi Hozrot Pauluse (ra:) leḳsoin. Hozrot Isae behesto toshrif neoar onuman 27 bosor bade ikan leḳa oise.
Hozrot Paulus nize kunu shomoe ou Kolosi ṭauno gesoin na, oile Allar kalam hunia ou ṭaunor bout manshe Hozrot Isar torika ḳobul ḳorsoin. Ou ḳobor hunia tan mono kub kushi asil. Ermaze tain ḳobor faila, Kolosi ṭaunor kunu kunu ustade Hozrot Isar name bul talim toblig korra, tara ashol talimor loge tarar mongoṛa kisu motobad, riti-reoazo hikaira, erlagi Hozrot Pauluse mono kub ḳoshṭo faia siṭir nomunae ou sohifa leḳla.
Tain zanaila, guna taki nazat faoar lagi hou ustad oḳolor hikail talimor kunu zorur nae. Tara hikaita, firista oḳolor name ebadot ḳora, mosolmani ḳam ḳorani, nanan nomunar haram-halal ḳanir ḳota. Erdae leḳoke zanaila, guna taki nazat faoar lagi ita ustador talimor kunu zorur nae. Tain Kolosiar mumin oḳolre bout utshaho zugaisoin, Hozrot Isar ufre imane mozbut oar lagi.
Ermaze ase,
(1) Hozrot Paulusor salam, shukria, munazat 1:1–14 aeat
(2) Allar morzi-munshae al-Mosir ḳam 1:15–2:19
(3) al-Mosir mazdiau aḳeri zindegi 2:20–4:6
(4) Aḳeri munazat ar salam 4:7–18
1
Hozrot Paulusor salam, shukria ar munazat
1-2 Ami Paulus, Alla Pakor morzie Hozrot Isa al-Mosir eḳzon sahabi. Kolosi ṭaunor maze al-Mosir torikar pak bonda ar mumin oḳolor gese ami ar bai Timotie ou sohifaḳan leḳram. Amrar gaibi baf Alla Pake tumrar ufre rohomot ar shanti nazil ḳoroukka.
 
3-4 Hozrot Isa al-Mosir ufre tumrar iman ar Allar pak bonda oḳolre maea ḳorar ḳota amra hunchi. Erlagi zeblau tumrar lagi dua ḳori, ou shomoe amrar malik Isa al-Mosir gaibi baf Alla Pakor shukria adae ḳori. Tumra age ze kush-ḳobri mani Allar hok kalam faiso, ou kalam huniau tumrar mono eḳ asha zonmise. Ou asha takiu tumrar iman ar maea foeda oise. Ar tumra asha ḳorrae ze saman faitae, ita to behesto raḳa ase. I kush-ḳobri duniar hoḳolbae sitria bala folala oia din din baṛer. Ze din tone tumra ou kush-ḳobri ar Allar rohomotor befare furafur huncho, ou din toneu itae tumrar bitreo furafur ḳam ḳorer. Ou kush-ḳobrir ḳota tumra amar logor maear bai Abu-Farasor gese huncho. Tain tumrar torof taki al-Mosir eḳzon hok kezmotḳari. Pak ruhur bole tumrar dilor maze ze maea foeda oise, ou befare Abu-Farase amrare zanaisoin.
Erlagi tumrar befare hunar bad takiu amra hamesha tumrar lagi dua ḳori. Ruhani ilim ar buddi dia tumra zanu Allar munsha furafur buztae faro. 10 Amra Allar dorbaro ou duau ḳorram, tumra zate hoḳol befare al-Mosir morzi zugaia solo ar tan ufozukto ummotor laḳan zindegi ḳaṭao. Hok kam ḳori ḳori foloban o, ar Alla Pakre aro bala ḳori sino. 11 Allae tan moha kudroti bole hoḳol nomunar bol dia tumrare boloban ḳoroukka. Bala-mosiboto foṛleo kushi-bashi roia sobor ḳorar tofik deukka. 12 Ar hoḳol shomoe behesti baf Alla Pakor shukria zanao. Allar pak bonda oḳole nuror bashshait ze odikar faiba, itar bagi oar lagi to tainu tumrare ufozukto banaisoin. 13 Tainu amrare andairor bashshai taki uddar ḳoria, tan ḳas maear zonor bashshait anchoin. 14 Ou maear zonor ufre iman anae amra rehai faisi, mani guna taki mafi faisi.
al-Mosiu hokkoltar fordan
15 Ou maear zonu oila, batuni Allar zairi surot; hokkolta foeda ḳorar age tain asla, ar foeda oa hokkoltar maze tainu fordan. 16 Asman-zominor maze deḳa ar a-deḳa zotota ase, ita bashshai ouk ba bahaduri, shashon kiba ḳemota ouk, hokkoltau tan ator foeda. Ita to ḳali tan lagiu foeda ḳora oise. 17 Hokkoltar foela tain asla ar tan mazdiau hoḳolta ṭikia ase. 18 Tainu tan shorilor mata, mani zomator mata. Tainu hokkoltar foela, ar tainu foela murda taki zinda oisoin, zate hoḳol befare tainu fordan oita faroin. 19 Allae saila, tan Allai gunor hokkolta zanu al-Mosir maze taḳe. 20 Ar duniat ba behesto zenou oe na ḳene, ou al-Mosir mazdia zanu hokkoltar loge tan milon oe. Tain saila, solibor ufre al-Mosir kurbanir lour bodla shanti ḳaimor mazdi ou milon ouk.
21 Tumra to eḳ shomoe Allar ges taki duroi aslae, ar tan befare tumrar dilo dushmoni bab asil. Ita tumrar bod ḳamor mazdi zair oise. 22 Oile al-Mosir zan kurbanir mazdi Allae tumrareo tan loge milon goṭaisoin, zate tumrare fak-fobitro, nikut ar ni-oforadi halote tan samne azir ḳorta faroin. 23 Te al-Mosir befare kush-ḳobri taki ze nichchit asha tumra faiso, ḳali ou ashar ufre imane tir roio, in taki loṛio na. Tumra to zano, i kush-ḳobri hara duniat toblig kora oise, ami Pauluso ou kush-ḳobri tobligor ḳadim oisi.
Zomator lagi Hozrot Paulusor ḳam
24 Tumrar lagi ami duk-mosibot shoijjo ḳorae kub anondo fairam. Zano to, al-Mosir shoril mani zomator lagi tan ze duk-musibot oḳono baki ase, ita oḳon amar shoril dia fura ḳoriar. 25 Alla Pake tan fobitro kalam tumrar gese furafur toblig korar bar amare disoin, gotikeu ami zomator eḳzon ḳezmotḳari oisi. 26 Allar kalamor ze batuni befar agor zomanar manshor gese zug zug dori lukail asil, ita oḳon tan pak bonda oḳolor gese zair ḳora oise. 27 Allae saisoin, bin zati oḳolor geseo tan batuni munshar gourob ze kita, ita zenu tan hoḳol bonda oḳole zanta faroin. Ashole al-Mosi tumrar dilo asoin, gotike tumra gourob faoar asha faiso. 28 Ar ou al-Mosir befare amra toblig koriar, Allar deoa aḳol-hekmot dia manshore hushiar ḳoriar ar talim diar zate al-Mosir torikat furafur kamil halote tarare Allar dorbaro azir ḳortam fari. 29 Ou niote Allar ze kudroti bol amar maze ḳam ḳorer, ou kudroti boleu ami dile-zane menot ḳoriar.