Fobitro Tourat Shorif fas nombor sifara
Dusra-Boyani
Forisiti
Ou sifara Hozrot Musa (a:)or ufre nazil oa fobitro Tourat Shorifor shesh sifara mani, fas nombor sifara. Ou sifara nazil oar mul ḳaron oilo, morubumir maze soforor haloto zonom oa Boni Israilor aolad oḳolre, fobitro Tourat Shorif ar Allar deoa hukum-ahkam oḳol aroḳbar mono ḳorai deoa. Erlagi ikanor nam oilo, Dusra-Boyani.
Agor sairo sifarar loge ou sifarat noya bout hukum ase, ar ou sifarar bout ayat fobitro Injil Shorifor maze-o ullek kora oise. Ermaze kub mulloban ou ayat-o ase, “Tumra forteḳe tumrar asta dil, asta zan ar hoḳol bol-shokti dia tumrar Mabud Allare mohobbot ḳorio. Aiz ami tumrare ze hukum diar, ita tumrar dilo gatia rakio.” (6:4-6)
Ou sifarat Hozrot Musa (a:)or tinṭa ḳas nosiot ase, tain tan ufator age Boni Israilre iad ḳorai dila. Ou shomoy tara Kenan deshor shimanat aia hari Allar oada ḳora hou aramor Kenan desho hamanir lagi zuit asla. Er age to tara sallish bosor morubumir nanan zagat gurte gurte bout heran oisoin.
Ermaze ase,
(1) Hozrot Musa (a:)or foyla nosiot 1:1—4:43 ayat
(2) Hozrot Musa (a:)or dusra nosiot 4:44—28:68 ayat
(3) Hozrot Musa (a:)or tin nombor nosiot 29—30 ruku
(4) Hozrot Musa (a:)or shesh halot 31—34 ruku
Hozrot Musa (a:)or foyla nosiot (1:1—4:43)
1
Tur faṛ saṛar ḳota
1 Musa nobie Zordan gangor fub faror Araba namor morubumit Boni Israil zatire ou boyan ḳorsla, tain Suf gaur samne ubaia tarar loge matila. Er eḳbae asil Faran, ar oinnobae asil Tufol, Labon, Hazirut ar Dizahab, ou sair gau.
2 Seiror faṛia fotedi Tur faṛ taki Kadesh-Bornea forzonto aṭia zaite ḳali egaro din lage. 3 Oile Boni Israil Mishor taki bar oia unchallish bosor egaro mash forzonto, ortat soforor sallish boros solar ḳalo, ono gurila. Bade ou mashor foyla tariko Musa nobie tarare zanaila Mabude tanre zeta ḳoisla. 4 Tain laṛai kori Amuri oḳlor bashsha Sihunre ar Bashon deshor bashsha Uzre araia harle ita ḳoila. Ou Sihune bashshai korta Hishbon ṭauno, ar Uze bashshai korta Osṭarut ar Idri ṭauno.
5 Zordan gangor fub faror Muab desho, Musa nobie Allar deoa Tourator talim boyan ḳoria buzaila. Tain ḳoila, 6 “O Boni Israil, huno, amra Tur faṛor galat taḳar ḳalo Mabud Allae amrare ḳoisla, ou faṛor galat tumrar bout din guzori gese. 7 Te oḳon tumra hoḳole tambu tulia Amuri oḳlor faṛia elaḳa ar ou elaḳar ḳanda-ḳasar hoḳol zagat zaoar lagi roana o. I zaga hoḳolta oilo gia: Araba morubumi ar ou morubumir ḳanda-ḳasar usa faṛia zaga ar nisa faṛia zaga, Negeb morubumi ar doriar kinara, mani Kenan desh taki arombo ḳoria Lebanon desh oia Furat gang forzonto ita hoḳol zaga. 8 Mono rakio, ita hoḳol zaga ami tumrare dilaisi. Ami Mabude tumrar baf-dadain Ibrahim, Isʼhak, Iakub ar tarar ḳandanre ze desh deoar oada ḳorslam, tumra oḳon gia ita hoḳol zaga doḳol ḳorilao.
Hozrot Musae aro ḳoyzonre neta banaila
9 “Te baiainre, hou shomoy ami tumrare ḳoislam, tumra hoḳlor bar to ami eḳla boibar shaiddo nai. 10 Tumrar Mabud Allae tumrare oto aolad baṛai disoin, erlagi tumra aiz asmanor terar laḳan oiso, gonia fuṛail zae na. 11 Tumrar baf-dadar Mabud Allae tumrare aro azar azar gun baṛaukka, ar tan oada mafik tumrare rohom-borkot deukka. 12 Oile ami eḳla ḳemne tumrar ḳaijja-fosad miṭaitam, ar tumrar zimmadarir bar boitam? 13 Erlagi tumrar fortek kandan taki koyzon aḳoldar, zanra-hunra ar hoḳol manshor gese ijjoti zonre fosond ḳoro, ami tumrar zimmadari erar ato shomzaimu.
14 “Tumra zuaf dislae, aichcha, afne zela ḳoira, ola-u bala oibo. 15 Teu ami tumrar fortek kandan taki aḳoldar, buddiman ar zanra-hunra zonre nia tumrar azar zonor ufre, sho zonor ufre, foinchash zonor ufre, dosh zonor ufre shordar banai dislam, ar ofisar-o boail ḳorslam.
16 “Hou shomoy ami tumrar hakim oḳolre hukum dislam, ḳoislam, ḳaijja-fosador bisaro badi-bibadi duio fokkor mat hunia hok insaf ḳorio, ita nizor zatir ouk ba bin zatir ouk. 17 Bisaror shomoy tumra ḳeuror fokko loio na, doni-gorib hoḳlor ḳota hunio. Ashole bisaror malik to Alla, erlagi tumra kunu manshore ḍoraio na. Ze bisaror mimangsha ḳora tumrar lagi koṭin oy, ikan amar gese anio, ami deḳmu. 18 Ar tumra kila kita ḳortae, ita to ami hou shomoy ḳoia dislam.
Guia faṭaia deshor ḳobor zana
19 “Bade amra Mabud Allar hukum faia, Tur faṛ saṛia Amuri oḳlor faṛia elaḳa muka roana oilam. Tumra to deḳso, ḳoto boṛo ar ḳoto marattoḳ morubumi faroia amra Kadesh-Bornea aia azilam. 20 Azia hari ami koislam, oḳon to tumra Amuri oḳlor hou faṛia elaḳat aia fosi geso, i deshḳan amrar Mabud Allae amrare dilaira. 21 Huno, tumrar Mabud Allar dan ḳora ou asta desh-u tumrar samne foṛi roise. Oḳon zao, gia tumrar baf-dadar Mabud Allar oada ḳora ou deshre doḳol ḳoro. Ḳeu ḍoraio na, nirash oio na.
22 “Ou shomoy tumra hoḳol aia amare ḳoilae, te foyla ḳoyzon guiare ou desho faṭail ouk, tara gia deshḳan dekia aia amrare ḳoiba, kun fote zaoa amrar lagi bala ar zaoar foto kun kun ṭaun foṛbo.
23 “Tumrar foramish amar fosond oilo, erlagi fortek kandan taki eḳzon ḳori muṭ baro zonre alog korlam. 24 Tara tumrare ono toia ou faṛor ufre uṭlo, ar Ashkul namor faṛia ḳalo gia bala ḳori hoḳolta dekia ailo. 25 Tara hou desh taki kisu fol-mul ania amrare deḳaia ḳoilo, amrar Mabud Allae amrare ze deshḳan dan ḳorra, ikan to boṛo bala zaga.
26 “Oile tumra ou desho zaite razi oilae na. Tumra nizor Mabud Allar hukumor birudita ḳorlae. 27 Tumra zarzir tambut hamaia boḳa-zoḳa shuru ḳorlae, ar ḳoilae, Mabude amrar loge dushmoni koroin, erlagi-u amrare binash ḳorar niote, Amuri oḳlor ato falaia marar kiale, Mishor desh taki tain amrare bar ḳori anchoin. 28 Amra kila hino zaimu? Amrar guia baiainte aia zano ḍor harai disoin. Tara ḳoisoin, hinor manush bule amra taki bout usa-muṭa foyluan. Tarar ṭaun oḳol-o boṛo boṛo, itar sairobae usa usa oal dia baunḍori kora, asmano soilar lager. Ar foyluan Anaki oḳolre-o bule hono deḳsoin.
29 “Ita hunia ami tumrare ḳoislam, tumra mon gabṛaio na, itare ḍoraio na. 30 Tumrar Mabud Alla to tumrar age age zaira. Tain tumrar fokko loia tumrar sokur samne Mishor desho zela zuddo ḳorsla, oḳono oula ḳorba. 31 Ar ou morubumir maze-o to tumra deḳso, ono aia fosar ag forzonto, bafe zelaḳan afon futre kulo ḳori boia nein, oulaḳan Alla Mabude tumrare-o asta fot boia anchoin. 32 Otota hunar bade-o tumra tan ufre borosha ḳorlae na. 33 Taine-u to tambu gaṛibar zaga sinanir lagi ar fot sinaia nibar lagi, raitkur shomoy agunir kuṭi ar dinkur shomoy megor kuṭir nomuna oia tumrar age age gesoin.
34 “Oile tumrar ita zuaf hunia Mabude kub gusa ḳorla, tain ḳosom ḳaia ḳoila, 35 ami Mabude tumrar baf-dadar gese ḳosom ḳaislam ou deshḳan ditam ḳori, ta-o oḳonkur ita naforman oḳole i bala zaga ḳan deḳar nosib oito nae, 36 ḳali Zifunnir fua Kalut saṛa. Ikan deḳar shoubaiggo ou Kalute faibo, he amar ḳotare furafur manche, he zeta zaga faodi faṛaia aise, ita zaga ami tare ar tar aolad oḳolre dimu.
37 “Baiainre, tumrar ḳarone Mabude amar ufre-o gusa ḳorla, gusa ḳori amare ḳoila, tumi Musa-o hou desho hamaitae fartae nae. 38 Ḳali tumar ḳadim Nunor fua Iusa gia hono hamaibo. Tumi tare shaosh dio, he Boni Israilre i deshor doḳoldari dia malik banaibo. 39 Tumra ḳoislae, amrar bebuz nabalik huruttaintore hou deshor manshe doria nibogi. Oile ami Mabude erare-u ou Kenan deshor malik banaimu, era ikan doḳol ḳorba. 40 Te oḳon tumra hirbar fisaia gia Nil doriar faredi morubumir bae roana deo.
41 “Ikan hunia tumra ḳoislae, amra to Mabudor dorbaro gunagar oigesi. Ta-o amrar Mabud Allar hukum mafik oḳon gia zuddo ḳormu. Oḳan ḳoia tumra ostro-shostro loilae, ar mono ḳorslae, faṛi elaḳat uṭia zuddo ḳora-o kub shuza.
42 “Oile Mabude amare ḳoila, tumi tarare ḳo, tara zanu zuddor lagi faṛo na uṭe, ḳaron ami tarar loge roitam nae, ar amare saṛia zudi tumrar nizor ichchae zao, te dushmonor gese aribae. 43 Ami tumrare hushiari deoar bade-o tumra ita manlae na. Tumra Mabudor hukumor ulṭa gia buk fulaia ou faṛo uṭat laglae. 44 Teu faṛor bashinda Amuri zatie tumrare dekia fal bandi bar oilo, mousaḳor mou-fukor laḳan fal bandia tumrar ḳore ḳore ailo, ar marte marte Seiror Horma ṭaun forzonto ḳedaia nilo. 45 Bade tumra aia Mabudor gese ḳandon lagailae, oile Mabude ḳan bond ḳorilla, i kandon hunla na. 46 Ou nomunae tumra bout din Kadesh elaḳat roilae, lamba shomoy ono guzrilo.”