1 Mabude Musare ḳoila, “O Musa, Boni Israilor maze imamoti korar lagi tumar bai Harun, tar fua Nadab, Abihu, Ali-Azor ar Isamarre tumar samne anao.

2 “Tumar bai Harunor ijjot ar shundor baṛanir lagi fobitro lebas toiar ḳorao. 3 Ami Pak Ruhu dia zeta ustad oḳolre ḳarigori kamor aḳol-hekmot disi, tumi hou ḳarigor oḳolre hukum deo, tara Harunor lagi oula fobitro lebas banaukka, ze lebas ḳali amar imamotir ḳamo lage. 4 I lebasor maze bukur ufror toli, efron, alḳella, chekor ḳafoṛor fainjabi, faugṛi ar ḳomror bondoni banaio. Tumar bai Harun ar tar fuainte zate amar imamoti kam ḳorta faroin, erlagi tarar fak-fobitro lebas banaio. 5 Lebas banaite tara lilua, baingoni, lal suta, ar dami suti kafoṛ, er loge shuna-o lagaiba.

6 “Fordan imamor efron banaibae lilua, baingoni, lal suta, dami suti kafoṛ, ar shunadi. Ita bala kunu ustadredi banaio. 7 Efronor ḳandor dui gala zuṛa dibar lagi dukan foṭṭi banaia, efronor ufror kunat lagaio. 8 Efronor loge zuṛa lagail feṭor ufror belṭ ḳan-o efronor laḳan lilua, baingoni, lal suta, dami suti kafoṛ, ar shunadi banaio.

9 “Tumi duiṭa akik fattor ania er ufre Israil, mani Iakubor fuaintor nam kudaia lekaio. 10 Foyla fattoror ufre, tarar zonmor hishabe boṛo taki huru muka soy zonor nam, ar dusra fattoror ufre-o baki soy zonor nam kudaia lekaio. 11 Hunar oḳole dami fattoror ufre kudia zela sil banain, ekkere ou laḳan ḳori dugu fattoror ufre Israilor fuaintor nam kudaio. 12 Fattor duiogu shunar zazoiror maze lagaia efronor ḳandor foṭṭir loge lagaio. Israilor fuaintor bae Mabudor nozor raḳar lagi, i fattor Harune Mabudor samne tar ḳandor maze lagaibo. 13-14 Duio zazoiror loge shunadi banail duksa chein lagaio. Ou duio chein ḳaṭi shunadi rosir nomunae fesaia banaio.

15 “Amar ray-foysala zanar lagi bukur ufror toli banaio. Bala ustad kunu dorziredi banaio. Efronor ḳamor laḳan iṭa-o lilua, baingoni, lal suta, dami suti kafoṛ, ar shunadi banaio. 16 Iṭa oibo lambae ada at, fashe ada at, sair kuna ala dui bainj ḳora ekkan ḳafoṛ. 17 Er ufre hair doraia sair hair fattor lagaibae. Foyla harit iakut, fit, ar fanna moni. 18 Dusra harit lal moni, lil moni ar hira; 19 tin nombor harit firuz, gumed ar foddorag moni. 20 Sair nombor hairo fukraz, boidurjo ar shuruz moni. I fattor oḳol shunar zazoirdi lagaio. 21 Israilor baro fuar lagi baroṭa fattor lagbo. Ita eḳo fattoro eḳ eḳ fuar nam kudia lekaio, zela kudia sil banail oy.

22 “Bukur ufror tolir lagi kaṭi shunadi rosir laḳan fesaia duksa chein banaio. 23 Shunar duiṭa ḳoṛa banaia bukur ou tolir ufror kunat lagaio. 24 Ar chein duiogesa duio ḳoṛar loge aṭḳaio. 25 Duio ḳandor efronor samnor fitat shunar zazoiror loge cheinor eḳ mata bandio. 26 Aro duiṭa shunar ḳoṛa banaia bukur ufror tolir dui kunat lagaio. I duioṭa efronor loge bukur tolir tole roibo. 27 Bade aro duiṭa shunar ḳoṛa banaia, efronor ḳandor foṭṭir shoi toledi, feṭor ufror belṭor ufror silair ḳasat lagaio. 28 Bade bukur ufror tolir tolor ḳoṛar loge feṭor ufror noksha ḳora belṭor ḳoṛa lilua sutadi bandio. Teu ou toli efronor ufre taki horto nae.

29 “Pak zagat hamaibar bala Harune amar ray-foysala hunar lagi, bukur ufror tolir ufre leḳa Israilor baro fuar nam lagaite oibo, i toliṭae tarare hor-hamesha Mabudor samne raḳbo. 30 Amar ray-foysalar ou tolir bitre Urim ar Tummim*28:30 Urim ar Tummim oilo dui zinish Allar morzi buzar lagi. Darona ḳora oy, ita oilo bishesh dui fattor ba dui moni. namor fobitro fattorguin rakio. Harun zebla Mabudor samne azir oibo, ou shomoy ita tar bukur ufre roibo. Harune Boni Israilor lagi amar ray-foysala zanar ufae hishabe hor-hamesha tar bukur ufre Mabudor deoa ou siz raḳbo.”

31 Mabude Musare ḳoila, “Efronor tole lamba ze alḳella roibo, ikṭa furaṭa-u lilua rongor sutadi banaio. 32 Mata haraibar lagi er mazḳano faḳ rakio. I faḳ zaga zate na siṛe, erlagi er sairo gala mozbut ḳori bain ḳorte oibo. 33 Lilua, baingoni, lal rongor sutadi anuar folor laḳan banaia, ou alḳellar tolor muṛir sairobae lagaio. Ar itar maze maze dio shunar gungur. 34 I muṛit dibae egu ḳori anuar ar egu gungur. 35 Imamoti korar bala Harune i lebas findibo. He zebla pak zagat Mabudor samne azir oibo, ar hon taki bare bar oibo, ou shomoy ou gungur oḳlor aoaz huna zaibo, teu he morto nae.

36 “Ḳaṭi shunadi ekkan fat banaia er ufre silor laḳan kudia ou ayat lekaio, ‘Mabudor name fak-fobitro.’ 37 I fatḳan faugṛir samnor galat lagaia lilua sutadi bandio. 38 Iṭa Harunor ḳofalor ufre roibo. Zoto fak-fobitro mal Boni Israile dan-ḳoyrat loia aiba, itar hoḳol nomunar dush-tiruṭir bar Harune boibo. Mabude zate tarare kobul ḳoroin, erlagi Harune ḳofalor ufre i shunar fatḳan hamesha lagaia raḳbo. 39 Imamor fainjabi ar faugṛi toiar ḳoraio chekor dami suti kafoṛdi. Ḳomror bondoni kan sui-sutadi noksha ḳori banaio.

40 “Harunor fuaintor ijjot ar shundoror lagi fainjabi, toki ar ḳomror bondoni toiar ḳoraio. 41 Tumi tumar bai Harun ar tar fuaintore i kafoṛ findaio. Tarar matat fobitro tel ḍalia ḳelafoti shomzaia imamoti kamo lagaio. Tumi tarare fak-fobitro ḳorio, zate tara amar imam oita faroin. 42 Ḳomor taki urat forzonto shoromor zaga gurar lagi suti kafoṛdi haf-penṭor laḳan zangia banaio. 43 Harun ar tar fuain zebla Milon-tambut hamaiba, ba kurbani kanar gese pak zagat hamaia imamotir ḳamo lagba, ou shomoy tara ou zangia finba. Teu tara ni-oforadi roiba, morta nae. Harun ar tar oarishor silsilar lagi i ain hor-hamesha salu roibo.”