1 Mabude Musare ḳoila, “Agor fattoror laḳan tumi noya dukan fattor tiar ḳoro. Tumi ze dukan bangislae, hi fattoror maze ze hukum leḳa asil, ou hukum oḳol ami hirbar i duio fattoro lekia dimu. 2 Fozor bade-u tumi tiar oia Tur faṛor ufre uṭio. Uṭia faṛor matat amar samne azir oio. 3 Tumar loge kunu manshore anio na, i faṛor kunuḳano zate kunu manush na ae. Faṛor ḳandat kunu goru-sagol ba meṛa-meṛire raḳte dio na.”

4 Teu Musae agor fattoror laḳan dukan fattor banaila, ar Mabudor hukum mafik fozore uṭia fattor duioḳan ato loia Tur faṛor ufre uṭila. 5 Ar Mabud-o megor ḳalnir maze lamia aila. Tain Hozrot Musar daro ubaia tan “Mabud, zein asoin” nam elan ḳorla. 6 Tain Musar samna dia toshrif nila, ar ou kalam elan ḳori kori gela,

8 Ikan hunia-u Musa nobi loge loge soizdat foṛia ḳoila, 9 “O malik, ami zudi tumar dorbaro rohomot fai, te meherbani kori tumi-o amrar log kano solo. Ou zati zudio kub gaṛteṛa-ekguia zat, ta-o tumi amrar guna ar ḳosurire maf ḳoria dilao. Amrare tumar afon proza hishabe kobul ḳorilao.”

10 Mabude ḳoila, “Huno, ami eḳ usilla boail ḳoriar, ami tumar hoḳol manshor samne ou laḳan keramoti kam deḳaimu, zeta asta duniar kunu zatir samne kunudin-o ḳora oise na. Tumi ou zeta manshor loge boshot ḳorrae, tara deḳba, ami Mabude tumrar lagi kita ḳoriar, ita dekia tarar zano ḍor hamaibo. 11 Ami aiz tumrare zeta hukum dimu, ita kial ḳori amol ḳoro. Ami Amuri, Kenani, Hiṭṭi, Farizi, Hibbi ar Zibuzi oḳolre tumrar samna taki kedai dimu. 12 Oile ḳobordar! Tumra ze desho zairae, i deshor manshor loge kunuzat chukti korio na, arnae fando hamaibae. 13 Tumra tarar puja-monḍop bangia ṭukra ṭukra ḳorbae, tarar boli kanain bangilibae, ar tarar Ashera-debir nishana kuṭi oḳol ḳaṭia falaibae. 14 Tumra kunu deb-debir puja ḳorio na. Ami Alla to la-shorik Mabud, kunu shorik shoijjo ḳori na, amar faona ebadot ami sai-u sai.

15 “Hou deshor manshor loge kunuzat chukti korio na, arnae tara zebla shiriki kamor niote, tarar deb-debir samne nizore shofia diba, devtar name boli diba, ou shomoy tara tumrare-o daot diba ar tumra gia tarar ou bolir gust ḳaibae. 16 Tumrar fuaintor loge tarar fuṛintor bia-shadi dibae, ar ou fuṛinte tarar devtar gese gia shiriki kam ḳorba, tarar loge tumrar fuaintore-o ṭanba.

17 “Tumra nizor lagi kunuzator murti banaio na.

18 “Tumra Ḳamir Saṛa Ruṭir Id adae ḳorio. Shat din ḳamir saṛa ruṭi kaio. Abib sandor ṭik kora tariko tumrare zela hukum deoa oise, ou laḳan id adae ḳorio. Mono rakio, ou sando tumra Mishor taki bar oia aislae.

19 “Tumrar feṭor foyda hoḳol foyla fua amar oibo. Erloge tumrar goru-sagol ba foshur foyla meda baichcha-o amar oibo. 20 Ḳali gadintor foyla meda baichchar bodla, amare egu meṛa-baichcha bodla dia ogure ḳalas ḳoria nio. Ḳalas na ḳoraile ogur gordona bangilio. Tumrar hokkol boṛo fuainre ola ḳalas ḳorai nio.

“Huno, idor shomoy ḳeu ḳali ate amar ḳasat aio na.

21 “Haftar soydin tumra ḳam ḳorio, oile shat nombor din ziraio. Ḳet ḳora ar foshol daoar bala-o ziraio.

22 “Ou tino id tumra manio, Fonchaisha Id, ḳetor foyla daoa gom dia Noya Fosholor Id, ar bosoror hesh masho baganor faḳna fol baṛit ania Ḍera-goror Id adae ḳorio. 23 Bosoro tinbar tumrar hoḳol beṭain aia hoj ḳorar niote amar gese azir oio. Mono rakio, ami-u Mabud, Boni Israilor Alla. 24 Ami hou deshor hoḳol zatire tumrar samon taki kedai dimu. Tumrar deshor shimana baṛaia boṛo ḳormu. Tumra bosoro tinbar nizor Mabud Allar samne azir oio, teu tumrar zaga-zominor bae ḳeu lalos ḳorto nae.

25 “Amar namor kurbanir foshur loge tumra ḳamir ala kunta lilla-kurbani dio na. Azadi Idor kurbanir kunuzat ḳani bian forzonto rakio na.

26 “Tumrar ḳetor daoa foyla fosholor hoḳol taki bala ongsho Alla Mabudor goro loia aio.

“Ar huno, sagolor baichchar gust tar maʼr duddi randio na.”

27 Bade Mabude Musare ḳoila, “Tumi i kalam oḳol lekia to. Ami ou kalam mafik tumar loge ar Boni Israilor loge amar milonor usilla boail ḳorlam.” 28 Ou shomoy Musa nobi sallish din sallish rait Mabudor daro faṛor ufre roila. Tain kunuzat dana-fani kaila na. Mabude hou duio fattoror ufre tan loge milonor usillar ou ayat oḳol, mani shoriotor doshṭa hukum-ahkam lekia dila.

29 Teu Musae shahadot fattor duioḳan ato loia Tur faṛ taki lamia aila. Mabudor loge batchit ḳorae Musar mukor surot nurani oigelo, oile Musae ikan ṭer faila na. 30 Ou shomoy Harun ar hoḳol Boni Israile Musar nurani surot deḳla, dekia tara ḳasat aite ḍoraigela. 31 Oile Musae tarare ḍaḳ dila, teu Harun ar Boni Israilor murobbi oḳol tan gese aila, ar Musae tarar loge mat-ḳota matila. 32 Bade hoḳol Boni Israil tan ḳasat aila. Aia harle tain Tur faṛor ufre Mabudor deoa hoḳol hukum-ahkam tarare zanaila.

33 Tarar loge mat-ḳota shesh oigele Musae tan nurani sehara lukanir lagi muko forda lagai dila. 34 Oile Musae zebla Mabudor loge batchitor lagi kaneḳar bitre tan samne zaita, ou shomoy i forda kulilita. Bade bare aia forda lagaita, ar Allar deoa hukum oḳol Boni Israilre zanaita. 35 Hoḳol manshe deḳta Musar muk nurani oigese. Musae tan muk gurilita ar Mabudor samne zaoar ag forzonto tan muk gura roito.