1 Forishi oḳolor maze Nikodim name Ihudi oḳolor eḳzon neta asla. 2 Eḳdin rait tain aia Isare ḳoila, “Huzur, amra zani, afne eḳzon ustad hishabe Allar ges taki aisoin. Afne zeta keramoti ḳam ḳorra, Alla loge na taḳle ḳeu ita ḳorto fare na.” 3 Tain Nikodimre ḳoila, “Ami afnare hasau ḳoiram, noea ḳori zonom na loile ḳeu Allar bashshai deḳe na.” 4 Teu Nikodime tanre ḳoila, “Manush buṛa oigele hirbar zonom loe kila? Dusrabar maʼr feṭo hamaia zonom loe ni?” 5 Isae zuaf dila, “Ami afnare hasau ḳoiram, fani ar Pak Ruhu taki zonom na oile ḳeu Allar bashshait hamaito fare na. 6 Roḳto-mangsho taki zetar zonom, ita to ḳali roḳto-mangsho. Ar Pak Ruh taki zetar zonom, ita ruhu. 7 Ami ze afnare ḳoilam, noea ḳori zonom loa zorur, ete taijjub oiba na. 8 Batash tar zebae ichcha obae zae, ar afne tar aoaz hunoin, oile ḳoi taki ae ar ḳoi zae, ikan zanoin na. Te Pak Ruhu taki zerar zonom oise, tarar belaeo olaḳan oe.”

9 Nikodime Isare zikaila, “Ikṭa kila oito fare?” 10 Isae zuaf dila, “Afne Boni Israilor ustad oiao ita buzoin na ni? 11 Afnare hasau ḳoiram, amra zeta zani oḳanu ḳoi, ar zeta deḳsi ou befare shakki dei. Oile afnara amrar shakki manoin na. 12 Ami afnarare duniabi befare ḳoile zebla ekin ḳoroin na, te behesti befare ḳoile kila ekin ḳorba? 13 Zein behesto taḳoin ar behest taki aisoin, hou Bin-Adom saṛa ar ḳeu behesto uṭsoin na.

14 “Morubumir maze Musa nobie zela hafre usat tulchila, ola ami Bin-Adomreo usat tula oibo. 15 Zate ze zone amar ufre iman ane, he aḳeri zindegi hasil ḳore. 16 Alla Pake duniar manshore oto beshi maea ḳorla, i maear ḳatire tan ḳas maear zonre dan ḳorla. Ze manshe ou maear zonor ufre iman ane, he binash oe na, borong aḳeri zindegi hasil ḳore.

17 “Allae manshore dushi forman ḳorar lagi tan maear zonre duniat faṭaisoin na. Ou maear zonor ḳatire manshe zate nazat fae, erlagiu faṭaisoin. 18 Ze zone ou maear zonor ufre iman ane, tar kunu bisar oe na, oile ze iman ane na, tare ageu dushi shaibosto ḳora oigese. Ḳaron Allar eḳmatro maear zon, Ibnullar ufre he iman anche na. 19 Tare dushi shaibosto ḳora oise, ḳaron duniat nur zair oise. Oile manshor bod ḳamor lagi nur taki andairre beshi bala faise. 20 Ze manshe bod ḳam ḳore, he nurre ginnae, tar bod ḳam oḳol zair oizibo ḳori he nuror gese ae na. 21 Oile ze zon hok-halalir fote sole, he nuror gese ae, zate tar hoḳol ḳam Allar munsha mafik oise ḳori forman oe.”

22 Erbade Hozrot Isa ar sahabi oḳol Ehudia elaḳat aila. Hino tain sahabi oḳolor loge kisu din ḳaṭaila ar manshore toubar gusol ḳoraila. 23 Ou shomoe Salim namor eḳ gaur ḳandat Oinun namor eḳ zagat Ehiaeo toubar gusol ḳoranit asla. Hou zagat bout fani taḳae dole dole manush aia toubar gusol loila. 24 Ehia nobire ou shomoeo zelo bondi ḳora oise na.

25 Ou shomoe shoriot mafik pak-saf oar befar loia, Ehia nobir ummot oḳole Ihudir eḳ alimor loge torko lagai dila. 26 Bade tain tain Hozrot Ehiar gese aia ḳoila, “Huzur, zein Zordan gangor hofaro afnar loge asla, ar zar befare afne shakki disla, deḳra ni, hoḳol manush tan gese zairagi ar tain erare toubar gusol dira.” 27 Ikan hunia Ehiae ḳoila, “Behest taki deoa na oile ḳeu kunta fae na. 28 Tumrau to huncho, ami ḳoisi, ami al-Mosi nae, oile tan age amare faṭani oise. 29 Zar gese koinnare bia deoa oe, einu nosha. Noshar duste ḳali ubaia noshar mat hunoin ar tan golar aoaz hunia kushi oin. Ou laḳan amar kushio aiz fura oilo. 30 Tanre boṛo oite oibo ar ami hori zaitam oibo.”

31 Zein ufor taki ain, ein hoḳolor ufre. Oile ze dunia taki ae, he to duniar, he duniabi matu mate. Zein behest taki ain, tan ashon hoḳolor ufre. 32 Tain hono zeta deḳsoin ar hunchoin, otar shakkiu dein. Ḳeu tan shakki mane na. 33 Oile ze zone tan shakki ḳobul ḳorse, he oḳan diau forman ḳore, Allar kalamu hasa. 34 Allae zenre faṭaisoin, tain Allar kalamu batain, ḳaron Allae tanre furafur ḳoria Pak Ruh dan ḳoroin. 35 Bafe tan futre, mani tan ḳas maear zonre maea ḳoroin ar tan atou hoḳolta disoin. 36 Ze manshe Allar ḳas maear zonor ufre iman anche, he aḳeri zindegi failise. Oile ze tanre mane na, he kunumonteu aḳer faito nae borong tar ufre Allar gozob foṛbo.