10
Hozrot Isa al-Mosiu duar
1 Hozrot Isae aro ḳoila, “Ami tumrare nichchit hasa ḳota ḳoiram, ze manush meṛar gual-goror duaredi na hamaia, oinno fote hamae, he to sur-ḍaḳait. 2 Oile ze zon duaredi hamae, he-u meṛar raḳal. 3 Gual-goror sokidare raḳalre duar kulia dey. Meṛainteo raḳalor ḍaḳ hunoin ar raḳale tarar nam dori ḍaki ḍaki bar ḳori ney. 4 Gor taki nizor meṛaintore bar ḳoria harle, raḳal tarar age age zae, ar tar meṛain zae ḳore ḳore, ḳaron tar golar aoaz tara sine. 5 Tara kunubala osina kunu raḳalor loge zaito nae borong tar ges taki bagibo, ḳaron osina kunu raḳalor golar aoaz tara sine na.” 6 Isae Forishi oḳolre hikanir lagi ou udahoron dila, oile tain kita buzaira, tara shomzita farla na.
7 Erlagi tain hirbar ḳoila, “Ami tumrare nichchit hok kota ḳoiram, meṛar falor lagi amiu duar. 8 Amar age raḳalor bab doria zeta aisla, iguin to sur-ḍaḳait asla, meṛainteo tarar ḳota hunchoin na. 9 Amiu duar. Amar mazdi ze hamaibo, he tar zan basaibo. He bitre aoa-zaoa ḳorbo ar aṭia-soria ḳaibo. 10 Sure to ḳali suri, kun-ḳarafi ar binash ḳorar nioteu ae. Oile ami aisi zate tara zindegi fae, ar ou zindegi furafur bug kore.
11 “Amiu ashol raḳal. Ashol raḳale tar meṛar lagi nizor zan bilai dey. 12-13 Ḳali betonor ashae ze zone raḳali ḳore, he ḳaṭi raḳal nae ar i meṛaino tar nizor nae. Bag aoat deḳleu he meṛain falaia nizor zan basae. Ḳaron he ḳali betonor lagi raḳali ḳore, meṛaintor ḳota sintao ḳore na. Bage aia meṛain doria neygi, teu tara fal bangia sitri zae. 14-15 Te amiu bala raḳal. Amar gaibi bafe amare sinoin, ar amio amar bafore sini. Ṭik oula, ami amar meṛaintoreo sini, ar amar meṛainteo amare sinoin. Ami amar meṛa falor lagi nizor zan dilairam. 16 Amar to aro meṛain asoin, zeta i gual-goro nai, tarareo ami ante oibo. Tara nichchoe amar ḍaḳ hunba, teu ḳali eḳzon raḳal ar eḳṭa fal oibo.
17 “Bafe amare maea ḳoroin, ḳaron ami amar zan bilaimu zate hirbar firot nei. 18 Amar zan ḳeu amar ges taki ḳaṛia nito nae, oile ami nizeu zan bilaimu. Mono rakio, zan deoar ḳemota zela amar ase, oula firot neoar ḳemotao ase. I daeitto ami amar gaibi bafor ges taki faisi.”
19 Hozrot Isar ita mat-ḳota hunia Ihudi neta oḳolor maze hirbar doladoli lagigelo. 20 Tarar mazor boute ḳoilo, “Ogure bute dorse, he fagol, tumra ogur mat hunrae ḳene?” 21 Ar boute ḳoilo, “Bute dora manshor mat to ila nae. Bute kunu andar souk bala ḳore ni?”
Hozrot Isa al-Mosir dabi
22 Bade Zeruzalem kaba goror doḳol faoar idor shomoe aia azilo. Ou shomoe asil shitor din. 23 Hozrot Isa Baetul-Mukaddosor Bashsha Sulaimanor barindat aṭa-uṭi ḳorra. 24 Ermaze Ihudi neta oḳol Isar sairobae dola oia ḳoila, “Ar ḳotodin tumi amrare loṭḳaia raḳtae? Tumi zudi hasaror al-Mosi o, te forishkar ḳori amrare ḳo.”
25 Teu Isae zuaf dila, “Ami to ḳoilam, oile afnara ekin ḳorra na, ar amar gaibi bafor name ami ze ḳam ḳori, itaeo amar befare shakki der, 26 ta-o afnara ekin ḳorra na, ḳaron afnara amar falor meṛa nae. 27 Amar meṛainte amar ḍaḳ hunoin. Ami to tarare sini ar tarao amar ḳore ḳore roin. 28 Ami tarare aḳeri zindegi dan ḳori, tara kunu shomoe binash oita nae. Ḳeu amar ges tone tarare ḳaṛia nito nae. 29 Amar ze gaibi bafe tarare amar ato disoin, tain hoḳol taki mohan. Tan at taki ḳeu kunta ḳaṛia nito fare na. 30 Ami ar baba, amra eḳ.”
31 Teu Ihudi neta oḳole hirbar fattor loila tanre marar lagi. 32 Isae tarare ḳoila, “Gaibi bafor hukum mafik bout bala bala ḳam ami afnaintore deḳaisi. Itar maze kun ḳamor lagi afnara amare fattor marta saira?” 33 Tara ḳoila, “Bala kunu ḳamor lagi amra tore fattor mariar na, tui to shiriki ḳorre, erlagiu fattor marmu. Manush oia tui nizore Alla hishabe dabi ḳorre.” 34 Tain ḳoila, “Afnarar shorioto leḳa ase na ni, ‘Ami ḳoilam, tumrau elahi’? 35 Te Allar kalam zerar gese nazil oisil, erare to tain nizeu Allar laḳan ḳoia ḍakisoin. Ar pak kitabor ḳota to bad deoa zae na. 36 Te gaibi bafe zanre nizor lagi basia fosond ḳorla ar duniat faṭaila, ou ami zebla ḳoilam, ami Ibnulla, te afnara kila ḳoira, tui shiriki ḳorre? 37 Ami zudi amar gaibi bafor ḳam na ḳori, te afnara amar ufre iman anba na. 38 Oile ami zudi amar bafor hoḳol ḳam ḳoria taki, te amar ufre iman na anleo ita ekin ḳoroukka. Teu afnara zanba, gaibi baf amar mazeu asoin, ar amio tan maze asi.” 39 Ou shomoe hirbar tara Isare dorar sesṭa ḳorla, oile tain in tone gaib oigela.
40 Bade tain hirbar Zordan gangor hofaro gia roila. Age ou zagat Hozrot Ehiae manshore toubar gusol dita. 41 Hono bout manush tan gese ailo ar mata-mati ḳorlo, “Ehia nobie to kunu keramoti nishana deḳaisoin na, oile tain Hozrot Isar befare zotota ḳoisla, ita furafur hasa.” 42 Oḳan buzia honor bout manshe Hozrot Isar ufre iman anla.