Fobitro Tourat Shorif souta sifara
Shumari
Forisiti
Ou sifara Hozrot Musa (a:)or ufre nazil oa fobitro Tourat Shorifor sair nombor sifara. Er nam oilo Shumari sifara. Shumari namor ḳaron oilo, ou sifarar shurute Boni Israilor foyla adom shumarir befare leḳa ase. Ar heshe aroḳ adom shumari oise, er maze onuman sallish bosor guzori gese. Ar ou shomoy Boni Israilor naforman beṭa-beṭin morubumit mori gesoin, oile tarar aolad oḳol Allar oada ḳora Kenan desho hamanir lagi basia roisoin. Hou dusra adom shumarir shomoy erare gona oise.
Ibrani bashae i sifarar nam Bemidbar, mani morubumir maze. Boni Israil oḳole onuman sallish bosor doria morubumir nanan zagat zoto sofor ḳorsoin, ou soforor nanan goṭona ar itihash i sifarat ase. Zemon, guia oḳolre Kenan desho faṭani, Kurahor naformani, Allar hukume Hozrot Harun (a:)or laṭit ful, fitolor haf, gadar muko zoban fuṭa, aro bout goṭona.
Ermaze ase:
(1) Tur faṛor maze Boni Israilor aḳeri din oḳol 1:1—10:10 ayat
(2) Tur faṛ taki Muab desho sofor 10:11—22:1 ayat
(3) Muab deshor bitre nanan goṭona 22:2—36:13 ayat
1
Foyla bar Boni Israilor adom shumari
1 Boni Israil zati Mishor desh taki bar oia aoar dui nombor bosoror shomoy, dui nombor sandor foyla din, Mabude Sinai morubumit Milon-tambur bitre Hozrot Musar loge batchit ḳorla. Tain Musare ḳoila, 2 “Oḳon tamam Boni Israilor gusṭi ar foribar mafik eḳ ek kori hoḳol beṭaintor nam leḳo. 3 Tumi ar tumar bai Harune bish bosor ba er beshi boyoshi, mani zuddot zaoar zuka fouzi dol mafik tarare gono. 4 Fortek kandanor eḳzone tumrare shaijjo ḳorba, era oiba nizor gusṭir fordan murobbi. 5 Zara shaijjo ḳorba, erar nam oilo,
Ruben ḳandanor Shadiuror fua Alisur,
6 Shimion ḳandanor Shuroshadayor fua Shalumil,
7 Ehuda ḳandanor Aminadabor fua Nahish,
8 Isaḳor ḳandanor Sugaror fua Notonel,
9 Sobulon ḳandanor Helonor fua Iliab,
10 Iusufor fuaintor maz taki:
Afraim ḳandanor Amihudor fua Alishama,
Manosha ḳandanor Fatoshuror fua Gomoliel,
11 Bin-Iamin ḳandanor Zidaunir fua Abidan,
12 Dan ḳandanor Amishadar fua Akiazar,
13 Ashir ḳandanor Ukranor fua Foziel,
14 Sadu ḳandanor Duelor fua Iliasof,
15 Noftali kandanor Inanor fua Ahir.”
16 Boni Israilor maz taki ou baro zonre fosond ḳori neoa oilo. Era oila tarar baf-dadaintor foribaror fordan, Boni Israilor fouzi dolor shordar.
17 Mabude zerar nam ḳoisla, Musa ar Harune ou shordar oḳolre ḳobordi anaila, 18 ar ou bosoror dusra sandor foyla din hoḳol Boni Israilre ekḳano dola ḳorla. Tara zarzir gusṭi ar foribar mafik tarar nam leḳailo. Bish bosor ba er beshi boyoshor beṭaintor nam eḳ ek kori leḳa oilo. 19 Mabudor hukum mafik Sinai morubumit Musae erare gonila.
20 Iakub urfe Israilor boṛo fuar nam Ruben, ou ḳandan taki zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 21 Ruben ḳandan taki faoa gelo soysallish azar fas-sho zon.
22 Shimion ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 23 Shimion ḳandan taki faoa gelo onushaiṭ azar tin-sho zon.
24 Sadu ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 25 Sadu ḳandan taki faoa gelo foytallish azar soy-sho foinchash zon.
26 Ehuda ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 27 Ehuda ḳandan taki faoa gelo suattoir azar soy-sho zon.
28 Isaḳor ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 29 Isaḳor ḳandan taki faoa gelo suanno azar sair-sho zon.
30 Sobulon ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 31 Sobulon ḳandan taki faoa gelo shatanno azar sair-sho zon.
32 Iusufor fua Afraim ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 33 Afraim ḳandan taki faoa gelo sallish azar fas-sho zon.
34 Ar tan bai Manosha ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 35 Manosha ḳandan taki faoa gelo bottish azar dui-sho zon.
36 Bin-Iamin ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 37 Bin-Iamin ḳandan taki faoa gelo faytish azar sair-sho zon.
38 Dan ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 39 Dan ḳandan taki faoa gelo bashoṭṭi azar shat-sho zon.
40 Ashir ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 41 Ashir ḳandan taki faoa gelo ekchallish azar fas-sho zon.
42 Noftali kandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo. 43 Noftali kandan taki faoa gelo teppanno azar sair-sho zon.
44 Hozrot Musa, Harun ar Boni Israilor baro zon murobbi netae ou manshore gonila. Ou baro zon neta asla baro ḳandanor shordar. 45 Asta Boni Israilor maze zerar boyosh bish bosor ba tar beshi, mani zuddot zaoar zuka boyosh, zarzir gusṭi mafik tarare gona oilo. 46 Gonia hokkoltae soy laḳ tin azar fas-sho foinchash zon faoa gelo.
47 Oile Lebi kandanre, mani imam bongshore erar loge gona oilo na. 48 Mabude age-u Musare ḳoisla, 49 “Tumi Lebi kandanre gonbae na, gonar shomoy Boni Israilor oinno manshor loge erare hishab ḳorio na. 50 Tumi tarare shahadot tambu, mani amar goror shaz-shoronjam ar hokkoltar deḳa-hunar bar dibae. Tarar ḳam oibo, amar gor ar er hoḳol shaz-shoronjam boia neoa. Tara er sairo galabae zarzir tambu ṭangaia roiba ar amar goror deḳa-huna ḳorba. 51 Amar gorre eḳ zaga taki aroḳ zagat nite oile, Lebi kandanor manshe ikan kulba, bade aroḳ zagat gia eḳ ek kori zuṛa lagaia hirbar banaiba. Ḳali Lebi kandan saṛa oinno ḳeu itar ḳandat gele tare zane mara oibo. 52 Bad-baki Boni Israile tarar fouzi dol mafik zarzir tambu ṭangaiba. Forteḳe zarzir dolor shimanar maze, dolor nishana lagail fotaḳar tole roite oibo. 53 Boni Israilor ufre zate Mabudor gozob na lame, erlagi Lebi kandanor manshe amar shahadot tambur faradari korar lagi amar goror sairo galabae tarar tambu ṭangaia roiba.”
54 Mabude Musa nobire zela hukum disla, Boni Israile ṭik ola-u ḳorla.