4
Hozrot Ibrahim (a:) taki talim
1 Te amrar ḳandanor mul baf Hozrot Ibrahimor zindegir befare kita ḳoitam? Tain kita faila? 2 Shoriot manar lagiu zudi tanre be-ḳosur ḳoia gona oe, te tain nizor boṛai deḳaita faroin, oile Allar dorbaro to nae. 3 Ḳaron Allar kalamo ase, “Ibrahime Allar ufre iman anae, Allae tanre be-ḳosur ḳalas ḳoia goino ḳorla.” 4 Ḳamlae ḳam ḳoria ze beton fae, ikṭa kunu dan nae, ikṭa tar faona mozuri. 5 Oile kunu manshe zudi nizor amolor ufre borosha na ḳoria, ḳali tan ufre iman ane, zein gunagarre be-ḳosur ḳoia goino ḳoroin, te tar imanor lagi he ḳalas fae. 6 Ar niz amol saṛa Alla Pake zare be-ḳosur ḳoia goino ḳorsoin, Hozrot Daudeo tare nek-kofali ḳoisoin. Fobitro Zobur Shorifo tain ḳoira,
7 Nek-kofali tarau, zerar naformanire maf ḳora oise,
Mabud Moulae zerar gunare ar hishabo dorta nae.
8 Nek-kofali hou zon, zar gunare Allae tar amol-noma taki ḳaṭi disoin.
9 Te nek-kofali ḳali tarareu ḳoa oise ni, zerar mosolmani ḳam ḳorail oise? Mosolmani na ḳorail manshoreo ḳoa oise na ni? Oe, tarareo nek-kofali ḳoa oise. Ḳaron Allar kalamo faisi, Hozrot Ibrahimor imanor lagiu, Allae tanre be-ḳosur ḳalas ḳoia goino ḳorla. 10 Kun shomoe ḳorla? Mosolmani ḳoranir age, na bade? Nichchoe, mosolmani ḳoranir ageu oisla. 11 Mosolmani ḳam ḳoranir ageu Allae tanre imanor lagi be-ḳosur ḳoia goino ḳorsla, ar mosolmani ḳam ḳorani asil er forman ba nishana. E taki buza zae, mosolmani na dileo, ḳali imanor lagi zerare be-ḳosur ḳalas ḳoia dora oe, tarar mul baf oila Hozrot Ibrahim. 12 Mosolmani ḳoranir age Hozrot Ibrahimor iman zelaḳan asil, mosolmani ḳoraia zoto manshe ou imane sole, tararo mul baf oila ou Ibrahim.
Imanor boleu Allai oada furon
13 Alla Pake oada ḳorsla, Hozrot Ibrahim ar tan ḳandanre i duniar doḳoldari diba. Shoriot manar lagi i oada ḳora oise na, borong Ibrahimor imanor lagiu tanre be-ḳosur ḳalas ḳoia goino ḳoria ou oada ḳorsla. 14 Shoriot mania ḳeu zudi doḳoldari failae, te to iman beḳama bonizae ar Allar oadaro kunu dam roe na. 15 Shoriote to Allar gozob lamae. Ashol ḳota oilo, zeḳano shoriot nai, ino shoriot bongor ḳotao nai.
16 Erlagi i oada ḳali manshor imanor mazdi fura ḳora oe, zate iṭa Allar rohomotor dan hishabe roe. Te Ibrahimor ḳandanor gese ze oada ḳora oise, ikan nichchoe fura ḳora oibo. Ḳali shoriot manra oḳolor lagiu furon ḳora oito nae, zera Ibrahimor imanor loge shorik, tarar lagio i oada fura ḳora oe. 17 Allar kalamo zela leḳa ase, “Ami tumare bout zatir mul baf banailam.” Ou hishabe Allar nozoro Ibrahim oila amra hoḳolor mul baf. Zein morare zindegi dein ar zeta oar nae, ota oaita faroin, hou Allar ufre tain iman ansla.
18 Ou Ibrahime zebla aolad faoar kunu asha ḳorar ḳota nae, hou shomoeo tain Allar ufre borosha ḳoria imane mozbut roisoin. Allae tanre ḳoisla, “Tumar ḳandanre ami asmanor terar laḳan behishab ḳormu.” Ar ou ḳotar ufre tain iman anla. 19 Eḳ-sho bosor boeoshor Ibrahime zudio buzchila, hurutta zonom deoar ḳemota ar tan nai, tan bibi Saeraro hurutta oar boeosh shesh oigese, tebou tan iman mozbut asil. 20 Allar oadar befare tan mono kunu shondoe aise na, borong tain imane aro mozbut oia Allar tarif ḳorla. 21 Ibrahime furafur ekin ḳorla, Allae ze oada ḳorsoin, ita fura ḳorar ḳemotao tan ase. 22 Ou ḳaroneu tan imanor lagi tanre be-ḳosur ḳoia goino ḳora oisil. 23 “Be-ḳosur ḳoia goino ḳora oisil,” ikan ḳali Ibrahimor lagi leḳa oise na, 24 amrar lagio leḳa oise. Imanor lagiu Allae amrare be-ḳosur ḳoia goino ḳorba, ḳaron ze Allae amrar malik Isare murda taki zinda ḳorsla, amra tan ufreu iman anchi. 25 Amrar gunar kofora hishabe ou Isare moutor ato tuli deoa oisil, ar amrare be-ḳosur ḳalas ḳoia goino ḳorar lagi tanre murda taki zinda ḳora oisil.