1 Forteḳ manshe deshor razare mania solouk, ḳaron Allar morzi saṛa ḳeu razotto fae na, raza oḳolre to Allaeu godit boain. 2 Erlagi ze manshe deshor razar dushmoni ḳore, he ashole Allai hukumor dushmoni ḳore. Ila ḳam zetae ḳoroin, tara to nizor ufre gozob ḍakia anoin. 3 Ar bala ḳam ḳorra zone to razare ḍoranir kunta nai, oile ku-ḳam ḳorra zonor lagi ḳoṭin bifod. Te tumra kita nirboye roitae sao ni? Taile bala fote aṭo, teu razae tumrar tarif ḳorba. 4 Razae to tumrar balair lagiu Allar ḳadim hishabe ḳam ḳoroin. Oile tumra zera ku-ḳam ḳoro, tumrar lagi bifod ase. Tain ḳamoḳa ḳeurore maroin na, oile ku-ḳam ḳorrare Allar ḳadim hishabe ṭiku shaza dein. 5 Te ḳali shazar ḍore nae, borong zarzir bibeḳor bisareo razar hukum mana zorur.

6 Otar lagiu to tumra ḳazna deo, ḳaron ḳazna tulia ḳoros ḳorar mazdi tara Allar ḳezmot ḳorra. 7 Oḳon zar zela faona, tare ola deo. Zenre ḳazna dibar ḳota, enre ḳazna deo; zenre mashul dibar ḳota, enre mashul deo; zenre ijjot ḳorar ḳota, ene ijjot ḳoro; zenre tazim ḳorar ḳota, ene tazim ḳoro.

8 Ḳali maear rin saṛa dusra kunu befare ḳeuror gese rini oio na. Zano ni, ze manshe oinno zonre maea ḳore, he to shoriotor hukum-ahkam shullo-ana adae ḳorse. 9 Zela shoriotor hukum ase, “Zina ḳorio na, kun ḳorio na, suri ḳorio na, lub-lalos ḳorio na,” ba i laḳan aro zoto hukum ase, i hoḳol hukumre eḳano ḳori ḳoa oise, “Tumar ari-forire nizor laḳan maea ḳoro.” 10 Ar maea taḳle ḳeu ari-forir ḳeti ḳorto fare na, erlagi maea ḳorle furafur shoriotu mana oizae.

11 Te bai oḳol, oḳonkur zomanar halot to tumra zano-u, erlagi buzi-huni solo. Tumra gum taki hozag oar shomoe oigese, ḳaron amra ze shomoe iman anchilam, hou halot takio amrar nazat oḳon aro daro aichche. 12 Rait fuaia hari bian oizar; oḳon zoldi ao, amra andarir bod ḳam saṛia nuror lebas lagai, Allai atiar findilai. 13 Hoi-hulla ḳori mod ḳaia ṭal oa, zina-bodmaishi ba mongoṛa sola, ingsha ar ḳaijja-fosad bad dia, ao, amra dinor fore solra manshor laḳan soli. 14 Finnor lebasor laḳan tumra malik Isa al-Mosire furafur findilao. Shorilor bod ḳaish miṭanir sinta ekkere bad deo.