Asmani Kitab
Bibi Rutor sohifa
Forisiti
Rut namor sohifa oilo huru eḳṭa sohifa. Hozrot Musa (a:)or ufator bad taki Hozrot Daud (a:)or shashon amol salu oar age mazḳanor i 500 bosoror bitre goṭi zaoa bout goṭonar ek goṭona oilo ou Bibi Rutor sohifa. Boni Israil zatie Kenan desho aia boshoti gaṛlo. Ino tarar kunu nirafotta asil na. Hou shomoy asta Kenan desh tara doḳol ḳorto farse na, ar tarar kunu raza-o asil na, oile tarar amir oḳole shomoy shomoy shashon ḳorto. Asta i shomoy dori kali zuddo ar oshanti asil.
Hou zomanat Allar hukum asil, kunu beṭae zudi bou toia niaoladi halote morizae, te tar afon baie tar boure nika ḳorte oibo, zudi afon bai na taḳe, te tar hoḳol taki korib zone tar boure nika ḳorte oibo. Bade ou beṭir goro zonom oa aolade-u oibo tair mora zamair oarish. Bibi Rutor zamai mori zaoar bade Allar hukum moto zamair ḳorib eḳzonor gese Rute hirbar bia boila. Bade tan goro fua-fuṛir zonom oilo. Ar oula-u Bibi Rut Hozrot Daud (a:)or boṛo-ma, mani tan dadar ma oilae.
Ou sohifa taki buza zae, Allar mayar bonda Boni Israil oḳol be-fote gelegi, tarar ufre nanan duk-koshṭo ailo. Ar bin-dormi kunu beṭa-beṭie zudi Allar hukum mania sole, te tar ufre Allar rohomotor zoṛi lame. Ar he Allar mayar bonda bonizae. Ilaḳan ḳori Bibi Rut bin-dormi beṭi oia-o Allar mayar bandi bonigesla.
Agor zomanar boṛo boṛo buzurg oḳlor mote, Hozrot Shamuel (a:)or ate Hozrot Daud (a:)or amolo i sohifaḳan leḳa oise.
Ermaze ase:
(1) Bibi Noyomir foribar Muab desho gelo 1:1-5
(2) Rutre loia Bibi Noyomi baṛit firot aila 1:6-22
(3) Bibi Rute Hozrot Buazor loge deḳa ḳorla 2 ruku
(4) Bibi Rutor biar lagi Noyomir sinta 3 ruku
(5) Hozrot Buazor loge Bibi Rutor shadi 4:1-17
(6) Bibi Rutor fonti Hozrot Daud 4:18-22
1
Bibi Noyomir foribar Muab desho gelo
1-2 Hozrot Daud nobir tin siṛi age amir oḳlor hukumotor amolo, Ehuda desho Ali Malik name eḳ beṭa asla, tan bibir nam Noyomi, Moholun ar Kilion namor tarar dui fua asla. Ou shomoy desho kub bezuita nidan deḳa dilo. Nidanor ṭelae Betelham gaur Ifrata gusṭir ou Ali Malike tan bibi ar fuainre loia Muab desho gelagi. 3 Hono zaoar ḳoydin bade Ali Malik morigela, tan bou Noyomi ar duio fua etim oilo. 4-5 Bade Bibi Noyomie duio fuare ou Muab deshor dui koinar loge shadi dila. Ek koinar nam Rut, arok koinar nam Orpa. Shadir ḳoydin bade duio fua-o morigela. Oula eḳ dosh boros gelo. Bibi Noyomie tan duio boure loia ṛaṛi halote hou Muab desho-u roila.
Rutre loia Bibi Noyomi baṛit firot aila
6 Aḳta eḳdin tain ḳobor faila, tan nizor hou Ehuda desho Mabude borkot nazil ḳoria ḳani-kuraki dan ḳorsoin. 7 Ou ḳobor faia tain duio fuar boure loia hirbar desho zaitagi kori tiar oila. 8 Foto bar oia Bibi Noyomie tan fuar bouainre ḳoila, “O beṭin, tumitain tumartanor maʼr gese zaogi, hono gele tumra shuk faibae. Ma-bafe tumrare bia-shadi diba, tumra noya gor-shongshar ḳorbae. Ar mai oḳolre, amar foribaror loge tumra zela bala bebohar ḳorso, Allae-o tumrar oula balai koroukka, 9 tumrare bala beṭa milai deukka, tumra zate shuḳ-shantie zindegi kaṭaitae faro.” Ḳoia tain tarare ainja ḳori doria maya dila. Teu tara duiozone au au ḳori ḍaḳaia ḳandi kandi koila, 10 “Mai go, amrare-o afnar logkano afnar desho neukkagi.”
11 Hoṛie ḳoila, “Na rego mai, tumra kitallagi amar loge zaitae? Tumrar baf-maʼr gese zaogi. Amar loge gele to lab-ub oito nae. Ila to nae zen amar aro fuain asoin, otar loge tumrare raḳmu, 12 ba ami aroḳ shongshar fatia hou torofa fuar loge tumrare raḳtam farmu. Amar to ar i boyosh-o roise na. Ar roile-o ami aiz rait-u aroḳ shongshar fatia hari amar goro kunu fut zonmile-o, 13 tumra kunu otodin baṛ saibae ni? Tumra zarzir baṛit zaogi, ami to obagi, ḳofal-fuṛa. Shoyong Mabude amar ufre ṭaṭa falai disoin.” 14 Ikan hunia tara au au ḳori kandon dorla. Ḳoto shomoy ḳandia hari Orpae tan hoṛire maya dia bidae loia bafor baṛit gelagi. Oile Rut tan hoṛir loge-u roigela.
15 Ein gia harle hoṛie Rutre ḳoila, “O beṭi, tumar zal to tair nizor baṛi ar devtar gese zargi, te tumi-o tair loge zaogi.”
16 Rute zuaf dila, “Ji na amma, afne ila matoin na zanu, afnar ḳor oia roite amare nished ḳoroin na zanu. Afne zeno-u zain na ḳene ami-o zaimu, afne zeno roiba ami-o ono roimu. Afnar zati-u oibo amar zati, afnar Mabud-u oiba amar Mabud. 17 Ze zagat afne morizibae, ono ami-o morizimu, ar ono-u amar ḳoybor oibo. Ḳali moron saṛa dusra kunutae zudi amare afnar log saṛaito fare, te Allae zanu amare gozobi shasti dein.”
18 Ikan hunia hoṛie ar kunta ḳoila na, tain buzilila Rute tan loge zaito ḳori dil bandilise.
19 Bade tara duiozone aṭa dorla, aṭi aṭi tara Betelham gaut aia fosila. Gaut aite-u gaur beṭinte aia uloistol lagaia ḳoila, “Iyallare, Noyomir ou halot oise ni?” 20 “Oy go shuna, amare ar Noyomi [mani, shuki] ḳoia ḍakio na, Marua [mani, titta] ḳoia ḍakio, Shorbo-shoktiman Allae to amar zindegire titta banailise. 21 Ami obagini kofal-fuṛa. Amare ar kitallagi Noyomi koia ḍakirae? Desh taki geslam bora ate, ar Mabude anla ḳali ate. Shoyong Shorbo-shoktimane-u amar bora ḍubi korilisoin.”
22 Olaḳan ḳori Muabi Rutre loia Noyomie Muab desh saṛia nizor baṛit Betelham gia hamaila. Ou shomoy barli foshol ḳaṭar mousum asil.