Fobitro Injil Shorif 17 nombor sifara
Titas
Forisiti
Alla Pakor hukume ou sifara leḳsoin Hozrot Isa al-Mosir ḳas sahabi Hozrot Paulus (ra:). Hozrot Isae behesto toshrif neoar bade 26–28 bosoror maze ou sifara leḳa oise. Ou shomoy leḳokor murobbi boyosh. Titas name eḳzon zuan manush bin-dormo taki al-Mosir torika kobul ḳorsila. Shomazor gese tan temon beshi nam-ḍaḳ asil na. Ein Hozrot Paulusre Kriti difo toblig kamo shaijjo ḳorsoin, erlagi tan ato hou zomator zimma deoa oise. Bade leḳoḳe Titas namor ou sohifa tan gese leḳsoin.
Leḳoḳe ḳoira, Kriti difo boshot ḳorra naforman shomazor maze, Hozrot Isa al-Mosir ummotor shobab-choritro, sal-cholon kila oa zorur. Ar zomator nanan nomunar ba nanan boyoshor manshore kila talim deoa zae. Esaṛa, zomator maz taki doladoli, ingsha-ninda, baze torko-bitorko bad dia, Allar ḍor-ḳofe Allai rohomote zindegi kaṭanir foramish ase.
Ermaze ase,
(1) Salam ar dua 1:1-4 ayat
(2) Kriti difor zomator saloḳdar neoa 1:5-16
(3) Zomator nanan manshor dayitto 2 ruku
(4) Nek kamor foramish ar hushiari 3:1-11 ayat
(5) Bidayi salam 3:12-15
1
1 Ami Paulus to Alla Pakor gulam ar Hozrot Isa al-Mosir eḳzon sahabi. Amar dayitto oilo, Allar fosond ḳora bonda oḳolre imanor fote ana, ar Allare mania solar maze ze hokikot ase, ou hokikotre sinai deoa. 2 Ami al-Mosir kezmot ḳoriar, aḳeri zindegi faoar ashae. Ze Allae kunu misa matoin na, hou Allae i zindegi deoar oada ḳorsoin, dunia foyda oar age-u. 3 Tain tan kalam shoṭik shomoye zair ḳorsoin, ar amrar toraneala Allar hukum mafik ita toblig korar bar amar ato deoa oise.
4 Amar hou ḳas aolad Titasor gese leḳram, amra duiozon-u eḳoi imane al-Mosir ummot oisi.
Amrar gaibi baf Allae ar toraneala Isa al-Mosie rohomot ar shanti dan ḳoroukka.
Kriti difor zomator saloḳdar neoa
5 Titas huno, ami tumare ou Kriti difo toia aisi, zate zeta ḳam oḳono baki roise, tumi ota furafur adae ḳoro. Ar ami zela hukum dislam, ṭik oula tumi forteḳ ṭaunor zomator murobbi oḳolre ḳamo boail ḳoro. 6 Mono rakio, ze murobbi oḳol bodnam saṛa nikut, zerar ḳali eḳzon bou asoin, zerar fua-fuṛin Isayi imandar, zera beforua babe zindegi kaṭae na, borong ma-bafor baiddo ase, ou murobbire tumi boail ḳoro. 7 Allai kamor zimmadari faoae zekunu saloḳdar zanu bodnam saṛa nikut oin. Tain zanu shoirasar, bodragi, nishakur, maramari korra ba haram ruzi-ruzgaror lalosi na oin. 8 Er bodla tain zanu memandari korra, nek babor ashik, hok-halali, ar Allar baiddo zon oin. Tan bala bisar-buddi taḳe, ar nizore furafur shamlaia raḳta faroin. 9 Alla Pakor ze hok kalam talim faisoin, tain itare mozbut ḳori doria raḳoin, ar ṭik ou laḳan ḳaṭi talim toblig korta faroin. Erloge zera tan bifokke ase, tarar bul-beaḳoli-o dorai dein.
10 Ḳaron bout beshamal manush asoin, zetae ḳeurore manoin na, beḳama mat matoin, sol-soturi koroin. Zetae mosolmani kam ḳoranir lagi zura-zuri koroin, ami kas ḳori otar ḳota-u ḳoiram. 11 Itar muk bond ḳora zorur. Itae ku-fote ṭeḳa ḳamanir ashae ola talim dein, ze talim deoa tarar lagi ṭik nae. I talim dia kunu kunu foribarre bigṛailira. 12 Erlagi tarar nizor deshor eḳzon fonḍite ḳoisoin, “Kriti difor manshe hamesha misa matoin, iguin to zongli zanuaror laḳan, kuṛia ar feṭua.” 13 Ita to eḳdom hasa, erlagi tumi kub gorom oia tarar aib deḳaia deo, zate tarar Isayi iman shullo-ana nikut oy. 14 Ihudi oḳlor banail kichcha-ḳahini, ar zeta manush Allai hokikot taki be-fote gesegi, tara zanu itar hukum-ufodesh ḳano na loin.
15 Zerar dil fak-fobitro, tarar gese hoḳolta-u fobitro. Oile zerar dil nafakie bora, ar zeta beiman, itar gese kunta-u fobitro nae. Itar mon ar bibeḳ hoḳolta-u borbad. 16 Tara mukdi dabi koroin Allare manoin, oile tarar ḳamor mazdi tanre oshikar ḳoroin. Iguin to noforoti ar obaiddo. Itare kunu bala ḳamo lagail zae na.