ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২২ ꠘꠝ꠆ꠛꠞ ꠍꠤꠙꠣꠞꠣ
ꠖꠥꠍꠞꠣ ꠙꠤꠔꠞ
ꠙꠞꠤꠌꠤꠔꠤ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠢꠇꠟ ꠁꠍꠣꠄꠁ ꠁꠝꠣꠘꠖꠣꠞ ꠅꠇꠟꠞ ꠉꠦꠍꠦ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠤꠔꠞꠦ (ꠞꠣ꠩) ꠈꠥꠛ ꠝꠍꠤꠛꠔꠞ ꠢꠣꠟꠔꠦ ꠔꠣꠘ ꠡꠢꠤꠖ ꠅꠀꠞ ꠕꠥꠠꠣ ꠀꠉꠦ ꠁ ꠍꠢꠤꠚꠣ ꠌꠤꠑꠤꠞ ꠀꠇꠣꠞꠦ ꠟꠦꠈꠍꠂꠘ। ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৩২ ꠛꠍꠞ ꠛꠣꠖꠦ ꠁꠈꠣꠘ ꠟꠦꠈꠣ ꠅꠁꠍꠦ।
ꠁ ꠍꠢꠤꠚꠣ ꠟꠦꠈꠣꠞ ꠝꠥꠟ ꠃꠖ꠆ꠖꠦꠡ꠆ꠡ ꠅꠁꠟ, ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠞ ꠜꠥꠟ ꠔꠣꠟꠤꠝꠞ ꠝꠣꠎꠖꠤ ꠎꠦ ꠇꠥ-ꠇꠣꠝ ꠡꠥꠞꠥ ꠅꠁꠍꠤꠟ, ꠄꠞ ꠛꠤꠞꠥꠗꠤꠔꠣ ꠇꠞꠣ। ꠔꠣꠁꠘ ꠁ ꠍꠢꠤꠚꠣꠞ ꠝꠣꠎꠦ ꠛꠣꠔꠣꠁꠍꠂꠘ, ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞꠦ ꠙꠥꠞꠣꠙꠥꠞ ꠌꠤꠘꠟꠦ, ꠁꠔꠣ ꠕꠣꠇꠤ ꠛꠣꠌꠣ ꠎꠣꠄ। ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠦ ꠇꠁꠔꠣ, ꠢꠎꠞꠔ ꠁꠍꠣ ꠖꠥꠍꠞꠣꠛꠣꠞ ꠖꠥꠘꠤꠀꠔ ꠀꠅꠀꠞ ꠇꠥꠘꠥ ꠘꠤꠌ꠆ꠌꠄꠅꠔꠣ ꠘꠣꠁ। ꠅꠁꠟꠦ ꠟꠦꠈꠇꠦ ꠇꠁꠞꠣ, ꠢꠎꠞꠔ ꠁꠍꠣꠄ ꠔꠡꠞꠤꠚ ꠀꠘꠔꠦ ꠖꠦꠞꠤ ꠇꠞꠣ ꠔ ꠀꠟ꠆ꠟꠣꠞ ꠍꠛꠞꠉꠣꠞꠤꠞ ꠘꠤꠡꠣꠘꠣ, ꠀꠍꠟꠦ ꠔꠣꠁꠘ ꠀꠁꠛꠣꠃ ꠀꠁꠛꠣ, ꠀꠁꠀ ꠢꠇꠟꠔꠣꠞ ꠛꠤꠌꠣꠞ ꠇꠞꠛꠣ ꠀꠞ ꠅꠈꠘꠇꠥꠞ ꠢꠇꠟꠔꠣ ꠛꠤꠘꠣꠡ ꠅꠁꠛ। ꠔꠦ ꠅꠃ ꠃꠡ꠆ꠔꠣꠖ ꠅꠇꠟꠞ ꠔꠣꠟꠤꠝ ꠕꠣꠇꠤ ꠢꠥꠡꠤꠀꠞ ꠞꠁꠀ, ꠙꠞꠦꠎꠉꠣꠞ ꠢꠤꠡꠣꠛꠦ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ ꠙꠞꠣꠝꠤꠡ ꠖꠤꠍꠂꠘ।
ꠄꠞꠝꠣꠎꠦ ꠀꠍꠦ,
(ꠇ) ꠍꠣꠟꠣꠝ ꠎꠣꠘꠣꠘꠤ ১:১-২ ꠀꠄꠀꠔ
(ꠈ) ꠝꠥꠝꠤꠘ ꠅꠇꠟꠞꠦ ꠖꠣꠅꠔ ꠀꠞ ꠙꠍꠘ꠆ꠖ ꠇꠞꠣ ১:৩-১৫
(ꠉ) ꠀꠟ-ꠝꠍꠤꠞ ꠉꠃꠞꠛ ꠀꠞ ꠘꠛꠤ ꠅꠇꠟꠞ ꠛꠥꠟꠤ ১:১৬-২১
(ꠊ) ꠜꠘ꠆ꠒ ꠃꠡ꠆ꠔꠣꠖ ২ ꠞꠥꠇꠥ
(ꠌ) ꠢꠎꠞꠔ ꠁꠍꠣꠞ ꠚꠤꠞꠤꠀ ꠀꠅꠀꠞ ꠛꠦꠙꠣꠞꠦ ৩ ꠞꠥꠇꠥ
1
ꠍꠣꠟꠣꠝ ꠎꠣꠘꠣꠘꠤ
1 ꠀꠝꠤ ꠍꠣꠁꠝꠘ-ꠙꠤꠔꠞ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠉꠥꠟꠣꠝ ꠀꠞ ꠍꠣꠢꠣꠛꠤ। ꠔꠥꠝꠞꠣ ꠎꠦꠞꠣ ꠀꠝꠞꠣꠞ ꠟꠣꠈꠣꠘ, ꠀꠝꠞꠣꠞ ꠀꠟ꠆ꠟꠣ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠙꠣꠇ-ꠙꠞꠦꠎꠉꠣꠞꠤꠄ ꠄꠇꠁ ꠟꠣꠈꠣꠘ ꠝꠢꠣ ꠖꠣꠝꠤ ꠁꠝꠣꠘ ꠢꠣꠍꠤꠟ ꠇꠞꠍ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ। 2 ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣꠞꠦ ꠙꠥꠞꠣꠙꠥꠞ ꠌꠤꠘꠣꠞ ꠝꠣꠎꠖꠤ, ꠔꠥꠝꠞꠣꠞ ꠃꠙꠞꠦ ꠛꠦꠡ ꠇꠞꠤ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠅꠃꠇ।
ꠝꠥꠝꠤꠘ ꠅꠇꠟꠞꠦ ꠖꠣꠅꠔ ꠀꠞ ꠙꠍꠘ꠆ꠖ ꠇꠞꠣ
3 ꠎꠦꠁꠘ ꠔꠣꠘ ꠘꠤꠎꠞ ꠝꠢꠤꠝꠣ ꠀꠞ ꠉꠥꠘꠦ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠘꠞꠦ ꠙꠥꠞꠣꠙꠥꠞ ꠌꠤꠘꠣꠞ ꠝꠣꠎꠖꠤ ꠔꠣꠘ ꠇꠥꠖꠞꠔꠦ ꠀꠝꠞꠣ ꠅꠟꠣ ꠘꠤꠀꠝꠔ ꠙꠣꠁꠍꠤ, ꠎꠣꠔꠦ ꠀꠝꠞꠣ ꠙꠞꠦꠎꠉꠣꠞ ꠛꠘꠤꠀ ꠎꠤꠘ꠆ꠖꠦꠉꠤ ꠇꠣꠐꠣꠁ। 4 ꠔꠣꠘ ꠝꠢꠤꠝꠣ ꠀꠞ ꠉꠥꠘꠦ ꠀꠝꠞꠣꠞ ꠟꠉꠦ ꠝꠢꠣ ꠖꠣꠝꠤ ꠀꠞ ꠛꠃꠔ ꠛꠠ ꠛꠠ ꠅꠀꠖꠣ ꠇꠞꠍꠂꠘ, ꠎꠣꠔꠦ ꠔꠥꠝꠞꠣ ꠖꠥꠘꠤꠀꠛꠤ ꠢꠇꠟ ꠛꠖ ꠈꠣꠁꠡ ꠕꠣꠇꠤ ꠛꠣꠌꠤꠀ ꠀꠟ꠆ꠟꠣꠁ ꠉꠥꠘꠞ ꠜꠣꠉꠤ ꠅꠅ।
5 ꠄꠞꠖꠣꠄ ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ, ꠁꠝꠣꠘꠞ ꠟꠉꠦ ꠘꠦꠇ ꠈꠣꠁꠍꠟꠔ, ꠘꠦꠇ ꠈꠣꠁꠍꠟꠔꠞ ꠟꠉꠦ ꠀꠟ-ꠝꠍꠤꠞꠦ ꠌꠤꠘꠣꠞ ꠀꠈꠟ, 6 ꠁ ꠀꠈꠟꠞ ꠟꠉꠦ ꠘꠤꠎꠞꠦ ꠡꠣꠝꠟꠣꠘꠤ, ꠡꠣꠝꠟꠣꠘꠤꠞ ꠟꠉꠦ ꠗꠂꠎ꠆ꠎ ꠀꠞ ꠗꠂꠎ꠆ꠎꠞ ꠟꠉꠦ ꠙꠞꠦꠎꠉꠣꠞꠤ, 7 ꠙꠞꠦꠎꠉꠣꠞꠤꠞ ꠟꠉꠦ ꠄꠇꠦ-ꠅꠁꠘ꠆ꠘꠦ ꠝꠣꠄꠀ, ꠀꠞ ꠄꠇꠦ-ꠅꠁꠘ꠆ꠘꠦ ꠝꠣꠄꠀꠞ ꠟꠉꠦ ꠀꠟ꠆ꠟꠣꠁ ꠝꠢꠛ꠆ꠛꠔꠦ ꠛꠣꠠꠅ। 8 ꠔꠥꠝꠞꠣꠞ ꠝꠣꠎꠦ ꠎꠥꠖꠤ ꠁꠔꠣ ꠉꠥꠘꠣꠉꠥꠘ ꠕꠣꠇꠦ, ꠀꠞ ꠁꠔꠣ ꠜꠞꠤꠀ ꠙꠠꠣꠔ ꠞꠄ, ꠔꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠙꠥꠞꠣꠙꠥꠞ ꠌꠤꠘꠣꠈꠣꠘ ꠔꠥꠝꠞꠣꠞ ꠛꠦꠇꠣꠝꠣ-ꠛꠦꠢꠥꠖꠣ ꠎꠣꠁꠔ ꠘꠣꠄ। 9 ꠅꠁꠟꠦ ꠎꠦ ꠎꠘꠞ ꠝꠣꠎꠦ ꠁꠔꠣ ꠉꠥꠘꠣꠉꠥꠘ ꠘꠣꠁ, ꠢꠦ ꠔ ꠀꠘ꠆ꠖꠣ, ꠢꠦ ꠇꠥꠘ꠆ꠔꠣꠃ ꠛꠥꠎꠦ ꠘꠣ। ꠇꠣꠞꠘ ꠀꠉꠞ ꠎꠦ ꠉꠥꠘꠣ ꠕꠣꠇꠤ ꠔꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ, ꠁꠈꠣꠘ ꠢꠦ ꠚꠣꠃꠞꠤꠟꠤꠍꠦ।
10 ꠄꠞꠟꠣꠉꠤ ꠜꠣꠁ ꠅꠇꠟ ꠢꠥꠘꠅ, ꠀꠟ꠆ꠟꠣꠄ ꠎꠦꠘ ꠢꠣꠍꠣꠃ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠀꠞ ꠙꠍꠘ꠆ꠖ ꠇꠞꠍꠂꠘ, ꠁꠔꠣ ꠘꠤꠌ꠆ꠌꠤꠔ ꠇꠞꠣꠞ ꠟꠣꠉꠤ ꠀꠞꠅ ꠛꠦꠡꠤ ꠈꠤꠀꠟꠤ ꠅꠅ। ꠁꠟꠣ ꠇꠞꠟꠦ ꠔꠥꠝꠞꠣ ꠇꠥꠘꠥ ꠡꠝꠄ ꠃꠡ꠆ꠐꠣ ꠈꠣꠁꠔꠣꠄ ꠘꠣꠄ। 11 ꠀꠞ ꠀꠝꠞꠣꠞ ꠝꠣꠟꠤꠇ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠢꠣꠝꠦꠡꠣꠇꠥꠞ ꠛꠣꠖꠡꠣꠁꠔ ꠔꠥꠝꠞꠣꠞꠦ ꠀꠖꠞ ꠇꠞꠤ ꠢꠣꠞꠣꠁꠟ ꠅꠁꠛ।
12 ꠄꠞꠟꠣꠉꠤ, ꠀꠝꠤ ꠢꠣꠝꠦꠡꠣ ꠔꠥꠝꠞꠣꠞꠦ ꠅꠔꠣ ꠛꠦꠙꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ, ꠎꠥꠖꠤꠅ ꠁꠔꠣ ꠔꠥꠝꠞꠣꠞ ꠎꠣꠘꠣ ꠀꠍꠦ ꠀꠞ ꠔꠥꠝꠞꠣꠞ ꠉꠦꠍꠦ ꠎꠦ ꠢꠇꠤꠇꠔ ꠀꠁꠍꠦ, ꠁꠔꠣꠔ ꠕꠤꠞꠅ ꠀꠍ। 13 ꠀꠍꠟꠦ ꠀꠝꠤ ꠝꠘꠅ ꠇꠞꠞꠣꠝ, ꠀꠝꠤ ꠎꠔꠖꠤꠘ ꠔꠣꠝ꠆ꠛꠥꠞ ꠟꠣꠈꠣꠘ ꠅꠃ ꠡꠞꠤꠟꠦ ꠛꠣꠌꠤꠀ ꠞꠁꠝꠥ, ꠅꠔꠖꠤꠘ ꠔꠥꠝꠞꠣꠞꠦ ꠅꠔꠣ ꠝꠘꠅ ꠇꠞꠣꠁ ꠖꠤꠀ ꠢꠎꠣꠉ ꠞꠣꠈꠣ ꠃꠌꠤꠔ। 14 ꠇꠣꠞꠘ ꠀꠝꠤ ꠔ ꠀꠞ ꠛꠦꠡꠤ ꠖꠤꠘ ꠅꠃ ꠡꠞꠤꠟꠦ ꠞꠁꠔꠣꠝ ꠘꠣꠄ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠁꠈꠣꠘ ꠀꠝꠣꠞꠦ ꠙꠞꠤꠡ꠆ꠇꠣꠞ ꠎꠣꠘꠣꠁ ꠖꠤꠍꠂꠘ। 15 ꠔꠦ ꠀꠝꠣꠞ ꠝꠃꠔꠞ ꠛꠣꠖꠦꠅ ꠢꠣꠝꠦꠡꠣ ꠎꠣꠔꠦ ꠅꠔꠣ ꠝꠘꠅ ꠞꠣꠈꠔꠣꠄ ꠙꠣꠞ, ꠀꠝꠤ ꠅꠃ ꠝꠦꠘꠔꠅ ꠇꠞꠝꠥ।
ꠀꠟ-ꠝꠍꠤꠞ ꠉꠃꠞꠛ ꠀꠞ ꠘꠛꠤ ꠅꠇꠟꠞ ꠛꠥꠟꠤ
16 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠔꠣꠘ ꠢꠤꠞꠛꠣꠞ ꠔꠡꠞꠤꠚ ꠀꠘꠣꠞ ꠇꠕꠣ ꠎꠣꠘꠣꠘꠤꠔ ꠉꠤꠀ, ꠀꠝꠞꠣ ꠇꠥꠘꠥ ꠛꠣꠘꠣꠁꠟ ꠇꠤꠌ꠆ꠍꠣ ꠇꠁꠍꠤ ꠘꠣ। ꠀꠝꠞꠣ ꠔ ꠘꠤꠎꠞ ꠌꠃꠈꠦ ꠔꠣꠘ ꠝꠢꠤꠝꠣ ꠖꠦꠈꠍꠤ। 17 ꠀꠍꠝꠣꠘ ꠕꠣꠇꠤ ꠎꠣꠟꠣꠟ ꠀꠞ ꠡꠣꠘꠞ ꠎꠦ ꠀꠅꠀꠎ ꠀꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠄꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ,” ꠅꠃ ꠀꠅꠀꠎꠞ ꠝꠣꠎꠖꠤ ꠀꠟ-ꠝꠍꠤꠄ ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠁꠎ꠆ꠎꠔ ꠀꠞ ꠉꠃꠞꠛ ꠙꠣꠁꠍꠂꠘ। 18 ꠀꠝꠞꠣ ꠎꠦꠛꠟꠣ ꠔꠣꠘ ꠟꠉꠦ ꠢꠃ ꠙꠛꠤꠔ꠆ꠞ ꠙꠣꠠꠅ ꠀꠍꠟꠣꠝ, ꠅꠃ ꠡꠝꠄ ꠘꠤꠎꠞ ꠇꠣꠘꠦ ꠛꠦꠢꠦꠡ꠆ꠔꠞ ꠅꠃ ꠉꠣꠁꠛꠤ ꠀꠅꠀꠎ ꠢꠥꠘꠍꠤ।
19 ꠀꠞ ꠀꠝꠞꠣꠞ ꠟꠣꠉꠤ ꠀꠞꠅ ꠛꠠ ꠙꠞꠝꠣꠘ ꠅꠁꠟ, ꠙꠣꠇ ꠇꠤꠔꠣꠛꠅ ꠘꠛꠤ ꠅꠇꠟꠦ ꠎꠔꠔꠣ ꠛꠣꠔꠣꠁ ꠉꠦꠍꠂꠘ। ꠀꠘ꠆ꠖꠣꠞꠤꠞ ꠝꠣꠎꠦ ꠔꠥꠝꠞꠣꠞ ꠌꠃꠈ ꠎꠦꠟꠣꠈꠣꠘ ꠞꠥꠡꠘꠤꠞ ꠛꠣꠄ ꠕꠣꠇꠦ, ꠑꠤꠇ ꠅꠟꠣꠈꠣꠘ ꠎꠔ ꠡꠝꠄ ꠛꠤꠀꠘ ꠅꠁꠍꠦ ꠘꠣ ꠀꠞ ꠔꠥꠝꠞꠣꠞ ꠖꠤꠟꠅ ꠚꠎꠞꠞ ꠡꠥꠇ-ꠔꠦꠞꠣ ꠃꠑꠍꠦ ꠘꠣ, ꠅꠔ ꠡꠝꠄ ꠔꠥꠝꠞꠣ ꠘꠛꠤ ꠅꠇꠟꠞ ꠇꠕꠣꠄ ꠈꠤꠀꠟꠤ ꠅꠅ, ꠔꠦꠃ ꠔꠥꠝꠞꠣꠞ ꠜꠣꠟꠣ ꠅꠁꠛ। 20 ꠀꠞ ꠈꠣꠍ ꠇꠞꠤ ꠝꠘꠅ ꠞꠣꠈꠤꠅ, ꠇꠤꠔꠣꠛꠞ ꠝꠣꠎꠞ ꠇꠥꠘꠥ ꠇꠕꠣ ꠘꠛꠤ ꠅꠇꠟꠞ ꠝꠘꠉꠠꠣ ꠘꠣꠄ। 21 ꠇꠣꠞꠘ ꠘꠛꠤ ꠅꠇꠟꠦ ꠔꠣꠞꠣꠞ ꠁꠌ꠆ꠍꠣꠝꠔ ꠇꠥꠘꠥ ꠇꠕꠣ ꠇꠁꠍꠂꠘ ꠘꠣ, ꠈꠣꠟꠤ ꠙꠣꠇ ꠞꠥꠢꠥꠞ ꠛꠟꠦ ꠀꠟ꠆ꠟꠣꠞ ꠖꠦꠅꠀ ꠛꠥꠟꠤ ꠛꠣꠔꠣꠁꠍꠂꠘ।