1 ꠅ ꠜꠣꠁ ꠅꠇꠟ, ꠢꠦꠡ-ꠝꠦꠡ ꠇꠁꠞꠣꠝ, ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ, ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠝꠣꠎꠦ ꠎꠦꠟꠣ ꠎꠟꠖꠤ ꠎꠟꠖꠤ ꠍꠤꠔ꠆ꠞꠤꠍꠤꠟ, ꠅꠃꠟꠣ ꠎꠣꠘꠥ ꠖꠤꠘ ꠖꠤꠘ ꠍꠤꠔ꠆ꠞꠣꠔ ꠞꠄ ꠀꠞ ꠉꠃꠞꠛ ꠙꠣꠅꠀꠔ ꠞꠄ। 2 ꠀꠞ ꠅꠃ ꠖꠥꠀꠈꠣꠘꠅ ꠇꠞꠤꠅ, ꠀꠝꠞꠣ ꠎꠣꠘꠥ ꠛꠤꠛꠦꠇ ꠍꠣꠠꠣ ꠘꠣꠚꠞꠝꠣꠘ ꠅꠇꠟꠞ ꠀꠔ ꠕꠣꠇꠤ ꠞꠦꠢꠣꠁ ꠙꠣꠁ। ꠡꠛ ꠝꠣꠘꠥꠡ ꠔ ꠀꠞ ꠁꠝꠣꠘꠖꠣꠞ ꠘꠣꠄ। 3 ꠅꠁꠟꠦ ꠝꠣꠟꠤꠇ ꠁꠍꠣ ꠔ ꠢꠇ ꠀꠞ ꠈꠣꠐꠤ, ꠔꠣꠁꠘꠃ ꠔꠥꠝꠞꠣꠞꠦ ꠁꠝꠣꠘꠦ ꠕꠤꠞ ꠞꠣꠈꠛꠣ ꠀꠞ ꠡꠄꠔꠣꠘꠞ ꠀꠔ ꠕꠣꠇꠤ ꠢꠣꠝꠦꠡꠣ ꠢꠦꠚꠣꠎꠔ ꠇꠞꠛꠣ। 4 ꠝꠣꠟꠤꠇꠞ ꠃꠙꠞꠦ ꠁꠝꠣꠘ ꠀꠘꠍ ꠇꠞꠤ ꠔꠥꠝꠞꠣꠞ ꠃꠙꠞꠦ ꠀꠝꠞꠣꠞ ꠁ ꠄꠇꠤꠘ ꠀꠍꠦ, ꠀꠝꠞꠣ ꠎꠦꠟꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣ ꠑꠤꠇ ꠅꠃ ꠟꠣꠈꠣꠘ ꠇꠣꠝ ꠇꠞꠞꠣꠄ ꠀꠞ ꠇꠞꠣꠔ ꠞꠁꠛꠣꠄꠅ। 5 ꠝꠣꠟꠤꠇ ꠁꠍꠣꠄ ꠎꠣꠘꠥ ꠔꠥꠝꠞꠣꠞ ꠖꠤꠟꠞꠦ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠙꠕꠦ ꠀꠞ ꠀꠟ-ꠝꠍꠤꠞ ꠍꠛꠞꠞ ꠙꠕꠦ ꠌꠣꠟꠥ ꠞꠣꠈꠂꠘ।

6 ꠜꠣꠁ ꠅꠇꠟ, ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣꠞ ꠎꠝꠣꠔꠞ ꠇꠥꠘꠥ ꠁꠝꠣꠘꠖꠣꠞ ꠜꠣꠁꠄ ꠎꠥꠖꠤ ꠇꠥꠠꠤꠀꠝꠤ ꠇꠞꠦ ꠀꠞ ꠀꠝꠞꠣ ꠎꠦꠔꠣ ꠔꠣꠟꠤꠝ ꠖꠤꠍꠤ, ꠁꠔꠣ ꠘꠣ ꠝꠣꠘꠦ, ꠔꠦ ꠔꠣꠞ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠅ। 7 ꠢꠥꠘꠅ, ꠀꠝꠞꠣꠞ ꠟꠣꠈꠣꠘ ꠇꠦꠝꠘꠦ ꠌꠟꠔꠣꠄ, ꠁꠔꠣ ꠔ ꠔꠥꠝꠞꠣ ꠎꠣꠘꠃ। ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ, ꠅꠃ ꠡꠝꠄ ꠔ ꠇꠥꠘꠥꠎꠣꠔ ꠇꠥꠠꠤꠀꠝꠤ ꠇꠞꠍꠤ ꠘꠣ, 8 ꠝꠣꠉꠘꠣ ꠇꠥꠘꠥ ꠈꠣꠘꠤ ꠈꠣꠁꠍꠤ ꠘꠣ। ꠀꠝꠞꠣ ꠖꠤꠘꠦ-ꠞꠣꠁꠔꠦ ꠝꠦꠘꠔ ꠇꠞꠤꠀ ꠞꠥꠎꠤ-ꠞꠥꠎꠉꠣꠞ ꠇꠞꠍꠤ, ꠎꠣꠔꠦ ꠔꠥꠝꠞꠣ ꠇꠦꠃꠞꠞ ꠛꠥꠏꠣ ꠘꠣ ꠅꠁ। 9 ꠅꠁꠟꠦ ꠀꠝꠞꠣ ꠎꠦꠘ ꠔꠥꠝꠞꠣꠞ ꠉꠦꠍ ꠕꠣꠇꠤ ꠡꠣꠁꠎ꠆ꠎ ꠘꠤꠛꠣꠞ ꠅꠗꠤꠇꠣꠞ ꠘꠣꠁ, ꠁꠟꠣ ꠔ ꠘꠣꠄ, ꠔꠣ-ꠅ ꠀꠝꠞꠣ ꠅꠟꠣ ꠇꠞꠤꠀ ꠖꠦꠈꠣꠁꠍꠤ, ꠎꠣꠔꠦ ꠔꠥꠝꠞꠣꠅ ꠀꠝꠞꠣꠞ ꠟꠣꠈꠣꠘ ꠌꠟ। 10 ꠔꠥꠝꠞꠣꠞ ꠉꠦꠍꠦ ꠕꠣꠇꠣꠞ ꠇꠣꠟꠅ ꠔꠣꠟꠤꠝ ꠖꠤꠍꠟꠣꠝ, ꠇꠥꠘꠥ ꠎꠘꠦ ꠎꠥꠖꠤ ꠇꠣꠝ ꠇꠞꠔ ꠘꠣ ꠌꠣꠄ, ꠔꠦ ꠢꠦ ꠈꠣꠘꠤꠅ ꠛꠣꠖ ꠖꠤꠟꠣꠃꠇ। 11 ꠀꠝꠞꠣ ꠅꠈꠘꠅ ꠢꠥꠘꠞꠣꠝ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠦꠃ ꠇꠥꠠꠤꠀꠝꠤ ꠇꠞꠦꠞ ꠀꠞ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠦꠞ ꠘꠣ, ꠛꠞꠋ ꠢꠣꠝꠦꠡꠣ ꠙꠞꠞ ꠇꠤꠌ꠆ꠍꠣ ꠉꠣꠁꠀ ꠖꠤꠘ ꠇꠣꠐꠣꠄ। 12 ꠔꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠅꠁꠀ ꠁꠔꠣ ꠝꠣꠘꠡꠞꠦ ꠘꠍꠤꠅꠔ ꠀꠞ ꠢꠥꠇꠥꠝ ꠖꠤꠀꠞ, ꠔꠣꠞꠣ ꠎꠣꠘꠥ ꠡꠣꠘ꠆ꠔꠤ ꠅꠁꠀ ꠞꠥꠎꠤ-ꠞꠥꠎꠉꠣꠞ ꠇꠞꠤꠀ ꠈꠣꠄ, ꠀꠞ ꠘꠤꠎꠞ ꠈꠣꠘꠤ ꠘꠤꠎꠦ ꠎꠥꠉꠣꠄ।

13 ꠜꠣꠁꠀꠁꠘꠞꠦ, ꠘꠦꠇ ꠇꠣꠝꠅ ꠢꠦꠞꠣꠘ ꠅꠁꠅ ꠘꠣ। 14 ꠅꠃ ꠌꠤꠑꠤꠞ ꠜꠣꠡꠣꠄ ꠟꠦꠈꠣ ꠀꠝꠞꠣꠞ ꠙꠞꠣꠝꠤꠡ ꠎꠥꠖꠤ ꠇꠦꠃ ꠘꠣ ꠝꠣꠘꠦ, ꠔꠦ ꠔꠣꠞꠦ ꠌꠤꠘꠤꠀ ꠞꠣꠈꠅ, ꠔꠣꠞ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠅ, ꠔꠦꠃ ꠢꠦ ꠡꠞꠝꠤꠘ꠆ꠖꠣ ꠅꠁꠛ। 15 ꠅꠁꠟꠦ ꠈꠤꠀꠟ ꠞꠣꠈꠤꠅ, ꠔꠣꠞꠦ ꠖꠥꠡꠝꠘ ꠝꠘꠅ ꠇꠞꠤꠅ ꠘꠣ, ꠛꠞꠋ ꠜꠣꠁ ꠢꠤꠡꠣꠛꠦ ꠢꠥꠡꠤꠀꠞ ꠇꠞꠅ।

16 ꠡꠣꠘ꠆ꠔꠤ ꠖꠦꠅꠞꠣ ꠝꠣꠟꠤꠇꠦ ꠔꠥꠝꠞꠣꠞꠦ ꠢꠣꠝꠦꠡꠣ ꠢꠇꠟ ꠘꠝꠥꠘꠣꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ। ꠝꠣꠟꠤꠇ ꠁꠍꠣ ꠔꠥꠝꠞꠣ ꠢꠇꠟꠞ ꠟꠉꠦ ꠟꠉꠦ ꠞꠃꠇ꠆ꠇꠣ।

17 ꠢꠥꠘꠅ, ꠁ ꠍꠣꠟꠣꠝꠞ ꠇꠕꠣ ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠟꠦꠈꠍꠤ। ꠅꠇꠐꠣꠃ ꠀꠝꠣꠞ ꠙꠞꠔꠦꠇ ꠌꠤꠑꠤꠞ ꠀꠟꠣꠝꠔ, ꠀꠝꠤ ꠅꠃ ꠘꠝꠥꠘꠣꠄ ꠌꠤꠑꠤ ꠟꠦꠈꠤ। 18 ꠔꠥꠝꠞꠣ ꠢꠇꠟꠞ ꠃꠙꠞꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠎꠣꠞꠤ ꠞꠃꠇ। ꠀꠝꠤꠘ॥