1 ꠢꠎꠞꠔ ꠙꠣꠃꠟꠥꠍ ꠙꠄꠟꠣ ꠖꠞ꠆ꠛꠤ ꠀꠞ ꠛꠣꠖꠦ ꠟꠥꠡ꠆ꠞꠣ ꠐꠣꠃꠘꠅ ꠉꠤꠀ ꠀꠎꠤꠟꠣ। ꠟꠥꠡ꠆ꠞꠣꠔ ꠔꠤꠝꠕꠤ ꠘꠣꠝꠦ ꠄꠇꠎꠘ ꠃꠝ꠆ꠝꠔ ꠀꠍꠟꠣ, ꠔꠣꠘ ꠝꠣ ꠁꠝꠣꠘꠖꠣꠞ, ꠝꠣ ꠔ ꠁꠢꠥꠖꠤ ꠎꠣꠔꠞ, ꠅꠁꠟꠦ ꠛꠣꠚ ꠁꠃꠘꠣꠘꠤ ꠎꠣꠔꠞ। 2 ꠟꠥꠡ꠆ꠞꠣ ꠀꠞ ꠁꠇꠘꠤꠅ ꠐꠣꠃꠘꠞ ꠢꠇꠟ ꠁꠝꠣꠘꠖꠣꠞꠦ ꠔꠤꠝꠕꠤꠞ ꠛꠃꠔ ꠔꠣꠞꠤꠚ ꠇꠞꠔꠣ। 3 ꠙꠣꠃꠟꠥꠍꠦ ꠔꠤꠝꠕꠤꠞꠦ ꠟꠉꠦ ꠘꠤꠔꠣ ꠇꠞꠤ ꠈꠤꠀꠟ ꠇꠞꠟꠣ; ꠔꠣꠁꠘ ꠔꠤꠝꠕꠤꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ, ꠇꠣꠞꠘ ꠢꠤ ꠎꠣꠉꠣꠁꠘ꠆ꠔꠞ ꠁꠢꠥꠖꠤ ꠅꠇꠟꠦ ꠎꠣꠘꠔꠣ ꠔꠤꠝꠕꠤꠞ ꠛꠣꠚ ꠅꠁꠟꠣ ꠁꠃꠘꠣꠘꠤ ꠎꠣꠔꠞ ꠝꠣꠘꠥꠡ। 4 ꠎꠦꠞꠥꠎꠣꠟꠦꠝ ꠎꠝꠣꠔꠞ ꠍꠣꠢꠣꠛꠤ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠎꠦꠔꠣ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠐꠣꠃꠘꠦ ꠐꠣꠃꠘꠦ ꠍꠚꠞ ꠇꠞꠤ ꠇꠞꠤ ꠁꠔꠣ ꠝꠥꠝꠤꠘ ꠅꠇꠟꠞ ꠀꠔꠅ ꠡꠝꠎꠣꠁꠟꠣ ꠀꠞ ꠝꠣꠘꠣꠞ ꠔꠣꠉꠤꠖ ꠖꠤꠟꠣ। 5 ꠅꠃꠟꠣ ꠎꠝꠣꠔꠞ ꠝꠥꠝꠤꠘ ꠅꠇꠟꠞ ꠁꠝꠣꠘ ꠝꠎꠛꠥꠔ ꠅꠁꠟ, ꠀꠞ ꠖꠤꠘꠦ ꠖꠤꠘꠦ ꠔꠣꠞꠣꠞ ꠙꠞꠤꠝꠣꠘ ꠀꠞꠅ ꠛꠣꠠꠤꠟ।

6 ꠙꠣꠇ ꠞꠥꠢꠦ ꠢꠎꠞꠔ ꠙꠣꠃꠟꠥꠍ ꠀꠞ ꠔꠣꠘ ꠟꠉꠞ ꠢꠇꠟꠞꠦ ꠀꠍꠤꠀ ꠖꠦꠡꠅ ꠇꠣꠟꠣꠝ ꠔꠛꠟꠤꠉ ꠇꠞꠔꠦ ꠝꠣꠘꠣ ꠇꠞꠟꠣ, ꠔꠦꠃ ꠔꠣꠞꠣ ꠚꠞꠥꠉꠤꠀ ꠀꠞ ꠉꠣꠟꠣꠔꠤꠀ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁꠀ ꠉꠦꠟꠣ। 7 ꠉꠤꠀ ꠝꠥꠡꠤꠀꠞ ꠡꠤꠝꠣꠘꠣꠔ ꠀꠁꠀ ꠢꠣꠞꠟꠦ ꠛꠤꠕꠥꠘꠤꠀ ꠖꠦꠡꠅ ꠎꠣꠁꠔꠣ ꠌꠣꠁꠟꠣ, ꠅꠁꠟꠦ ꠁꠍꠣꠞ ꠞꠥꠢꠦ ꠔꠣꠞꠣꠞꠦ ꠢꠤꠈꠣꠘꠅ ꠎꠣꠁꠔꠦ ꠖꠤꠟꠣ ꠘꠣ, 8 ꠄꠞꠖꠣꠄ ꠔꠣꠞꠣ ꠝꠥꠡꠤꠀ ꠖꠦꠡ ꠚꠣꠟꠣꠁꠀ ꠔꠞꠥꠀꠍ ꠐꠣꠃꠘꠅ ꠉꠦꠟꠣꠉꠤ। 9 ꠞꠣꠁꠔꠞ ꠛꠣꠟꠣ ꠙꠣꠃꠟꠥꠍꠦ ꠉꠣꠁꠛꠤ ꠄꠇ ꠖꠞꠡꠘ ꠙꠣꠁꠟꠣ; ꠔꠣꠁꠘ ꠖꠦꠈꠟꠣ, ꠝꠣꠇꠤꠖꠘꠤꠀ ꠖꠦꠡꠞ ꠄꠇ ꠛꠦꠐꠣꠄ ꠃꠛꠣꠁꠀ ꠔꠣꠘꠞꠦ ꠝꠤꠘꠔ ꠇꠞꠤ ꠇꠁꠞꠣ, “ꠝꠣꠇꠤꠖꠘꠤꠀꠔ ꠙꠣꠞ ꠅꠁꠀ ꠀꠁꠀ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠃꠇ꠆ꠇꠣ।” 10 ꠔꠣꠁꠘ ꠁ ꠀꠟꠣꠝꠔ ꠖꠦꠈꠣꠞ ꠛꠣꠖꠦꠃ ꠀꠝꠞꠣ ꠝꠣꠇꠤꠖꠘꠤꠀꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠅꠁꠟꠣꠝ, ꠀꠝꠞꠣ ꠛꠥꠎꠟꠣꠝ, ꠝꠣꠇꠤꠖꠘꠤꠀꠞ ꠝꠣꠘꠡꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ ꠀꠟ꠆ꠟꠣꠄ ꠀꠝꠞꠣꠞꠦ ꠙꠣꠑꠣꠁꠞꠣ।

11 ꠅꠃ ꠀꠝꠞꠣ ꠔꠞꠥꠀꠍ ꠍꠣꠠꠤꠀ ꠎꠣꠎꠅ ꠇꠞꠤ ꠡꠥꠎꠣ ꠍꠣꠝꠕ꠆ꠞꠣꠇꠤ ꠖꠤꠙꠅ ꠉꠦꠟꠣꠝ, ꠢꠤꠘ ꠕꠣꠇꠤ ꠛꠣꠖꠞ ꠖꠤꠘ ꠘꠤꠀꠙꠟꠤ ꠐꠣꠃꠘꠅ ꠉꠤꠀ ꠀꠎꠤꠟꠣꠝ। 12 ꠘꠤꠀꠙꠟꠤ ꠕꠣꠇꠤ ꠀꠝꠞꠣ ꠚꠤꠟꠤꠙꠤ ꠐꠣꠃꠘꠅ ꠉꠦꠟꠣꠝ। ꠁꠐꠣ ꠅꠁꠟ ꠝꠣꠇꠤꠖꠘꠤꠀꠞ ꠢꠇꠟ ꠕꠣꠇꠤ ꠛꠠ ꠐꠣꠃꠘ, ꠁꠘꠅ ꠞꠥꠝꠣꠘ ꠞꠣꠎꠣꠞ ꠝꠣꠘꠥꠡ ꠛꠡꠔ ꠇꠞꠔꠣ। ꠀꠝꠞꠣ ꠇꠄꠖꠤꠘ ꠅꠘꠅ ꠞꠁꠟꠣꠝ। 13 ꠄꠇ ꠎꠥꠝ꠆ꠝꠣꠛꠣꠞꠦ ꠀꠝꠞꠣ ꠐꠣꠃꠘꠞ ꠛꠣꠁꠞꠣ ꠉꠣꠋꠉꠞ ꠙꠣꠞꠅ ꠉꠦꠟꠣꠝ, ꠝꠘꠅ ꠇꠞꠟꠣꠝ, ꠢꠤꠈꠣꠘꠅ ꠁꠢꠥꠖꠤ ꠗꠞ꠆ꠝꠞ ꠖꠥꠀ ꠇꠞꠣꠞ ꠇꠥꠘꠥ ꠎꠣꠉꠣ ꠀꠍꠦ। ꠢꠤꠘꠅ ꠉꠤꠀ ꠀꠝꠞꠣ ꠛꠦꠐꠤꠘ꠆ꠔꠞ ꠄꠇ ꠖꠟ ꠖꠦꠈꠤꠀ ꠔꠣꠞꠣꠞ ꠟꠉꠦ ꠝꠣꠔꠅ ꠛꠁꠟꠣꠝ। 14 ꠀꠞ ꠄꠞꠣꠞ ꠝꠣꠎꠦ ꠕꠥꠀꠔꠤꠞꠣ ꠐꠣꠃꠘꠞ ꠟꠥꠖꠤꠀ ꠘꠣꠝꠞ ꠅ-ꠁꠢꠥꠖꠤ ꠀꠟ꠆ꠟꠣꠞꠣꠁꠀ ꠄꠇ ꠛꠦꠐꠤ ꠝꠣꠘꠥꠡ ꠀꠍꠟꠣ, ꠄꠁꠘ ꠛꠣꠁꠋꠉꠘꠤ ꠞꠋꠉꠞ ꠈꠣꠘ꠆ꠖꠣꠘꠤ ꠇꠣꠙꠠꠞ ꠇꠣꠞꠛꠣꠞ ꠇꠞꠔꠣ। ꠔꠣꠁꠘ ꠀꠝꠞꠣꠞ ꠛꠄꠀꠘ ꠢꠥꠘꠣꠔ ꠀꠍꠟꠣ, ꠀꠞ ꠝꠣꠛꠥꠖꠦ ꠔꠣꠘ ꠖꠤꠟꠞ ꠖꠥꠀꠞ ꠈꠥꠟꠤꠀ ꠖꠤꠟꠣꠁꠟꠣ, ꠎꠣꠔꠦ ꠔꠣꠁꠘ ꠙꠣꠃꠟꠥꠍꠞ ꠛꠄꠀꠘ ꠖꠤꠟ ꠖꠤꠀ ꠢꠥꠘꠂꠘ। 15 ꠔꠣꠁꠘ ꠀꠞ ꠔꠣꠘ ꠊꠞꠞ ꠢꠇꠟꠦ ꠔꠃꠛꠣꠞ ꠉꠥꠍꠟ ꠇꠞꠤꠀ ꠢꠣꠞꠟꠦ ꠔꠣꠁꠘ ꠝꠤꠘꠔ ꠇꠞꠤ ꠇꠁꠟꠣ, “ꠀꠙꠘꠣꠞꠣ ꠎꠥꠖꠤ ꠀꠝꠣꠞꠦ ꠝꠣꠟꠤꠇꠞ ꠃꠙꠞꠦ ꠁꠝꠣꠘꠖꠣꠞ ꠝꠘꠅ ꠇꠞꠂꠘ, ꠔꠦ ꠀꠝꠣꠞ ꠛꠣꠠꠤ ꠈꠣꠘꠅ ꠀꠁꠀ ꠞꠃꠇ꠆ꠇꠣ।” ꠇꠁꠀ ꠔꠣꠁꠘ ꠎꠥꠞꠦ ꠎꠣꠔꠤꠀ ꠀꠝꠞꠣꠞꠦ ꠔꠣꠘ ꠛꠣꠠꠤꠔ ꠘꠤꠟꠣꠉꠤ।

16 ꠄꠇꠖꠤꠘ ꠀꠝꠞꠣ ꠎꠦꠛꠟꠣ ꠢꠃ ꠖꠥꠀ ꠇꠞꠣꠞ ꠎꠣꠉꠣꠔ ꠎꠣꠅꠀꠔ ꠀꠍꠟꠣꠝ, ꠅꠃ ꠡꠝꠄ ꠎꠤꠘ꠆ꠘꠣꠔ ꠡꠣꠗꠇꠤ ꠄꠇ ꠛꠣꠘ꠆ꠖꠤ ꠛꠦꠐꠤ ꠀꠈꠔꠣꠃ ꠀꠝꠞꠣꠞ ꠍꠣꠝꠘꠦ ꠀꠁꠟ। ꠔꠣꠁ ꠜꠣꠁꠉ꠆ꠉ ꠉꠘꠤꠀ ꠔꠣꠁꠞ ꠉꠤꠞꠡ꠆ꠔ ꠅꠇꠟꠞꠦ ꠛꠃꠔ ꠟꠣꠜ ꠇꠞꠣꠁꠔ। 17 ꠔꠣꠁ ꠀꠝꠞꠣꠞ ꠈꠞꠦ ꠈꠞꠦ ꠀꠁꠀ ꠌꠤꠟ꠆ꠟꠣꠁꠀ ꠇꠁꠟ, “ꠁ ꠝꠣꠘꠥꠡ ꠉꠥꠁꠘ ꠃꠙꠞꠀꠟꠣꠞ ꠡꠦꠛꠇ, ꠄꠞꠣ ꠔꠥꠝꠞꠣꠞꠦ ꠔꠞꠣꠘꠤꠞ ꠙꠕ ꠖꠦꠈꠣꠁ ꠖꠤꠞꠣ।” 18 ꠔꠣꠁ ꠛꠃꠔ ꠖꠤꠘ ꠗꠞꠤ ꠁꠔꠣ ꠇꠞꠍꠤꠟ, ꠄꠇꠖꠤꠘ ꠙꠣꠃꠟꠥꠍꠦ ꠛꠤꠞꠇ꠆ꠔ ꠅꠁꠀ ꠔꠣꠁꠞ ꠛꠣꠄ ꠝꠥꠈ ꠚꠤꠞꠣꠁꠀ ꠢꠃ ꠎꠤꠘꠞꠦ ꠇꠁꠟꠣ, “ꠀꠝꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠣꠞꠦ ꠁ ꠢꠥꠇꠥꠝ ꠖꠤꠞꠣꠝ, ꠔꠥꠝꠤ ꠁ ꠛꠦꠐꠤꠞ ꠉꠦꠍ ꠕꠣꠇꠤ ꠛꠣꠞ ꠅꠁꠀ ꠎꠣꠅꠉꠤ!” ꠀꠞ ꠟꠉꠦ ꠟꠉꠦꠃ ꠢꠤ ꠎꠤꠘ ꠛꠣꠞ ꠅꠁꠀ ꠉꠦꠟꠉꠤ।

19 ꠅꠁꠟꠦ ꠔꠣꠁꠞ ꠝꠥꠘꠤꠛ ꠅꠇꠟꠦ ꠔꠣꠞꠣꠞ ꠟꠣꠜ ꠚꠥꠠꠣꠁꠉꠦꠟ ꠖꠦꠈꠤꠀ, ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠗꠞꠤꠀ ꠐꠣꠘꠤꠀ ꠡꠖꠞꠅ ꠟꠁꠀ ꠉꠦꠟꠣ। 20 ꠛꠣꠖꠦ ꠢꠣꠇꠤꠝ ꠅꠇꠟꠞ ꠉꠦꠍꠦ ꠡꠝꠎꠣꠁ ꠖꠤꠀ ꠇꠁꠟꠣ, “ꠁ ꠝꠣꠘꠥꠡꠉꠥꠁꠘ꠆ꠔꠦ ꠀꠝꠞꠣꠞ ꠐꠣꠃꠘꠅ ꠀꠁꠀ ꠛꠦꠕꠣꠄꠀ ꠉꠘ꠆ꠒꠉꠥꠟ ꠛꠣꠠꠣꠁ ꠖꠤꠍꠦ। ꠄꠞꠣ ꠔ ꠁꠢꠥꠖꠤ ꠀꠞ ꠀꠝꠞꠣ ꠅꠁꠟꠣꠝ ꠞꠥꠝꠣꠘ ꠝꠣꠘꠥꠡ। 21 ꠄꠞꠣ ꠅꠃ ꠎꠣꠔꠞ ꠇꠣꠄꠖꠣ-ꠇꠣꠘꠥꠘꠞ ꠇꠕꠣ ꠝꠣꠘꠡꠞꠦ ꠢꠤꠇꠣꠁꠞꠣ, ꠎꠦꠔꠣ ꠇꠞꠣ ꠀꠝꠞꠣꠞ ꠟꠣꠉꠤ ꠛꠦ-ꠀꠁꠘꠤ।” 22 ꠀꠞ ꠢꠤꠘꠞ ꠀꠞꠅ ꠝꠣꠘꠥꠡ ꠄꠇꠟꠉꠦ ꠖꠟ ꠛꠣꠘ꠆ꠖꠤꠀ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠛꠤꠞꠥꠗꠤꠔꠣ ꠇꠞꠟ, ꠔꠦꠃ ꠢꠣꠇꠤꠝ ꠅꠇꠟꠦ ꠄꠞꠣꠞ ꠇꠣꠙꠠ-ꠌꠥꠙꠠ ꠈꠥꠟꠤꠀ ꠍꠤꠋꠟꠣꠖꠤ ꠝꠣꠞꠣꠞ ꠢꠥꠇꠥꠝ ꠖꠤꠟꠣ। 23 ꠀꠞ ꠈꠥꠛ ꠜꠣꠟꠣꠐꠤꠇꠦ ꠍꠤꠋꠟꠣꠖꠤ ꠝꠣꠞꠤꠀ ꠔꠣꠞꠣꠞꠦ ꠎꠦꠟꠅ ꠢꠣꠞꠣꠁ ꠕꠁꠀ, ꠎꠦꠟꠞ ꠅꠚꠤꠡꠣꠞꠞꠦ ꠢꠥꠇꠥꠝ ꠖꠤꠟꠣ ꠇꠠꠣꠇꠠꠤ ꠙꠣꠢꠣꠞꠣ ꠖꠦꠅꠀꠞ ꠟꠣꠉꠤ। 24 ꠎꠦꠟꠞ ꠅꠚꠤꠡꠣꠞꠦ ꠁ ꠢꠥꠇꠥꠝ ꠙꠣꠁꠀ ꠢꠣꠞꠤ ꠔꠣꠞꠣꠞꠦ ꠎꠦꠟꠞ ꠜꠤꠔꠞꠞ ꠇꠥꠑꠣꠔ ꠢꠣꠞꠣꠁ ꠕꠁꠟꠣ, ꠀꠞ ꠔꠣꠞꠣꠞ ꠙꠣꠅꠔ ꠒꠣꠘ꠆ꠒꠣ-ꠛꠦꠠꠤ ꠟꠣꠉꠣꠁꠟꠣ।

25 ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠙꠣꠃꠟꠥꠍ ꠀꠞ ꠍꠤꠟꠣꠍꠦ ꠀꠟ꠆ꠟꠣꠞ ꠢꠣꠝꠖ-ꠉꠎꠟ ꠉꠣꠁꠔꠦ ꠉꠣꠁꠔꠦ ꠖꠥꠀ ꠇꠞꠣꠔ ꠀꠍꠟꠣ, ꠎꠦꠟꠞ ꠇꠄꠖꠤ ꠅꠇꠟꠦ ꠇꠣꠘ ꠙꠣꠔꠤꠀ ꠔꠣꠞꠣꠞ ꠉꠎꠟ ꠢꠥꠘꠟꠣ। 26 ꠅꠃ ꠡꠝꠄ ꠀꠈꠔꠣꠃ ꠛꠠ ꠄꠇ ꠜꠂꠍꠣꠟ ꠅꠁꠟ, ꠀꠡ꠆ꠔꠣ ꠎꠦꠟꠈꠣꠘꠣꠞ ꠜꠤꠔ ꠇꠣꠙꠤꠀ ꠃꠑꠟ। ꠎꠦꠟꠞ ꠢꠇꠟ ꠖꠥꠀꠞ ꠀꠞ ꠇꠄꠖꠤ ꠅꠇꠟꠞ ꠡꠤꠇꠟ ꠈꠥꠟꠤꠉꠦꠟ। 27 ꠔꠦꠃ ꠎꠦꠟꠞ ꠅꠚꠤꠡꠣꠞꠞ ꠊꠥꠝ ꠜꠣꠋꠟ ꠀꠞ ꠎꠦꠟꠞ ꠢꠇꠟ ꠖꠥꠀꠞ ꠈꠥꠟꠣ ꠖꠦꠈꠤꠀ ꠔꠣꠘ ꠔꠟꠥꠀꠞ ꠛꠣꠞ ꠇꠞꠤꠀ ꠘꠤꠎꠦ ꠘꠤꠎꠦ ꠈꠥꠘ ꠅꠁꠎꠤꠔꠣ ꠌꠣꠁꠟꠣ, ꠔꠣꠁꠘ ꠝꠘꠅ ꠇꠞꠟꠣ, ꠢꠇꠟ ꠇꠄꠖꠤ ꠜꠣꠉꠤꠀ ꠉꠦꠍꠂꠘꠉꠤ। 28 ꠅꠃ ꠙꠣꠃꠟꠥꠍꠦ ꠖꠦꠈꠤꠀ ꠌꠤꠟ꠆ꠟꠣꠁꠀ ꠇꠁꠟꠣ, “ꠖꠝ ꠟꠅ, ꠖꠝ ꠟꠅ, ꠘꠤꠎꠞ ꠈꠦꠔꠤ ꠇꠞꠤꠅ ꠘꠣ, ꠀꠝꠞꠣ ꠢꠇꠟꠃ ꠁꠈꠣꠘꠅ ꠞꠁꠍꠤ।” 29 ꠔꠦꠃ ꠅꠚꠤꠡꠣꠞꠦ ꠄꠇꠎꠘꠞꠦ ꠛꠣꠔ꠆ꠔꠤ ꠀꠘꠣꠞ ꠢꠥꠇꠥꠝ ꠖꠤꠀ, ꠔꠣꠁꠘ ꠖꠃꠠꠣꠁꠀ ꠉꠤꠀ ꠜꠤꠔꠞꠦ ꠢꠣꠝꠣꠁꠟꠣ, ꠀꠞ ꠒꠞꠞ ꠌꠥꠐꠦ ꠇꠣꠙꠤ ꠇꠣꠙꠤ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠙꠣꠅꠔ ꠙꠠꠟꠣ; 30 ꠛꠣꠖꠦ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠛꠣꠞꠦ ꠀꠘꠤꠀ ꠎꠤꠇꠣꠁꠟꠣ, “ꠍꠣꠛ ꠅꠇꠟ, ꠀꠝꠤ ꠇꠤꠔꠣ ꠇꠞꠟꠦ ꠎꠣꠘꠦ ꠛꠣꠌꠔꠣꠝ ꠙꠣꠞꠝꠥ?” 31 ꠔꠣꠞꠣ ꠎꠥꠀꠙ ꠖꠤꠟꠣ, “ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠃꠇ꠆ꠇꠣ, ꠔꠦꠃ ꠀꠙꠘꠦ ꠀꠞ ꠀꠙꠘꠣꠞ ꠛꠣꠠꠤꠞ ꠢꠇꠟ ꠎꠣꠘꠦ ꠛꠣꠌꠛꠣ।” 32 ꠙꠣꠃꠟꠥꠍ ꠀꠞ ꠍꠤꠟꠣꠍꠦ ꠎꠦꠟꠞ ꠅꠚꠤꠡꠣꠞ ꠀꠞ ꠔꠣꠘ ꠛꠣꠠꠤꠞ ꠢꠇꠟꠞꠦ ꠝꠣꠟꠤꠇꠞ ꠇꠣꠟꠣꠝ ꠢꠥꠘꠣꠁꠟꠣ। 33 ꠀꠞ ꠢꠃ ꠞꠣꠁꠔꠃ ꠔꠣꠁꠘ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠟꠁꠀ ꠉꠤꠀ ꠔꠣꠞꠣꠞ ꠡꠞꠤꠟꠞ ꠇꠣꠐꠣ-ꠌꠤꠞꠣ ꠗꠁꠀ ꠖꠤꠟꠣ, ꠛꠣꠖꠦ ꠔꠣꠁꠘ ꠀꠞ ꠔꠣꠘ ꠛꠣꠠꠤꠞ ꠢꠇꠟꠦ ꠟꠉꠦ ꠟꠉꠦ ꠔꠃꠛꠣꠞ ꠉꠥꠍꠟ ꠇꠞꠟꠣ। 34 ꠀꠞ ꠔꠣꠞꠣꠞꠦ ꠔꠣꠘ ꠘꠤꠎꠞ ꠊꠞꠅ ꠘꠤꠀ ꠈꠣꠘꠣ ꠈꠣꠁꠔꠦ ꠖꠤꠟꠣ। ꠛꠣꠠꠤꠞ ꠢꠇꠟꠦ ꠝꠤꠟꠤ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠛꠃꠔ ꠈꠥꠡꠤ ꠅꠁꠟꠣ।

35 ꠛꠣꠖꠞ ꠖꠤꠘ ꠛꠤꠀꠘꠦ ꠢꠣꠇꠤꠝ ꠅꠇꠟꠦ ꠙꠥꠟꠤꠡ ꠙꠣꠑꠣꠁꠀ ꠎꠣꠘꠣꠁꠟꠣ, “ꠁ ꠇꠄꠖꠤ ꠅꠇꠟꠞꠦ ꠍꠣꠠꠤ ꠖꠦꠅ।” 36 ꠔꠦꠃ ꠎꠦꠟꠞ ꠅꠚꠤꠡꠣꠞ ꠍꠣꠛꠦ ꠙꠣꠃꠟꠥꠍꠞꠦ ꠎꠣꠘꠣꠁꠟꠣ, “ꠢꠣꠇꠤꠝ ꠅꠇꠟꠦ ꠢꠥꠇꠥꠝ ꠖꠤꠍꠂꠘ ꠀꠙꠘꠣꠞꠣꠞꠦ ꠍꠣꠠꠤ ꠖꠤꠛꠣꠞ ꠟꠣꠉꠤ, ꠔꠦ ꠀꠙꠘꠣꠞꠣ ꠛꠣꠞ ꠅꠁꠀ ꠀꠃꠇ꠆ꠇꠣ ꠀꠞ ꠍꠢꠤ-ꠍꠣꠟꠣꠝꠔꠦ ꠔꠡꠞꠤꠚ ꠘꠦꠃꠇ꠆ꠇꠣ।” 37 ꠙꠣꠃꠟꠥꠍꠦ ꠔꠣꠞꠣꠞꠦ ꠇꠁꠟꠣ, “ꠀꠝꠞꠣ ꠞꠥꠝꠣꠘ ꠝꠣꠘꠥꠡ, ꠀꠝꠞꠣꠞ ꠇꠥꠘꠥ ꠛꠤꠌꠣꠞ ꠘꠣ ꠇꠞꠤꠀ ꠢꠇꠟꠞ ꠍꠣꠝꠘꠦ ꠍꠤꠋꠟꠣꠖꠤ ꠝꠣꠞꠍꠂꠘ ꠀꠞ ꠎꠦꠟꠅ ꠢꠣꠞꠣꠁꠍꠂꠘ। ꠅꠈꠘ ꠢꠣꠇꠤꠝ ꠅꠇꠟꠦ ꠀꠝꠞꠣꠞꠦ ꠟꠥꠇꠣꠁꠀ ꠍꠣꠠꠤ ꠖꠤꠔꠣ ꠌꠣꠁꠞꠣ? ꠁꠔꠣ ꠅꠁꠔ ꠘꠣꠄ, ꠔꠣꠞꠣ ꠘꠤꠎꠦ ꠀꠁꠀ ꠀꠝꠞꠣꠞꠦ ꠛꠣꠞ ꠇꠞꠤ ꠘꠦꠃꠇ꠆ꠇꠣ।” 38 ꠙꠥꠟꠤꠡꠦ ꠉꠤꠀ ꠢꠣꠇꠤꠝ ꠅꠇꠟꠞꠦ ꠅꠃ ꠇꠕꠣ ꠎꠣꠘꠣꠁꠟꠣ, ꠢꠣꠇꠤꠝ ꠅꠇꠟꠦ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠞꠥꠝꠣꠘ ꠝꠣꠘꠥꠡ ꠢꠥꠘꠤꠀ ꠒꠞꠣꠁꠉꠦꠟꠣ। 39 ꠔꠣꠞꠣ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠉꠦꠍꠦ ꠀꠁꠀ ꠝꠣꠚ ꠌꠣꠁꠟꠣ, ꠀꠞ ꠔꠣꠞꠣꠞꠦ ꠛꠣꠞꠦ ꠘꠤꠀ ꠐꠣꠃꠘ ꠕꠣꠇꠤ ꠢꠞꠤ ꠎꠣꠅꠀꠞ ꠟꠣꠉꠤ ꠝꠤꠘꠔ ꠇꠞꠟꠣ। 40 ꠔꠦꠃ ꠔꠣꠞꠣ ꠎꠦꠟꠈꠣꠘꠣ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠛꠤꠛꠤ ꠟꠥꠖꠤꠀꠞ ꠛꠣꠠꠤꠔ ꠢꠣꠝꠣꠁꠟꠣ। ꠢꠤꠈꠣꠘꠅ ꠝꠥꠝꠤꠘ ꠅꠇꠟꠞ ꠟꠉꠦ ꠖꠦꠈꠣ-ꠡꠣꠇ꠆ꠇꠣꠔ ꠇꠞꠤꠀ ꠔꠣꠞꠣꠞꠦ ꠃꠔꠡꠣꠢ ꠖꠤꠟꠣ, ꠛꠣꠖꠦ ꠢꠘ ꠕꠣꠇꠤ ꠞꠅꠀꠘꠣ ꠅꠁꠟꠣ।