1-2 ꠀꠝꠤ ꠙꠣꠃꠟꠥꠍ, ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤꠄ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠇꠟ꠆ꠟꠍꠤ ꠐꠣꠃꠘꠞ ꠝꠣꠎꠦ ꠀꠟ-ꠝꠍꠤꠞ ꠔꠞꠤꠇꠣꠞ ꠙꠣꠇ ꠛꠘ꠆ꠖꠣ ꠀꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠀꠝꠤ ꠀꠞ ꠜꠣꠁ ꠔꠤꠝꠕꠤꠄ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।

3-4 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠔꠥꠝꠞꠣꠞ ꠁꠝꠣꠘ ꠀꠞ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠝꠣꠄꠀ ꠇꠞꠣꠞ ꠇꠕꠣ ꠀꠝꠞꠣ ꠢꠥꠘꠍꠤ। ꠄꠞꠟꠣꠉꠤ ꠎꠦꠛꠟꠣꠃ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ, ꠅꠃ ꠡꠝꠄ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ। 5 ꠔꠥꠝꠞꠣ ꠀꠉꠦ ꠎꠦ ꠈꠥꠡ-ꠈꠛꠞꠤ ꠝꠣꠘꠤ ꠀꠟ꠆ꠟꠣꠞ ꠢꠇ ꠇꠣꠟꠣꠝ ꠙꠣꠁꠍ, ꠅꠃ ꠇꠣꠟꠣꠝ ꠢꠥꠘꠤꠀꠃ ꠔꠥꠝꠞꠣꠞ ꠝꠘꠅ ꠄꠇ ꠀꠡꠣ ꠎꠘꠝꠤꠍꠦ। ꠅꠃ ꠀꠡꠣ ꠕꠣꠇꠤꠃ ꠔꠥꠝꠞꠣꠞ ꠁꠝꠣꠘ ꠀꠞ ꠝꠣꠄꠀ ꠙꠄꠖꠣ ꠅꠁꠍꠦ। ꠀꠞ ꠔꠥꠝꠞꠣ ꠀꠡꠣ ꠇꠞꠞꠣꠄ ꠎꠦ ꠍꠣꠝꠣꠘ ꠙꠣꠁꠔꠣꠄ, ꠁꠔꠣ ꠔ ꠛꠦꠢꠦꠡ꠆ꠔꠅ ꠞꠣꠈꠣ ꠀꠍꠦ। 6 ꠁ ꠈꠥꠡ-ꠈꠛꠞꠤ ꠖꠥꠘꠤꠀꠞ ꠢꠇꠟꠛꠣꠄ ꠍꠤꠔ꠆ꠞꠤꠀ ꠜꠣꠟꠣ ꠚꠟꠀꠟꠣ ꠅꠁꠀ ꠖꠤꠘ ꠖꠤꠘ ꠛꠣꠠꠦꠞ। ꠎꠦ ꠖꠤꠘ ꠕꠘꠦ ꠔꠥꠝꠞꠣ ꠅꠃ ꠈꠥꠡ-ꠈꠛꠞꠤ ꠀꠞ ꠀꠟ꠆ꠟꠣꠞ ꠞꠢꠝꠔꠞ ꠛꠦꠙꠣꠞꠦ ꠙꠥꠞꠣꠙꠥꠞ ꠢꠥꠘꠍ, ꠅꠃ ꠖꠤꠘ ꠕꠘꠦꠃ ꠁꠔꠣꠄ ꠔꠥꠝꠞꠣꠞ ꠜꠤꠔꠞꠦꠅ ꠙꠥꠞꠣꠙꠥꠞ ꠇꠣꠝ ꠇꠞꠦꠞ। 7 ꠅꠃ ꠈꠥꠡ-ꠈꠛꠞꠤꠞ ꠇꠕꠣ ꠔꠥꠝꠞꠣ ꠀꠝꠣꠞ ꠟꠉꠞ ꠝꠣꠄꠀꠞ ꠜꠣꠁ ꠀꠛꠥ-ꠚꠣꠞꠣꠍꠞ ꠉꠦꠍꠦ ꠢꠥꠘꠍ। ꠔꠣꠁꠘ ꠔꠥꠝꠞꠣꠞ ꠔꠞꠚ ꠕꠣꠇꠤ ꠀꠟ-ꠝꠍꠤꠞ ꠄꠇꠎꠘ ꠢꠇ ꠈꠦꠎꠝꠔꠇꠣꠞꠤ। 8 ꠙꠣꠇ ꠞꠥꠢꠥꠞ ꠛꠟꠦ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠦ ꠝꠣꠄꠀ ꠙꠄꠖꠣ ꠅꠁꠍꠦ, ꠅꠃ ꠛꠦꠙꠣꠞꠦ ꠀꠛꠥ-ꠚꠣꠞꠣꠍꠦ ꠀꠝꠞꠣꠞꠦ ꠎꠣꠘꠣꠁꠍꠂꠘ।

9 ꠄꠞꠟꠣꠉꠤ ꠔꠥꠝꠞꠣꠞ ꠛꠦꠙꠣꠞꠦ ꠢꠥꠘꠣꠞ ꠛꠣꠖ ꠕꠣꠇꠤꠃ ꠀꠝꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ। ꠞꠥꠢꠣꠘꠤ ꠁꠟꠤꠝ ꠀꠞ ꠛꠥꠖ꠆ꠖꠤ ꠖꠤꠀ ꠔꠥꠝꠞꠣ ꠎꠣꠘꠥ ꠀꠟ꠆ꠟꠣꠞ ꠝꠥꠘꠡꠣ ꠙꠥꠞꠣꠙꠥꠞ ꠛꠥꠎꠔꠣꠄ ꠙꠣꠞ। 10 ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠅꠃ ꠖꠥꠀꠃ ꠇꠞꠞꠣꠝ, ꠔꠥꠝꠞꠣ ꠎꠣꠔꠦ ꠢꠇꠟ ꠛꠦꠙꠣꠞꠦ ꠀꠟ-ꠝꠍꠤꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟ ꠀꠞ ꠔꠣꠘ ꠃꠙꠎꠥꠇ꠆ꠔ ꠃꠝ꠆ꠝꠔꠞ ꠟꠣꠈꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠅ। ꠢꠇ ꠇꠣꠝ ꠇꠞꠤ ꠇꠞꠤ ꠚꠟꠛꠣꠘ ꠅꠅ, ꠀꠞ ꠀꠟ꠆ꠟꠣ ꠙꠣꠇꠞꠦ ꠀꠞꠅ ꠜꠣꠟꠣ ꠇꠞꠤ ꠌꠤꠘꠅ। 11 ꠀꠟ꠆ꠟꠣꠄ ꠔꠣꠘ ꠝꠢꠣ ꠇꠥꠖꠞꠔꠤ ꠛꠟꠦ ꠢꠇꠟ ꠘꠝꠥꠘꠣꠞ ꠛꠟ ꠖꠤꠀ ꠔꠥꠝꠞꠣꠞꠦ ꠛꠟꠛꠣꠘ ꠇꠞꠃꠇ꠆ꠇꠣ। ꠛꠣꠟꠣ-ꠝꠍꠤꠛꠔꠅ ꠙꠠꠟꠦꠅ ꠈꠥꠡꠤ-ꠛꠣꠡꠤ ꠞꠁꠀ ꠍꠛꠞ ꠇꠞꠣꠞ ꠔꠚꠤꠇ ꠖꠦꠃꠇ꠆ꠇꠣ। 12 ꠀꠞ ꠢꠇꠟ ꠡꠝꠄ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠎꠣꠘꠣꠅ। ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠘꠥꠞꠞ ꠛꠣꠖꠡꠣꠁꠔ ꠎꠦ ꠅꠗꠤꠇꠣꠞ ꠙꠣꠁꠛꠣ, ꠁꠔꠣꠞ ꠜꠣꠉꠤ ꠅꠀꠞ ꠟꠣꠉꠤ ꠔ ꠔꠣꠁꠘꠃ ꠔꠥꠝꠞꠣꠞꠦ ꠃꠙꠎꠥꠇ꠆ꠔ ꠛꠣꠘꠣꠁꠍꠂꠘ। 13 ꠔꠣꠁꠘꠃ ꠀꠝꠞꠣꠞꠦ ꠀꠘ꠆ꠖꠣꠁꠞꠞ ꠛꠣꠖꠡꠣꠁ ꠕꠣꠇꠤ ꠃꠖ꠆ꠖꠣꠞ ꠇꠞꠤꠀ, ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠛꠣꠖꠡꠣꠁꠔ ꠀꠘꠍꠂꠘ। 14 ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠝꠞꠣ ꠞꠦꠢꠣꠁ ꠙꠣꠁꠍꠤ, ꠝꠣꠘꠤ ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠁꠍꠤ।

15 ꠅꠃ ꠝꠣꠄꠀꠞ ꠎꠘꠃ ꠅꠁꠟꠣ, ꠛꠣꠔꠥꠘꠤ ꠀꠟ꠆ꠟꠣꠞ ꠎꠣꠁꠞꠤ ꠍꠥꠞꠔ; ꠢꠇ꠆ꠇꠟꠔꠣ ꠙꠄꠖꠣ ꠇꠞꠣꠞ ꠀꠉꠦ ꠔꠣꠁꠘ ꠀꠍꠟꠣ, ꠀꠞ ꠙꠄꠖꠣ ꠅꠀ ꠢꠇ꠆ꠇꠟꠔꠣꠞ ꠝꠣꠎꠦ ꠔꠣꠁꠘꠃ ꠙꠞꠗꠣꠘ। 16 ꠀꠍꠝꠣꠘ-ꠎꠝꠤꠘꠞ ꠝꠣꠎꠦ ꠖꠦꠈꠣ ꠀꠞ ꠀ-ꠖꠦꠈꠣ ꠎꠔꠔꠣ ꠀꠍꠦ, ꠁꠔꠣ ꠛꠣꠖꠡꠣꠁ ꠅꠃꠇ ꠛꠣ ꠛꠣꠢꠣꠖꠥꠞꠤ, ꠡꠣꠡꠘ ꠇꠤꠛꠣ ꠈꠦꠝꠔꠣ ꠅꠃꠇ, ꠢꠇ꠆ꠇꠟꠔꠣꠃ ꠔꠣꠘ ꠀꠔꠞ ꠙꠄꠖꠣ। ꠁꠔꠣ ꠔ ꠈꠣꠟꠤ ꠔꠣꠘ ꠟꠣꠉꠤꠃ ꠙꠄꠖꠣ ꠇꠞꠣ ꠅꠁꠍꠦ। 17 ꠢꠇ꠆ꠇꠟꠔꠣꠞ ꠙꠄꠟꠣ ꠔꠣꠁꠘ ꠀꠍꠟꠣ ꠀꠞ ꠔꠣꠘ ꠝꠣꠎꠖꠤꠀꠃ ꠢꠇꠟꠔꠣ ꠐꠤꠇꠤꠀ ꠀꠍꠦ। 18 ꠔꠣꠁꠘꠃ ꠔꠣꠘ ꠡꠞꠤꠟꠞ ꠝꠣꠕꠣ, ꠝꠣꠘꠤ ꠎꠝꠣꠔꠞ ꠝꠣꠕꠣ। ꠔꠣꠁꠘꠃ ꠢꠇ꠆ꠇꠟꠔꠣꠞ ꠙꠄꠟꠣ, ꠀꠞ ꠔꠣꠁꠘꠃ ꠙꠄꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍꠂꠘ, ꠎꠣꠔꠦ ꠢꠇꠟ ꠛꠦꠙꠣꠞꠦ ꠔꠣꠁꠘꠃ ꠙꠞꠗꠣꠘ ꠅꠁꠔꠣ ꠙꠣꠞꠂꠘ। 19 ꠀꠟ꠆ꠟꠣꠄ ꠌꠣꠁꠟꠣ, ꠔꠣꠘ ꠀꠟ꠆ꠟꠣꠁ ꠉꠥꠘꠞ ꠢꠇ꠆ꠇꠟꠔꠣ ꠎꠣꠘꠥ ꠀꠟ-ꠝꠍꠤꠞ ꠝꠣꠎꠦ ꠕꠣꠇꠦ। 20 ꠀꠞ ꠖꠥꠘꠤꠀꠔ ꠛꠣ ꠛꠦꠢꠦꠡ꠆ꠔꠅ ꠎꠦꠘꠅꠃ ꠅꠄ ꠘꠣ ꠇꠦꠘꠦ, ꠅꠃ ꠀꠟ-ꠝꠍꠤꠞ ꠝꠣꠎꠖꠤꠀ ꠎꠣꠘꠥ ꠢꠇ꠆ꠇꠟꠔꠣꠞ ꠟꠉꠦ ꠔꠣꠘ ꠝꠤꠟꠘ ꠅꠄ। ꠔꠣꠁꠘ ꠌꠣꠁꠟꠣ, ꠍꠟꠤꠛꠞ ꠃꠙꠞꠦ ꠀꠟ-ꠝꠍꠤꠞ ꠇꠥꠞꠛꠣꠘꠤꠞ ꠟꠃꠞ ꠛꠖꠟꠣ ꠡꠣꠘ꠆ꠔꠤ ꠇꠣꠁꠝꠞ ꠝꠣꠎꠖꠤ ꠅꠃ ꠝꠤꠟꠘ ꠅꠃꠇ।

21 ꠔꠥꠝꠞꠣ ꠔ ꠄꠇ ꠡꠝꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠖꠥꠞꠁ ꠀꠍꠟꠣꠄ, ꠀꠞ ꠔꠣꠘ ꠛꠦꠙꠣꠞꠦ ꠔꠥꠝꠞꠣꠞ ꠖꠤꠟꠅ ꠖꠥꠡꠝꠘꠤ ꠜꠣꠛ ꠀꠍꠤꠟ। ꠁꠔꠣ ꠔꠥꠝꠞꠣꠞ ꠛꠖ ꠇꠣꠝꠞ ꠝꠣꠎꠖꠤ ꠎꠣꠁꠞ ꠅꠁꠍꠦ। 22 ꠅꠁꠟꠦ ꠀꠟ-ꠝꠍꠤꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠀꠟ꠆ꠟꠣꠄ ꠔꠥꠝꠞꠣꠞꠦꠅ ꠔꠣꠘ ꠟꠉꠦ ꠝꠤꠟꠘ ꠊꠐꠣꠁꠍꠂꠘ, ꠎꠣꠔꠦ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ, ꠘꠤꠈꠥꠔ ꠀꠞ ꠘꠤ-ꠅꠙꠞꠣꠗꠤ ꠢꠣꠟꠔꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠔꠣ ꠙꠣꠞꠂꠘ। 23 ꠔꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠕꠣꠇꠤ ꠎꠦ ꠘꠤꠌ꠆ꠌꠤꠔ ꠀꠡꠣ ꠔꠥꠝꠞꠣ ꠙꠣꠁꠍ, ꠈꠣꠟꠤ ꠅꠃ ꠀꠡꠣꠞ ꠃꠙꠞꠦ ꠁꠝꠣꠘꠦ ꠕꠤꠞ ꠞꠁꠅ, ꠁꠘ ꠕꠣꠇꠤ ꠟꠠꠤꠅ ꠘꠣ। ꠔꠥꠝꠞꠣ ꠔ ꠎꠣꠘ, ꠁ ꠈꠥꠡ-ꠈꠛꠞꠤ ꠢꠣꠞꠣ ꠖꠥꠘꠤꠀꠔ ꠔꠛꠟꠤꠉ ꠇꠞꠣ ꠅꠁꠍꠦ, ꠀꠝꠤ ꠙꠣꠃꠟꠥꠍꠅ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠈꠣꠖꠤꠝ ꠅꠁꠍꠤ।

24 ꠔꠥꠝꠞꠣꠞ ꠟꠣꠉꠤ ꠀꠝꠤ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠣꠄ ꠈꠥꠛ ꠀꠘꠘ꠆ꠖ ꠙꠣꠁꠞꠣꠝ। ꠎꠣꠘ ꠔ, ꠀꠟ-ꠝꠍꠤꠞ ꠡꠞꠤꠟ ꠝꠣꠘꠤ ꠎꠝꠣꠔꠞ ꠟꠣꠉꠤ ꠔꠣꠘ ꠎꠦ ꠖꠥꠈ-ꠝꠍꠤꠛꠔ ꠅꠈꠘꠅ ꠛꠣꠇꠤ ꠀꠍꠦ, ꠁꠔꠣ ꠅꠈꠘ ꠀꠝꠣꠞ ꠡꠞꠤꠟ ꠖꠤꠀ ꠙꠥꠞꠣ ꠇꠞꠤꠀꠞ। 25 ꠀꠟ꠆ꠟꠣ ꠙꠣꠇꠦ ꠔꠣꠘ ꠙꠛꠤꠔ꠆ꠞ ꠇꠣꠟꠣꠝ ꠔꠥꠝꠞꠣꠞ ꠉꠦꠍꠦ ꠙꠥꠞꠣꠙꠥꠞ ꠔꠛꠟꠤꠉ ꠇꠞꠣꠞ ꠜꠣꠞ ꠀꠝꠣꠞꠦ ꠖꠤꠍꠂꠘ, ꠉꠔꠤꠇꠦꠃ ꠀꠝꠤ ꠎꠝꠣꠔꠞ ꠄꠇꠎꠘ ꠈꠦꠎꠝꠔꠇꠣꠞꠤ ꠅꠁꠍꠤ। 26 ꠀꠟ꠆ꠟꠣꠞ ꠇꠣꠟꠣꠝꠞ ꠎꠦ ꠛꠣꠔꠥꠘꠤ ꠛꠦꠙꠣꠞ ꠀꠉꠞ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠎꠥꠉ ꠎꠥꠉ ꠗꠞꠤ ꠟꠥꠇꠣꠁꠟ ꠀꠍꠤꠟ, ꠁꠔꠣ ꠅꠈꠘ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠎꠣꠁꠞ ꠇꠞꠣ ꠅꠁꠍꠦ। 27 ꠀꠟ꠆ꠟꠣꠄ ꠌꠣꠁꠍꠂꠘ, ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦꠅ ꠔꠣꠘ ꠛꠣꠔꠥꠘꠤ ꠝꠥꠘꠡꠣꠞ ꠉꠃꠞꠛ ꠎꠦ ꠇꠤꠔꠣ, ꠁꠔꠣ ꠎꠦꠘꠥ ꠔꠣꠘ ꠢꠇꠟ ꠛꠘ꠆ꠖꠣ ꠅꠇꠟꠦ ꠎꠣꠘꠔꠣ ꠙꠣꠞꠂꠘ। ꠀꠍꠟꠦ ꠀꠟ-ꠝꠍꠤ ꠔꠥꠝꠞꠣꠞ ꠖꠤꠟꠅ ꠀꠍꠂꠘ, ꠉꠔꠤꠇꠦ ꠔꠥꠝꠞꠣ ꠉꠃꠞꠛ ꠙꠣꠅꠀꠞ ꠀꠡꠣ ꠙꠣꠁꠍ। 28 ꠀꠞ ꠅꠃ ꠀꠟ-ꠝꠍꠤꠞ ꠛꠦꠙꠣꠞꠦ ꠀꠝꠞꠣ ꠔꠛꠟꠤꠉ ꠇꠞꠤꠀꠞ, ꠀꠟ꠆ꠟꠣꠞ ꠖꠦꠅꠀ ꠀꠈꠟ-ꠢꠦꠇꠝꠔ ꠖꠤꠀ ꠝꠣꠘꠡꠞꠦ ꠢꠥꠡꠤꠀꠞ ꠇꠞꠤꠀꠞ ꠀꠞ ꠔꠣꠟꠤꠝ ꠖꠤꠀꠞ ꠎꠣꠔꠦ ꠀꠟ-ꠝꠍꠤꠞ ꠔꠞꠤꠇꠣꠔ ꠙꠥꠞꠣꠙꠥꠞ ꠇꠣꠝꠤꠟ ꠢꠣꠟꠔꠦ ꠔꠣꠞꠣꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠇꠞꠔꠣꠝ ꠙꠣꠞꠤ। 29 ꠅꠃ ꠘꠤꠅꠔꠦ ꠀꠟ꠆ꠟꠣꠞ ꠎꠦ ꠇꠥꠖꠞꠔꠤ ꠛꠟ ꠀꠝꠣꠞ ꠝꠣꠎꠦ ꠇꠣꠝ ꠇꠞꠦꠞ, ꠅꠃ ꠇꠥꠖꠞꠔꠤ ꠛꠟꠦꠃ ꠀꠝꠤ ꠖꠤꠟꠦ-ꠎꠣꠘꠦ ꠝꠦꠘꠔ ꠇꠞꠤꠀꠞ।