1 ꠢꠎꠞꠔ ꠝꠥꠍꠣꠄ ꠇꠁꠞꠣ, “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠦ ꠞꠢꠝꠔ ꠀꠞ ꠟꠣꠘ꠆ꠘꠔꠞ ꠙꠕ ꠖꠦꠈꠣꠁꠍꠤ, ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠃꠙꠞꠦ ꠚꠟꠤꠛ। ꠚꠟꠤꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠔꠣ ꠎꠣꠔꠤ ꠅꠇꠟꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠛꠣ, ꠔꠣꠞꠣꠞ ꠟꠉꠦ ꠛꠡꠔ ꠇꠞꠣꠞ ꠛꠣꠟꠣ ꠔꠥꠝꠞꠣ ꠁꠔꠣ ꠈꠤꠀꠟ ꠇꠞꠤꠅ। 2 ꠢꠃ ꠡꠝꠄ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠦꠍꠦ ꠚꠤꠞꠤꠀ ꠀꠅ, ꠀꠞ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠞꠣꠝ, ꠁꠔꠣ ꠖꠤꠟꠦ-ꠎꠣꠘꠦ ꠀꠝꠟ ꠇꠞꠅ, 3 ꠔꠦ ꠢꠃ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞꠦ ꠛꠘ꠆ꠖꠤ ꠢꠣꠟꠔ ꠕꠣꠇꠤ ꠀꠎꠣꠖ ꠇꠞꠛꠣ। ꠔꠣꠁꠘ ꠔꠥꠝꠞꠣꠞꠦ ꠝꠣꠄꠀ-ꠝꠝꠔꠣ ꠇꠞꠛꠣ, ꠀꠞ ꠔꠣꠁꠘ ꠎꠦꠔꠣ ꠎꠣꠔꠤꠞ ꠝꠣꠎꠦ ꠔꠥꠝꠞꠣꠞꠦ ꠍꠤꠔ꠆ꠞꠣꠁꠀ ꠖꠤꠍꠟꠣ, ꠅꠔꠣ ꠕꠣꠇꠤ ꠢꠤꠞꠛꠣꠞ ꠔꠥꠝꠞꠣꠞꠦ ꠔꠥꠇꠣꠁꠀ ꠀꠘꠛꠣ। 4 ꠖꠥꠘꠤꠀꠞ ꠀꠈꠦꠞꠤ ꠇꠤꠘꠣꠞꠣꠔꠅ ꠎꠥꠖꠤ ꠔꠥꠝꠞꠣꠞꠦ ꠚꠣꠟꠣꠁꠟ ꠅꠄ, ꠔꠦ ꠢꠘꠅ ꠕꠣꠇꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠔꠥꠇꠣꠁꠀ ꠀꠘꠛꠣ। 5 ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠖꠦꠡꠅ ꠔꠥꠝꠞꠣꠞꠦ ꠚꠤꠞꠣꠁꠀ ꠀꠘꠛꠣ, ꠁꠔꠣ ꠢꠤꠞꠛꠣꠞ ꠔꠥꠝꠞꠣ ꠖꠈꠟ ꠇꠞꠛꠣꠄ। ꠔꠣꠁꠘ ꠔꠥꠝꠞꠣꠞꠦ ꠛꠃꠔ ꠛꠣꠠꠣꠁ ꠖꠤꠛꠣ, ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠌꠣꠁꠔꠦꠅ ꠔꠥꠝꠞꠣꠞ ꠀꠅꠟꠣꠖꠞ ꠙꠞꠤꠝꠣꠘ ꠀꠞꠅ ꠛꠣꠠꠣꠁꠛꠣ। 6 ꠔꠥꠝꠞꠣ ꠎꠣꠔꠦ ꠙꠥꠞꠣꠙꠥꠞ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠀꠡꠤꠇ ꠛꠘꠤꠀ ꠛꠣꠌꠤꠀ ꠞꠅ, ꠅꠃ ꠘꠤꠅꠔꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠖꠤꠟꠞ ꠝꠍꠟꠝꠣꠘꠤ ꠔꠣꠁꠘ ꠘꠤꠎꠦ ꠖꠤꠛꠣ। 7 ꠀꠞ ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠃ ꠖꠥꠡꠝꠘꠞ ꠃꠙꠞꠦ ꠚꠣꠟꠣꠁꠛꠣ, ꠎꠦꠔꠣꠄ ꠔꠥꠝꠞꠣꠞꠦ ꠁꠋꠡꠣ ꠀꠞ ꠎꠥꠟꠥꠝ ꠇꠞꠂꠘ। 8 ꠢꠃ ꠡꠝꠄ ꠔꠥꠝꠞꠣ ꠢꠤꠞꠛꠣꠞ ꠔꠥꠝꠞꠣꠞ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣꠄ, ꠔꠣꠘ ꠛꠣꠔꠣꠁꠟ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ, ꠅꠔꠣ ꠢꠇꠟꠔꠣ ꠀꠝꠟ ꠇꠞꠛꠣꠄ।

9 “ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠇꠟ ꠘꠝꠥꠘꠣꠄ ꠔꠥꠝꠞꠣꠞꠦ ꠀꠄ-ꠃꠘ꠆ꠘꠔꠤ ꠖꠤꠛꠣ, ꠔꠣꠁꠘ ꠔꠥꠝꠞꠣꠞ ꠇꠣꠝ-ꠇꠣꠎꠅ ꠛꠞꠇꠔ ꠖꠤꠛꠣ, ꠔꠥꠝꠞꠣꠞ ꠀꠅꠟꠣꠖꠞ ꠙꠞꠤꠝꠣꠘ ꠛꠣꠠꠣꠁꠛꠣ, ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠛꠣꠁꠌ꠆ꠌꠣꠁꠘ ꠀꠞ ꠎꠝꠤꠘꠞ ꠚꠡꠟ ꠛꠣꠠꠣꠁ ꠖꠤꠛꠣ। ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠃꠙꠞꠦ ꠔꠣꠁꠘ ꠎꠦꠟꠣ ꠈꠥꠡꠤ ꠀꠍꠟꠣ, ꠔꠥꠝꠞꠣꠞ ꠃꠙꠞꠦꠅ ꠅꠟꠣ ꠈꠥꠡꠤ ꠅꠁꠀ ꠔꠥꠝꠞꠣꠞꠦ ꠢꠇꠟ ꠘꠝꠥꠘꠣꠄ ꠛꠣꠠꠣꠁꠛꠣ। 10 ꠈꠣꠟꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠌꠟꠤꠀ, ꠅꠃ ꠔꠃꠞꠣꠔ ꠇꠤꠔꠣꠛꠅ ꠟꠦꠈꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠟꠦ, ꠀꠡ꠆ꠔꠣ ꠖꠤꠟꠦ-ꠎꠣꠘꠦ ꠔꠣꠘ ꠛꠣꠄ ꠚꠤꠞꠟꠦ, ꠔꠣꠁꠘ ꠅꠃ ꠞꠢꠝ-ꠛꠞꠇꠔ ꠖꠤꠛꠣ।

11 “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠞꠣꠝ, ꠁꠔꠣ ꠝꠣꠘꠤꠀ ꠌꠟꠣ ꠔꠥꠝꠞꠣꠞ ꠟꠣꠉꠤ ꠛꠦꠡꠤ ꠇꠡ꠆ꠐꠞ ꠇꠥꠘꠥ ꠇꠣꠝ ꠘꠣꠄ, ꠁꠔꠣ ꠔꠥꠝꠞꠣꠞ ꠟꠣꠉꠣꠟꠞ ꠛꠣꠞꠦꠅ ꠘꠣꠄ। 12 ꠁꠔꠣ ꠔ ꠛꠦꠢꠦꠡ꠆ꠔꠅ ꠔꠥꠟꠤꠀ ꠕꠅꠀ ꠇꠥꠘꠥ ꠌꠤꠎ ꠘꠣꠄ ꠎꠦꠘ ꠔꠥꠝꠞꠣ ꠇꠁꠔꠣꠄ, ꠛꠦꠢꠦꠡ꠆ꠔꠅ ꠕꠣꠇꠤ ꠇꠦꠉꠤꠄ ꠟꠣꠝꠣꠁ ꠀꠘꠤꠀ ꠁꠔꠣ ꠀꠝꠞꠣꠞꠦ ꠢꠥꠘꠣꠁꠔ, ꠀꠞ ꠀꠝꠞꠣ ꠀꠝꠟ ꠇꠞꠔꠣꠝ? 13 ꠁꠔꠣ ꠖꠞꠤꠀꠞ ꠢꠙꠣꠞꠞ ꠇꠥꠘꠥ ꠌꠤꠎꠅ ꠘꠣꠄ ꠎꠦꠘ ꠔꠥꠝꠞꠣ ꠇꠁꠔꠣꠄ, ꠖꠞꠤꠀ ꠙꠣꠞ ꠅꠁꠀ ꠇꠦꠉꠤꠄ ꠉꠤꠀ ꠁꠔꠣ ꠀꠘꠤꠀ ꠀꠝꠞꠣꠞꠦ ꠢꠥꠘꠣꠁꠔ, ꠀꠞ ꠀꠝꠞꠣ ꠀꠝꠟ ꠇꠞꠔꠣꠝ? 14 ꠛꠞꠋ ꠝꠣꠛꠥꠖꠞ ꠇꠣꠟꠣꠝ ꠔ ꠔꠥꠝꠞꠣꠞ ꠟꠉꠦꠃ ꠀꠍꠦ, ꠔꠥꠝꠞꠣꠞ ꠝꠥꠈꠞ ꠝꠣꠎꠦ ꠀꠞ ꠖꠤꠟꠞ ꠜꠤꠔꠞꠦ ꠁꠔꠣ ꠀꠍꠦ, ꠎꠣꠔꠦ ꠁꠔꠣ ꠀꠝꠟ ꠇꠞꠅ।

15 “ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠦꠔꠣ ꠔꠥꠟꠤꠀ ꠗꠞꠍꠤ, ꠁꠔꠣ ꠅꠁꠟ ꠎꠤꠘ꠆ꠖꠦꠉꠤ ꠀꠞ ꠜꠣꠟꠣꠁ, ꠛꠣ ꠝꠃꠔ ꠀꠞ ꠖꠥꠈ-ꠝꠍꠤꠛꠔ। 16 ꠀꠁꠎ ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠤꠅ, ꠔꠣꠘ ꠖꠦꠅꠀ ꠡꠞꠤꠅꠔ, ꠢꠇꠟ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠢꠞ-ꠢꠣꠝꠦꠡꠣ ꠝꠣꠘꠤꠅ। ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ, ꠙꠞꠤꠝꠣꠘꠦ ꠛꠣꠠꠛꠣꠄ, ꠀꠞ ꠎꠦ ꠖꠦꠡꠈꠣꠘ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠃ ꠖꠦꠡꠅ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ।

17 “ꠅꠁꠟꠦ ꠔꠥꠝꠞꠣꠞ ꠝꠘ ꠎꠥꠖꠤ ꠀꠟ꠆ꠟꠣ ꠝꠣꠛꠥꠖꠞ ꠛꠣꠄ ꠕꠣꠇꠤ ꠚꠤꠞꠤꠎꠣꠄ, ꠔꠣꠘ ꠢꠥꠇꠥꠝ ꠘꠣ ꠝꠣꠘꠤꠀ ꠔꠥꠝꠞꠣ ꠎꠥꠖꠤ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣꠔ ꠟꠣꠉꠤꠀ ꠅꠔꠣꠞꠦ ꠙꠞꠘꠣꠝ ꠇꠞꠅ, 18 ꠔꠦ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁ ꠖꠤꠞꠣꠝ, ꠔꠥꠝꠞꠣ ꠘꠤꠡ꠆ꠌꠤꠔ ꠛꠤꠘꠣꠡ ꠅꠁꠎꠤꠛꠣꠄ। ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠎꠦ ꠖꠦꠡ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠤꠘꠅ ꠔꠥꠝꠞꠣ ꠛꠦꠡꠤ ꠖꠤꠘ ꠛꠣꠌꠔꠣꠄ ꠘꠣꠄ।

19 “ꠅꠃ ꠀꠍꠝꠣꠘ-ꠎꠝꠤꠘꠞꠦ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠡꠣꠇ꠆ꠇꠤ ꠞꠣꠈꠤꠀ ꠇꠁꠀꠞ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠤꠘ꠆ꠖꠦꠉꠤ ꠀꠞ ꠝꠃꠔ, ꠞꠢꠝꠔ ꠀꠞ ꠟꠣꠘ꠆ꠘꠔꠞꠦ ꠔꠥꠟꠤꠀ ꠗꠞꠍꠤ। ꠄꠞꠟꠣꠉꠤ ꠅ ꠜꠣꠁꠀꠁꠘ, ꠔꠥꠝꠞꠣ ꠎꠤꠘ꠆ꠖꠦꠉꠤꠞꠦ ꠙꠍꠘ꠆ꠖ ꠇꠞꠤꠟꠣꠅ, ꠔꠦꠃ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠎꠣꠘ ꠛꠣꠌꠤꠛ। 20 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠅ, ꠔꠣꠘ ꠀꠡꠤꠇ ꠛꠘꠤꠀ ꠔꠣꠘꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠞꠣꠈꠤꠅ, ꠅꠔꠣꠞ ꠝꠣꠎꠦꠃ ꠔꠥꠝꠞꠣꠞ ꠎꠤꠘ꠆ꠖꠦꠉꠤ। ꠔꠣꠁꠘ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠛꠣꠞ ꠟꠣꠉꠤ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠀꠞ ꠁꠀꠇꠥꠛꠞ ꠟꠉꠦ ꠇꠍꠝ ꠈꠣꠁꠀ ꠅꠀꠖꠣ ꠖꠤꠍꠂꠘ, ꠢꠃ ꠖꠦꠡꠅ ꠅꠔꠣ ꠢꠥꠇꠥꠝ-ꠀꠢꠇꠣꠝ ꠝꠣꠘꠣꠞ ꠝꠣꠎꠦꠃ ꠔꠥꠝꠞꠣꠞ ꠎꠤꠘ꠆ꠖꠦꠉꠤ।”