33
ꠢꠎꠞꠔ ꠝꠥꠍꠣ (ꠀ꠩) ꠅꠞ ꠀꠈꠦꠞꠤ ꠖꠥꠀ
1 ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣ ꠝꠥꠍꠣ ꠘꠛꠤꠞ ꠃꠚꠣꠔꠞ ꠀꠉꠦ, ꠛꠘꠤ ꠁꠍꠞꠣꠁꠟꠞꠦ ꠔꠣꠁꠘ ꠅꠃ ꠖꠥꠀ ꠖꠤꠟꠣ:
2 ꠔꠡꠞꠤꠚ ꠀꠘꠟꠣ ꠝꠣꠛꠥꠖ ꠀꠟ꠆ꠟꠣꠄ ꠔꠥꠞ ꠙꠣꠠ ꠕꠣꠇꠤ,
ꠀꠝꠞꠣ ꠢꠇꠟꠦ ꠖꠦꠈꠣ ꠙꠣꠁꠟꠣꠝ ꠘꠥꠞꠦ ꠄꠟꠣꠢꠤ।
ꠍꠦꠁꠞ ꠀꠞ ꠚꠣꠞꠣꠘ ꠙꠣꠠ ꠕꠣꠇꠤ ꠖꠦꠈꠣꠁꠘ ꠘꠥꠞꠞ ꠔꠦꠎ,
ꠟꠣꠈꠅ ꠟꠣꠈꠅ ꠚꠤꠞꠤꠡ꠆ꠔꠣ ꠇꠤꠛꠣ ꠀꠞꠅ ꠛꠦꠡ।
ꠖꠤꠖꠣꠞ ꠖꠤꠟꠣ ꠝꠣꠛꠥꠖꠦ ꠄꠞꠣꠞ ꠝꠣꠎ ꠕꠘꠦ,
ꠒꠣꠁꠘ ꠀꠔꠅ ꠜꠞꠣ ꠀꠍꠤꠟ ꠘꠥꠞꠞ ꠀꠉꠥꠁꠘꠦ।
3 ꠢꠣꠍꠣꠃ ꠔꠣꠁꠘ ꠝꠣꠄꠀ ꠇꠞꠂꠘ ꠘꠤꠎꠞ ꠛꠘ꠆ꠖꠣꠞꠦ,
ꠔꠣꠝꠣꠝ ꠙꠞꠦꠎꠉꠣꠞ ꠛꠘ꠆ꠖꠣ ꠔꠣꠘ ꠢꠥꠇꠥꠝꠦ ꠌꠟꠦ।
ꠍꠁꠎꠖꠣ ꠇꠞꠣꠔ ꠀꠍꠂꠘ ꠔꠣꠞꠣ ꠔꠣꠘ ꠙꠣꠅꠞ ꠔꠟꠣꠔ,
ꠢꠥꠇꠥꠝ ꠙꠣꠁꠟꠦ ꠔꠣꠝꠤꠟ ꠇꠞꠂꠘ ꠞꠂꠘ ꠔꠣꠘ ꠇꠕꠣꠔ।
4 ꠝꠥꠍꠣ ꠘꠛꠤꠄ ꠎꠦ ꠡꠞꠤꠅꠔ ꠖꠤꠍꠟꠣ ꠀꠝꠞꠣꠞꠦ,
ꠛꠘꠤ ꠁꠍꠞꠣꠁꠟꠞ ꠗꠘ ꠁꠔꠣ ꠎꠣꠘꠦ ꠢꠇꠟꠦ।
5 ꠖꠟꠣ ꠅꠁꠀ ꠀꠁꠟꠣ ꠎꠦꠛꠟꠣ ꠝꠄ-ꠝꠥꠞꠛ꠆ꠛꠤꠞ ꠖꠟ,
ꠟꠉ ꠅꠁꠀ ꠀꠁꠍꠟꠣ ꠁꠍꠞꠣꠁꠟꠞ ꠈꠣꠘ꠆ꠖꠣꠘꠞ ꠢꠇꠟ,
ꠢꠃ ꠡꠝꠄ ꠔ ꠝꠣꠛꠥꠖ ꠀꠍꠟꠣ ꠔꠣꠞꠣꠞ ꠃꠙꠞꠞ ꠛꠣꠖꠡꠣ,
ꠄꠞꠣ ꠢꠇꠟ ꠔꠣꠘ ꠙ꠆ꠞꠎꠣ ꠔꠣꠁꠘꠃ ꠡꠣꠢꠣꠘꠡꠣ।
ꠛꠣꠞꠅ ꠈꠣꠘ꠆ꠖꠣꠘꠞꠦ ꠖꠥꠀ ꠖꠤꠟꠣ
6 ꠞꠥꠛꠦꠘ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠢꠎꠞꠔ ꠝꠥꠍꠣꠄ ꠇꠁꠟꠣ:
ꠞꠥꠛꠦꠘ ꠈꠣꠘ꠆ꠖꠣꠘ ꠎꠤꠘ꠆ꠖꠣ ꠞꠃꠇ, ꠘꠤꠙꠣꠔ ꠘꠣꠄ ꠇꠥꠘꠥꠖꠤꠘ,
ꠔꠣ-ꠅ ꠔꠣꠞ ꠊꠞꠅ ꠙꠄꠖꠣ ꠅꠁꠛ ꠇꠝ ꠙꠥꠀ-ꠙꠥꠠꠤꠘ।
7 ꠄꠢꠥꠖꠣ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠇꠁꠟꠣ:
ꠅ ꠝꠣꠛꠥꠖ, ꠔꠥꠝꠤ ꠅꠈꠘ ꠄꠢꠥꠖꠣꠞ ꠚꠞꠤꠀꠖ ꠢꠥꠘꠅ,
ꠜꠣꠁ-ꠛꠤꠞꠣꠖꠞꠞ ꠗꠣꠞꠅ ꠔꠣꠞꠦ ꠚꠤꠞꠣꠁꠀ ꠀꠘꠅ।
ꠖꠥꠁꠅ ꠀꠔ ꠔꠣꠞ ꠡꠛꠟ ꠞꠣꠈꠅ ꠟꠣꠠꠣꠁꠞ ꠡꠝꠄ,
ꠡꠣꠁꠎ꠆ꠎ ꠇꠞꠅ ꠔꠥꠝꠤ ꠔꠣꠞꠦ ꠖꠥꠡꠝꠘꠞꠦ ꠖꠦꠅ ꠀꠞꠣꠁ।
8 ꠟꠦꠛꠤ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠇꠁꠟꠣ:
ꠔꠥꠝꠣꠞ ꠀꠡꠤꠇꠞ ꠀꠔꠅ ꠀꠍꠦ ꠔꠥꠝ꠆ꠝꠤꠝ ꠀꠞ ꠃꠞꠤꠝ*33:8 ꠔꠥꠝ꠆ꠝꠤꠝ ꠀꠞ ꠃꠞꠤꠝ ꠅꠁꠟ ꠖꠥꠁ ꠎꠤꠘꠤꠡ ꠀꠟ꠆ꠟꠣꠞ ꠝꠞ꠆ꠎꠤ ꠛꠥꠎꠣꠞ ꠟꠣꠉꠤ। ꠗꠣꠞꠘꠣ ꠇꠞꠣ ꠅꠄ, ꠁꠔꠣ ꠅꠁꠟ ꠛꠤꠡꠦꠡ ꠖꠥꠁ ꠙꠣꠔ꠆ꠔꠞ ꠛꠣ ꠖꠥꠁ ꠝꠘꠤ। ꠢꠤꠎꠞꠔ ২৮:৩০ ꠖꠦꠈꠃꠇ꠆ꠇꠣ।,
ꠇꠥꠖꠞꠔꠤ ꠢꠃ ꠖꠥꠁ ꠍꠣꠝꠣꠘꠣꠞ ꠝꠣꠟꠤꠇ ꠈꠣꠟꠤ ꠅꠃ ꠟꠦꠛꠤꠘ।
ꠝꠣꠍꠣ ꠘꠣꠝꠞ ꠎꠣꠉꠣꠔ ꠟꠁꠍ ꠔꠣꠞ ꠙꠞꠤꠇ꠆ꠇꠣ,
ꠝꠦꠞꠤꠛꠣ ꠘꠣꠝꠞ ꠙꠣꠘꠤꠞ ꠎꠣꠉꠣꠔ ꠅꠁꠍꠤꠟ ꠅꠃ ꠇꠣꠁꠎ꠆ꠎꠣ।†33:8 ꠝꠣꠍꠣ ꠀꠞ ꠝꠦꠞꠤꠛꠣ। ꠢꠤꠎꠞꠔ ১৭:৭ ꠖꠦꠈꠃꠇ꠆ꠇꠣ।
9 ꠝꠣ-ꠛꠣꠚꠞꠦꠅ ꠔꠥꠟꠍꠦ ꠘꠣ ꠢꠦ ꠔꠥꠝꠣꠞ ꠃꠙꠞꠦ,
ꠉꠥꠘꠣꠞ ꠡꠣꠎꠣ ꠖꠤꠍꠦ ꠔꠣꠞ ꠝꠣʼꠞ ꠙꠦꠐꠞ ꠜꠣꠁꠞꠦ।
ꠖꠣꠛꠤ ꠍꠣꠠꠤꠀ ꠡꠙꠤ ꠖꠤꠍꠦ ꠀꠙꠘ ꠙꠥꠀ-ꠙꠥꠠꠤ,
ꠎꠤꠘ꠆ꠖꠦꠉꠤ ꠇꠥꠞꠛꠣꠘꠤ ꠖꠤꠍꠦ ꠔꠥꠝꠣꠞ ꠀꠁꠘ ꠝꠣꠘꠤ।
ꠔꠥꠝꠣꠞ ꠇꠣꠟꠣꠝ ꠙꠣꠞꠣ ꠖꠤꠍꠦ ꠝꠣꠘꠍꠦ ꠡꠞꠤꠅꠔ,
ꠅꠀꠖꠣ-ꠌꠥꠇ꠆ꠔꠤ ꠝꠣꠘꠤꠀ ꠌꠟꠍꠦ, ꠘꠣ ꠇꠞꠤ ꠈꠤꠀꠘꠔ।
10 ꠔꠥꠝꠣꠞ ꠢꠥꠇꠥꠝ ꠔꠣꠞꠣ ꠢꠤꠇꠣꠄ ꠁꠀꠇꠥꠛ ꠛꠋꠡꠞꠦ,
ꠔꠥꠝꠣꠞ ꠡꠞꠤꠅꠔ ꠛꠥꠎꠣꠄ ꠔꠣꠞꠣ ꠁꠍꠞꠣꠁꠟ ꠎꠣꠔꠤꠞꠦ।
ꠀꠉꠞ-ꠈꠥꠡꠛꠄ ꠎꠣꠟꠣꠄ ꠔꠣꠞꠣ ꠔꠥꠝꠣꠞ ꠍꠣꠝꠘꠦ ꠀꠁꠀ,
ꠎꠣꠟꠣꠁꠟ ꠇꠥꠞꠛꠣꠘꠤ ꠖꠦꠄ ꠇꠥꠞꠛꠣꠘ-ꠉꠣꠔ ꠉꠤꠀ।
11 ꠔꠣꠞ ꠍꠣꠝꠣꠘꠣꠔ ꠛꠞꠇꠔ ꠖꠦꠅ ꠉ ꠅ ꠀꠝꠣꠞ ꠝꠣꠛꠥꠖ,
ꠞꠣꠎꠤ-ꠈꠥꠡꠤ ꠞꠅ ꠔꠥꠝꠤ ꠔꠣꠞ ꠃꠙꠞꠦ ꠛꠃꠔ।
ꠔꠣꠞ ꠖꠥꠡꠝꠘꠞ ꠇꠝꠞ ꠔꠥꠝꠤ ꠜꠣꠋꠉꠤ-ꠌꠥꠞꠤ ꠖꠦꠅ,
ꠊꠤꠘ꠆ꠘꠣ ꠇꠞꠞꠣꠞ ꠇꠝꠞ ꠜꠣꠋꠉꠤ ꠛꠞꠛꠣꠖ ꠇꠞꠤꠟꠣꠅ।
12 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠝꠣꠛꠥꠖꠞ ꠝꠣꠄꠀꠞ ꠛꠘ꠆ꠖꠣ ꠡꠣꠄ-ꠡꠣꠘ꠆ꠔꠤꠄ ꠞꠁꠛ,
ꠘꠤꠞꠣꠙꠖꠦ ꠞꠁꠛ ꠢꠦ ꠔꠣꠘ ꠒꠣꠈꠘꠣꠞ ꠔꠟꠅ।
ꠢꠣꠞꠣ ꠖꠤꠘ ꠢꠣꠞꠣ ꠞꠣꠁꠔ ꠍꠣꠄꠀꠔ ꠞꠣꠈꠛꠣ ꠔꠣꠞꠦ,
ꠎꠤꠘ꠆ꠖꠦꠉꠤ ꠉꠥꠎꠞꠤꠛ ꠔꠣꠞ ꠔꠣꠘ ꠛꠉꠟ ꠔꠟꠦ।
13 ꠁꠃꠍꠥꠚ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠞꠢꠝ-ꠛꠞꠇꠔ ꠇꠞꠅ ꠝꠣꠛꠥꠖ ꠔꠣꠞ ꠖꠦꠡꠈꠣꠘꠞꠦ,
ꠀꠍꠝꠣꠘ ꠕꠣꠇꠤ ꠖꠣꠝꠤ ꠖꠣꠝꠤ ꠎꠤꠘꠤꠡ ꠖꠦꠅ ꠔꠣꠞꠦ।
ꠈꠥꠀ ꠖꠤꠀ ꠜꠤꠎꠣꠁ ꠖꠦꠅ ꠃꠙꠞꠞ ꠀꠍꠝꠣꠘ ꠕꠣꠇꠤ,
ꠀꠞꠅ ꠖꠦꠅ ꠔꠣꠞ ꠎꠝꠤꠘꠅ ꠝꠣꠐꠤꠞ ꠝꠥꠞꠞ ꠙꠣꠘꠤ।
14 ꠡꠥꠞꠥꠎꠞ ꠔꠦꠎꠦ ꠙꠣꠇꠣꠁꠀ ꠖꠦꠅ ꠜꠣꠟꠣ ꠚꠟ,
ꠌꠣꠘ꠆ꠖꠦ ꠌꠣꠘ꠆ꠖꠦ ꠖꠦꠅ ꠔꠣꠞꠦ ꠝꠎꠣꠞ ꠚꠡꠟ।
15 ꠙꠥꠞꠣꠘꠣ ꠙꠣꠠ ꠕꠣꠇꠤ ꠗꠘ-ꠍꠣꠝꠣꠘꠣ ꠖꠦꠅ,
ꠌꠤꠞꠇꠣꠟꠤꠘ ꠙꠣꠠꠤꠀ ꠝꠣꠟ ꠔꠣꠞ ꠎꠝꠤꠘꠅ ꠘꠦꠅ।
16 ꠎꠝꠤꠘ ꠕꠣꠇꠤ ꠖꠦꠅ ꠉ ꠝꠣꠛꠥꠖ ꠜꠣꠟꠣ ꠜꠣꠟꠣ ꠝꠣꠟ,
ꠎꠣꠟꠣꠁꠟ ꠎꠋꠟꠣꠞ ꠘꠥꠞꠞ ꠝꠣꠟꠤꠇ ꠞꠢꠝ ꠇꠞꠅ ꠌꠤꠞꠇꠣꠟ‡33:16 ꠎꠣꠟꠣꠁꠟ ꠎꠋꠟꠣ। ꠢꠤꠎꠞꠔ ৩:১-৪ ꠖꠦꠈꠃꠇ꠆ꠇꠣ।,
ꠁꠃꠍꠥꠚꠞ ꠝꠣꠕꠣꠔ ꠟꠣꠝꠃꠇ ꠀꠝꠣꠞ ꠅꠃ ꠖꠥꠀ,
ꠜꠣꠁꠀꠁꠘ ꠕꠣꠇꠤ ꠝꠢꠣꠘ ꠎꠘꠞ ꠔꠣꠟꠥꠔ ꠟꠣꠝꠃꠇ ꠁꠔꠣ।
17 ꠒꠦꠇꠣ ꠛꠣꠁꠌ꠆ꠌꠣꠞ ꠝꠔ ꠅꠃꠇ ꠔꠣꠞ ꠛꠟ-ꠡꠇ꠆ꠔꠤ ꠀꠞ ꠡꠣꠘ,
ꠔꠣꠞ ꠝꠣꠕꠣꠞ ꠢꠤꠋ ꠎꠥꠠꠣ ꠔ ꠎꠋꠟꠤ ꠛꠄꠞꠣꠞ ꠟꠣꠈꠣꠘ।
ꠢꠤꠋ ꠖꠤꠀ ꠉꠥꠔꠣꠁꠛ ꠢꠦ ꠢꠣꠞꠣ ꠎꠉꠔꠞꠦ,
ꠙꠥꠛ ꠙꠌꠤꠝ ꠃꠔ꠆ꠔꠞ ꠖꠇ꠆ꠇꠤꠘ ꠖꠃꠠꠣꠁꠛ ꠢꠇꠟꠞꠦ।
ꠀꠚꠞꠣꠁꠝꠞ ꠅꠁꠛꠣ ꠅꠟꠣ ꠟꠣꠈꠅ ꠟꠣꠈꠅ ꠎꠘ,
ꠀꠎꠣꠞ ꠀꠎꠣꠞ ꠎꠘ ꠅꠁꠛꠣ ꠝꠣꠘꠡꠣꠞ ꠝꠥꠟ ꠗꠘ।
18 ꠍꠛꠥꠟꠘ ꠀꠞ ꠁꠍꠣꠈꠞꠞ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠍꠛꠥꠟꠘꠦ ꠈꠥꠡꠤ ꠇꠞꠃꠇ ꠛꠣꠁꠞꠞ ꠇꠣꠝ-ꠇꠣꠎ ꠟꠁꠀ,
ꠁꠍꠣꠈꠞ ꠈꠥꠡꠤ ꠞꠃꠇ ꠊꠞꠞ ꠇꠣꠝꠅ ꠞꠁꠀ।
19 ꠒꠣꠇꠤ ꠒꠣꠇꠤ ꠙꠣꠠꠞ ꠗꠣꠞꠅ ꠀꠘꠛ ꠝꠣꠘꠡꠞꠦ,
ꠇꠥꠞꠛꠣꠘꠤ ꠖꠤꠛ ꠢꠘꠅ ꠈꠣꠍ ꠍꠢꠤ ꠖꠤꠟꠦ।
ꠖꠞꠤꠀ ꠕꠣꠇꠤ ꠔꠥꠟꠛꠣ ꠔꠣꠞꠣ ꠖꠞꠤꠀꠞ ꠙꠦꠐꠞ ꠗꠘ,
ꠛꠣꠟꠤ ꠕꠣꠇꠤ ꠔꠥꠟꠤꠀ ꠀꠘꠛꠣ ꠟꠥꠇꠣꠁꠟ ꠡꠛ ꠞꠔꠘ।
20 ꠍꠣꠖꠥ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠝꠥꠛꠣꠞꠇ ꠢꠃ ꠎꠘ, ꠍꠣꠖꠥꠞ ꠎꠣꠄꠉꠣ ꠛꠣꠠꠣꠁ ꠖꠤꠛꠣ ꠎꠦꠁꠘ,
ꠍꠣꠖꠥ ꠔ ꠡꠤꠋꠢꠞ ꠟꠣꠈꠣꠘ ꠈꠣꠙ ꠗꠞꠤ ꠞꠄ,
ꠖꠥꠡꠝꠘꠞ ꠀꠔ ꠀꠞ ꠇꠟ꠆ꠟꠣ ꠍꠤꠠꠤꠀ ꠚꠣꠟꠣꠄ।
21 ꠢꠇꠟ ꠕꠣꠇꠤ ꠡꠞꠟ ꠎꠝꠤ ꠘꠤꠎꠞ ꠟꠣꠉꠤ ꠘꠤꠍꠦ,
ꠎꠁꠉ꠆ꠉ ꠝꠥꠞꠛ꠆ꠛꠤꠞ ꠀꠡꠘ ꠔꠣꠞ ꠟꠣꠉꠤ ꠕꠅꠀ ꠅꠁꠍꠦ।
ꠎꠣꠔꠤꠞ ꠡꠞ꠆ꠖꠣꠞ ꠅꠇꠟ ꠖꠟꠣ ꠅꠀꠞ ꠇꠣꠟꠅ,
ꠝꠣꠛꠥꠖꠞ ꠘꠤꠀꠄ ꠛꠤꠌꠣꠞ ꠢꠦ ꠔꠣꠝꠤꠟ ꠇꠞꠤꠟ,
ꠛꠘꠤ ꠁꠍꠞꠣꠁꠟꠞꠦ ꠖꠦꠅꠀ ꠢꠥꠇꠥꠝ ꠙꠥꠞꠣ ꠝꠣꠁꠘ꠆ꠘ ꠇꠞꠟ।
22 ꠖꠣꠘ ꠈꠣꠘ꠆ꠖꠣꠘꠞ ꠛꠦꠙꠣꠞ ꠔꠣꠁꠘ ꠇꠁꠟꠣ:
ꠚꠥꠞꠚꠥꠞꠣ ꠡꠤꠋꠢꠞ ꠛꠣꠁꠌ꠆ꠌꠣ ꠅꠁꠟ ꠖꠣꠘ ꠈꠣꠘ꠆ꠖꠣꠘ,
ꠛꠣꠡꠘ ꠖꠦꠡ ꠕꠘ ꠚꠣꠟꠖꠤ ꠀꠁꠀ ꠇꠞꠦ ꠛꠠꠣꠁ ꠡꠣꠘ।
23 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠘꠙ꠆ꠔꠣꠟꠤ ꠔ ꠝꠣꠛꠥꠖꠞ ꠝꠣꠄꠀ-ꠝꠝꠔꠣꠔ ꠢꠣꠛꠥꠒꠥꠛꠥ ꠈꠣꠞ,
ꠔꠣꠘ ꠞꠢꠝ-ꠛꠞꠇꠔꠅ ꠢꠦ ꠢꠣꠔꠣꠞ ꠇꠣꠐꠦꠞ।
ꠔꠥꠝꠤ ꠔꠣꠞꠦ ꠔꠣꠞ ꠀꠙꠘ ꠡꠤꠝꠣꠘꠣꠔ ꠀꠘꠅ,
ꠍꠁ-ꠍꠣꠟꠣꠝꠔꠦ ꠉꠣꠟꠤꠟ ꠀꠅꠞ ꠀꠞ ꠖꠃꠇꠘꠞ ꠖꠦꠡꠅ ꠘꠦꠅ।
24 ꠀꠡꠤꠞ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ:
ꠀꠡꠤꠞꠦ ꠙꠣꠁꠛ ꠞꠢꠝꠔ ꠅꠁꠘ꠆ꠘ ꠕꠣꠇꠤ ꠛꠦꠡꠤ,
ꠢꠇꠟ ꠜꠣꠁꠄ ꠝꠣꠄꠀ ꠇꠞꠛꠣ ꠔꠣꠞꠦ ꠞꠣꠡꠤ ꠞꠣꠡꠤ।
ꠅꠔ ꠞꠢꠝ-ꠛꠞꠇꠔ ꠙꠣꠁꠀ ꠈꠥꠡꠤ ꠕꠣꠇꠣꠞ ꠇꠣꠟꠅ,
ꠖꠥꠁ ꠙꠣꠅ ꠔꠣꠞ ꠒꠥꠛꠣꠁꠟ ꠞꠁꠛ ꠎꠄꠔꠥꠘꠞ ꠔꠦꠟꠅ।
25 ꠔꠣꠞ ꠉꠦꠁꠐ ꠅꠇꠟ ꠛꠣꠘ꠆ꠖꠣꠁꠟ ꠅꠃꠇ ꠟꠥꠀ ꠀꠞ ꠔꠣꠝꠣꠖꠤ,
ꠢꠦ ꠛꠟꠀꠟꠣ ꠝꠎꠛꠥꠔ ꠞꠃꠇ ꠔꠣꠞ ꠙꠥꠞꠣ ꠎꠤꠘ꠆ꠖꠦꠉꠤ।
26 ꠝꠥꠍꠣ ꠘꠛꠤꠄ ꠀꠞꠅ ꠇꠁꠟꠣ:
ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣꠞ ꠢꠝꠣꠘꠤ ꠖꠥꠍꠞꠣ ꠇꠦꠃ ꠘꠣꠁ,
ꠔꠥꠝꠞꠣꠞꠦ ꠡꠣꠁꠎ꠆ꠎꠞ ꠟꠣꠉꠤ ꠀꠍꠝꠣꠘꠅ ꠛꠦꠠꠣꠁꠘ।
ꠔꠣꠘ ꠘꠤꠎꠞ ꠡꠣꠘ-ꠝꠢꠤꠝꠣꠄ ꠝꠦꠊꠞ ꠌꠣꠇꠣꠔ ꠌꠠꠤꠀ,
ꠡꠣꠁꠎ꠆ꠎꠇꠣꠞꠤ ꠅꠁꠔꠣ ꠌꠣꠁꠘ ꠔꠥꠝꠞꠣꠞ ꠟꠣꠉꠤꠀ।
27 ꠢꠇꠟ ꠙꠄꠟꠣꠇꠥꠞ ꠄꠇ ꠀꠟ꠆ꠟꠣꠃ ꠅꠁꠟꠣ ꠀꠡꠞꠄ ꠑꠤꠇꠣꠘꠣ,
ꠔꠣꠘ ꠌꠤꠞꠇꠣꠟꠤꠘ ꠀꠔ ꠖꠤꠀ ꠔꠥꠝꠞꠣꠞꠦ ꠞꠣꠈꠍꠂꠘ ꠗꠞꠤꠀ।
ꠔꠥꠝꠞꠣꠞ ꠍꠣꠝꠘꠞ ꠢꠇꠟ ꠖꠥꠡꠝꠘ ꠔꠣꠁꠘꠃ ꠈꠦꠖꠣꠁ ꠖꠦꠁꠘ,
ꠁꠔꠣꠞꠦ ꠛꠤꠘꠣꠡ ꠇꠞꠅ ꠢꠥꠇꠥꠝ ꠖꠤꠍꠂꠘ ꠔꠣꠁꠘ।
28 ꠄꠞꠟꠣꠉꠤ ꠁꠍꠞꠣꠁꠟ ꠎꠣꠔꠤ ꠜꠣꠟꠣ-ꠀꠚꠔꠣ ꠞꠂꠘ,
ꠁꠀꠇꠥꠛ ꠛꠋꠡꠞ ꠙꠣꠘꠤꠞ ꠏꠞꠘꠣ ꠘꠤꠞꠣꠙꠖ ꠕꠣꠇꠂꠘ।
ꠢꠤꠘꠅ ꠞꠁꠛ ꠚꠄ-ꠚꠡꠟ ꠀꠞ ꠀꠋꠉꠥꠞ ꠞꠡꠦ ꠜꠞꠣ,
ꠔꠣꠞ ꠃꠙꠞꠦ ꠟꠣꠝꠛ ꠀꠍꠝꠣꠘꠤ ꠈꠥꠀ।
29 ꠅ ꠛꠘꠤ ꠁꠍꠞꠣꠁꠟ, ꠝꠥꠛꠣꠞꠇ ꠀꠅꠟꠣꠖ ꠔꠥꠝꠤ!
ꠔꠥꠝꠤ ꠅꠁꠟꠣꠄ ꠝꠣꠛꠥꠖ ꠀꠟ꠆ꠟꠣꠞ ꠀꠎꠣꠖ ꠇꠞꠣ ꠎꠣꠔꠤ।
ꠡ꠆ꠛꠄꠅꠋ ꠝꠣꠛꠥꠖ ꠅꠁꠟꠣ ꠔꠥꠝꠣꠞ ꠎꠣꠘ ꠛꠣꠌꠣꠘꠤꠞ ꠓꠣꠟ,
ꠔꠣꠁꠘꠃ ꠅꠁꠟꠣ ꠔꠥꠝꠣꠞ ꠎꠄꠅꠞ ꠗꠣꠞꠣꠁꠟ ꠔꠟꠥꠀꠞ।
ꠖꠥꠡꠝꠘ ꠔꠥꠝꠣꠞ ꠍꠣꠝꠘꠦ ꠀꠁꠟꠦ ꠕꠞ-ꠕꠞꠣꠁꠀ ꠇꠣꠙꠦ,
ꠔꠥꠝꠤ ꠔꠣꠞꠣꠞ ꠛꠥꠇꠥꠞ ꠃꠙꠞꠦ ꠝꠣꠠꠣ ꠖꠤꠛꠣꠄ ꠘꠦ।