1 ꠛꠣꠖꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠄꠟꠤꠝ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠟꠣ। ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠘꠤꠞ ꠛꠣꠖꠞ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈꠅ ꠔꠣꠞꠣ ꠍꠤꠘ ꠘꠣꠝꠞ ꠝꠞꠥꠜꠥꠝꠤꠔ ꠀꠁꠀ ꠀꠎꠤꠟꠣ। ꠍꠤꠘ ꠅꠁꠟ ꠔꠥꠞ ꠙꠣꠠ ꠀꠞ ꠄꠟꠤꠝꠞ ꠝꠣꠎꠈꠣꠘꠅ। 2 ꠅꠃ ꠡꠝꠄ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠇꠣꠘꠣ-ꠇꠣꠘꠤ ꠟꠣꠉꠣꠁꠟꠣ। 3 ꠄꠞꠣ ꠖꠥꠁꠅꠎꠘꠞ ꠛꠤꠞꠥꠖ꠆ꠖꠦ ꠛꠘꠤ ꠁꠍꠞꠣꠁꠟꠦ ꠇꠁꠟꠣ, “ꠢꠣꠄꠞꠦ ꠢꠣꠄ, ꠁꠔꠣꠞ ꠇꠕꠣꠄ ꠀꠝꠞꠣ ꠇꠦꠘꠦ ꠀꠁꠟꠣꠝ, ꠝꠣꠛꠥꠖꠦ ꠇꠦꠘꠦ ꠘꠤꠎꠞ ꠀꠔꠦ ꠀꠝꠞꠣꠞꠦ ꠝꠤꠡꠞ ꠖꠦꠡꠅ ꠝꠣꠞꠟꠣ ꠘꠣ? ꠢꠤ ꠡꠝꠄ ꠀꠝꠞꠣ ꠉꠥꠡ꠆ꠔꠞ ꠒꠦꠉꠞ ꠇꠣꠘ꠆ꠖꠣꠔ ꠛꠁꠔꠣꠝ, ꠙꠦꠐ ꠜꠞꠤꠀ ꠉꠥꠡ꠆ꠔ-ꠞꠥꠐꠤ ꠈꠣꠁꠔꠣꠝ, ꠅꠁꠟꠦ ꠁꠔꠣꠄ ꠀꠝꠞꠣꠞꠦ ꠃꠙꠣꠡꠦ ꠀꠞ ꠙꠦꠐꠞ ꠜꠥꠇꠦ ꠝꠣꠞꠔꠣ ꠇꠞꠤ ꠅꠘꠅ ꠀꠘꠍꠂꠘ।”

4 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠔꠣꠞꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠝꠥ, ꠔꠣꠞꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠂꠘ ꠇꠤ ꠘꠣ। ꠀꠝꠤ ꠔꠥꠝꠞꠣꠞ ꠈꠣꠘꠤ ꠝꠦꠊꠞ ꠎꠠꠤꠞ ꠟꠣꠈꠣꠘ ꠀꠍꠝꠣꠘ ꠕꠣꠇꠤ ꠎꠝꠤꠘꠅ ꠍꠣꠠꠤꠝꠥ। ꠝꠣꠘꠡꠦ ꠛꠣꠁꠞꠦ ꠀꠁꠀ ꠢꠣꠙ꠆ꠔꠣꠞ ꠙꠞꠔꠦꠇ ꠖꠤꠘꠞ ꠈꠣꠘꠤ ꠙꠞꠔꠤ ꠖꠤꠘ ꠔꠥꠟꠤꠀ ꠘꠤꠛꠣ। 5 ꠈꠣꠟꠤ ꠢꠣꠙ꠆ꠔꠣꠞ ꠍꠄ ꠘꠝ꠆ꠛꠞ ꠖꠤꠘꠅ ꠔꠣꠞꠣ ꠎꠦꠔꠣ ꠔꠥꠟꠤꠀ ꠀꠘꠛꠣ, ꠁꠔꠣ ꠔꠂꠀꠞ ꠇꠞꠣꠞ ꠛꠣꠖꠦ ꠅꠁꠘ꠆ꠘ ꠖꠤꠘꠞ ꠈꠣꠘꠤ ꠕꠣꠇꠤ ꠒꠣꠛꠥꠟ ꠅꠁꠎꠤꠛ।”

6 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘꠦ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠔꠥꠝꠞꠣ ꠎꠦꠛꠟꠣ ꠇꠣꠘꠣ-ꠇꠣꠘꠤ ꠟꠣꠉꠣꠁꠍ, ꠔꠦ ꠀꠁꠎ ꠢꠣꠁꠘ꠆ꠎꠣ ꠛꠣꠟꠣꠃ ꠛꠥꠎꠛꠣꠄ, ꠅꠃ ꠝꠣꠛꠥꠖꠦꠃ ꠔꠥꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ। 7 ꠛꠤꠀꠘ ꠅꠁꠟꠦꠃ ꠔꠥꠝꠞꠣ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠖꠦꠈꠛꠣꠄ, ꠔꠣꠁꠘ ꠔ ꠢꠥꠘꠍꠂꠘ, ꠔꠥꠝꠞꠣ ꠇꠤꠔꠣ ꠇꠣꠘꠣ-ꠇꠣꠘꠤ ꠇꠞꠍ। ꠔꠦ ꠀꠝꠞꠣ ꠀꠞ ꠇꠤꠔꠣ ꠎꠦꠘ, ꠔꠥꠝꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠅꠔꠔꠣ ꠝꠣꠔꠤꠞꠣꠄ?” 8 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠢꠣꠁꠘ꠆ꠎꠣ ꠛꠣꠟꠣ ꠔꠥꠝꠞꠣꠞꠦ ꠉꠥꠡ꠆ꠔ ꠖꠤꠛꠣ, ꠀꠞ ꠛꠤꠀꠘꠦ ꠙꠦꠐ ꠜꠞꠣ ꠞꠥꠐꠤꠅ ꠖꠤꠛꠣ। ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠔꠥꠝꠞꠣ ꠎꠦꠔꠣ ꠇꠣꠘꠣ-ꠇꠣꠘꠤ ꠇꠞꠍ, ꠁꠔꠣ ꠔꠣꠁꠘ ꠢꠥꠘꠍꠂꠘ। ꠀꠍꠟꠦ ꠀꠝꠞꠣ ꠖꠥꠁꠎꠘ ꠇꠤꠔꠣ ꠎꠦꠘ, ꠔꠥꠝꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠅꠔꠔꠣ ꠝꠣꠔꠤꠞꠣꠄ? ꠁ ꠝꠣꠔ ꠔ ꠀꠝꠞꠣꠞ ꠛꠤꠞꠥꠖ꠆ꠖꠦ ꠘꠣꠄ, ꠔꠥꠝꠞꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦꠃ ꠝꠣꠔꠤꠞꠣꠄ।”

9 ꠄꠞꠛꠣꠖꠦ ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠎꠦꠔꠣ ꠝꠣꠔꠤꠍ, ꠁꠔꠣ ꠔꠣꠁꠘ ꠢꠥꠘꠍꠂꠘ। ꠅꠈꠘ ꠔꠥꠝꠞꠣ ꠀꠁꠀ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠅ।” 10 ꠔꠦꠃ ꠢꠣꠞꠥꠘꠦ ꠔꠣꠞꠣꠞꠦ ꠅꠃ ꠡꠋꠛꠣꠖ ꠎꠣꠘꠣꠁꠞꠣ, ꠅꠃ ꠡꠝꠄ ꠝꠞꠥꠜꠥꠝꠤꠞ ꠛꠣꠄ ꠔꠣꠞꠣꠞ ꠌꠃꠈ ꠙꠠꠔꠦꠃ ꠖꠦꠈꠂꠘ, ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠍꠦ।

11 ꠄꠞꠝꠣꠎꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 12 “ꠀꠝꠤ ꠛꠘꠤ ꠁꠍꠞꠣꠁꠟꠞ ꠢꠇ꠆ꠇꠟ ꠝꠣꠔ-ꠇꠕꠣ ꠢꠥꠘꠍꠤ। ꠅꠈꠘ ꠔꠥꠝꠤ ꠎꠣꠘꠣꠁ ꠖꠦꠅ, ꠔꠣꠞꠣ ꠙꠞꠔꠦꠇ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠈꠣꠁꠛꠣ ꠉꠥꠡ꠆ꠔ ꠀꠞ ꠛꠤꠀꠘꠦ ꠈꠣꠁꠛꠣ ꠙꠦꠐ ꠜꠞꠣ ꠞꠥꠐꠤ। ꠔꠦꠃ ꠔꠣꠞꠣ ꠛꠥꠎꠛꠣ, ꠀꠝꠤ ꠀꠟ꠆ꠟꠣꠃ ꠔꠣꠞꠣꠞ ꠝꠣꠛꠥꠖ।”

13 ꠢꠣꠍꠣꠃ ꠢꠣꠁꠘ꠆ꠎꠣ ꠛꠣꠟꠣ ꠇꠥꠄꠟ ꠙꠣꠈꠤꠞ ꠙꠣꠟ ꠀꠁꠀ ꠔꠣꠞꠣꠞ ꠀꠡ꠆ꠔꠣ ꠇꠦꠝ꠆ꠙꠅ ꠎꠣꠝ ꠅꠁꠉꠦꠟ, ꠛꠣꠖꠞ ꠖꠤꠘ ꠛꠤꠀꠘꠦ ꠈꠥꠀ ꠙꠠꠤꠀ ꠇꠦꠝ꠆ꠙꠞ ꠌꠣꠁꠞꠅꠛꠣꠄ ꠜꠤꠎꠤꠉꠦꠟ। 14 ꠛꠦꠁꠟ ꠅꠀꠞ ꠛꠣꠖꠦ ꠅꠃ ꠈꠥꠀ ꠢꠥꠇꠣꠁꠟꠦ ꠖꠦꠈꠣ ꠉꠦꠟ, ꠡꠣꠉꠥꠞ ꠖꠣꠘꠣꠞ ꠟꠣꠈꠣꠘ ꠄꠇꠎꠣꠔꠞ ꠙꠣꠔꠟꠣ ꠎꠤꠘꠤꠡ ꠝꠣꠐꠤꠞ ꠃꠙꠞꠦ ꠙꠠꠤ ꠞꠁꠍꠦ। 15 ꠁꠔꠣ ꠖꠦꠈꠤꠀ ꠛꠘꠤ ꠁꠍꠞꠣꠁꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠅꠛꠣ, ꠁꠔꠣ ꠇꠤꠔꠣ? ꠁꠔꠣ ꠇꠤꠔꠣ ꠙꠠꠍꠦ, ꠀꠝꠞꠣ ꠇꠦꠃ ꠔ ꠌꠤꠘꠞꠣꠝ ꠘꠣ।”

ꠔꠦꠃ ꠝꠥꠍꠣꠄ ꠇꠁꠟꠣ, “ꠁꠔꠣ ꠔ ꠛꠦꠢꠦꠡ꠆ꠔꠤ ꠈꠣꠘꠤ, ꠔꠥꠝꠞꠣ ꠈꠣꠁꠔꠣꠄ ꠇꠞꠤ ꠝꠣꠛꠥꠖꠦ ꠖꠣꠘ ꠇꠞꠍꠂꠘ। 16 ꠅꠃ ꠈꠣꠘꠤꠞ ꠇꠕꠣꠃ ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ, ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠈꠣꠘꠤ ꠔꠥꠇꠣꠁꠀ ꠘꠦꠅ। ꠊꠞꠞ ꠢꠇꠟꠞ ꠟꠣꠉꠤ ꠎꠘ-ꠙꠤꠍꠦ ꠄꠇ ꠙꠦꠐꠥ ꠇꠞꠤ ꠔꠥꠇꠣꠁꠅ।” 17 ꠔꠦꠃ ꠔꠣꠞꠣ ꠅꠃꠟꠣ ꠇꠞꠟꠣ, ꠝꠣꠘꠥꠡ ꠅꠘꠥꠝꠣꠘꠦ ꠇꠦꠃ ꠛꠦꠡ ꠇꠞꠤ ꠘꠤꠟꠣ, ꠇꠦꠃ ꠇꠝ ꠘꠤꠟꠣ। 18 ꠛꠣꠖꠦ ꠙꠦꠐꠥꠖꠤ ꠝꠣꠙꠤꠀ ꠖꠦꠈꠟꠣ, ꠎꠦꠁꠘ ꠛꠦꠡꠤ ꠔꠥꠇꠣꠁꠍꠟꠣ, ꠔꠣꠘꠅ ꠛꠦꠡꠤ ꠅꠁꠍꠦ ꠘꠣ, ꠀꠞ ꠎꠦꠁꠘ ꠕꠥꠠꠣ ꠔꠥꠇꠣꠁꠍꠟꠣ, ꠔꠣꠘꠅ ꠇꠝ ꠅꠁꠍꠦ ꠘꠣ; ꠢꠇꠟꠦꠃ ꠎꠣꠞꠎꠤꠞ ꠙꠞꠤꠛꠣꠞꠞ ꠈꠣꠘꠤꠞ ꠅꠘꠥꠝꠣꠘꠦ ꠔꠥꠇꠣꠁꠍꠂꠘ।

19 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠇꠣꠁꠟ ꠛꠤꠀꠘꠇꠥꠞ ꠈꠣꠘꠤꠞ ꠟꠣꠉꠤ ꠁꠔꠣ ꠝꠥꠐꠦꠃ ꠎꠝꠣꠁ ꠕꠁꠅ ꠘꠣ।” 20 ꠔꠣ-ꠅ ꠇꠦꠃ ꠇꠦꠃ ꠝꠥꠍꠣꠞ ꠇꠕꠣ ꠘꠣ ꠝꠣꠘꠤꠀ ꠛꠣꠖꠞ ꠖꠤꠘꠞ ꠟꠣꠉꠤꠅ ꠕꠥꠠꠣ ꠕꠁꠟ। ꠄꠞꠟꠣꠉꠤ ꠁꠔꠣ ꠙꠌꠤꠀ ꠇꠤꠠꠣ-ꠙꠥꠇ ꠎꠘꠝꠤꠀ ꠉꠘ꠆ꠖ ꠛꠣꠞ ꠅꠁꠟ; ꠁꠔꠣ ꠖꠦꠈꠤꠀ ꠝꠥꠍꠣ ꠔꠣꠞꠣꠞ ꠃꠙꠞꠦ ꠈꠥꠛ ꠉꠥꠍꠣ ꠅꠁꠟꠣ। 21 ꠅꠟꠣ ꠙꠞꠔꠦꠇ ꠖꠤꠘ ꠚꠎꠞꠦ ꠔꠣꠞꠣ ꠎꠣꠞꠎꠤꠞ ꠈꠣꠘꠤꠞ ꠅꠘꠥꠝꠣꠘꠦ ꠔꠥꠇꠣꠁꠔ, ꠅꠁꠟꠦ ꠞꠂꠖ ꠉꠞꠝ ꠅꠁꠟꠦꠃ ꠁꠔꠣ ꠉꠟꠤꠎꠤꠔ।

22 ꠛꠣꠖꠦ ꠍꠄ ꠘꠝ꠆ꠛꠞ ꠖꠤꠘꠅ ꠔꠣꠞꠣꠞ ꠈꠣꠘꠤꠞ ꠟꠣꠉꠤ ꠒꠣꠛꠥꠟ ꠈꠣꠘꠤ, ꠝꠣꠘꠤ ꠖꠥꠁ ꠙꠦꠐꠥ ꠇꠞꠤ ꠔꠥꠇꠣꠁꠟ, ꠀꠞ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠦ ꠀꠁꠀ ꠝꠥꠍꠣꠞꠦ ꠎꠣꠘꠣꠁꠟꠣ। 23 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠁꠔꠣ ꠑꠤꠇ ꠀꠍꠦ, ꠝꠣꠛꠥꠖꠦꠃ ꠅꠃꠟꠣ ꠢꠥꠇꠥꠝ ꠖꠤꠍꠂꠘ; ꠇꠣꠁꠟ ꠔ ꠢꠣꠙ꠆ꠔꠣꠞ ꠡꠦꠡ ꠖꠤꠘ, ꠎꠥꠝ꠆ꠝꠣꠛꠣꠞ; ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠖꠤꠘ। ꠔꠦ ꠔꠥꠝꠞꠣꠞ ꠎꠦꠔꠣ ꠞꠣꠘ꠆ꠖꠣꠞ ꠖꠞꠇꠣꠞ ꠀꠍꠦ ꠁꠔꠣ ꠀꠁꠎ ꠞꠣꠘ꠆ꠖꠤꠟꠣꠅ, ꠀꠞ ꠛꠤꠞꠣꠘ ꠇꠞꠣꠞ ꠎꠞꠥꠞ ꠅꠁꠟꠦ ꠛꠤꠞꠣꠘ ꠇꠞꠅ, ꠛꠣꠇꠤ ꠢꠇꠟꠔꠣ ꠛꠣꠖꠞ ꠖꠤꠘ ꠛꠤꠀꠘꠇꠥꠞ ꠟꠣꠉꠤ ꠕꠁ ꠖꠦꠅ।” 24 ꠅꠃ ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠁꠔꠣ ꠊꠞꠅ ꠕꠁꠟ, ꠁꠔꠣꠞ ꠝꠣꠎꠦ ꠇꠥꠘꠥ ꠉꠘ꠆ꠖꠅ ꠛꠣꠞ ꠅꠁꠟ ꠘꠣ, ꠇꠤꠠꠣꠄꠅ ꠗꠞꠟ ꠘꠣ।

25 ꠛꠣꠖꠦ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠁꠎ ꠔꠥꠝꠞꠣ ꠁꠔꠣ ꠈꠣꠅ, ꠇꠣꠞꠘ ꠀꠁꠎ ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠖꠤꠘ, ꠎꠥꠝ꠆ꠝꠣꠛꠣꠞ। ꠀꠁꠎ ꠔꠥꠝꠞꠣ ꠛꠘ꠆ꠖꠞ ꠝꠣꠎꠦ ꠁ ꠈꠣꠘꠤ ꠙꠣꠁꠔꠣꠄ ꠘꠣꠄ। 26 ꠔꠥꠝꠞꠣ ꠢꠣꠙ꠆ꠔꠣꠔ ꠍꠄ ꠖꠤꠘ ꠁ ꠈꠣꠘꠤ ꠔꠥꠇꠣꠁꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠔ ꠎꠥꠝ꠆ꠝꠣꠛꠣꠞ, ꠁ ꠖꠤꠘ ꠁꠔꠣ ꠙꠣꠁꠔꠣꠄ ꠘꠣꠄ।”

27 ꠔꠣ-ꠅ ꠇꠥꠘꠥ ꠇꠥꠘꠥ ꠎꠘꠦ ꠡꠣꠔ ꠘꠝ꠆ꠛꠞ ꠖꠤꠘꠅ ꠅꠃ ꠈꠣꠘꠤ ꠔꠥꠇꠣꠁꠛꠣꠞ ꠟꠣꠉꠤ ꠛꠣꠞꠦ ꠉꠦꠟ, ꠉꠤꠀ ꠇꠥꠘ꠆ꠔꠣ ꠙꠣꠁꠟ ꠘꠣ। 28 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠞꠣ ꠀꠞ ꠇꠔꠖꠤꠘ ꠀꠝꠣꠞ ꠢꠥꠇꠥꠝ ꠀꠞ ꠘꠤꠅꠝ-ꠇꠣꠘꠥꠘ ꠜꠣꠋꠉꠤꠔꠣꠄ? 29 ꠢꠥꠘꠅ, ꠔꠥꠝꠞꠣꠞ ꠎꠤꠞꠣꠘꠤꠞ ꠟꠣꠉꠤ ꠁ ꠎꠥꠝ꠆ꠝꠣꠛꠣꠞ ꠔ ꠝꠣꠛꠥꠖꠦꠃ ꠔꠥꠝꠞꠣꠞꠦ ꠖꠤꠍꠂꠘ, ꠄꠞꠟꠣꠉꠤ ꠔꠣꠁꠘ ꠢꠣꠙ꠆ꠔꠣꠞ ꠍꠄ ꠘꠝ꠆ꠛꠞ ꠖꠤꠘꠅ ꠔꠥꠝꠞꠣꠞꠦ ꠖꠥꠁ ꠖꠤꠘꠞ ꠈꠣꠘꠤ ꠖꠦꠁꠘ; ꠅꠈꠘ ꠕꠣꠇꠤ ꠅꠃ ꠡꠣꠔ ꠘꠝ꠆ꠛꠞ ꠖꠤꠘ, ꠝꠣꠘꠤ ꠎꠥꠝ꠆ꠝꠣꠛꠣꠞꠦ ꠔꠥꠝꠞꠣ ꠢꠇꠟꠦ ꠎꠣꠞꠎꠤꠞ ꠊꠞꠅ ꠞꠁꠀ ꠎꠤꠞꠣꠁꠅ, ꠇꠦꠃ ꠊꠞꠞ ꠛꠣꠞꠦ ꠎꠣꠁꠅ ꠘꠣ।” 30 ꠄꠞꠛꠣꠖ ꠕꠣꠇꠤ ꠢꠣꠙ꠆ꠔꠣꠞ ꠡꠣꠔ ꠘꠝ꠆ꠛꠞ ꠖꠤꠘꠅ ꠝꠣꠘꠡꠦ ꠎꠤꠞꠣꠁꠔ।

31 ꠛꠘꠤ ꠁꠍꠞꠣꠁꠟꠦ ꠁ ꠈꠣꠘꠤꠞ ꠘꠣꠝ ꠕꠁꠟ, ꠝꠣꠘ꠆ꠘꠣ; ꠁꠔꠣ ꠖꠦꠈꠔꠦ ꠗꠟꠣ ꠒꠥꠟꠣ ꠛꠤꠌꠤꠞ ꠟꠣꠈꠣꠘ, ꠀꠞ ꠈꠣꠁꠔꠦ ꠝꠃ ꠝꠣꠈꠣꠁꠟ ꠙꠤꠑꠣꠞ ꠟꠣꠈꠣꠘ ꠝꠎꠣ।

32 ꠛꠣꠖꠦ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠅꠃ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠄꠇ ꠙꠦꠐꠥ ꠙꠞꠤꠝꠣꠘ ꠝꠣꠘ꠆ꠘꠣ ꠔꠥꠟꠤꠀ ꠔꠥꠝꠞꠣꠞ ꠛꠣꠖꠞ ꠛꠋꠡꠗꠞ ꠅꠇꠟꠞ ꠟꠣꠉꠤ ꠎꠝꠣ ꠇꠞꠤ ꠕꠅ, ꠔꠦꠃ ꠔꠣꠞꠣꠅ ꠖꠦꠈꠛꠣ, ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤ ꠘꠦꠅꠀꠞ ꠇꠣꠟꠅ ꠝꠞꠥꠜꠥꠝꠤꠞ ꠝꠣꠎꠦ ꠔꠣꠁꠘ ꠇꠤꠔꠣ ꠈꠣꠅꠀꠁꠍꠂꠘ।”

33 ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠄꠉꠥ ꠛꠂꠀꠝꠞ ꠝꠣꠎꠦ ꠄꠇ ꠙꠦꠐꠥ ꠙꠞꠤꠝꠣꠘ ꠝꠣꠘ꠆ꠘꠣ ꠔꠥꠟꠤꠀ ꠝꠣꠛꠥꠖꠞ ꠍꠣꠝꠘꠦ ꠕꠅ, ꠁꠔꠣ ꠔꠥꠝꠞꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠎꠝꠣ ꠞꠁꠛ।” 34 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠟꠣ, ꠅꠃ ꠟꠣꠈꠣꠘ ꠢꠣꠞꠥꠘꠦ ꠅꠃ ꠝꠣꠘ꠆ꠘꠣ ꠛꠂꠀꠝꠅ ꠜꠞꠟꠣ। ꠛꠣꠖꠦ ꠔꠣꠁꠘ ꠙꠛꠤꠔ꠆ꠞ ꠡꠘ꠆ꠖꠥꠇꠞ ꠜꠤꠔꠞꠦ ꠡꠣꠢꠣꠖꠔ ꠙꠣꠔ꠆ꠔꠞꠞ ꠍꠣꠝꠘꠦ ꠕꠁꠟꠣ। 35 ꠛꠘꠤ ꠁꠍꠞꠣꠁꠟꠦ ꠌꠣꠟ꠆ꠟꠤꠡ ꠛꠞꠍ ꠗꠞꠤ ꠁ ꠝꠣꠘ꠆ꠘꠣ ꠈꠣꠁꠟ, ꠔꠣꠞꠣ ꠎꠔꠖꠤꠘ ꠙꠞ꠆ꠎꠘ꠆ꠔ ꠝꠣꠘꠥꠡ ꠛꠡꠔ ꠇꠞꠣꠞ ꠎꠣꠉꠣ, ꠝꠣꠘꠤ ꠇꠦꠘꠣꠘ ꠖꠦꠡꠞ ꠡꠤꠝꠣꠘꠣꠔ ꠀꠁꠀ ꠘꠣ ꠙꠃꠍꠤꠟ, ꠅꠔꠖꠤꠘ ꠅꠃ ꠈꠣꠘꠤꠃ ꠈꠣꠁꠟꠣ। 36 ꠄꠇ ꠙꠦꠐꠥ ꠅꠁꠟꠉꠤ, ꠄꠇ ꠚꠥꠞꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ।