1-2 ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟ ꠅꠇꠟ ꠛꠣꠞꠘꠤꠞ ꠛꠣꠖꠦ, ꠔꠤꠘ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘꠃ ꠔꠣꠞꠣ ꠞꠚꠤꠖꠤꠝ ꠅꠁꠀ ꠍꠤꠘꠣꠁ ꠝꠞꠥꠜꠥꠝꠤꠔ ꠙꠃꠍꠤꠟꠣ। ꠅꠘꠅ ꠀꠁꠀ ꠔꠣꠞꠣ ꠝꠞꠥꠜꠥꠝꠤꠞ ꠔꠥꠞ ꠙꠣꠠꠞ ꠍꠣꠝꠘꠦ ꠔꠣꠝ꠆ꠛꠥ ꠉꠣꠠꠤꠟꠣ।

3 ꠄꠞꠝꠣꠎꠦ ꠢꠎꠞꠔ ꠝꠥꠍꠣ ꠔꠥꠞ ꠙꠣꠠꠞ ꠃꠙꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠉꠦꠟꠣ। ꠝꠣꠛꠥꠖꠦ ꠙꠣꠠꠞ ꠃꠙꠞꠦ ꠕꠣꠇꠤ ꠔꠣꠘꠞꠦ ꠒꠣꠇꠤꠀ ꠇꠁꠟꠣ, “ꠅ ꠝꠥꠍꠣ, ꠔꠥꠝꠤ ꠁꠀꠇꠥꠛꠞ ꠀꠅꠟꠣꠖ ꠅꠇꠟꠞꠦ ꠇꠅ, ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, 4 ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠅꠇꠟꠞ ꠖꠡꠣ ꠇꠤꠔꠣ ꠊꠐꠣꠁꠍꠤ, ꠁꠔꠣ ꠔ ꠔꠥꠝꠞꠣꠞ ꠘꠤꠎꠞ ꠌꠃꠈꠦ ꠖꠦꠈꠍ। ꠌꠤꠟꠦ ꠎꠦꠟꠣ ꠔꠣꠞ ꠛꠣꠁꠌ꠆ꠌꠣꠞꠦ ꠒꠣꠈꠘꠣꠖꠤ ꠛꠁꠀ ꠘꠦꠄ, ꠀꠝꠤꠅ ꠅꠃ ꠘꠝꠥꠘꠣꠄ ꠔꠥꠝꠞꠣꠞꠦ ꠀꠝꠣꠞ ꠉꠦꠍꠦ ꠛꠁꠀ ꠀꠘꠍꠤ। 5 ꠅꠈꠘ ꠔꠥꠝꠞꠣ ꠎꠥꠖꠤ ꠀꠝꠣꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠝꠣꠘꠅ, ꠀꠞ ꠀꠝꠣꠞ ꠟꠉꠞ ꠅꠀꠖꠣ ꠀꠖꠣꠄ ꠇꠞꠅ, ꠔꠦ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠈꠣꠍ ꠡꠝ꠆ꠙꠖ। ꠝꠘꠅ ꠞꠣꠈꠤꠅ, ꠢꠣꠞꠣ ꠖꠥꠘꠤꠀꠞ ꠢꠇꠟꠔꠣꠃ ꠀꠝꠣꠞ ꠄꠈꠔꠤꠀꠞꠅ। 6 ꠔꠥꠝꠞꠣꠞꠦ ꠖꠤꠀꠃ ꠇꠣꠁꠝ ꠅꠁꠛ ꠀꠝꠣꠞ ꠁꠝꠣꠝ ꠅꠇꠟꠞ ꠛꠣꠖꠡꠣꠁ, ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠙꠛꠤꠔ꠆ꠞ ꠎꠣꠔꠤ। ꠔꠦ ꠀꠝꠣꠞ ꠅꠃ ꠛꠥꠟꠤ ꠈꠣꠘꠣꠁꠘ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠅ।”

7 ꠅꠃ ꠝꠥꠍꠣꠄ ꠀꠁꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠖꠟꠣ ꠇꠞꠣꠁꠟꠣ। ꠖꠟꠣ ꠇꠞꠣꠁꠀ ꠇꠁꠟꠣ, ꠝꠣꠛꠥꠖꠦ ꠔꠣꠘꠞꠦ ꠇꠤꠔꠣ ꠇꠤꠔꠣ ꠢꠥꠇꠥꠝ ꠖꠤꠍꠂꠘ। 8 ꠔꠦꠃ ꠢꠇꠟ ꠝꠣꠘꠡꠦ ꠄꠇꠟꠉꠦ ꠇꠁꠟꠣ, “ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁꠍꠂꠘ, ꠀꠝꠞꠣ ꠅꠟꠣ ꠢꠇ꠆ꠇꠟꠔꠣ ꠇꠞꠝꠥ।” ꠝꠣꠘꠡꠦ ꠎꠦꠝꠘꠦ ꠎꠥꠀꠙ ꠖꠤꠟꠣ, ꠝꠥꠍꠣꠄ ꠉꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠅꠟꠣ ꠎꠣꠘꠣꠁꠟꠣ। 9 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠝꠥ, ꠅꠃ ꠛꠣꠔꠌꠤꠔ ꠎꠣꠔꠦ ꠝꠣꠘꠡꠦ ꠘꠤꠎꠞ ꠇꠣꠘꠦ ꠢꠥꠘꠔ ꠙꠣꠞꠦ, ꠄꠞꠟꠣꠉꠤ ꠀꠝꠤ ꠊꠘ ꠄꠇ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠞꠁꠀ ꠛꠣꠔꠌꠤꠔ ꠇꠞꠝꠥ। ꠔꠦꠃ ꠝꠣꠘꠡꠦ ꠁꠔꠣ ꠢꠥꠘꠛꠣ, ꠀꠞ ꠔꠥꠝꠣꠞ ꠃꠙꠞꠦ ꠢꠞ-ꠢꠣꠝꠦꠡꠣ ꠙꠥꠞꠣꠙꠥꠞ ꠄꠇꠤꠘ ꠞꠣꠈꠛꠣ।”

ꠛꠣꠖꠦ ꠝꠥꠍꠣ ꠉꠤꠀ ꠔꠣꠞꠣꠞꠅ ꠢꠇꠟ ꠇꠕꠣ ꠝꠣꠛꠥꠖꠞꠦ ꠎꠣꠘꠣꠁꠟꠣ। 10 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠁꠎ ꠀꠞ ꠇꠣꠁꠟ ꠖꠥꠁꠅ ꠖꠤꠘ ꠝꠣꠘꠡꠞ ꠇꠣꠍꠣꠔ ꠉꠤꠀ ꠔꠣꠞꠣꠞꠦ ꠙꠣꠇ-ꠍꠣꠚ ꠇꠞꠅ। ꠔꠣꠞꠣ ꠎꠣꠞꠎꠤꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠦꠃꠇ। 11 ꠔꠣꠞꠣ ꠙꠞꠡꠥ ꠖꠤꠘꠞ ꠟꠣꠉꠤ ꠔꠂꠀꠞ ꠅꠃꠇ, ꠅꠃ ꠖꠤꠘ ꠀꠝꠤ ꠝꠣꠛꠥꠖ ꠔꠥꠞ ꠙꠣꠠꠞ ꠃꠙꠞꠦ ꠟꠣꠝꠤꠀ ꠀꠁꠀ ꠔꠣꠞꠣ ꠢꠇꠟꠞꠦ ꠖꠤꠖꠣꠞ ꠖꠤꠝꠥ। 12 ꠔꠦ ꠔꠥꠝꠤ ꠙꠣꠠꠞ ꠌꠣꠁꠞꠅꠛꠣꠄ ꠄꠇꠐꠣ ꠡꠤꠝꠣꠘꠣ ꠑꠤꠇ ꠇꠞꠤꠀ ꠖꠤꠟꠣꠅ। ꠖꠤꠀ ꠔꠣꠞꠣꠞꠦ ꠢꠥꠡꠤꠀꠞ ꠇꠞꠤ ꠇꠅ, ꠔꠣꠞꠣ ꠎꠣꠘꠥ ꠁ ꠙꠣꠠꠅ ꠘꠣ ꠃꠑꠦ ꠀꠞ ꠙꠣꠠꠞ ꠡꠤꠝꠣꠘꠣꠔ ꠘꠣ ꠍꠄ। ꠇꠦꠃ ꠎꠥꠖꠤ ꠁ ꠙꠣꠠꠅ ꠍꠄ, ꠔꠦ ꠔꠣꠞ ꠡꠣꠎꠣ ꠅꠁꠟ ꠝꠃꠔ। 13 ꠝꠣꠞꠣꠞ ꠛꠣꠟꠣ ꠔꠣꠞ ꠉꠔꠞꠅ ꠀꠔ ꠘꠣ ꠖꠤꠀ, ꠔꠣꠞꠦ ꠙꠣꠔ꠆ꠔꠞ ꠛꠣ ꠔꠤꠞ ꠝꠣꠞꠤꠀ ꠝꠣꠞꠛꠣꠄ। ꠢꠦ ꠝꠣꠘꠥꠡ ꠅꠃꠇ ꠛꠣ ꠎꠣꠘꠥꠀꠞ ꠅꠃꠇ ꠔꠣꠞꠦ ꠝꠣꠞꠤꠟꠤꠛꠣꠄ। ꠈꠣꠟꠤ ꠄꠇꠟꠉꠦ ꠛꠃꠔ ꠡꠝꠄ ꠡꠤꠋꠉꠣ ꠛꠣꠎꠣꠘꠤꠞ ꠀꠅꠀꠎ ꠢꠥꠘꠟꠦ, ꠔꠣꠞꠣ ꠅꠃ ꠙꠣꠠꠞ ꠇꠣꠘ꠆ꠖꠣꠔ ꠀꠁꠔꠣ ꠙꠣꠞꠛꠣ।”

14 ꠔꠦꠃ ꠝꠥꠍꠣꠄ ꠙꠣꠠꠅ ꠕꠣꠇꠤ ꠟꠣꠝꠤꠀ ꠀꠁꠀ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠟꠣ, ꠝꠣꠘꠡꠦ ꠔꠣꠞꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠟ। 15 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠙꠞꠡꠥ ꠖꠤꠘꠞ ꠟꠣꠉꠤ ꠎꠥꠁꠔ ꠅꠅ, ꠄꠞꠝꠣꠎꠦ ꠇꠦꠃ ꠛꠤꠛꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤꠅ ꠘꠣ।” 16 ꠢꠣꠍꠣꠃ ꠢꠃ ꠙꠞꠡꠥ ꠖꠤꠘ ꠀꠁꠟꠦ ꠛꠤꠀꠘꠇꠥ ꠛꠣꠟꠣ ꠙꠣꠠꠞ ꠃꠙꠞꠦ ꠊꠘ ꠝꠦꠊꠞ ꠇꠣꠟꠘꠤ ꠖꠦꠈꠣ ꠉꠦꠟ, ꠈꠥꠛ ꠛꠦꠡꠤ ꠝꠦꠊꠞ ꠒꠣꠇ-ꠎꠤꠟꠇꠣꠘꠤ ꠡꠥꠞꠥ ꠅꠁꠟ। ꠎꠥꠞꠦ ꠎꠥꠞꠦ ꠡꠤꠋꠉꠣꠞ ꠀꠅꠀꠎ ꠢꠥꠘꠣ ꠉꠦꠟ, ꠔꠦꠃ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠜꠤꠔꠞꠞ ꠢꠇꠟ ꠝꠣꠘꠥꠡ ꠒꠞꠣꠁꠀ ꠇꠣꠙꠣ ꠗꠞꠟꠣ। 17 ꠅꠃ ꠡꠝꠄ ꠝꠥꠍꠣꠄ ꠝꠣꠘꠡꠞꠦ ꠀꠟ꠆ꠟꠣꠞ ꠍꠣꠝꠘꠦ ꠘꠦꠅꠀꠞ ꠟꠣꠉꠤ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠟꠣ। ꠔꠣꠞꠣ ꠢꠇꠟ ꠉꠤꠀ ꠙꠣꠠꠞ ꠟꠣꠝꠣꠔ ꠃꠛꠣꠁꠟꠣ। 18 ꠀꠞ ꠀꠡ꠆ꠔꠣ ꠔꠥꠞ ꠙꠣꠠ ꠗꠥꠝꠣꠄ ꠜꠞꠤꠉꠦꠟ, ꠝꠣꠛꠥꠖ ꠝꠃꠟꠣꠄ ꠀꠉꠥꠘꠤꠞ ꠟꠣꠈꠣꠘ ꠘꠥꠞꠞ ꠍꠥꠞꠔꠦ ꠙꠣꠠꠞ ꠃꠙꠞꠦ ꠔꠡꠞꠤꠚ ꠀꠘꠟꠣ। ꠁꠐ-ꠜꠣꠐ꠆ꠐꠣꠞ ꠗꠥꠝꠣꠞ ꠟꠣꠈꠣꠘ ꠗꠥꠝꠣ ꠃꠠꠣ ꠡꠥꠞꠥ ꠅꠁꠟ ꠀꠞ ꠀꠡ꠆ꠔꠣ ꠙꠣꠠ ꠎꠥꠠꠤ ꠛꠦꠎꠥꠁꠔꠣ ꠇꠣꠙ ꠡꠥꠞꠥ ꠅꠁꠟ। 19 ꠡꠤꠋꠉꠣꠞ ꠀꠅꠀꠎ ꠀꠞꠅ ꠎꠥꠞꠦ ꠎꠥꠞꠦ ꠛꠣꠎꠤꠟ। ꠅꠃ ꠡꠝꠄ ꠝꠥꠍꠣꠄ ꠀꠟ꠆ꠟꠣꠞ ꠟꠉꠦ ꠝꠣꠔꠤꠟꠣ, ꠀꠞ ꠀꠟ꠆ꠟꠣꠄꠅ ꠘꠤꠎꠞ ꠀꠅꠀꠎꠖꠤ ꠝꠥꠍꠣꠞ ꠝꠣꠔꠞ ꠎꠥꠀꠙ ꠖꠤꠟꠣ।

20 ꠝꠣꠛꠥꠖ ꠘꠤꠎꠦ ꠔꠥꠞ ꠙꠣꠠꠞ ꠝꠣꠕꠣꠔ ꠟꠣꠝꠤꠀ ꠀꠁꠀ ꠝꠥꠍꠣꠞꠦ ꠒꠣꠇꠤꠟꠣ, ꠔꠦꠃ ꠝꠥꠍꠣ ꠃꠑꠤꠀ ꠙꠣꠠꠞ ꠃꠙꠞꠦ ꠉꠦꠟꠣ। 21 ꠉꠤꠀ ꠢꠣꠞꠟꠦ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠟꠣꠝꠣꠔ ꠎꠣꠅ, ꠉꠤꠀ ꠝꠣꠘꠡꠞꠦ ꠇꠠꠣ ꠇꠞꠤ ꠇꠁꠀ ꠀꠅ, ꠀꠞꠘꠣꠄ ꠀꠝꠣꠞꠦ ꠖꠦꠈꠣꠞ ꠟꠣꠉꠤ ꠔꠣꠞꠣ ꠡꠤꠝꠣꠘꠣ ꠙꠣꠞ ꠅꠁꠀ ꠃꠙꠞꠦ ꠀꠁꠛ꠆ꠛꠣ। ꠀꠁꠟꠦ ꠛꠃꠔ ꠝꠣꠘꠥꠡ ꠝꠣꠞꠣ ꠎꠣꠁꠛꠣ। 22 ꠀꠞ ꠎꠦ ꠁꠝꠣꠝ ꠅꠇꠟ ꠢꠣꠝꠦꠡꠣ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠘ, ꠀꠍꠟꠦ ꠔꠣꠞꠣꠞ ꠇꠣꠝꠃ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠀ, ꠔꠣꠞꠣꠅ ꠘꠤꠎꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠛꠣ। ꠀꠞꠘꠣꠄ ꠀꠝꠤ ꠔꠣꠞꠣꠞ ꠃꠙꠞꠦꠅ ꠉꠎꠛ ꠓꠣꠟꠤꠝꠥ।”

23 ꠝꠥꠍꠣꠄ ꠝꠣꠛꠥꠖꠞꠦ ꠎꠥꠀꠙ ꠖꠤꠟꠣ, “ꠔꠣꠞꠣ ꠔ ꠄꠝꠘꠦꠃ ꠔꠥꠞ ꠙꠣꠠꠅ ꠀꠁꠔꠣ ꠘꠣꠄ, ꠀꠙꠘꠦ ꠀꠉꠦꠃ ꠀꠝꠞꠣꠞꠦ ꠇꠠꠣ ꠢꠥꠡꠤꠀꠞꠤ ꠖꠤꠍꠂꠘ। ꠀꠝꠞꠣꠅ ꠙꠣꠠꠞ ꠌꠣꠁꠞꠅꠛꠣꠄ ꠖꠣꠉ ꠖꠤꠀ ꠀꠙꠘꠣꠞ ꠟꠣꠉꠤ ꠙꠣꠇ ꠡꠤꠝꠣꠘꠣ ꠀꠟꠉꠣꠁꠍꠤ।”

24 ꠅꠁꠟꠦ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠘꠣ, ꠔꠥꠝꠤ ꠟꠣꠝꠣꠔ ꠎꠣꠅ। ꠛꠣꠖꠦ ꠔꠥꠝꠤ ꠀꠞ ꠢꠣꠞꠥꠘ ꠖꠥꠁꠅꠎꠘꠦ ꠝꠤꠟꠤꠀ ꠃꠙꠞꠦ ꠀꠁꠅ। ꠈꠤꠀꠟ ꠞꠣꠈꠤꠅ, ꠇꠥꠘꠥ ꠁꠝꠣꠝ ꠛꠣ ꠖꠥꠍꠞꠣ ꠇꠥꠘꠥ ꠝꠣꠘꠥꠡ ꠎꠣꠔꠦ ꠡꠤꠝꠣꠘꠣ ꠍꠣꠠꠤꠀ ꠀꠝꠣꠞ ꠇꠣꠍꠣꠔ ꠘꠣ ꠀꠁꠘ, ꠀꠁꠟꠦ ꠀꠝꠤ ꠔꠣꠞꠣꠞ ꠃꠙꠞꠦ ꠟꠣꠘ꠆ꠘꠔꠤ ꠉꠎꠛ ꠓꠣꠟꠝꠥ।”

25 ꠁꠈꠣꠘ ꠢꠥꠘꠤꠀ ꠝꠥꠍꠣ ꠟꠣꠝꠣꠔ ꠉꠦꠟꠣ, ꠉꠤꠀ ꠝꠣꠘꠡꠞꠦ ꠢꠇꠟꠔꠣ ꠎꠣꠘꠣꠁꠟꠣ।