1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠅ ꠝꠥꠍꠣ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠁꠝꠣꠝꠔꠤ ꠇꠞꠣꠞ ꠟꠣꠉꠤ ꠔꠥꠝꠣꠞ ꠜꠣꠁ ꠢꠣꠞꠥꠘ, ꠔꠣꠞ ꠙꠥꠀ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠞꠦ ꠔꠥꠝꠣꠞ ꠍꠣꠝꠘꠦ ꠀꠘꠣꠅ।

2 “ꠔꠥꠝꠣꠞ ꠜꠣꠁ ꠢꠣꠞꠥꠘꠞ ꠁꠎ꠆ꠎꠔ ꠀꠞ ꠡꠥꠘ꠆ꠖꠞ ꠛꠣꠠꠣꠘꠤꠞ ꠟꠣꠉꠤ ꠙꠛꠤꠔ꠆ꠞ ꠟꠦꠛꠣꠍ ꠔꠂꠀꠞ ꠇꠞꠣꠅ। 3 ꠀꠝꠤ ꠙꠣꠇ ꠞꠥꠢꠥ ꠖꠤꠀ ꠎꠦꠔꠣ ꠃꠡ꠆ꠔꠣꠖ ꠅꠇꠟꠞꠦ ꠇꠣꠞꠤꠉꠞꠤ ꠇꠣꠝꠞ ꠀꠈꠟ-ꠢꠦꠇꠝꠔ ꠖꠤꠍꠤ, ꠔꠥꠝꠤ ꠢꠃ ꠇꠣꠞꠤꠉꠞ ꠅꠇꠟꠞꠦ ꠢꠥꠇꠥꠝ ꠖꠦꠅ, ꠔꠣꠞꠣ ꠢꠣꠞꠥꠘꠞ ꠟꠣꠉꠤ ꠅꠃꠟꠣ ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠃꠇ꠆ꠇꠣ, ꠎꠦ ꠟꠦꠛꠣꠍ ꠈꠣꠟꠤ ꠀꠝꠣꠞ ꠁꠝꠣꠝꠔꠤꠞ ꠇꠣꠝꠅ ꠟꠣꠉꠦ। 4 ꠁ ꠟꠦꠛꠣꠍꠞ ꠝꠣꠎꠦ ꠛꠥꠇꠥꠞ ꠃꠙꠞꠞ ꠕꠟꠤ, ꠄꠚꠞꠘ, ꠀꠟꠈꠦꠟ꠆ꠟꠣ, ꠌꠦꠉꠞ ꠇꠣꠙꠠꠞ ꠙꠣꠁꠘ꠆ꠎꠣꠛꠤ, ꠙꠣꠃꠉꠠꠤ ꠀꠞ ꠇꠝꠞꠞ ꠛꠘ꠆ꠖꠘꠤ ꠛꠣꠘꠣꠁꠅ। ꠔꠥꠝꠣꠞ ꠜꠣꠁ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠎꠣꠔꠦ ꠀꠝꠣꠞ ꠁꠝꠣꠝꠔꠤ ꠇꠣꠝ ꠇꠞꠔꠣ ꠙꠣꠞꠂꠘ, ꠄꠞꠟꠣꠉꠤ ꠔꠣꠞꠣꠞ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠁꠅ। 5 ꠟꠦꠛꠣꠍ ꠛꠣꠘꠣꠁꠔꠦ ꠔꠣꠞꠣ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ, ꠄꠞ ꠟꠉꠦ ꠡꠥꠘꠣꠅ ꠟꠣꠉꠣꠁꠛꠣ।

6 “ꠙꠞꠗꠣꠘ ꠁꠝꠣꠝꠞ ꠄꠚꠞꠘ ꠛꠣꠘꠣꠁꠛꠣꠄ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ। ꠁꠔꠣ ꠜꠣꠟꠣ ꠇꠥꠘꠥ ꠃꠡ꠆ꠔꠣꠖꠞꠦꠖꠤ ꠛꠣꠘꠣꠁꠅ। 7 ꠄꠚꠞꠘꠞ ꠇꠣꠘ꠆ꠖꠞ ꠖꠥꠁ ꠉꠣꠟꠣ ꠎꠥꠠꠣ ꠖꠤꠛꠣꠞ ꠟꠣꠉꠤ ꠖꠥꠈꠣꠘ ꠙꠐ꠆ꠐꠤ ꠛꠣꠘꠣꠁꠀ, ꠄꠚꠞꠘꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠅ। 8 ꠄꠚꠞꠘꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠙꠦꠐꠞ ꠃꠙꠞꠞ ꠛꠦꠟꠐ ꠈꠣꠘꠅ ꠄꠚꠞꠘꠞ ꠟꠣꠈꠣꠘ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ ꠛꠣꠘꠣꠁꠅ।

9 “ꠔꠥꠝꠤ ꠖꠥꠁꠐꠣ ꠀꠇꠤꠇ ꠙꠣꠔ꠆ꠔꠞ ꠀꠘꠤꠀ ꠄꠞ ꠃꠙꠞꠦ ꠁꠍꠞꠣꠁꠟ, ꠝꠣꠘꠤ ꠁꠀꠇꠥꠛꠞ ꠙꠥꠀꠂꠘ꠆ꠔꠞ ꠘꠣꠝ ꠈꠥꠖꠣꠁꠀ ꠟꠦꠈꠣꠁꠅ। 10 ꠙꠄꠟꠣ ꠙꠣꠔ꠆ꠔꠞꠞ ꠃꠙꠞꠦ, ꠔꠣꠞꠣꠞ ꠎꠘꠝꠞ ꠢꠤꠡꠣꠛꠦ ꠛꠠ ꠕꠣꠇꠤ ꠢꠥꠞꠥ ꠝꠥꠈꠣ ꠍꠄ ꠎꠘꠞ ꠘꠣꠝ, ꠀꠞ ꠖꠥꠍꠞꠣ ꠙꠣꠔ꠆ꠔꠞꠞ ꠃꠙꠞꠦꠅ ꠛꠣꠇꠤ ꠍꠄ ꠎꠘꠞ ꠘꠣꠝ ꠈꠥꠖꠣꠁꠀ ꠟꠦꠈꠣꠁꠅ। 11 ꠢꠥꠘꠣꠞ ꠅꠇꠟꠦ ꠖꠣꠝꠤ ꠙꠣꠔ꠆ꠔꠞꠞ ꠃꠙꠞꠦ ꠈꠥꠖꠤꠀ ꠎꠦꠟꠣ ꠡꠤꠟ ꠛꠣꠘꠣꠁꠘ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠖꠥꠉꠥ ꠙꠣꠔ꠆ꠔꠞꠞ ꠃꠙꠞꠦ ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠘꠣꠝ ꠈꠥꠖꠣꠁꠅ। 12 ꠙꠣꠔ꠆ꠔꠞ ꠖꠥꠁꠅꠉꠥ ꠡꠥꠘꠣꠞ ꠎꠣꠎꠁꠞꠞ ꠝꠣꠎꠦ ꠟꠣꠉꠣꠁꠀ ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠟꠉꠦ ꠟꠣꠉꠣꠁꠅ। ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠛꠣꠄ ꠝꠣꠛꠥꠖꠞ ꠘꠎꠞ ꠞꠣꠈꠣꠞ ꠟꠣꠉꠤ, ꠁ ꠙꠣꠔ꠆ꠔꠞ ꠢꠣꠞꠥꠘꠦ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠇꠣꠘ꠆ꠖꠞ ꠝꠣꠎꠦ ꠟꠣꠉꠣꠁꠛ। 13-14 ꠖꠥꠁꠅ ꠎꠣꠎꠁꠞꠞ ꠟꠉꠦ ꠡꠥꠘꠣꠖꠤ ꠛꠣꠘꠣꠁꠟ ꠖꠥꠇꠍꠣ ꠌꠦꠁꠘ ꠟꠣꠉꠣꠁꠅ। ꠅꠃ ꠖꠥꠁꠅ ꠌꠦꠁꠘ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠘꠝꠥꠘꠣꠄ ꠙꠦꠌꠣꠁꠀ ꠛꠣꠘꠣꠁꠅ।

15 “ꠀꠝꠣꠞ ꠞꠣꠄ-ꠚꠄꠍꠣꠟꠣ ꠎꠣꠘꠣꠞ ꠟꠣꠉꠤ ꠛꠥꠇꠥꠞ ꠃꠙꠞꠞ ꠕꠟꠤ ꠛꠣꠘꠣꠁꠅ। ꠜꠣꠟꠣ ꠃꠡ꠆ꠔꠣꠖ ꠇꠥꠘꠥ ꠖꠞ꠆ꠎꠤꠞꠦꠖꠤ ꠛꠣꠘꠣꠁꠅ। ꠄꠚꠞꠘꠞ ꠇꠣꠝꠞ ꠟꠣꠈꠣꠘ ꠁꠐꠣꠅ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ ꠛꠣꠘꠣꠁꠅ। 16 ꠁꠐꠣ ꠅꠁꠛ ꠟꠣꠝ꠆ꠛꠣꠄ ꠀꠗꠣ ꠀꠔ, ꠙꠣꠡꠦ ꠀꠗꠣ ꠀꠔ, ꠌꠣꠁꠞ ꠇꠥꠘꠣ ꠀꠟꠣ ꠖꠥꠁ ꠜꠣꠁꠘ꠆ꠎ ꠇꠞꠣ ꠄꠇꠈꠣꠘ ꠇꠣꠙꠠ। 17 ꠄꠞ ꠃꠙꠞꠦ ꠢꠣꠁꠞ ꠗꠞꠣꠁꠀ ꠌꠣꠁꠞ ꠢꠣꠁꠞ ꠙꠣꠔ꠆ꠔꠞ ꠟꠣꠉꠣꠁꠛꠣꠄ। ꠙꠄꠟꠣ ꠢꠣꠞꠤꠔ ꠁꠀꠇꠥꠔ, ꠙꠤꠔ, ꠀꠞ ꠙꠣꠘ꠆ꠘꠣ ꠝꠘꠤ। 18 ꠖꠥꠍꠞꠣ ꠢꠣꠞꠤꠔ ꠟꠣꠟꠝꠘꠤ, ꠟꠤꠟ ꠝꠘꠤ ꠀꠞ ꠢꠤꠞꠣ; 19 ꠔꠤꠘ ꠘꠝ꠆ꠛꠞ ꠢꠣꠞꠤꠔ ꠚꠤꠞꠥꠎ, ꠉꠥꠝꠦꠖ ꠀꠞ ꠙꠖ꠆ꠖꠞꠣꠉ ꠝꠘꠤ। 20 ꠌꠣꠁꠞ ꠘꠝ꠆ꠛꠞ ꠢꠣꠁꠞꠅ ꠙꠥꠈꠞꠣꠎ, ꠛꠂꠖꠥꠞ꠆ꠎ ꠀꠞ ꠡꠥꠞꠥꠎ ꠝꠘꠤ। ꠁ ꠙꠣꠔ꠆ꠔꠞ ꠅꠇꠟ ꠡꠥꠘꠣꠞ ꠎꠣꠎꠁꠞꠖꠤ ꠟꠣꠉꠣꠁꠅ। 21 ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠟꠣꠉꠤ ꠛꠣꠞꠅꠐꠣ ꠙꠣꠔ꠆ꠔꠞ ꠟꠣꠉꠛ। ꠁꠔꠣ ꠄꠇꠅ ꠙꠣꠔ꠆ꠔꠞꠅ ꠄꠇ ꠄꠇ ꠙꠥꠀꠞ ꠘꠣꠝ ꠈꠥꠖꠤꠀ ꠟꠦꠈꠣꠁꠅ, ꠎꠦꠟꠣ ꠈꠥꠖꠤꠀ ꠡꠤꠟ ꠛꠣꠘꠣꠁꠟ ꠅꠄ।

22 “ꠛꠥꠇꠥꠞ ꠃꠙꠞꠞ ꠕꠟꠤꠞ ꠟꠣꠉꠤ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠟꠣꠈꠣꠘ ꠙꠦꠌꠣꠁꠀ ꠖꠥꠇꠍꠣ ꠌꠦꠁꠘ ꠛꠣꠘꠣꠁꠅ। 23 ꠡꠥꠘꠣꠞ ꠖꠥꠁꠐꠣ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠅꠃ ꠕꠟꠤꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠅ। 24 ꠀꠞ ꠌꠦꠁꠘ ꠖꠥꠁꠅꠉꠦꠍꠣ ꠖꠥꠁꠅ ꠇꠠꠣꠞ ꠟꠉꠦ ꠀꠐꠇꠣꠁꠅ। 25 ꠖꠥꠁꠅ ꠇꠣꠘ꠆ꠖꠞ ꠄꠚꠞꠘꠞ ꠍꠣꠝꠘꠞ ꠚꠤꠔꠣꠔ ꠡꠥꠘꠣꠞ ꠎꠣꠎꠁꠞꠞ ꠟꠉꠦ ꠌꠦꠁꠘꠞ ꠄꠇ ꠝꠣꠕꠣ ꠛꠣꠘ꠆ꠖꠤꠅ। 26 ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠃꠙꠞꠞ ꠕꠟꠤꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠅ। ꠁ ꠖꠥꠁꠅꠐꠣ ꠄꠚꠞꠘꠞ ꠟꠉꠦ ꠛꠥꠇꠥꠞ ꠕꠟꠤꠞ ꠔꠟꠦ ꠞꠁꠛ। 27 ꠛꠣꠖꠦ ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠡꠁ ꠔꠟꠦꠖꠤ, ꠙꠦꠐꠞ ꠃꠙꠞꠞ ꠛꠦꠟꠐꠞ ꠃꠙꠞꠞ ꠡꠤꠟꠣꠁꠞ ꠇꠣꠍꠣꠔ ꠟꠣꠉꠣꠁꠅ। 28 ꠛꠣꠖꠦ ꠛꠥꠇꠥꠞ ꠃꠙꠞꠞ ꠕꠟꠤꠞ ꠔꠟꠞ ꠇꠠꠣꠞ ꠟꠉꠦ ꠙꠦꠐꠞ ꠃꠙꠞꠞ ꠘꠇꠡꠣ ꠇꠞꠣ ꠛꠦꠟꠐꠞ ꠇꠠꠣ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤꠅ। ꠔꠦꠃ ꠅꠃ ꠕꠟꠤ ꠄꠚꠞꠘꠞ ꠃꠙꠞꠦ ꠕꠣꠇꠤ ꠢꠞꠔ ꠘꠣꠄ।

29 “ꠙꠣꠇ ꠎꠣꠉꠣꠔ ꠢꠣꠝꠣꠁꠛꠣꠞ ꠛꠣꠟꠣ ꠢꠣꠞꠥꠘꠦ ꠀꠝꠣꠞ ꠞꠣꠄ-ꠚꠄꠍꠣꠟꠣ ꠢꠥꠘꠣꠞ ꠟꠣꠉꠤ, ꠛꠥꠇꠥꠞ ꠃꠙꠞꠞ ꠕꠟꠤꠞ ꠃꠙꠞꠦ ꠟꠦꠈꠣ ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠘꠣꠝ ꠟꠣꠉꠣꠁꠔꠦ ꠅꠁꠛ, ꠁ ꠕꠟꠤꠐꠣꠄ ꠔꠣꠞꠣꠞꠦ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠍꠣꠝꠘꠦ ꠞꠣꠈꠛ। 30 ꠀꠝꠣꠞ ꠞꠣꠄ-ꠚꠄꠍꠣꠟꠣꠞ ꠅꠃ ꠕꠟꠤꠞ ꠜꠤꠔꠞꠦ ꠃꠞꠤꠝ ꠀꠞ ꠔꠥꠝ꠆ꠝꠤꠝ*28:30 ꠃꠞꠤꠝ ꠀꠞ ꠔꠥꠝ꠆ꠝꠤꠝ ꠅꠁꠟ ꠖꠥꠁ ꠎꠤꠘꠤꠡ ꠀꠟ꠆ꠟꠣꠞ ꠝꠞ꠆ꠎꠤ ꠛꠥꠎꠣꠞ ꠟꠣꠉꠤ। ꠗꠣꠞꠘꠣ ꠇꠞꠣ ꠅꠄ, ꠁꠔꠣ ꠅꠁꠟ ꠛꠤꠡꠦꠡ ꠖꠥꠁ ꠙꠣꠔ꠆ꠔꠞ ꠛꠣ ꠖꠥꠁ ꠝꠘꠤ। ꠘꠣꠝꠞ ꠙꠛꠤꠔ꠆ꠞ ꠙꠣꠔ꠆ꠔꠞꠉꠥꠁꠘ ꠞꠣꠈꠤꠅ। ꠢꠣꠞꠥꠘ ꠎꠦꠛꠟꠣ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛ, ꠅꠃ ꠡꠝꠄ ꠁꠔꠣ ꠔꠣꠞ ꠛꠥꠇꠥꠞ ꠃꠙꠞꠦ ꠞꠁꠛ। ꠢꠣꠞꠥꠘꠦ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠞꠣꠄ-ꠚꠄꠍꠣꠟꠣ ꠎꠣꠘꠣꠞ ꠃꠙꠣꠄ ꠢꠤꠡꠣꠛꠦ ꠢꠞ-ꠢꠣꠝꠦꠡꠣ ꠔꠣꠞ ꠛꠥꠇꠥꠞ ꠃꠙꠞꠦ ꠝꠣꠛꠥꠖꠞ ꠖꠦꠅꠀ ꠅꠃ ꠌꠤꠎ ꠞꠣꠈꠛ।”

31 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠄꠚꠞꠘꠞ ꠔꠟꠦ ꠟꠣꠝ꠆ꠛꠣ ꠎꠦ ꠀꠟꠈꠦꠟ꠆ꠟꠣ ꠞꠁꠛ, ꠁꠇꠐꠣ ꠙꠥꠞꠣꠐꠣꠃ ꠟꠤꠟꠥꠀ ꠞꠋꠉꠞ ꠡꠥꠔꠣꠖꠤ ꠛꠣꠘꠣꠁꠅ। 32 ꠝꠣꠕꠣ ꠢꠣꠞꠣꠁꠛꠣꠞ ꠟꠣꠉꠤ ꠄꠞ ꠝꠣꠎꠈꠣꠘꠅ ꠚꠣꠇ ꠞꠣꠈꠤꠅ। ꠁ ꠚꠣꠇ ꠎꠣꠉꠣ ꠎꠣꠔꠦ ꠘꠣ ꠍꠤꠠꠦ, ꠄꠞꠟꠣꠉꠤ ꠄꠞ ꠌꠣꠁꠞꠅ ꠉꠣꠟꠣ ꠝꠎꠛꠥꠔ ꠇꠞꠤ ꠛꠣꠁꠘ ꠇꠞꠔꠦ ꠅꠁꠛ। 33 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣꠖꠤ ꠀꠘꠥꠀꠞ ꠚꠟꠞ ꠟꠣꠈꠣꠘ ꠛꠣꠘꠣꠁꠀ, ꠅꠃ ꠀꠟꠈꠦꠟ꠆ꠟꠣꠞ ꠔꠟꠞ ꠝꠥꠠꠤꠞ ꠌꠣꠁꠞꠅꠛꠣꠄ ꠟꠣꠉꠣꠁꠅ। ꠀꠞ ꠁꠔꠣꠞ ꠝꠣꠎꠦ ꠝꠣꠎꠦ ꠖꠤꠅ ꠡꠥꠘꠣꠞ ꠊꠥꠋꠉꠥꠞ। 34 ꠁ ꠝꠥꠠꠤꠔ ꠖꠤꠛꠣꠄ ꠄꠉꠥ ꠇꠞꠤ ꠀꠘꠥꠀꠞ ꠀꠞ ꠄꠉꠥ ꠊꠥꠋꠉꠥꠞ। 35 ꠁꠝꠣꠝꠔꠤ ꠇꠞꠣꠞ ꠛꠣꠟꠣ ꠢꠣꠞꠥꠘꠦ ꠁ ꠟꠦꠛꠣꠍ ꠚꠤꠘ꠆ꠖꠤꠛ। ꠢꠦ ꠎꠦꠛꠟꠣ ꠙꠣꠇ ꠎꠣꠉꠣꠔ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛ, ꠀꠞ ꠢꠘ ꠕꠣꠇꠤ ꠛꠣꠞꠦ ꠛꠣꠞ ꠅꠁꠛ, ꠅꠃ ꠡꠝꠄ ꠅꠃ ꠊꠥꠋꠉꠥꠞ ꠅꠇꠟꠞ ꠀꠅꠀꠎ ꠢꠥꠘꠣ ꠎꠣꠁꠛ, ꠔꠦꠃ ꠢꠦ ꠝꠞꠔ ꠘꠣꠄ।

36 “ꠈꠣꠐꠤ ꠡꠥꠘꠣꠖꠤ ꠄꠇꠈꠣꠘ ꠙꠣꠔ ꠛꠣꠘꠣꠁꠀ ꠄꠞ ꠃꠙꠞꠦ ꠡꠤꠟꠞ ꠟꠣꠈꠣꠘ ꠈꠥꠖꠤꠀ ꠅꠃ ꠀꠄꠀꠔ ꠟꠦꠈꠣꠁꠅ, ‘ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ।’ 37 ꠁ ꠙꠣꠔꠈꠣꠘ ꠙꠣꠃꠉꠠꠤꠞ ꠍꠣꠝꠘꠞ ꠉꠣꠟꠣꠔ ꠟꠣꠉꠣꠁꠀ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤꠅ। 38 ꠁꠐꠣ ꠢꠣꠞꠥꠘꠞ ꠇꠙꠣꠟꠞ ꠃꠙꠞꠦ ꠞꠁꠛ। ꠎꠔ ꠙꠣꠇ-ꠙꠛꠤꠔ꠆ꠞ ꠝꠣꠟ ꠛꠘꠤ ꠁꠍꠞꠣꠁꠟꠦ ꠖꠣꠘ-ꠈꠄꠞꠣꠔ ꠟꠁꠀ ꠀꠁꠛꠣ, ꠁꠔꠣꠞ ꠢꠇꠟ ꠘꠝꠥꠘꠣꠞ ꠖꠥꠡ-ꠔꠤꠞꠥꠐꠤꠞ ꠜꠣꠞ ꠢꠣꠞꠥꠘꠦ ꠛꠁꠛ। ꠝꠣꠛꠥꠖꠦ ꠎꠣꠔꠦ ꠔꠣꠞꠣꠞꠦ ꠇꠛꠥꠟ ꠇꠞꠂꠘ, ꠄꠞꠟꠣꠉꠤ ꠢꠣꠞꠥꠘꠦ ꠇꠙꠣꠟꠞ ꠃꠙꠞꠦ ꠁ ꠡꠥꠘꠣꠞ ꠙꠣꠔꠈꠣꠘ ꠢꠣꠝꠦꠡꠣ ꠟꠣꠉꠣꠁꠀ ꠞꠣꠈꠛ। 39 ꠁꠝꠣꠝꠞ ꠙꠣꠁꠘ꠆ꠎꠣꠛꠤ ꠀꠞ ꠙꠣꠃꠉꠠꠤ ꠔꠂꠀꠞ ꠇꠞꠣꠁꠅ ꠌꠦꠉꠞ ꠖꠣꠝꠤ ꠡꠥꠔꠤ ꠇꠣꠙꠠꠖꠤ। ꠇꠝꠞꠞ ꠛꠘ꠆ꠖꠘꠤ ꠈꠣꠘ ꠡꠥꠁ-ꠡꠥꠔꠣꠖꠤ ꠘꠇꠡꠣ ꠇꠞꠤ ꠛꠣꠘꠣꠁꠅ।

40 “ꠢꠣꠞꠥꠘꠞ ꠙꠥꠀꠂꠘ꠆ꠔꠞ ꠁꠎ꠆ꠎꠔ ꠀꠞ ꠡꠥꠘ꠆ꠖꠞꠞ ꠟꠣꠉꠤ ꠙꠣꠁꠘ꠆ꠎꠣꠛꠤ, ꠔꠇꠤ ꠀꠞ ꠇꠝꠞꠞ ꠛꠘ꠆ꠖꠘꠤ ꠔꠂꠀꠞ ꠇꠞꠣꠁꠅ। 41 ꠔꠥꠝꠤ ꠔꠥꠝꠣꠞ ꠜꠣꠁ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠁ ꠇꠣꠙꠠ ꠚꠤꠘ꠆ꠖꠣꠁꠅ। ꠔꠣꠞꠣꠞ ꠝꠣꠕꠣꠔ ꠙꠛꠤꠔ꠆ꠞ ꠔꠦꠟ ꠓꠣꠟꠤꠀ ꠈꠦꠟꠣꠚꠔꠤ ꠡꠝꠎꠣꠁꠀ ꠁꠝꠣꠝꠔꠤ ꠇꠣꠝꠅ ꠟꠣꠉꠣꠁꠅ। ꠔꠥꠝꠤ ꠔꠣꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠤꠅ, ꠎꠣꠔꠦ ꠔꠣꠞꠣ ꠀꠝꠣꠞ ꠁꠝꠣꠝ ꠅꠁꠔꠣ ꠙꠣꠞꠂꠘ। 42 ꠇꠝꠞ ꠕꠣꠇꠤ ꠃꠞꠣꠔ ꠙꠞ꠆ꠎꠘ꠆ꠔ ꠡꠞꠝꠞ ꠎꠣꠉꠣ ꠉꠥꠞꠣꠞ ꠟꠣꠉꠤ ꠡꠥꠔꠤ ꠇꠣꠙꠠꠖꠤ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀ ꠛꠣꠘꠣꠁꠅ। 43 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ ꠎꠦꠛꠟꠣ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠛꠣ, ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦ ꠙꠣꠇ ꠎꠣꠉꠣꠔ ꠢꠣꠝꠣꠁꠀ ꠁꠝꠣꠝꠔꠤꠞ ꠇꠣꠝꠅ ꠟꠣꠉꠛꠣ, ꠅꠃ ꠡꠝꠄ ꠔꠣꠞꠣ ꠅꠃ ꠎꠣꠋꠉꠤꠀ ꠚꠤꠘꠛꠣ। ꠔꠦꠃ ꠔꠣꠞꠣ ꠘꠤ-ꠅꠙꠞꠣꠗꠤ ꠞꠁꠛꠣ, ꠝꠞꠔꠣ ꠘꠣꠄ। ꠢꠣꠞꠥꠘ ꠀꠞ ꠔꠣꠞ ꠅꠀꠞꠤꠡꠞ ꠍꠤꠟꠍꠤꠟꠣꠞ ꠟꠣꠉꠤ ꠁ ꠀꠁꠘ ꠢꠞ-ꠢꠣꠝꠦꠡꠣ ꠌꠣꠟꠥ ꠞꠁꠛ।”