1 ꠛꠣꠔꠍꠦꠟꠟꠦ ꠛꠣꠛꠟꠣ ꠟꠣꠇꠠꠤꠖꠤ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇ ꠛꠣꠘꠣꠁꠟꠣ। ꠁꠐꠣ ꠀꠠꠣꠁ ꠀꠔ ꠟꠣꠝ꠆ꠛꠣ, ꠖꠦꠠ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ। 2 ꠄꠞ ꠛꠣꠞꠦ-ꠜꠤꠔꠞꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠟꠣ, ꠄꠞ ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠟꠣꠉꠣꠁꠟꠣ। 3 ꠀꠉꠥꠁꠘꠖꠤ ꠡꠥꠘꠣ ꠉꠟꠣꠁꠀ ꠌꠣꠁꠞꠐꠣ ꠡꠥꠘꠣꠞ ꠇꠠꠣ ꠄꠞ ꠌꠣꠁꠞꠅ ꠇꠥꠘꠣꠔ ꠟꠣꠉꠣꠁꠟꠣ, ꠅꠉꠣꠟꠣꠔ ꠖꠥꠁꠐꠣ ꠀꠞ ꠢꠉꠣꠟꠣꠔ ꠖꠥꠁꠐꠣ ꠟꠣꠉꠣꠁꠟꠣ। 4 ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠟꠣ। 5 ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠟꠣꠉꠤ ꠁ ꠖꠥꠁꠅ ꠛꠦꠘ꠆ꠖꠣ, ꠡꠘ꠆ꠖꠥꠇꠞ ꠖꠥꠁ ꠉꠣꠟꠣꠞ ꠇꠠꠣꠞ ꠜꠤꠔꠞꠦꠖꠤ ꠢꠣꠞꠣꠁꠟꠣ।

6 ꠛꠣꠖꠦ ꠈꠣꠐꠤ ꠡꠥꠘꠣꠖꠤ ꠡꠘ꠆ꠖꠥꠇꠞ ꠄꠇꠈꠣꠘ ꠓꠣꠇꠘꠣ ꠛꠣꠘꠣꠁꠟꠣ, ꠅꠈꠣꠘꠞ ꠃꠙꠞꠦ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠟꠣꠉꠤ। ꠁ ꠓꠣꠇꠘꠣ ꠟꠣꠝ꠆ꠛꠣꠄ ꠀꠠꠣꠁ ꠀꠔ, ꠀꠞ ꠙꠣꠡꠦ ꠖꠦꠠ ꠀꠔ। 7 ꠡꠥꠘꠣ ꠙꠤꠐꠣꠁꠀ ꠓꠣꠇꠘꠣꠞ ꠖꠥꠁꠅ ꠉꠣꠟꠣꠔ ꠖꠥꠁꠐꠣ ꠇꠣꠞꠥꠛꠤ ꠛꠣꠘꠣꠁꠟꠣ। 8 ꠖꠥꠁꠅ ꠇꠣꠞꠥꠛꠤ ꠡꠘ꠆ꠖꠥꠇꠞ ꠓꠣꠇꠘꠣꠞ ꠖꠥꠁ ꠇꠤꠘꠣꠞꠅ ꠞꠁꠟ। ꠁ ꠖꠥꠁꠅ ꠇꠣꠞꠥꠛꠤ ꠓꠣꠇꠘꠣꠞ ꠟꠉꠦ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟ ꠅꠁꠟ, ꠁ ꠀꠡ꠆ꠔꠣꠐꠣ ꠈꠣꠟꠤ ꠄꠇ ꠌꠤꠎ ꠅꠁꠟ। 9 ꠇꠣꠞꠥꠛꠤ ꠖꠦꠈꠔꠦ ꠖꠥꠟꠖꠥꠟ ꠊꠥꠠꠣꠞ ꠟꠣꠈꠣꠘ ꠒꠣꠈꠘꠣ ꠀꠟꠣ, ꠄꠞ ꠖꠥꠁꠅ ꠒꠣꠈꠘꠣ ꠃꠙꠞꠦꠖꠤ ꠝꠦꠟꠤꠀ ꠖꠦꠅꠀꠄ, ꠅꠃ ꠒꠣꠈꠘꠣꠞ ꠍꠣꠄꠀꠞ ꠔꠟꠦ ꠡꠘ꠆ꠖꠥꠇꠞ ꠓꠣꠇꠘꠣ ꠢꠣꠝꠣꠁꠉꠦꠟ। ꠁꠐꠣ ꠝꠥꠈꠣꠝꠥꠈꠤ ꠃꠛꠣ ꠞꠁꠟ। ꠀꠞ ꠔꠣꠞꠣꠞ ꠌꠃꠈ ꠞꠁꠟ ꠡꠘ꠆ꠖꠥꠇꠞ ꠓꠣꠇꠘꠣꠞ ꠛꠣꠄ।

10 ꠛꠣꠔꠍꠦꠟꠟꠦ ꠛꠣꠖꠦ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠁ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ ꠇꠞꠤ ꠄꠇꠈꠣꠘ ꠐꠦꠛꠥꠟ ꠛꠣꠘꠣꠁꠟꠣ। 11 ꠛꠣꠘꠣꠁꠀ ꠢꠣꠞꠟꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠄꠞ ꠌꠣꠁꠞꠅ ꠇꠤꠘꠣꠞꠅ ꠘꠇꠡꠣ ꠟꠣꠉꠣꠁꠟꠣ। 12 ꠀꠞ ꠄꠞ ꠍꠣꠘꠤꠞ ꠌꠣꠁꠞꠅ ꠇꠤꠘꠣꠞꠅ ꠌꠣꠁꠞ ꠀꠋꠉꠥꠟ ꠃꠌꠣ ꠇꠞꠤ ꠄꠇ ꠢꠣꠎ ꠖꠤꠟꠣ, ꠢꠣꠎꠞ ꠝꠣꠎꠦ ꠡꠥꠘꠣꠖꠤ ꠘꠇꠡꠣ ꠟꠣꠉꠣꠁꠟꠣ। 13 ꠐꠦꠛꠥꠟꠞ ꠌꠣꠁꠞꠅ ꠇꠥꠘꠣꠞ ꠙꠣꠄꠀꠞ ꠃꠙꠞꠦ ꠡꠥꠘꠣꠞ ꠌꠣꠁꠞꠐꠣ ꠇꠠꠣ ꠟꠣꠉꠣꠁꠟꠣ। 14 ꠁ ꠌꠣꠁꠞꠅ ꠇꠠꠣꠁꠘ ꠐꠦꠛꠥꠟꠞ ꠇꠥꠘꠣꠞ ꠢꠃ ꠃꠌꠣ ꠢꠣꠎꠞ ꠔꠟꠦ ꠟꠣꠉꠣꠘꠤ ꠅꠁꠟ, ꠎꠣꠔꠦ ꠐꠦꠛꠥꠟ ꠛꠁꠀ ꠘꠦꠅꠀꠞ ꠛꠣꠟꠣ ꠇꠠꠣꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠟ ꠎꠣꠄ। 15 ꠐꠦꠛꠥꠟꠞꠦ ꠛꠁꠀ ꠘꠦꠅꠀꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠟꠣ। 16 ꠐꠦꠛꠥꠟꠞ ꠃꠙꠞꠞ ꠕꠣꠟ-ꠛꠣꠡꠘ, ꠀꠟ꠆ꠟꠣꠞ ꠘꠣꠝꠦ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠎꠉ ꠀꠞ ꠝꠉ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠉꠠꠣꠁꠟꠣ।

17 ꠛꠣꠖꠦ ꠈꠣꠐꠤ ꠡꠥꠘꠣꠖꠤ ꠄꠇꠈꠣꠘ ꠌꠦꠞꠣꠉ ꠖꠣꠘꠤ ꠔꠤꠀꠞ ꠇꠞꠟꠣ। ꠌꠦꠞꠣꠉ ꠖꠣꠘꠤꠞ ꠔꠟꠣ ꠀꠞ ꠃꠙꠞꠞ ꠒꠣꠘ꠆ꠒꠤ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠉꠠꠣꠁꠟꠣ। ꠄꠞ ꠒꠣꠘ꠆ꠒꠤ, ꠚꠥꠟꠞ ꠟꠣꠈꠣꠘ ꠙꠤꠀꠟꠣ, ꠇꠥꠠꠤ ꠀꠞ ꠙꠣꠙꠠꠤ ꠅꠇꠟ ꠌꠦꠞꠣꠉ ꠖꠣꠘꠤꠞ ꠟꠉꠦ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟꠣ। 18 ꠌꠦꠞꠣꠉ ꠖꠣꠘꠤꠞ ꠒꠣꠘ꠆ꠒꠤꠞ ꠖꠥꠁ ꠉꠣꠟꠣꠔ ꠔꠤꠘꠐꠣ ꠇꠞꠤ ꠝꠥꠐ ꠍꠄꠐꠣ ꠒꠣꠟ ꠖꠦꠅꠀ ꠅꠁꠟ। 19 ꠙꠞꠔꠦꠇ ꠒꠣꠟꠞ ꠝꠣꠎꠦ ꠎꠛꠣ ꠚꠥꠟꠞ ꠟꠣꠈꠣꠘ ꠔꠤꠘꠉꠥ ꠇꠞꠤ ꠙꠤꠀꠟꠣ ꠔꠤꠀꠞ ꠇꠞꠣ ꠅꠁꠟ। ꠌꠦꠞꠣꠉ ꠖꠣꠘꠤꠞ ꠍꠄꠅ ꠒꠣꠟꠅ ꠄꠇꠟꠣꠈꠣꠘ ꠇꠣꠝ ꠇꠞꠣ ꠅꠁꠟ। 20 ꠌꠦꠞꠣꠉ ꠖꠣꠘꠤꠞ ꠝꠥꠟ ꠒꠣꠘ꠆ꠒꠤꠞ ꠝꠣꠎꠦꠅ ꠎꠛꠣ ꠚꠥꠟꠞ ꠟꠣꠈꠣꠘ ꠌꠣꠁꠞꠐꠣ ꠙꠤꠀꠟꠣ ꠖꠦꠅꠀ ꠅꠁꠟ। 21 ꠅꠃ ꠝꠥꠟ ꠒꠣꠘ꠆ꠒꠤ ꠕꠣꠇꠤ ꠛꠣꠞꠅꠁꠟ ꠍꠄꠐꠣ ꠒꠣꠟꠞ ꠝꠣꠎꠦ, ꠙꠄꠟꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠄꠉꠥ ꠇꠞꠤ ꠇꠥꠠꠤ, ꠖꠥꠍꠞꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠀꠞꠇ ꠇꠥꠠꠤ, ꠀꠞ ꠢꠦꠡꠞ ꠖꠥꠁꠅ ꠒꠣꠟꠞ ꠎꠥꠠꠣꠔꠅ ꠇꠥꠠꠤ ꠟꠣꠉꠣꠁꠟ ꠅꠁꠟ। 22 ꠇꠥꠠꠤ ꠀꠞ ꠒꠣꠟ ꠢꠇꠟꠔꠣ ꠌꠦꠞꠣꠉ ꠖꠣꠘꠤ ꠕꠣꠇꠤ ꠛꠣꠞ ꠅꠁꠟ, ꠢꠇꠟꠔꠣ ꠝꠤꠟꠤꠀ ꠄꠇ ꠌꠤꠎ ꠅꠁꠟ। ꠀꠡ꠆ꠔꠣꠐꠣꠃ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠛꠣꠘꠣꠘꠤ ꠅꠁꠟ। 23 ꠈꠣꠐꠤ ꠡꠥꠘꠣꠖꠤ ꠡꠣꠔꠐꠣ ꠌꠦꠞꠣꠉ, ꠌꠦꠞꠣꠉꠞ ꠚꠤꠔꠣ ꠍꠣꠚ ꠇꠞꠣꠞ ꠌꠤꠝꠐꠣ, ꠎꠣꠟꠣꠁꠟ ꠚꠤꠔꠣꠞ ꠍꠣꠟꠤ ꠕꠅꠀꠞ ꠟꠣꠉꠤ ꠇꠄꠉꠥ ꠛꠣꠐꠤ ꠛꠣꠘꠣꠁꠟ ꠅꠁꠟ। 24 ꠄꠇ ꠝꠘ ꠈꠣꠐꠤ ꠡꠥꠘꠣꠖꠤ ꠁ ꠌꠦꠞꠣꠉ ꠖꠣꠘꠤ, ꠀꠞ ꠟꠉꠞ ꠢꠇꠟꠔꠣ ꠔꠤꠀꠞ ꠇꠞꠣ ꠅꠁꠟ।

25 ꠛꠣꠖꠦ ꠛꠣꠛꠟꠣ ꠟꠣꠇꠠꠤꠖꠤ ꠌꠣꠁꠞ ꠇꠥꠘꠣ ꠀꠟꠣ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠛꠣꠘꠣꠁꠟ ꠅꠁꠟ। ꠄꠇ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ, ꠀꠞ ꠖꠥꠁ ꠀꠔ ꠃꠛꠤ ꠖꠤꠀ ꠁ ꠐꠦꠛꠥꠟ ꠛꠣꠘꠣꠁꠟꠣ। ꠄꠞ ꠌꠣꠁꠞꠅ ꠇꠥꠘꠣꠞ ꠌꠣꠁꠞꠅ ꠢꠤꠋꠅ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟꠣ। 26 ꠍꠣꠘꠤ, ꠍꠣꠘꠤꠞ ꠌꠣꠁꠞꠅ ꠇꠤꠘꠣꠞ ꠀꠞ ꠢꠤꠋ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠟꠣꠉꠣꠁꠟꠣ। 27 ꠄꠞ ꠖꠥꠁ ꠇꠤꠘꠣꠞꠞ ꠘꠇꠡꠣꠞ ꠔꠟꠦ ꠖꠥꠉꠥ ꠇꠞꠤ ꠡꠥꠘꠣꠞ ꠇꠠꠣ ꠟꠣꠉꠣꠁꠟ ꠅꠁꠟ, ꠎꠣꠔꠦ ꠄꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠀ ꠛꠁꠀ ꠘꠦꠅꠀ ꠎꠣꠄ। 28 ꠛꠣꠛꠟꠣ ꠟꠣꠇꠠꠤꠖꠤ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠛꠣꠘꠣꠁꠟꠣ, ꠁꠐꠣꠞꠦꠅ ꠡꠥꠘꠣꠖꠤ ꠟꠦꠙꠤꠟꠣ।

29 ꠛꠣꠖꠦ ꠈꠥꠡꠛꠄ ꠀꠟꠣ ꠝꠡꠟꠣ ꠛꠣꠘꠣꠘꠤꠞ ꠇꠣꠞꠤꠉꠞꠞ ꠘꠤꠅꠝꠦ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠙꠛꠤꠔ꠆ꠞ ꠔꠦꠟ ꠀꠞ ꠈꠥꠡꠛꠄ ꠀꠟꠣ ꠈꠣꠐꠤ ꠀꠉꠞ ꠔꠤꠀꠞ ꠇꠞꠟꠣ।