ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚ ꠙꠄꠟꠣ ꠍꠤꠙꠣꠞꠣ
ꠙꠄꠖꠣ ꠘꠣꠝꠣ
ꠍꠤꠟꠐꠤ ꠜꠣꠡꠣꠄ ꠔꠞꠎꠝꠣ
ꠔꠃꠞꠣꠔ ꠡꠞꠤꠚꠞ ꠙꠞꠤꠌꠤꠔꠤ
ꠀꠟ꠆ꠟꠣ ꠙꠣꠇꠞ ꠘꠣꠎꠤꠟ ꠇꠞꠣ ꠀꠍꠝꠣꠘꠤ ꠇꠤꠔꠣꠛ ꠅꠇꠟꠞ ꠝꠣꠎꠞ ꠢꠇꠟ ꠙꠄꠟꠣ ꠇꠤꠔꠣꠛ ꠅꠁꠟ, ꠢꠎꠞꠔ ꠝꠥꠍꠣ (ꠀ꠩) ꠅꠞ ꠃꠙꠞꠦ ꠘꠣꠎꠤꠟ ꠅꠀ ꠔꠃꠞꠣꠔ ꠡꠞꠤꠚ ꠛꠣ ꠔꠃꠞꠣꠔ ꠇꠤꠔꠣꠛ। ꠁ ꠇꠤꠔꠣꠛ ꠢꠤꠛ꠆ꠞꠥ ꠝꠣꠘꠤ ꠁꠛꠞꠣꠘꠤ ꠜꠣꠡꠣꠄ ꠘꠣꠎꠤꠟ ꠅꠁꠍꠦ, ꠅꠃ ꠜꠣꠡꠣꠄ ‘ꠔꠥꠞꠣꠢ’ ꠝꠣꠘꠤ ‘ꠘꠍꠤꠅꠔ’। ꠅꠃ ꠔꠃꠞꠣꠔ ꠇꠤꠔꠣꠛ ꠘꠣꠎꠤꠟ ꠅꠁꠍꠦ ꠅꠘꠥꠝꠣꠘ ৩৫০০ ꠛꠍꠞ ꠀꠉꠦ। ꠀꠍꠝꠣꠘꠤ ꠇꠤꠔꠣꠛ ꠅꠇꠟꠞ ꠝꠣꠎꠦ ꠁꠇꠐꠣ ꠅꠁꠟ ꠢꠇꠟ ꠕꠣꠇꠤ ꠙꠥꠞꠣꠘ ꠇꠤꠔꠣꠛ, ꠀꠞ ꠛꠣꠖ-ꠛꠣꠇꠤ ꠢꠇꠟ ꠀꠍꠝꠣꠘꠤ ꠇꠤꠔꠣꠛꠦ ꠅꠃ ꠔꠃꠞꠣꠔ ꠇꠤꠔꠣꠛ ꠕꠣꠇꠤꠃ ꠔꠣꠟꠤꠝ ꠖꠦꠄ।
ꠔꠃꠞꠣꠔ ꠡꠞꠤꠚꠞ ꠙꠣꠌꠈꠣꠘ ꠍꠤꠙꠣꠞꠣ ꠀꠍꠦ, ꠅꠃ ꠍꠤꠙꠣꠞꠣ ꠅꠇꠟꠞ ꠛꠤꠡꠄ ꠡꠋꠇ꠆ꠇꠦꠙ ꠅꠁꠟ:
১। ꠙꠄꠖꠣ ꠘꠣꠝꠣ: ꠀꠍꠝꠣꠘ-ꠎꠝꠤꠘ ꠙꠄꠖꠣ ꠕꠣꠇꠤ ꠖꠥꠘꠤꠀꠞ ꠙꠥꠞꠣꠘ ꠁꠔꠤꠢꠣꠡ। ꠛꠣꠖꠦ ꠀꠟ꠆ꠟꠣ ꠙꠣꠇꠦ ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠀꠞ ꠔꠣꠘ ꠛꠋꠡꠗꠞꠞꠦ ꠙꠍꠘ꠆ꠖ ꠇꠞꠍꠂꠘ, ꠄꠞꠣꠞ ꠝꠣꠎꠦ ꠔꠣꠘ ꠘꠣꠔꠤ ꠢꠎꠞꠔ ꠁꠀꠇꠥꠛ (ꠀ꠩) ꠅꠁꠟꠣꠉꠤ ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠥꠟ ꠛꠣꠚ।
২। ꠢꠤꠎꠞꠔ: ꠛꠘꠤ ꠁꠍꠞꠣꠁꠟ ꠎꠣꠔꠤ ꠚꠦꠞꠣꠃꠘꠞ ꠉꠥꠟꠣꠝ ꠅꠁꠍꠂꠘ, ꠛꠣꠖꠦ ꠢꠎꠞꠔ ꠝꠥꠍꠣ (ꠀ꠩) ꠅꠞ ꠀꠔꠣꠘꠦ ꠀꠟ꠆ꠟꠣ ꠙꠣꠇꠦ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠇꠞꠤꠀ ꠛꠣꠞ ꠇꠞꠍꠂꠘ ꠇꠦꠘꠣꠘ ꠖꠦꠡ ꠎꠣꠅꠀꠞ ꠘꠤꠅꠔꠦ। ꠝꠞꠥꠜꠥꠝꠤꠔ ꠀꠁꠀ ꠔꠣꠞꠣ ꠄꠇ ꠇꠣꠛꠣ ꠊꠞ ꠛꠣꠘꠣꠁꠍꠂꠘ ꠎꠣꠞ ꠘꠣꠝ ꠅꠁꠟ ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥ।
৩। ꠟꠦꠛꠤꠀꠘ: ꠢꠃ ꠇꠣꠛꠣ ꠊꠞꠞ ꠄꠛꠣꠖꠔꠤꠞ ꠘꠤꠅꠝ-ꠇꠣꠘꠥꠘ ꠀꠞ ꠙꠄꠟꠣ ꠁꠔꠤꠢꠣꠡ।
৪। ꠡꠥꠝꠣꠞꠤ: ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠘꠤꠞ ꠖꠥꠁ ꠛꠍꠞꠞ ꠡꠝꠄ, ꠛꠦꠡꠤꠞ ꠜꠣꠉ ꠛꠘꠤ ꠁꠍꠞꠣꠁꠟ ꠘꠣꠚꠞꠝꠣꠘ ꠛꠘꠤꠉꠦꠍꠂꠘ। ꠄꠞꠟꠣꠉꠤ ꠅꠃ ꠘꠣꠚꠞꠝꠣꠘ ꠅꠇꠟ ꠘꠣ ꠝꠞꠣ ꠙꠞ꠆ꠎꠘ꠆ꠔ ৩৮ ꠛꠍꠞ ꠝꠞꠥꠜꠥꠝꠤꠞ ꠝꠣꠎꠦ ꠊꠥꠞꠣꠊꠥꠞꠤꠔ ꠀꠍꠤꠟ, ꠈꠣꠟꠤ ꠔꠣꠞꠣꠞ ꠀꠅꠟꠣꠖ ꠅꠇꠟ ꠎꠤꠘ꠆ꠖꠣ ꠞꠁꠟꠣ।
৫। ꠖꠥꠍꠞꠣ-ꠛꠄꠀꠘꠤ: ৪০ ꠛꠍꠞꠞ ꠡꠝꠄ ꠛꠘꠤ ꠁꠍꠞꠣꠁꠟ ꠎꠣꠔꠤ ꠇꠦꠘꠣꠘ ꠖꠦꠡꠞ ꠡꠤꠝꠣꠘꠣꠔ ꠀꠅꠀꠞ ꠛꠣꠖꠦ, ꠀꠟ꠆ꠟꠣꠄ ꠢꠎꠞꠔ ꠝꠥꠍꠣ (ꠀ꠩) ꠞꠦ ꠇꠁꠍꠂꠘ ꠔꠣꠘ ꠖꠦꠅꠀ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠍꠤꠅꠔ ꠢꠤꠞꠛꠣꠞ ꠛꠘꠤ ꠁꠍꠞꠣꠁꠟ ꠎꠣꠔꠤꠞꠦ ꠝꠘ ꠇꠞꠣꠁꠛꠣꠞ ꠟꠣꠉꠤ। ꠄꠞ ꠛꠣꠖꠦ ꠔꠣꠘ ꠈꠣꠖꠤꠝ ꠢꠎꠞꠔ ꠁꠃꠍꠣ (ꠀ꠩) ꠞꠦ ꠔꠣꠘ ꠈꠟꠤꠚꠣ ꠢꠤꠡꠣꠛꠦ ꠛꠅꠀꠁꠀ ꠢꠎꠞꠔ ꠝꠥꠍꠣ (ꠀ꠩) ꠖꠥꠘꠤꠀ ꠕꠣꠇꠤ ꠛꠤꠖꠣꠄ ꠅꠁꠉꠦꠟꠣ।
ꠙꠄꠖꠣ ꠘꠣꠝꠣ ꠍꠤꠙꠣꠞꠣꠞ ꠙꠞꠤꠌꠤꠔꠤ
ꠔꠃꠞꠣꠔ ꠡꠞꠤꠚꠞ ꠙꠄꠟꠣ ꠍꠤꠙꠣꠞꠣ ꠅꠁꠟ ‘ꠙꠄꠖꠣ ꠘꠣꠝꠣ’। ꠅꠃ ꠍꠤꠙꠣꠞꠣꠞ ꠙꠄꠟꠣ ꠀꠄꠀꠔꠅ ꠀꠍꠦ “ꠙꠄꠟꠣꠃ ꠀꠟ꠆ꠟꠣ,” ꠀꠞ ꠢꠦꠡ ꠀꠄꠀꠔꠅ ꠀꠍꠦ ꠢꠎꠞꠔ ꠁꠃꠍꠥꠚ (ꠀ꠩) ꠅꠞ ꠝꠃꠔ। ꠀꠞ ꠢꠣꠍꠣꠃ ꠀꠝꠞꠣ ꠖꠥꠘꠤꠀ ꠙꠄꠖꠣ ꠕꠘꠦ ꠢꠎꠞꠔ ꠁꠃꠍꠥꠚ (ꠀ꠩) ꠙꠞ꠆ꠎꠘ꠆ꠔ ꠛꠃꠔ ꠘꠛꠤꠞ ꠛꠄꠀꠘꠤ ꠁ ꠍꠤꠙꠣꠞꠣꠔ ꠙꠣꠁ। ꠙꠄꠖꠣ ꠘꠣꠝꠣꠞ ꠝꠥꠟ ꠛꠤꠡꠄ ꠅꠁꠟ, ꠀꠖꠝ ꠎꠣꠔꠤꠄ ꠁꠛꠟꠤꠍ-ꠡꠄꠔꠣꠘꠞ ꠜꠥꠟ ꠙꠞꠣꠝꠤꠡ ꠢꠥꠘꠤꠀ ꠢꠣꠞꠤ ꠘꠣꠚꠞꠝꠣꠘ ꠛꠘꠤꠉꠦꠟꠣ। ꠛꠣꠖꠦ ꠀꠟ꠆ꠟꠣ ꠙꠣꠇꠦ ꠅꠃ ꠘꠣꠚꠞꠝꠣꠘꠤ ꠕꠣꠇꠤ ꠝꠥꠇ꠆ꠔꠤ ꠙꠣꠅꠀꠞ ꠟꠣꠉꠤ ꠄꠇ ꠙꠕ ꠖꠦꠈꠣꠁꠟꠣ, ꠎꠣꠔꠦ ꠀꠖꠝ ꠎꠣꠔꠤ ꠢꠤꠞꠛꠣꠞ ꠔꠣꠘ ꠖꠤꠖꠣꠞ-ꠖꠞꠡꠘ ꠙꠣꠁꠔꠣ ꠙꠣꠞꠂꠘ।
ꠅꠃ ꠙꠕꠞꠦ ꠖꠥꠁ ꠘꠝꠥꠘꠣꠄ ꠖꠦꠈꠣꠁꠟ ꠅꠁꠍꠦ। ꠙꠄꠟꠣ, ꠀꠟ꠆ꠟꠣꠄ ꠘꠣꠘꠣꠘ ꠘꠛꠤꠞ ꠟꠉꠦ ꠔꠣꠘ ꠖꠤꠖꠣꠞ ꠙꠣꠅꠀꠞ ꠅꠀꠖꠣ-ꠌꠥꠇ꠆ꠔꠤ ꠇꠞꠟꠣ, ꠀꠞ ꠢꠃ ꠘꠛꠤꠞ ꠃꠝ꠆ꠝꠔꠦꠅ ꠄꠞ ꠘꠤꠀꠝꠔ-ꠚꠎꠤꠟꠔ ꠙꠣꠁꠟꠣ। ꠀꠞ ꠖꠥꠍꠞꠣ ꠘꠝꠥꠘꠣ ꠅꠁꠟ, ꠀꠟ꠆ꠟꠣ ꠙꠣꠇꠦ ꠅꠀꠖꠣ ꠇꠞꠟꠣ, ꠔꠣꠘ ꠙꠣꠑꠣꠁꠟ ꠢꠃ ꠘꠛꠤ ꠅꠇꠟꠞ ꠍꠤꠟꠍꠤꠟꠣ ꠕꠣꠇꠤ ꠅꠟꠣ ꠄꠇ ꠙꠛꠤꠔ꠆ꠞ ꠎꠘ ꠁ ꠖꠥꠘꠤꠀꠔ ꠀꠁꠛꠣ, ꠀꠁꠟꠦ ꠄꠘ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠀꠟ꠆ꠟꠣꠞ ꠖꠄꠀ ꠀꠞ ꠞꠢꠝ-ꠛꠞꠇꠔ ꠙꠣꠁꠛꠣ, ꠝꠣꠘꠡꠦ ꠖꠥꠘꠤꠀ ꠀꠞ ꠀꠈꠦꠞꠣꠔꠅ ꠘꠣꠎꠣꠔ ꠙꠣꠁꠛꠣ। ꠎꠦꠝꠘ, ꠀꠖꠝ-ꠢꠣꠅꠀꠞ ꠍꠣꠝꠘꠦ ꠔꠣꠁꠘ ꠡꠄꠔꠣꠘꠞꠦ ꠇꠁꠟꠣ, “ꠛꠦꠐꠤ ꠝꠣꠘꠡꠞ ꠛꠋꠡꠦ ꠔꠥꠝꠣꠞ ꠇꠟ꠆ꠟꠣ ꠉꠥꠠꠣ ꠇꠞꠛ” (৩ ꠞꠥꠇꠥ ১৫ ꠀꠄꠀꠔ)। ꠝꠣꠘꠤ, ꠢꠃ ꠙꠛꠤꠔ꠆ꠞ ꠎꠘꠦ ꠡꠄꠔꠣꠘꠞ ꠢꠇꠟ ꠈꠦꠝꠔꠣ ꠀꠞ ꠛꠟ-ꠡꠇ꠆ꠔꠤꠞꠦ ꠛꠤꠘꠣꠡ ꠇꠞꠛꠣ, ꠄꠁꠘ ꠎꠘꠝ ꠟꠁꠛꠣ ꠄꠇ ꠛꠦꠐꠤ ꠝꠣꠘꠡꠞ ꠊꠞꠅ, ꠛꠣꠖꠦ ꠀꠞꠇ ꠇꠤꠔꠣꠛꠅ ꠀꠟ꠆ꠟꠣꠄ ꠎꠣꠘꠣꠁꠍꠂꠘ ꠄꠘ ꠎꠘꠝ ꠅꠁꠛ ꠀꠛꠤꠀꠔꠤ ꠄꠇ ꠡꠔꠤ ꠘꠣꠞꠤꠞ ꠊꠞꠅ। ꠀꠞ ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠞꠦ ꠇꠁꠟꠣ, “ꠔꠥꠝꠣꠞ ꠛꠋꠡꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠛꠞꠇꠔ ꠢꠣꠍꠤꠟ ꠇꠞꠛꠣ” (২২:১৮ ꠀꠄꠀꠔ)। ꠛꠣꠖꠦ ꠔꠣꠁꠘ ꠢꠎꠞꠔ ꠁꠛ꠆ꠞꠣꠢꠤꠝꠞꠦ ꠎꠣꠘꠣꠁꠍꠂꠘ, ꠢꠃ ꠙꠛꠤꠔ꠆ꠞ ꠀꠅꠟꠣꠖ ꠀꠁꠛꠣ ꠔꠣꠘ ꠢꠥꠞꠥ ꠙꠥꠀ ꠢꠎꠞꠔ ꠁꠍꠢꠣꠇ (ꠀ꠩) ꠅꠞ ꠙꠥꠀ ꠁꠀꠇꠥꠛ ꠘꠛꠤꠞ ꠈꠣꠘ꠆ꠖꠣꠘꠅ।
ꠀꠟ꠆ꠟꠣꠄ ꠢꠎꠞꠔ ꠁꠀꠇꠥꠛ (ꠀ꠩) ꠞꠦ ꠘꠄꠀ ꠘꠣꠝ ꠖꠤꠍꠟꠣ ꠢꠎꠞꠔ ꠁꠍꠞꠣꠁꠟ, ꠄꠞꠟꠣꠉꠤ ꠁꠀꠇꠥꠛꠞ ꠛꠋꠡꠗꠞꠞꠦ ꠇꠅꠀ ꠅꠄ ‘ꠛꠘꠤ ꠁꠍꠞꠣꠁꠟ’, ꠝꠣꠘꠤ ꠢꠎꠞꠔ ꠁꠍꠞꠣꠁꠟꠞ ꠀꠅꠟꠣꠖ ꠅꠇꠟ। ꠙꠄꠖꠣ ꠘꠣꠝꠣ ꠍꠤꠙꠣꠞꠣꠞ ꠢꠦꠡ ꠅꠋꠡꠔ ꠀꠍꠦ, ꠢꠎꠞꠔ ꠁꠃꠍꠥꠚ (ꠀ꠩) ꠇꠤꠟꠣ ꠝꠤꠡꠞ ꠖꠦꠡꠅ ꠉꠥꠟꠣꠝ ꠛꠘꠟꠣ ꠀꠞ ꠛꠣꠖꠦ ꠝꠤꠡꠞ ꠖꠦꠡꠞ ꠞꠣꠎꠣ ꠛꠘꠤꠀ ꠘꠤꠖꠣꠘꠞ ꠀꠔ ꠕꠣꠇꠤ ꠎꠣꠘ ꠛꠣꠌꠣꠘꠤꠞ ꠟꠣꠉꠤ, ꠔꠣꠘ ꠘꠤꠎꠞ ꠛꠣꠛꠣ ꠀꠞ ꠜꠣꠁꠀꠂꠘꠞꠦꠅ ꠅꠃ ꠝꠤꠡꠞꠅ ꠀꠘꠍꠂꠘ। ꠅꠃ ꠘꠝꠥꠘꠣꠄ ꠛꠘꠤ ꠁꠍꠞꠣꠁꠟ ꠝꠤꠡꠞꠅ ꠛꠡꠔ ꠇꠞꠣ ꠡꠥꠞꠥ ꠅꠁꠟ।
ꠄꠞꠝꠣꠎꠦ ꠀꠍꠦ,
ꠢꠎꠞꠔ ꠀꠖꠝ (ꠀ꠩)—ꠖꠥꠘꠤꠀꠞ ꠙꠄꠖꠣ ১—৫ ꠞꠥꠇꠥ
ꠢꠎꠞꠔ ꠘꠥꠢ (ꠀ꠩)—ꠙꠣꠘꠤꠞ ꠉꠎꠛ ৬—১০ ꠞꠥꠇꠥ
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩)—ꠀꠟ꠆ꠟꠣꠞ ꠅꠀꠖꠣ ১১—২৩ ꠞꠥꠇꠥ
ꠢꠎꠞꠔ ꠁꠍꠢꠣꠇ (ꠀ꠩)—ꠢꠤꠞꠛꠣꠞ ꠀꠟ꠆ꠟꠣꠞ ꠅꠀꠖꠣ ২৪—২৬ ꠞꠥꠇꠥ
ꠢꠎꠞꠔ ꠁꠀꠇꠥꠛ (ꠀ꠩)—ꠛꠘꠤ ꠁꠍꠞꠣꠁꠟꠞ ꠡꠥꠞꠥ ২৭—৩৬ ꠞꠥꠇꠥ
ꠢꠎꠞꠔ ꠁꠃꠍꠥꠚ (ꠀ꠩)—ꠛꠘꠤ ꠁꠍꠞꠣꠁꠟ ꠝꠤꠡꠞ ꠖꠦꠡꠅ ꠀꠁꠟꠣ ৩৭—৫০ ꠞꠥꠇꠥ
ꠢꠎꠞꠔ ꠀꠖꠝ (ꠀ꠩) (১:১—৫:৩২)
1
ꠀꠍꠝꠣꠘ-ꠎꠝꠤꠘ ꠙꠄꠖꠣ
1 ꠙꠄꠟꠣꠃ ꠀꠟ꠆ꠟꠣꠄ ꠀꠍꠝꠣꠘ ꠀꠞ ꠖꠥꠘꠤꠀ ꠙꠄꠖꠣ ꠇꠞꠟꠣ। 2 ꠖꠥꠘꠤꠀꠁ ꠘꠤꠞꠣꠇꠣꠞ ꠀꠞ ꠈꠣꠟꠤ ꠀꠍꠤꠟ, ꠉꠁꠘ ꠙꠣꠘꠤꠞ ꠃꠙꠞꠦ ꠙꠥꠞꠣ ꠀꠘ꠆ꠖꠣꠁꠞ ꠀꠍꠤꠟ। ꠀꠟ꠆ꠟꠣꠞ ꠞꠥꠢꠥ ꠄꠞ ꠃꠙꠞꠦ ꠌꠟꠣꠌꠟ ꠇꠞꠔꠣ। 3 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ ꠚꠞ ꠅꠃꠇ, ꠀꠞ ꠚꠞ ꠅꠁꠟ। 4 ꠀꠟ꠆ꠟꠣꠄ ꠖꠦꠈꠟꠣ ꠚꠞ ꠜꠣꠟꠣ। ꠔꠣꠁꠘ ꠀꠘ꠆ꠖꠣꠁꠞ ꠕꠣꠇꠤ ꠚꠞꠞꠦ ꠀꠟꠉꠣ ꠇꠞꠤꠀ 5 ꠄꠞ ꠘꠣꠝ ꠞꠣꠈꠟꠣ ꠖꠤꠘ, ꠀꠞ ꠀꠘ꠆ꠖꠣꠁꠞꠞ ꠘꠣꠝ ꠞꠣꠈꠟꠣ ꠞꠣꠁꠔ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠙꠄꠟꠣ ꠖꠤꠘ।
6 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠙꠣꠘꠤꠞ ꠝꠣꠎꠦ ꠉꠥꠝ꠆ꠛꠥꠎꠞ ꠟꠣꠈꠣꠘ ꠚꠣꠇ ꠎꠣꠉꠣ ꠅꠃꠇ, ꠀꠞ ꠙꠣꠘꠤ ꠖꠥꠁ ꠜꠣꠉ ꠅꠁꠎꠣꠃꠇ। 7 ꠀꠞ ꠀꠟ꠆ꠟꠣꠄ ꠚꠣꠇ ꠎꠣꠉꠣ ꠙꠄꠖꠣ ꠇꠞꠤꠀ, ꠔꠟꠞ ꠀꠞ ꠃꠙꠞꠞ ꠙꠣꠘꠤ ꠀꠟꠉꠣ ꠇꠞꠟꠣ। ꠀꠞ ꠅꠃꠟꠣ ꠅꠁꠟ। 8 ꠀꠟ꠆ꠟꠣꠄ ꠉꠥꠝ꠆ꠛꠥꠎꠞ ꠟꠣꠈꠣꠘ ꠎꠦ ꠎꠣꠉꠣ ꠛꠣꠘꠣꠁꠟꠣ, ꠔꠣꠞ ꠘꠣꠝ ꠞꠣꠈꠟꠣ ꠀꠍꠝꠣꠘ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠖꠥꠁ ꠘꠝ꠆ꠛꠞ ꠖꠤꠘ।
9 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠍꠝꠣꠘꠞ ꠔꠟꠞ ꠙꠣꠘꠤ ꠄꠇ ꠎꠣꠉꠣꠔ ꠖꠟꠣ ꠅꠃꠇ, ꠀꠞ ꠢꠥꠇꠘꠣ ꠎꠣꠉꠣ ꠖꠦꠈꠣ ꠎꠣꠃꠇ। ꠀꠞ ꠅꠃꠟꠣ ꠅꠁꠟ। 10 ꠀꠟ꠆ꠟꠣꠄ ꠢꠥꠇꠘꠣ ꠎꠣꠉꠣꠞ ꠘꠣꠝ ꠞꠣꠈꠟꠣ ꠎꠝꠤꠘ ꠀꠞ ꠎꠝꠣꠁꠟ ꠙꠣꠘꠤꠞ ꠘꠣꠝ ꠖꠞꠤꠀ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ। 11 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠎꠝꠤꠘꠅ ꠊꠣꠡ ꠚꠟꠃꠇ; ꠀꠞ ꠢꠇꠟ ꠎꠣꠔꠞ ꠛꠤꠌꠀꠟꠣ ꠟꠔꠣ-ꠙꠣꠔꠣ ꠉꠣꠍ-ꠉꠣꠍꠣꠟꠤꠞ ꠎꠘꠝ ꠅꠃꠇ। ꠀꠞ ꠎꠝꠤꠘꠞ ꠃꠙꠞꠦ ꠢꠇꠟ ꠎꠣꠔꠞ ꠚꠟꠞ ꠉꠣꠍꠅ ꠅꠃꠇ, ꠄꠞꠣ ꠘꠤꠎꠞ ꠎꠣꠔꠝꠔ ꠚꠟ ꠗꠞꠛ ꠀꠞ ꠚꠟꠞ ꠝꠣꠎꠦ ꠎꠣꠞꠎꠤꠞ ꠛꠤꠌꠅ ꠕꠣꠇꠛ। ꠀꠞ ꠅꠃꠟꠣ ꠅꠁꠟ। 12 ꠎꠝꠤꠘꠅ ꠊꠣꠡ ꠚꠟꠤꠟ, ꠢꠇꠟ ꠎꠣꠔꠞ ꠛꠤꠌꠀꠟꠣ ꠟꠔꠣ-ꠙꠣꠔꠣ ꠉꠣꠍ-ꠛꠤꠞꠤꠇ ꠎꠘꠝꠤꠟ। ꠎꠝꠤꠘꠞ ꠃꠙꠞꠦ ꠢꠇꠟ ꠎꠣꠔꠞ ꠚꠟꠞ ꠉꠣꠍ ꠅꠁꠟ ꠎꠦꠔꠣꠄ ꠎꠣꠞꠎꠤꠞ ꠎꠣꠔꠝꠔ ꠚꠟ ꠗꠞꠦ, ꠢꠤ ꠚꠟꠞ ꠝꠣꠎꠦ ꠎꠣꠞꠎꠤꠞ ꠛꠤꠌꠅ ꠀꠍꠦ। ꠀꠟ꠆ꠟꠣꠄ ꠖꠦꠈꠟꠣ ꠁꠔꠣ ꠜꠣꠟꠣ। 13 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠔꠤꠘ ꠘꠝ꠆ꠛꠞ ꠖꠤꠘ।
14 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠍꠝꠣꠘꠞ ꠝꠣꠎꠦ ꠅꠃꠟꠣ ꠌꠦꠞꠣꠉ ꠅꠇꠟ ꠅꠃꠇ, ꠎꠣꠞꠣ ꠞꠣꠁꠔ ꠕꠣꠇꠤ ꠖꠤꠘꠞꠦ ꠀꠟꠉꠣ ꠇꠞꠦ। ꠁꠔꠣ ꠀꠟꠉꠣ ꠀꠟꠉꠣ ꠖꠤꠘ, ꠛꠍꠞ ꠀꠞ ꠁꠖ-ꠃꠔꠡꠛꠞ ꠘꠤꠡꠣꠘꠣ ꠅꠁꠛ। 15 ꠀꠍꠝꠣꠘ ꠕꠣꠇꠤ ꠔꠣꠞꠣ ꠖꠥꠘꠤꠀꠁꠞ ꠃꠙꠞꠦ ꠚꠞ ꠖꠤꠛ। ꠅꠃꠟꠣꠃ ꠅꠁꠟ। 16 ꠀꠟ꠆ꠟꠣꠄ ꠖꠥꠁꠐꠣ ꠛꠠ ꠌꠦꠞꠣꠉ ꠛꠣꠘꠣꠁꠟꠣ, ꠄꠞꠝꠣꠎꠦ ꠛꠠꠐꠣꠞꠦ ꠖꠤꠘꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠀꠞ ꠢꠥꠞꠥꠐꠣꠞꠦ ꠞꠣꠁꠔꠞ ꠃꠙꠞꠦ। ꠁꠔꠣ ꠍꠣꠠꠣ ꠔꠣꠁꠘ ꠔꠦꠞꠣ ꠅꠇꠟꠅ ꠙꠄꠖꠣ ꠇꠞꠟꠣ। 17 ꠔꠣꠁꠘ ꠄꠞꠣꠞꠦ ꠀꠍꠝꠣꠘꠞ ꠝꠣꠎꠦ ꠛꠅꠀꠁꠟꠣ ꠎꠣꠔꠦ ꠔꠣꠞꠣ ꠖꠥꠘꠤꠀꠁꠔ ꠚꠞ ꠖꠦꠄ। 18 ꠄꠞꠣ ꠖꠤꠘ ꠀꠞ ꠞꠣꠁꠔꠞ ꠃꠙꠞꠦ ꠛꠣꠖꠡꠣꠁ ꠇꠞꠦ, ꠀꠘ꠆ꠖꠣꠁꠞ ꠕꠣꠇꠤ ꠚꠞꠞꠦ ꠀꠟꠉꠣ ꠇꠞꠦ। ꠀꠟ꠆ꠟꠣꠄ ꠖꠦꠈꠟꠣ ꠁꠔꠣ ꠜꠣꠟꠣ। 19 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠌꠣꠁꠞ ꠘꠝ꠆ꠛꠞ ꠖꠤꠘ।
20 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠙꠣꠘꠤꠞ ꠝꠣꠎꠦ ꠎꠣꠘꠖꠣꠞ ꠅꠇꠟ ꠙꠣꠟꠦ ꠙꠣꠟꠦ ꠜꠞꠤ ꠎꠣꠃꠇ, ꠀꠞ ꠖꠥꠘꠤꠀꠁꠞ ꠃꠙꠞꠦ ꠀꠍꠝꠣꠘꠞ ꠝꠣꠎꠦ ꠙꠣꠈꠤꠘ ꠃꠠꠃꠇ। 21 ꠀꠞ ꠀꠟ꠆ꠟꠣꠄ ꠖꠞꠤꠀꠞ ꠛꠤꠞꠣꠐ ꠎꠣꠘꠖꠣꠞ ꠅꠇꠟ, ꠀꠞ ꠙꠣꠘꠤꠞ ꠝꠣꠎꠦ ꠙꠣꠟ ꠛꠣꠘ꠆ꠖꠤꠀ ꠊꠥꠞꠞꠣ ꠢꠇꠟ ꠎꠣꠔꠞ ꠎꠣꠘꠖꠣꠞ ꠙꠄꠖꠣ ꠇꠞꠟꠣ, ꠀꠞ ꠢꠇꠟ ꠎꠣꠔꠞ ꠙꠣꠈꠤꠅ ꠙꠄꠖꠣ ꠇꠞꠟꠣ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ। 22 ꠔꠣꠁꠘ ꠔꠣꠞꠣ ꠢꠇꠟꠞꠦ ꠅꠃ ꠟꠣꠈꠣꠘ ꠛꠞꠇꠔ ꠘꠣꠎꠤꠟ ꠇꠞꠟꠣ, ꠔꠥꠝꠞꠣ ꠚꠟꠀꠟꠣ ꠅꠁꠀ ꠛꠣꠠꠅ ꠀꠞ ꠖꠞꠤꠀꠞ ꠙꠣꠘꠤ ꠜꠞꠤ ꠎꠣꠅ, ꠖꠥꠘꠤꠀꠁꠞ ꠝꠣꠎꠦ ꠙꠣꠈꠤ ꠅꠇꠟꠅ ꠛꠣꠠꠃꠇ। 23 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠙꠣꠌ ꠘꠝ꠆ꠛꠞ ꠖꠤꠘ।
24 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠝꠣꠐꠤ ꠕꠣꠇꠤ ꠅꠃꠟꠣ ꠎꠣꠘꠖꠣꠞ ꠅꠃꠇ ꠎꠣꠞꠣꠞ ꠘꠤꠎꠞ ꠎꠣꠔ ꠅꠇꠟꠞꠦ ꠛꠣꠠꠣꠁꠛ, ꠄꠞꠣꠞ ꠝꠣꠎꠦ ꠙꠣꠟꠣ ꠢꠦꠝꠣꠘ, ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ ꠀꠞ ꠎꠋꠟꠤ ꠎꠣꠘꠥꠀꠞ ꠅꠇꠟꠅ। ꠅꠃꠟꠣꠃ ꠅꠁꠟ। 25 ꠀꠟ꠆ꠟꠣꠄ ꠖꠥꠘꠤꠀꠁꠞ ꠝꠣꠎꠦ ꠢꠇꠟ ꠎꠣꠔꠞ ꠎꠋꠟꠤ ꠎꠣꠘꠥꠀꠞ, ꠙꠣꠟꠣ ꠢꠦꠝꠣꠘ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠛꠣꠘꠣꠁꠟꠣ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ।
26 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠅ ꠀꠝꠞꠣꠞ ꠍꠥꠞꠔꠦ ꠀꠝꠞꠣꠞ ꠟꠉꠦ ꠝꠤꠟ ꠞꠣꠈꠤꠀ ꠝꠣꠘꠥꠡ ꠛꠣꠘꠣꠁ। ꠔꠣꠞꠣ ꠖꠞꠤꠀꠞ ꠝꠣꠍ, ꠀꠍꠝꠣꠘꠞ ꠙꠣꠈꠤ, ꠎꠣꠘꠥꠀꠞ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠀꠞ ꠀꠡ꠆ꠔꠣ ꠖꠥꠘꠤꠀꠁꠞ ꠃꠙꠞꠦ ꠛꠣꠖꠡꠣꠁ ꠇꠞꠃꠇ।
27 ꠔꠣꠁꠘ ꠔꠣꠘ ꠘꠤꠎꠞ ꠍꠥꠞꠔꠦ ꠝꠣꠘꠥꠡ ꠙꠄꠖꠣ ꠇꠞꠟꠣ, ꠄꠇ꠆ꠇꠦꠞꠦ ꠘꠤꠎꠞ ꠝꠔ ꠇꠞꠤ ꠙꠄꠖꠣ ꠇꠞꠟꠣ, ꠙꠄꠖꠣ ꠇꠞꠟꠣ ꠛꠦꠐꠣ ꠀꠞ ꠛꠦꠐꠤ। 28 ꠀꠞ ꠔꠣꠞꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠤꠀ ꠇꠁꠟꠣ, ꠔꠥꠝꠤꠔꠣꠁꠘ ꠚꠟꠀꠟꠣ ꠅꠁꠀ ꠛꠣꠠꠤꠀ ꠖꠥꠘꠤꠀꠁ ꠜꠞꠤ ꠎꠣꠅ। ꠖꠥꠘꠤꠀꠁꠞꠦ ꠡꠣꠡꠘ ꠇꠞꠅ, ꠀꠞ ꠖꠞꠤꠀꠞ ꠝꠣꠍ, ꠀꠍꠝꠣꠘꠞ ꠙꠣꠈꠤ, ꠝꠣꠐꠤꠞ ꠃꠙꠞꠦ ꠌꠟꠞꠣ ꠢꠇꠟ ꠎꠣꠘꠖꠣꠞꠞ ꠃꠙꠞꠦ ꠛꠣꠖꠡꠣꠁ ꠇꠞꠅ। 29 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠢꠥꠘꠅ, ꠖꠥꠘꠤꠀꠞ ꠃꠙꠞꠞ ꠢꠇꠟ ꠎꠣꠔꠞ ꠛꠤꠌꠀꠟꠣ ꠉꠣꠍ-ꠛꠤꠞꠤꠇ, ꠀꠞ ꠢꠇꠟ ꠎꠣꠔꠞ ꠚꠟꠞ ꠉꠣꠍ ꠎꠣꠞꠣꠞ ꠘꠤꠎꠞ ꠎꠣꠔꠝꠔ ꠚꠟ ꠗꠞꠦ ꠎꠣꠞ ꠚꠟꠞ ꠝꠣꠎꠦ ꠔꠣꠞꠣꠞ ꠘꠤꠎꠞ ꠛꠤꠌ ꠀꠍꠦ, ꠁꠔꠣ ꠢꠇꠟꠔꠣ ꠀꠝꠤ ꠔꠥꠝꠞꠣꠞ ꠈꠣꠘꠤꠞ ꠟꠣꠉꠤ ꠖꠤꠟꠣꠝ। 30 ꠖꠥꠘꠤꠀꠞ ꠙꠞꠔꠦꠇ ꠎꠣꠘꠥꠀꠞ, ꠀꠍꠝꠣꠘꠞ ꠙꠣꠈꠤꠘ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠁꠔꠣ ꠢꠇ꠆ꠇꠟ ꠎꠣꠘꠖꠣꠞꠞ ꠈꠣꠘꠤꠞ ꠟꠣꠉꠤ ꠀꠝꠤ ꠢꠇꠟ ꠟꠔꠣ-ꠙꠣꠔꠣ ꠀꠞ ꠊꠣꠡ ꠖꠤꠟꠣꠝ। ꠅꠃꠟꠣꠃ ꠅꠁꠟ। 31 ꠀꠟ꠆ꠟꠣꠄ ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣ ꠖꠦꠈꠟꠣ, ꠁꠔꠣ ꠢꠇꠟꠔꠣꠃ ꠈꠥꠛ ꠜꠣꠟꠣ ꠅꠁꠍꠦ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ। ꠁꠇꠐꠣ ꠅꠁꠟ ꠍꠄ ꠘꠝ꠆ꠛꠞ ꠖꠤꠘ।