1 ꠁꠛ꠆ꠞꠣꠢꠤꠝ ꠁ ꠡꠝꠄ ꠈꠥꠛ ꠝꠥꠞꠛ꠆ꠛꠤ ꠀꠞ ꠎꠣꠅꠀꠉꠤꠞ ꠙꠕꠤ ꠅꠁꠉꠦꠍꠂꠘ। ꠝꠣꠛꠥꠖꠦ ꠔꠣꠘꠞꠦ ꠢꠇꠟꠛꠣꠄ ꠕꠘꠦ ꠛꠞꠇꠔ ꠘꠣꠎꠤꠟ ꠇꠞꠍꠟꠣ। 2 ꠀꠞ ꠔꠣꠘ ꠈꠣꠍ ꠉꠥꠟꠣꠝ, ꠛꠣꠠꠤꠞ ꠙꠥꠞꠣꠘ ꠎꠦ ꠉꠥꠟꠣꠝꠞ ꠃꠙꠞꠦ ꠔꠣꠘ ꠢꠇꠟꠔꠣꠞ ꠜꠣꠞ ꠖꠦꠅꠀ ꠀꠍꠤꠟ ꠔꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠀꠝꠣꠞ ꠃꠞꠣꠔꠞ ꠔꠟꠦ ꠢꠣꠞꠣꠅ। 3 ꠀꠝꠤ ꠔꠥꠝꠣꠞꠦ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠇꠍꠝ ꠇꠞꠣꠁꠀꠞ, ꠀꠝꠤ ꠎꠦ ꠇꠦꠘꠣꠘꠤ ꠅꠇꠟꠞ ꠝꠣꠎꠦ ꠕꠣꠇꠤꠀꠞ, ꠔꠣꠞꠣꠞ ꠇꠥꠘꠥ ꠙꠥꠠꠤꠞꠦ ꠀꠝꠣꠞ ꠙꠥꠀꠞ ꠛꠃ ꠛꠣꠘꠣꠁꠀ ꠔꠥꠝꠤ ꠀꠘꠤꠅ ꠘꠣ। 4 ꠔꠥꠝꠤ ꠀꠝꠣꠞ ꠖꠦꠡꠅ ꠉꠤꠀ, ꠀꠝꠣꠞ ꠙꠥꠀ ꠁꠍꠢꠣꠇꠞ ꠟꠣꠉꠤ ꠀꠝꠣꠞ ꠈꠦꠡ-ꠇꠥꠐꠥꠝꠞ ꠝꠣꠎ ꠕꠣꠇꠤ ꠄꠉꠥ ꠇꠁꠘꠣ ꠌꠣꠁꠀ ꠀꠘꠛꠣꠄ।” 5 ꠅꠃ ꠢꠤ ꠉꠥꠟꠣꠝꠦ ꠔꠣꠘꠞꠦ ꠇꠁꠟꠣ, “ꠎꠥꠖꠤ ꠇꠥꠘꠥ ꠙꠥꠠꠤꠄ ꠀꠝꠣꠞ ꠟꠉꠦ ꠁ ꠖꠦꠡꠅ ꠀꠁꠔꠦ ꠞꠣꠎꠤ ꠘꠣ ꠅꠁꠘ, ꠔꠣꠁꠟꠦ ꠎꠦ ꠖꠦꠡ ꠍꠣꠠꠤꠀ ꠀꠙꠘꠦ ꠀꠁꠍꠂꠘ, ꠀꠙꠘꠣꠞ ꠙꠥꠀꠞꠦ ꠀꠝꠤ ꠢꠘꠅ ꠟꠁꠀ ꠎꠣꠁꠔꠣꠝ ꠘꠤ?” 6 ꠔꠣꠁꠘ ꠇꠁꠟꠣ, “ꠈꠛꠞꠖꠣꠞ! ꠔꠥꠝꠤ ꠀꠝꠣꠞ ꠙꠥꠀꠞꠦ ꠇꠥꠘꠥꠝꠘ꠆ꠔꠦꠃ ꠢꠤꠘꠅ ꠟꠁꠀ ꠎꠣꠁꠅ ꠘꠣ। 7 ꠎꠦ ꠀꠍꠝꠣꠘꠤ ꠀꠟ꠆ꠟꠣ ꠝꠣꠛꠥꠖꠦ ꠀꠝꠣꠞꠦ, ꠀꠝꠣꠞ ꠛꠣꠚꠞ ꠛꠣꠠꠤ ꠀꠞ ꠎꠘꠝ ꠝꠣꠐꠤ ꠕꠘꠦ ꠛꠣꠞ ꠇꠞꠤꠀ ꠀꠘꠍꠂꠘ, ꠔꠣꠁꠘ ꠀꠝꠣꠞ ꠟꠉꠦ ꠛꠣꠔ-ꠍꠅꠀꠟ ꠇꠞꠤ ꠇꠍꠝ ꠇꠞꠤꠀ ꠇꠁꠍꠂꠘ, ꠁ ꠖꠦꠡꠈꠣꠘ ꠔꠣꠁꠘ ꠀꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠤꠛꠣ। ꠔꠣꠁꠘ ꠔꠥꠝꠣꠞ ꠀꠉꠦꠃ ꠔꠣꠘ ꠚꠤꠞꠤꠡ꠆ꠔꠣꠞꠦ ꠢꠘꠅ ꠙꠣꠑꠣꠁꠛꠣ, ꠎꠣꠔꠦ ꠀꠝꠣꠞ ꠙꠥꠀꠞ ꠟꠣꠉꠤ ꠔꠥꠝꠤ ꠢꠘ ꠕꠘꠦ ꠄꠉꠥ ꠇꠁꠘꠣ ꠀꠘꠔꠣꠄ ꠙꠣꠞ। 8 ꠎꠥꠖꠤ ꠇꠥꠘꠥ ꠙꠥꠠꠤꠄ ꠔꠥꠝꠣꠞ ꠟꠉꠦ ꠀꠁꠔꠦ ꠞꠣꠎꠤ ꠘꠣ ꠅꠄ, ꠔꠦ ꠀꠝꠣꠞ ꠁ ꠇꠍꠝ ꠕꠣꠇꠤ ꠔꠥꠝꠤ ꠈꠣꠟꠣꠍ; ꠔꠣ-ꠅ ꠀꠝꠣꠞ ꠙꠥꠀꠞꠦ ꠔꠥꠝꠤ ꠇꠥꠘꠥ ꠟꠣꠈꠣꠘꠃ ꠢꠤꠘꠅ ꠟꠁꠀ ꠎꠣꠁꠅ ꠘꠣ।” 9 ꠅꠃ ꠢꠤ ꠉꠥꠟꠣꠝꠦ ꠔꠣꠘ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠃꠞꠣꠔꠞ ꠔꠟꠦ ꠀꠔ ꠢꠣꠞꠣꠁꠀ ꠅꠃꠟꠣ ꠇꠍꠝ ꠇꠞꠟꠣ।

10 ꠛꠣꠖꠦ ꠢꠃ ꠉꠥꠟꠣꠝꠦ ꠔꠣꠘ ꠝꠥꠘꠤꠛꠞ ꠃꠐꠞ ꠙꠣꠟ ꠕꠣꠇꠤ ꠖꠡꠐꠣ ꠃꠐ ꠟꠁꠟꠣ। ꠀꠞ ꠝꠥꠘꠤꠛꠞ ꠜꠣꠟꠣ ꠜꠣꠟꠣ ꠎꠤꠘꠤꠡ ꠅꠇꠟ ꠟꠁꠀ, ꠅꠞꠣꠝ-ꠘꠢꠞꠄꠁꠝ ꠖꠦꠡꠞ ꠎꠦꠘꠅ ꠘꠣꠢꠥꠞ ꠕꠣꠇꠔꠣ ꠢꠛꠣꠄꠖꠤ ꠞꠅꠀꠘꠣ ꠅꠁꠟꠣ। 11 ꠀꠞ ꠢꠣꠁꠘ꠆ꠎꠣ ꠛꠣꠟꠣ ꠎꠦꠛꠟꠣ ꠛꠦꠐꠤꠘ꠆ꠔꠦ ꠙꠣꠘꠤ ꠀꠘꠣꠔ ꠛꠣꠞ ꠅꠁꠘ, ꠅꠃ ꠡꠝꠄ ꠢꠤ ꠉꠥꠟꠣꠝꠦ ꠐꠣꠃꠘꠞ ꠛꠣꠞꠦ ꠄꠇ ꠇꠥꠀꠞ ꠇꠣꠍꠣꠔ ꠔꠣꠘ ꠃꠐ ꠅꠇꠟꠞꠦ ꠕꠁꠟꠣ। 12 ꠕꠁꠀ ꠅꠃ ꠖꠥꠀ ꠇꠞꠟꠣ, “ꠅ ꠝꠣꠛꠥꠖ, ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠀꠞꠎ ꠇꠞꠤ, ꠀꠁꠎ ꠀꠝꠣꠞ ꠍꠣꠝꠘꠦ ꠇꠣꠝꠤꠀꠛꠤ ꠎꠣꠁꠞ ꠇꠞꠅ, ꠀꠞ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞꠦ ꠝꠦꠢꠦꠞꠛꠣꠘꠤ ꠇꠞꠅ। 13 ꠖꠦꠈꠅ, ꠁ ꠐꠣꠃꠘꠞ ꠙꠥꠠꠤꠘ꠆ꠔꠦ ꠙꠣꠘꠤ ꠘꠦꠅꠀꠔ ꠀꠁꠞꠣ ꠀꠞ ꠀꠝꠤ ꠁꠘꠅ ꠇꠥꠀꠞ ꠇꠣꠍꠣꠔ ꠃꠛꠣꠁ ꠞꠁꠍꠤ। 14 ꠔꠦ ꠅꠃ ꠙꠥꠠꠤꠘ꠆ꠔꠞ ꠝꠣꠎꠦ ꠀꠝꠤ ꠎꠣꠞꠦ ꠇꠁꠝꠥ, ‘ꠀꠙꠘꠣꠞ ꠈꠂꠟꠣ ꠟꠣꠝꠣꠁꠀ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ’, ꠄꠞ ꠎꠥꠀꠙꠦ ꠎꠥꠖꠤ ꠢꠃ ꠙꠥꠠꠤꠄ ꠇꠂꠘ, ‘ꠀꠙꠘꠦ ꠙꠣꠘꠤ ꠈꠣꠃꠇ꠆ꠇꠣ ꠀꠞ ꠀꠙꠘꠣꠞ ꠃꠐ ꠅꠇꠟꠞꠦꠅ ꠀꠝꠤ ꠙꠣꠘꠤ ꠈꠣꠅꠀꠁꠝꠥ’ ꠔꠣꠁꠟꠦ ꠅꠃ ꠙꠥꠠꠤꠃ ꠎꠣꠘꠥ ꠔꠥꠝꠣꠞ ꠉꠥꠟꠣꠝ ꠁꠍꠢꠣꠇꠞ ꠟꠣꠉꠤ ꠔꠥꠝꠣꠞ ꠙꠍꠘ꠆ꠖꠞ ꠙꠥꠠꠤ ꠅꠁꠘ। ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠤ ꠀꠝꠣꠞ ꠝꠥꠘꠤꠛꠞꠦ ꠝꠦꠢꠦꠞꠛꠣꠘꠤ ꠇꠞꠟꠣꠄ।”

15 ꠔꠣꠘ ꠖꠥꠀ ꠡꠦꠡ ꠘꠣ ꠅꠁꠔꠦꠃ ꠛꠕꠥꠄꠟꠞ ꠙꠥꠠꠤ ꠞꠦꠛꠦꠇꠣꠄ ꠇꠣꠈꠅ ꠈꠂꠟꠣ ꠟꠁꠀ ꠐꠣꠃꠘ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠅꠃ ꠛꠕꠥꠄꠟ ꠅꠁꠟꠣ ꠁꠛ꠆ꠞꠣꠢꠤꠝꠞ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠙꠥꠀ। 16 ꠞꠦꠛꠦꠇꠣ ꠀꠍꠟꠣ ꠈꠥꠛ ꠡꠥꠘ꠆ꠖꠞꠤ, ꠀꠛꠤꠀꠔꠤ, ꠡꠔꠤ ꠘꠣꠞꠤ। ꠔꠣꠁꠘ ꠇꠥꠀ ꠕꠣꠇꠤ ꠈꠂꠟꠣ ꠜꠞꠤꠀ ꠎꠦꠛꠟꠣ ꠃꠑꠤꠀ ꠀꠁꠞꠣ, 17 ꠅꠃ ꠡꠝꠄꠃ ꠁꠛ꠆ꠞꠣꠢꠤꠝꠞ ꠉꠥꠟꠣꠝꠦ ꠖꠃꠠꠣꠁꠀ ꠔꠣꠘ ꠉꠦꠍꠦ ꠉꠤꠀ ꠇꠁꠟꠣ, “ꠖꠄꠀ ꠇꠞꠤ ꠀꠙꠘꠣꠞ ꠈꠂꠟꠣ ꠕꠣꠇꠤ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।” 18 ꠞꠦꠛꠦꠇꠣꠄ ꠇꠁꠟꠣ, “ꠢꠥꠎꠥꠞ, ꠙꠣꠘꠤ ꠈꠣꠃꠇ꠆ꠇꠣ।” ꠅꠃ ꠇꠕꠣ ꠇꠁꠀꠃ ꠔꠣꠁꠘ ꠎꠟꠖꠤ ꠇꠞꠤ ꠈꠂꠟꠣꠐꠣ ꠇꠣꠈꠅ ꠕꠘꠦ ꠀꠔꠅ ꠀꠘꠤꠀ ꠙꠣꠘꠤ ꠈꠣꠁꠔꠦ ꠖꠤꠟꠣ। 19 ꠙꠣꠘꠤ ꠈꠣꠅꠀꠁꠛꠣꠞ ꠛꠣꠖꠦ ꠞꠦꠛꠦꠇꠣꠄ ꠔꠣꠘꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞ ꠃꠐ ꠅꠇꠟꠞꠦꠅ ꠔꠣꠞꠣꠞ ꠙꠤꠀꠍ ꠝꠤꠐꠣꠁꠀ ꠙꠣꠘꠤ ꠈꠣꠅꠀꠁꠝꠥ, ꠔꠣꠞꠣ ꠙꠦꠐ ꠜꠞꠤꠀ ꠙꠣꠘꠤ ꠈꠣꠁꠛꠣ।” 20 ꠇꠁꠀꠃ ꠔꠣꠁꠘ ꠎꠟꠖꠤ ꠇꠞꠤ ꠙꠣꠘꠤꠞ ꠉꠣꠝꠟꠣꠔ ꠈꠂꠟꠣꠞ ꠙꠣꠘꠤ ꠓꠣꠟꠤꠀ ꠢꠤꠞꠛꠣꠞ ꠖꠃꠠꠣꠁꠀ ꠇꠥꠀꠞ ꠉꠦꠍꠦ ꠉꠦꠟꠣ। ꠀꠞ ꠢꠇꠟ ꠃꠐꠞꠦ ꠙꠣꠘꠤ ꠔꠥꠟꠤ ꠖꠤꠟꠣ। 21 ꠝꠣꠛꠥꠖꠦ ꠔꠣꠘ ꠁ ꠍꠚꠞ ꠇꠣꠝꠤꠀꠛ ꠇꠞꠍꠂꠘ ꠇꠤ ꠘꠣ ꠁꠐꠣ ꠎꠣꠘꠣꠞ ꠟꠣꠉꠤ ꠢꠤ ꠉꠥꠟꠣꠝꠦ ꠘꠤꠞꠛꠦ ꠞꠦꠛꠦꠇꠣꠞ ꠛꠣꠄ ꠌꠣꠁ ꠞꠁꠟꠣ।

22 ꠃꠐ ꠅꠇꠟꠦ ꠙꠣꠘꠤ ꠈꠣꠁꠀ ꠢꠣꠞꠟꠦ, ꠔꠣꠁꠘ ꠀꠗꠣ ꠔꠟꠣꠞ ꠄꠇꠐꠣ ꠡꠥꠘꠣꠞ ꠘꠣꠇꠞ ꠘꠕ ꠀꠞ ꠖꠥꠁ ꠀꠔꠅ ꠖꠡ ꠔꠟꠣꠞ ꠖꠥꠁꠐꠣ ꠡꠥꠘꠣꠞ ꠛꠣꠟꠣ ꠞꠦꠛꠦꠇꠣꠞꠦ ꠖꠤꠀ ꠎꠤꠇꠣꠁꠟꠣ, 23 “ꠀꠙꠘꠣꠞ ꠛꠣꠛꠣꠞ ꠘꠣꠝ ꠇꠤꠔꠣ? ꠀꠙꠘꠦ ꠇꠃꠇ꠆ꠇꠣ ꠌꠣꠁꠘ, ꠀꠙꠘꠣꠞ ꠛꠣꠚꠞ ꠛꠣꠠꠤꠔ ꠀꠝꠞꠣꠞ ꠞꠣꠁꠔ ꠕꠣꠇꠣꠞ ꠎꠣꠉꠣ ꠅꠁꠛ ꠘꠤ?” 24 ꠞꠦꠛꠦꠇꠣꠄ ꠇꠁꠟꠣ, “ꠀꠝꠣꠞ ꠛꠣꠛꠣꠞ ꠘꠣꠝ ꠛꠕꠥꠄꠟ। ꠖꠣꠖꠣꠞ ꠘꠣꠝ ꠘꠣꠢꠥꠞ ꠀꠞ ꠖꠣꠖꠤꠞ ꠘꠣꠝ ꠝꠤꠟꠇꠣ। 25 ꠔꠦ ꠀꠙꠘꠣꠞ ꠃꠐꠞ ꠈꠣꠘꠤꠞ ꠟꠣꠉꠤ ꠀꠝꠞꠣꠞ ꠛꠣꠠꠤꠔ ꠛꠃꠔ ꠈꠦꠞ-ꠜꠥꠡꠤ ꠀꠍꠦ ꠀꠞ ꠞꠁꠛꠣꠞ ꠎꠣꠉꠣꠅ ꠀꠍꠦ।” 26 ꠅꠃ ꠢꠤ ꠉꠥꠟꠣꠝꠦ ꠝꠣꠛꠥꠖꠞ ꠍꠁꠎꠖꠣ ꠇꠞꠤꠀ ꠇꠁꠟꠣ, 27 “ꠢꠇ꠆ꠇꠟ ꠙ꠆ꠞꠡꠋꠡꠣ ꠝꠣꠛꠥꠖꠞ, ꠎꠦꠁꠘ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ। ꠔꠣꠁꠘ ꠀꠝꠣꠞ ꠝꠣꠟꠤꠇꠞꠦ ꠔꠣꠘ ꠖꠦꠅꠀ ꠅꠀꠖꠣ ꠞꠣꠈꠔꠦ ꠀꠞ ꠁꠝꠣꠘꠖꠣꠞꠤ ꠖꠦꠈꠣꠁꠔꠦ ꠚꠣꠃꠞꠤꠍꠂꠘ ꠘꠣ। ꠔꠣꠁꠘ ꠀꠝꠣꠞꠦꠅ ꠙꠕ ꠌꠤꠘꠣꠁꠀ ꠀꠝꠣꠞ ꠝꠥꠘꠤꠛꠞ ꠇꠥꠐꠝꠞ ꠛꠣꠠꠤꠔ ꠟꠁꠀ ꠀꠁꠍꠂꠘ।”

28 ꠞꠦꠛꠦꠇꠣꠄ ꠖꠃꠠꠣꠁꠀ ꠉꠤꠀ ꠔꠣꠘ ꠝꠣʼꠞ ꠛꠣꠠꠤꠞ ꠢꠇꠟꠞꠦ ꠁꠔꠣ ꠎꠣꠘꠣꠁꠟꠣ। 29 ꠞꠦꠛꠦꠇꠣꠞ ꠄꠇ ꠜꠣꠁꠞ ꠘꠣꠝ ꠀꠍꠤꠟ ꠟꠣꠛꠘ। ꠅꠃ ꠟꠣꠛꠘꠦ ꠖꠃꠠꠣꠁꠀ ꠇꠥꠀꠞ ꠇꠣꠍꠣꠔ ꠀꠁꠟꠣ ꠄꠘꠞꠦ ꠖꠦꠈꠔꠣ ꠇꠞꠤ। 30 ꠛꠘꠤꠞ ꠀꠔꠞ ꠛꠣꠟꠣ ꠀꠞ ꠘꠣꠇꠞ ꠘꠕ ꠖꠦꠈꠤꠀ, ꠀꠞ ꠢꠤ ꠝꠣꠘꠡꠦ ꠎꠦꠔꠣ ꠇꠁꠍꠦ ꠁꠔꠣ ꠢꠥꠘꠤꠀ, ꠔꠣꠁꠘ ꠀꠁꠀ ꠖꠦꠈꠟꠣ, ꠝꠣꠘꠥꠡꠐꠣ ꠇꠥꠀꠞ ꠇꠣꠘ꠆ꠖꠣꠔ ꠔꠣꠞ ꠃꠐꠞ ꠉꠦꠍꠦ ꠃꠛꠣꠁ ꠞꠁꠍꠦ। 31 ꠟꠣꠛꠘꠦ ꠔꠣꠘꠞꠦ ꠇꠁꠟꠣ, “ꠅ ꠝꠣꠛꠥꠖꠞ ꠞꠢꠝꠔꠞ ꠝꠣꠘꠥꠡ, ꠀꠃꠇ꠆ꠇꠣ। ꠛꠣꠞꠦ ꠃꠛꠣꠁ ꠞꠁꠍꠂꠘ ꠇꠦꠘꠦ? ꠀꠝꠤ ꠀꠙꠘꠣꠞꠣꠞ ꠟꠣꠉꠤ ꠊꠞ, ꠀꠞ ꠃꠐꠞ ꠟꠣꠉꠤ ꠎꠣꠉꠣ ꠎꠥꠁꠔ ꠇꠞꠤꠀ ꠀꠁꠍꠤ।” 32 ꠅꠃ ꠢꠤ ꠉꠥꠟꠣꠝꠦ ꠔꠣꠞꠣꠞ ꠛꠣꠠꠤꠔ ꠉꠤꠀ ꠃꠐ ꠅꠇꠟꠞ ꠉꠣꠁꠐ ꠟꠣꠝꠣꠁꠔꠦꠃ, ꠟꠣꠛꠘꠦ ꠈꠦꠞ ꠀꠞ ꠜꠥꠡꠤ ꠀꠘꠤꠀ ꠖꠤꠟꠣ। ꠔꠣꠘꠦ ꠀꠞ ꠔꠣꠘ ꠟꠉꠞ ꠢꠇꠟꠞꠦ ꠀꠔ-ꠙꠣꠅ ꠗꠅꠀꠞ ꠙꠣꠘꠤꠅ ꠖꠤꠟꠣ। 33 ꠛꠣꠖꠦ ꠔꠣꠘ ꠍꠣꠝꠘꠦ ꠈꠣꠘꠤ ꠖꠦꠅꠀ ꠅꠁꠟ, ꠔꠦꠃ ꠔꠣꠁꠘ ꠇꠁꠟꠣ, “ꠀꠝꠤ ꠇꠤꠔꠣꠞ ꠟꠣꠉꠤ ꠁꠘꠅ ꠀꠁꠍꠤ, ꠁꠔꠣ ꠘꠣ ꠢꠥꠘꠣꠁꠀ ꠈꠣꠘꠤ ꠈꠣꠁꠔꠣꠝ ꠘꠣꠄ।” ꠟꠣꠛꠘꠦ ꠇꠁꠟꠣ, “ꠔꠦ ꠇꠁꠟꠣꠃꠇ꠆ꠇꠣ।”

34 ꠅꠃ ꠔꠣꠁꠘ ꠇꠁꠟꠣ, “ꠀꠝꠤ ꠁꠛ꠆ꠞꠣꠢꠤꠝꠞ ꠉꠥꠟꠣꠝ। 35 ꠀꠝꠣꠞ ꠝꠣꠟꠤꠇꠞꠦ ꠝꠣꠛꠥꠖꠦ ꠛꠃꠔ ꠛꠞꠇꠔ ꠘꠣꠎꠤꠟ ꠇꠞꠍꠂꠘ, ꠀꠁꠎ ꠔꠣꠁꠘ ꠛꠃꠔ ꠗꠘꠤ-ꠝꠣꠘꠤ। ꠝꠣꠛꠥꠖꠦ ꠔꠣꠘꠞꠦ ꠛꠃꠔ ꠉꠞꠥ-ꠝꠦꠠꠣ, ꠃꠐ-ꠉꠣꠗꠣ, ꠡꠥꠘꠣ-ꠞꠥꠙꠣ, ꠀꠞ ꠛꠣꠘ꠆ꠖꠤ-ꠉꠥꠟꠣꠝ ꠖꠤꠍꠂꠘ। 36 ꠔꠣꠘ ꠛꠤꠛꠤ ꠍꠣꠄꠞꠣꠞ ꠝꠥꠞꠛ꠆ꠛꠤ ꠛꠄꠅꠡꠅ ꠝꠥꠘꠤꠛꠞ ꠄꠇꠎꠘ ꠙꠥꠀ ꠅꠁꠍꠂꠘ, ꠀꠞ ꠅꠃ ꠙꠥꠀꠞꠦꠃ ꠔꠣꠁꠘ, ꠔꠣꠘ ꠢꠇꠟꠔꠣ ꠖꠤꠟꠣꠁꠍꠂꠘ। 37 ꠔꠣꠁꠘ ꠀꠝꠣꠞꠦ ꠇꠍꠝ ꠇꠞꠣꠁꠀ ꠇꠁꠍꠂꠘ ꠎꠦꠘ, ꠔꠣꠁꠘ ꠎꠦ ꠖꠦꠡꠅ ꠛꠡꠔ ꠇꠞꠞꠣ, ꠢꠤ ꠇꠦꠘꠣꠘ ꠖꠦꠡꠞ ꠇꠥꠘꠥ ꠙꠥꠠꠤꠞꠦ ꠎꠣꠔꠦ ꠔꠣꠘ ꠙꠥꠀꠞ ꠛꠃ ꠘꠣ ꠛꠣꠘꠣꠁ। 38 ꠄꠞ ꠛꠖꠟꠣ ꠔꠣꠘ ꠛꠣꠚꠞ ꠀꠞ ꠔꠣꠘ ꠈꠣꠘ꠆ꠖꠣꠘꠞ ꠛꠣꠠꠤꠔ ꠉꠤꠀ ꠔꠣꠘ ꠙꠥꠀꠞ ꠟꠣꠉꠤ ꠄꠇꠎꠘ ꠇꠁꠘꠣ ꠌꠣꠁꠀ ꠘꠦꠁ। 39 ꠅꠃ ꠀꠝꠤ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣꠝ, ‘ꠎꠥꠖꠤ ꠇꠥꠘꠥ ꠙꠥꠠꠤ ꠀꠝꠣꠞ ꠟꠉꠦ ꠀꠁꠔꠦ ꠞꠣꠎꠤ ꠘꠣ ꠅꠁꠘ?’ 40 ꠔꠣꠁꠘ ꠇꠁꠟꠣ, ‘ꠝꠣꠛꠥꠖ, ꠎꠣꠘꠞꠦ ꠀꠝꠤ ꠈꠦꠎꠝꠔ ꠇꠞꠤ, ꠔꠣꠁꠘꠃ ꠔꠣꠘ ꠚꠤꠞꠤꠡ꠆ꠔꠣꠞꠦ ꠙꠣꠑꠣꠁ ꠖꠤꠛꠣ, ꠎꠣꠔꠦ ꠔꠥꠝꠣꠞ ꠍꠚꠞ ꠇꠣꠝꠤꠀꠛ ꠅꠄ। ꠀꠞ ꠔꠥꠝꠤ ꠀꠝꠣꠞ ꠘꠤꠎꠞ ꠛꠋꠡ ꠀꠞ ꠀꠝꠣꠞ ꠛꠣꠚꠞ ꠈꠣꠘ꠆ꠖꠣꠘ ꠕꠘꠦ, ꠄꠉꠥ ꠙꠥꠠꠤꠞꠦ ꠀꠝꠣꠞ ꠙꠥꠀꠞ ꠟꠣꠉꠤ ꠌꠣꠁꠀ ꠀꠘꠛꠣꠄ। 41 ꠔꠣꠞꠣꠞ ꠢꠤꠘꠅ ꠉꠦꠟꠦ ꠎꠥꠖꠤ ꠔꠣꠞꠣ ꠇꠥꠘꠥ ꠙꠥꠠꠤꠞꠦ ꠘꠣ ꠖꠦꠁꠘ, ꠔꠣꠁꠟꠦ ꠔꠥꠝꠤ ꠀꠝꠣꠞ ꠁ ꠇꠍꠝ ꠕꠣꠇꠤ ꠈꠣꠟꠣꠍ ꠙꠣꠁꠛꠣꠄ।’

42 “ꠅꠃ ꠀꠁꠎ ꠀꠝꠤ ꠇꠥꠀꠞ ꠉꠦꠍꠦ ꠀꠁꠀ ꠖꠥꠀ ꠇꠞꠟꠣꠝ, ‘ꠅ ꠝꠣꠛꠥꠖ, ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠔꠥꠝꠤ ꠎꠥꠖꠤ ꠀꠝꠣꠞ ꠁ ꠍꠚꠞ ꠇꠣꠝꠤꠀꠛ ꠇꠞꠅ ꠔꠣꠁꠟꠦ, 43 ꠖꠦꠈꠅ, ꠀꠝꠤ ꠅꠃ ꠜꠞꠣ ꠇꠥꠀꠞ ꠉꠦꠍꠦ ꠃꠛꠣꠁ ꠞꠁꠍꠤ, ꠀꠞ ꠇꠥꠘꠥ ꠙꠥꠠꠤꠄ ꠅꠘꠅ ꠙꠣꠘꠤ ꠘꠦꠅꠀꠔ ꠀꠁꠟꠦ ꠀꠝꠤ ꠇꠁꠝꠥ, ꠈꠂꠟꠣ ꠕꠣꠇꠤ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠅ। 44 ꠀꠞ ꠎꠥꠖꠤ ꠔꠣꠁ ꠇꠄ, ‘ꠔꠥꠝꠤꠅ ꠙꠣꠘꠤ ꠈꠣꠅ ꠀꠞ ꠔꠥꠝꠣꠞ ꠃꠐ ꠅꠇꠟꠞꠦꠅ ꠀꠝꠤ ꠙꠣꠘꠤ ꠔꠥꠟꠤꠀ ꠖꠤꠝꠥ’, ꠔꠣꠁꠟꠦ ꠅꠃ ꠙꠥꠠꠤꠃ ꠎꠣꠘꠥ ꠀꠝꠣꠞ ꠝꠥꠘꠤꠛꠞ ꠙꠥꠀꠞ ꠟꠣꠉꠤ ꠔꠥꠝꠣꠞ ꠙꠍꠘ꠆ꠖ ꠇꠞꠣ ꠙꠥꠠꠤ ꠅꠄ।’

45 “ꠀꠝꠣꠞ ꠖꠥꠀ ꠡꠦꠡ ꠘꠣ ꠅꠁꠔꠦꠃ ꠖꠦꠈꠤ, ꠞꠦꠛꠦꠇꠣꠄ ꠈꠂꠟꠣ ꠇꠣꠈꠅ ꠟꠁꠀ ꠇꠥꠀꠔ ꠀꠁꠞꠣ ꠙꠣꠘꠤ ꠔꠥꠟꠔꠣ। ꠙꠣꠘꠤ ꠔꠥꠟꠣꠞ ꠛꠣꠖꠦ ꠀꠝꠤ ꠇꠁꠟꠣꠝ, ‘ꠖꠄꠀ ꠇꠞꠤꠀ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।’ 46 ꠔꠣꠁꠘ ꠎꠟꠖꠤ ꠇꠞꠤ ꠇꠣꠈꠅ ꠕꠘꠦ ꠈꠂꠟꠣ ꠟꠣꠝꠣꠁꠀ ꠀꠝꠣꠞꠦ ꠇꠁꠟꠣ, ‘ꠅꠃ ꠘꠦꠁꠘ, ꠙꠣꠘꠤ ꠈꠣꠁꠘ। ꠀꠝꠤ ꠀꠙꠘꠣꠞ ꠃꠐ ꠅꠇꠟꠞꠦꠅ ꠙꠣꠘꠤ ꠈꠣꠅꠀꠁꠝꠥ।’ ꠔꠦꠃ ꠀꠝꠤ ꠙꠣꠘꠤ ꠈꠣꠁꠟꠣꠝ, ꠀꠞ ꠔꠣꠁꠘ ꠀꠝꠣꠞ ꠃꠐ ꠅꠇꠟꠞꠦꠅ ꠙꠣꠘꠤ ꠈꠣꠅꠀꠁꠟꠣ। 47 ꠛꠣꠖꠦ ꠀꠝꠤ ꠔꠣꠘꠦ ꠎꠤꠇꠣꠁꠟꠣꠝ, ‘ꠀꠙꠘꠦ ꠇꠣꠞ ꠙꠥꠠꠤ?’ ꠔꠣꠁꠘ ꠇꠁꠟꠣ, ‘ꠀꠝꠤ ꠛꠕꠥꠄꠟꠞ ꠙꠥꠠꠤ, ꠀꠝꠣꠞ ꠖꠣꠖꠣꠞ ꠘꠣꠝ ꠘꠣꠢꠥꠞ ꠀꠞ ꠖꠣꠖꠤꠞ ꠘꠣꠝ ꠝꠤꠟꠇꠣ।’ ꠅꠃ ꠀꠝꠤ ꠔꠣꠘ ꠘꠣꠇꠅ ꠘꠕ ꠀꠞ ꠀꠔꠅ ꠛꠣꠟꠣ ꠚꠤꠘ꠆ꠖꠣꠁꠀ ꠖꠤꠟꠣꠝ। 48 ꠛꠣꠖꠦ ꠀꠝꠤ ꠝꠣꠛꠥꠖꠞ ꠍꠁꠎꠖꠣ ꠇꠞꠟꠣꠝ। ꠀꠞ ꠎꠦꠁꠘ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠢꠃ ꠝꠣꠛꠥꠖꠞ ꠡꠥꠇꠥꠞ ꠀꠖꠣꠄ ꠇꠞꠟꠣꠝ, ꠔꠣꠁꠘꠃ ꠀꠝꠣꠞꠦ ꠑꠤꠇ ꠙꠕꠦ ꠌꠣꠟꠣꠁꠀ ꠀꠘꠍꠂꠘ ꠎꠣꠔꠦ ꠀꠝꠤ ꠀꠝꠣꠞ ꠝꠥꠘꠤꠛꠞ ꠜꠣꠔꠤꠎꠤꠞꠦ, ꠔꠣꠘ ꠙꠥꠀꠞ ꠟꠣꠉꠤ ꠔꠥꠇꠣꠁꠀ ꠙꠣꠁ। 49 ꠔꠦꠃ ꠅꠈꠘ ꠀꠙꠘꠣꠞꠣ ꠀꠝꠣꠞ ꠝꠥꠘꠤꠛꠞ ꠛꠣꠄ ꠖꠞꠖ ꠀꠞ ꠁꠘꠍꠣꠚ ꠇꠞꠛꠣ ꠘꠤ, ꠇꠃꠇ꠆ꠇꠣ। ꠎꠥꠖꠤ ꠘꠣ ꠇꠞꠂꠘ ꠔꠣ-ꠅ ꠇꠃꠇ꠆ꠇꠣ, ꠎꠣꠔꠦ ꠀꠝꠤ ꠒꠣꠁꠘꠦ-ꠛꠣꠃꠄ ꠎꠣꠁꠔꠣꠝ ꠙꠣꠞꠤ।”

50 ꠅꠃ ꠟꠣꠛꠘ ꠀꠞ ꠛꠕꠥꠄꠟꠦ ꠇꠁꠟꠣ, “ꠊꠐꠘꠣ ꠔ ꠝꠣꠛꠥꠖ ꠕꠣꠇꠤꠃ ꠅꠁꠍꠦ। ꠅꠈꠘ ꠀꠝꠞꠣꠞ ꠜꠣꠟꠣ-ꠛꠥꠞꠣ ꠝꠣꠔꠣꠞ ꠇꠥꠘ꠆ꠔꠣꠃ ꠘꠣꠄ। 51 ꠅꠃ ꠖꠦꠈꠃꠇ꠆ꠇꠣ, ꠞꠦꠛꠦꠇꠣ ꠔ ꠅꠘꠅ ꠀꠍꠦ, ꠔꠦ ꠝꠣꠛꠥꠖꠞ ꠢꠥꠇꠥꠝ ꠝꠔ ꠀꠙꠘꠣꠞ ꠝꠥꠘꠤꠛꠞ ꠙꠥꠀꠞ ꠛꠃ ꠛꠣꠘꠣꠁꠛꠣꠞ ꠟꠣꠉꠤ ꠄꠞꠦ ꠟꠁꠀ ꠎꠣꠁꠔꠣ ꠙꠣꠞꠛꠣ।”

52 ꠁ ꠝꠣꠔ ꠢꠥꠘꠤꠀ ꠁꠛ꠆ꠞꠣꠢꠤꠝꠞ ꠉꠥꠟꠣꠝꠦ ꠝꠣꠛꠥꠖꠞ ꠍꠁꠎꠖꠣ ꠇꠞꠟꠣ। 53 ꠄꠞꠛꠣꠖꠦ ꠔꠣꠁꠘ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠇꠣꠙꠠ-ꠌꠥꠙꠠ ꠛꠣꠞ ꠇꠞꠤꠀ ꠞꠦꠛꠦꠇꠣꠞꠦ ꠖꠤꠟꠣ, ꠄꠞ ꠟꠉꠦ ꠞꠦꠛꠦꠇꠣꠞ ꠝꠣ-ꠜꠣꠁꠞꠦꠅ ꠛꠃꠔ ꠖꠣꠝꠤ ꠖꠣꠝꠤ ꠃꠙꠢꠣꠞ ꠖꠤꠟꠣ। 54 ꠛꠣꠖꠦ ꠔꠣꠁꠘ ꠀꠞ ꠔꠣꠘ ꠟꠉꠞ ꠢꠇꠟꠦ ꠈꠣꠅꠀ-ꠖꠣꠅꠀ ꠡꠦꠡ ꠇꠞꠤꠀ ꠢꠈꠣꠘꠅꠃ ꠞꠣꠁꠔ ꠇꠣꠐꠣꠁꠟꠣ। ꠛꠤꠀꠘꠦ ꠊꠥꠝ ꠕꠣꠇꠤ ꠃꠑꠤꠀ ꠔꠣꠁꠘ ꠇꠁꠟꠣ, “ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ।” 55 ꠔꠦꠃ ꠞꠦꠛꠦꠇꠣꠞ ꠝꠣ ꠀꠞ ꠜꠣꠁꠄ ꠇꠁꠟꠣ, “ꠙꠥꠠꠤꠉꠥ ꠀꠞꠅ ꠖꠡꠈꠣꠘ ꠖꠤꠘ ꠀꠝꠞꠣꠞ ꠉꠦꠍꠦ ꠕꠣꠇꠃꠇ, ꠛꠣꠖꠦ ꠎꠣꠁꠛꠘꠦ।” 56 ꠅꠃ ꠢꠤ ꠉꠥꠟꠣꠝꠦ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠎꠦꠛꠟꠣ ꠀꠝꠣꠞ ꠁ ꠍꠚꠞ ꠇꠣꠝꠤꠀꠛ ꠇꠞꠍꠂꠘ, ꠔꠣꠁꠟꠦ ꠀꠝꠣꠞꠦ ꠖꠦꠞꠤ ꠘꠣ ꠇꠞꠣꠁꠀ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠎꠣꠁꠉꠤ।” 57 ꠄꠞꠣ ꠇꠁꠟꠣ, “ꠀꠝꠞꠣ ꠔꠣꠁꠟꠦ ꠙꠥꠠꠤꠞꠦ ꠍꠣꠝꠘꠦ ꠀꠘꠤꠀ ꠎꠤꠇꠣꠁꠟꠣꠁ।” 58 ꠀꠞ ꠞꠦꠛꠦꠇꠣꠞꠦ ꠒꠣꠇꠤꠀ ꠀꠘꠤꠀ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠔꠣꠘ ꠟꠉꠦ ꠎꠣꠁꠛꠣꠄ ꠘꠤ ꠉ?” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠎꠣꠁꠝꠥꠘꠦ।” 59 ꠅꠃ ꠔꠣꠞꠣ ꠁꠛ꠆ꠞꠣꠢꠤꠝꠞ ꠉꠥꠟꠣꠝ ꠀꠞ ꠔꠣꠘ ꠟꠉꠞ ꠝꠣꠘꠡꠞ ꠟꠉꠦ ꠔꠣꠞꠣꠞ ꠛꠁꠘ ꠀꠞ ꠔꠣꠘ ꠛꠣꠘ꠆ꠖꠤ ꠛꠦꠐꠤꠞꠦ ꠛꠤꠖꠣꠄ ꠖꠤꠟꠣ। 60 ꠀꠞ ꠞꠦꠛꠦꠇꠣꠞꠦ ꠖꠥꠀ ꠇꠞꠤꠀ ꠇꠁꠟꠣ, “ꠛꠁꠘ ꠉ, ꠔꠥꠝꠤ ꠟꠣꠈ ꠟꠣꠈ ꠀꠅꠟꠣꠖꠞ ꠝꠣ ꠅꠅ। ꠔꠥꠝꠣꠞ ꠀꠅꠟꠣꠖꠦ ꠖꠥꠡꠝꠘ ꠅꠇꠟꠞꠦ ꠊꠣꠁꠟ ꠇꠞꠃꠇ।” 61 ꠞꠦꠛꠦꠇꠣ ꠀꠞ ꠔꠣꠘ ꠛꠣꠘ꠆ꠖꠤ ꠅꠇꠟꠦ ꠔꠂꠀꠞ ꠅꠁꠀ ꠃꠐꠞ ꠃꠙꠞꠦ ꠌꠠꠤꠀ, ꠁꠛ꠆ꠞꠣꠢꠤꠝꠞ ꠉꠥꠟꠣꠝꠞ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣ। ꠅꠃ ꠟꠣꠈꠣꠘ ꠢꠃ ꠉꠥꠟꠣꠝꠦ ꠞꠦꠛꠦꠇꠣꠞꠦ ꠟꠁꠀ ꠛꠣꠞ ꠅꠁꠟꠣ।

62 ꠁꠍꠢꠣꠇ ꠁ ꠡꠝꠄ ꠘꠦꠉꠦꠜꠅ ꠕꠣꠇꠔꠣ। ꠔꠣꠁꠘ ꠛꠦꠞ-ꠟꠢꠄ-ꠞꠥꠁ ꠘꠣꠝꠞ ꠎꠣꠉꠣ ꠕꠘꠦ ꠚꠤꠞꠔ ꠀꠁꠟꠣ। 63 ꠄꠇꠖꠤꠘ ꠛꠤꠀꠟꠤ ꠛꠣꠟꠣ ꠔꠣꠁꠘ ꠛꠘ꠆ꠖꠦꠖꠤ ꠀꠐꠣꠔ ꠛꠣꠞ ꠅꠁꠟꠣ। ꠀꠈꠔꠣꠃ ꠌꠃꠈ ꠔꠥꠟꠤꠀ ꠌꠣꠁꠀ ꠖꠦꠈꠟꠣ, ꠇꠄꠐꠣ ꠃꠐ ꠀꠁꠞꠣ। 64 ꠞꠦꠛꠦꠇꠣꠄꠅ ꠖꠥꠞꠁ ꠕꠘꠦ ꠁꠍꠢꠣꠇꠞꠦ ꠖꠦꠈꠤꠀꠃ ꠃꠐꠞ ꠃꠙꠞ ꠕꠣꠇꠤ ꠟꠣꠝꠤ ꠉꠦꠟꠣ। 65 ꠀꠞ ꠢꠃ ꠉꠥꠟꠣꠝꠞꠦ ꠎꠤꠇꠣꠁꠟꠣ, “ꠅꠃ ꠎꠦꠁꠘ ꠛꠘ꠆ꠖꠞ ꠝꠣꠎꠦꠖꠤ ꠀꠝꠞꠣꠞ ꠛꠣꠄ ꠀꠁꠞꠣ, ꠄꠁꠘ ꠇꠦ?” ꠉꠥꠟꠣꠝꠦ ꠇꠁꠟꠣ, “ꠄꠁꠘ ꠔ ꠀꠝꠣꠞ ꠝꠥꠘꠤꠛ।” ꠅꠃ ꠞꠦꠛꠦꠇꠣꠄ ꠛꠥꠞꠇꠣꠞ ꠙꠞ꠆ꠖꠣ ꠟꠣꠝꠣꠁ ꠖꠤꠟꠣ। 66 ꠀꠞ ꠢꠤ ꠉꠥꠟꠣꠝꠦ ꠎꠦꠔꠣ ꠎꠦꠔꠣ ꠇꠞꠤꠀ ꠀꠁꠍꠂꠘ, ꠢꠇꠟꠔꠣ ꠁꠍꠢꠣꠇꠞꠦ ꠎꠣꠘꠣꠁꠟꠣ। 67 ꠁꠍꠢꠣꠇꠦ ꠔꠣꠘ ꠝꠣ ꠛꠤꠛꠤ ꠍꠣꠄꠞꠣꠞ ꠔꠣꠝ꠆ꠛꠥꠔ ꠞꠦꠛꠦꠇꠣꠞꠦ ꠟꠁꠀ ꠉꠤꠀ ꠔꠣꠘꠦ ꠛꠤꠀ ꠇꠞꠟꠣ। ꠀꠞ ꠔꠣꠘꠞꠦ ꠝꠣꠄꠀ ꠇꠞꠟꠣ। ꠔꠣꠘ ꠝꠣʼꠞ ꠝꠃꠔꠞ ꠛꠣꠖꠦ, ꠞꠦꠛꠦꠇꠣꠞ ꠝꠣꠄꠀꠄꠃ ꠔꠣꠘ ꠎꠣꠘꠅ ꠡꠣꠘ꠆ꠔꠤ ꠙꠣꠁꠍꠟꠣ।