1 ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠙꠄꠟꠣ ꠃꠍꠤꠟ꠆ꠟꠣꠞ ꠝꠣꠎꠦ, ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠘꠣꠘꠣꠘ ꠘꠝꠥꠘꠣꠞ ꠘꠤꠅꠝ-ꠇꠣꠘꠥꠘ ꠀꠍꠤꠟ, ꠀꠞ ꠖꠥꠘꠤꠀꠔ ꠄꠛꠣꠖꠔ ꠇꠞꠣꠞ ꠟꠣꠉꠤ ꠄꠇꠈꠣꠘ ꠄꠛꠣꠖꠔ ꠈꠣꠘꠣꠞ ꠇꠕꠣꠅ ꠟꠦꠈꠣ ꠀꠍꠤꠟ। 2 ꠢꠃ ꠘꠤꠅꠝ ꠝꠣꠚꠤꠇ ꠄꠇꠈꠣꠘ ꠄꠛꠣꠖꠔ-ꠔꠣꠝ꠆ꠛꠥ ꠛꠣꠘꠣꠁꠟ ꠅꠁꠍꠤꠟ, ꠢꠤ ꠄꠛꠣꠖꠔ-ꠔꠣꠝ꠆ꠛꠥꠞ ꠙꠄꠟꠣ ꠇꠥꠑꠣꠔ ꠀꠍꠤꠟ ꠌꠦꠞꠣꠉ ꠖꠣꠘꠤ, ꠙꠛꠤꠔ꠆ꠞ ꠞꠥꠐꠤ ꠀꠞ ꠁꠔꠣ ꠞꠣꠈꠣꠞ ꠐꠦꠛꠥꠟ। ꠁ ꠙꠄꠟꠣ ꠇꠥꠑꠣꠞ ꠘꠣꠝ ꠀꠍꠤꠟ ꠙꠣꠇ ꠎꠣꠉꠣ। 3 ꠖꠥꠍꠞꠣ ꠙꠞ꠆ꠖꠣꠞ ꠜꠤꠔꠞꠦ ꠀꠞꠇ ꠇꠥꠑꠣ ꠀꠍꠤꠟ, ꠢꠤ ꠖꠥꠍꠞꠣ ꠇꠥꠑꠣꠞ ꠘꠣꠝ ꠀꠍꠤꠟ ꠈꠣꠍ ꠙꠣꠇ ꠎꠣꠉꠣ ꠛꠣ ꠢꠦꠞꠦꠝ ꠡꠞꠤꠚ। 4 ꠁ ꠇꠥꠑꠣꠞ ꠝꠣꠎꠦ ꠀꠍꠤꠟ, ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤ ꠐꠦꠛꠥꠟ, ꠡꠥꠘꠣꠖꠤ ꠟꠦꠙꠣ ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇꠞ ꠜꠤꠔꠞꠦ ꠀꠍꠤꠟ ꠡꠥꠘꠣꠞ ꠛꠂꠀꠝꠅ ꠜꠞꠣ ꠇꠥꠖꠞꠔꠤ ꠈꠣꠘꠤ ꠝꠣꠘ꠆ꠘꠣ, ꠁꠝꠣꠝ ꠢꠣꠞꠥꠘꠞ ꠟꠣꠑꠤ, ꠅꠃ ꠟꠣꠑꠤꠔ ꠇꠥꠖꠞꠔꠤ ꠚꠥꠟ ꠚꠥꠐꠤꠍꠤꠟ। ꠀꠞꠅ ꠀꠍꠤꠟ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣ ꠟꠦꠈꠣ ꠢꠃ ꠖꠥꠁꠅ ꠡꠣꠢꠣꠖꠔ ꠙꠣꠔ꠆ꠔꠞ। 5 ꠢꠤ ꠡꠘ꠆ꠖꠥꠇꠞ ꠃꠙꠞꠦ ꠀꠍꠤꠟ ꠀꠟ꠆ꠟꠣꠞ ꠎꠣꠟꠣꠟꠤ ꠡꠥꠘꠣꠞ ꠖꠥꠁ ꠇꠣꠞꠥꠛꠤ, ꠅꠔꠣꠞ ꠒꠣꠈꠘꠣꠉꠥꠁꠘ ꠢꠃ ꠡꠘ꠆ꠖꠥꠇꠞ ꠓꠣꠇꠘꠤꠞ ꠃꠙꠞꠦ ꠝꠤꠟꠤꠀ ꠖꠦꠅꠀ ꠀꠍꠤꠟ, ꠀꠞ ꠅꠘꠅꠃ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠔ। ꠁꠔꠣ ꠢꠇ꠆ꠇꠟꠔꠣꠞ ꠈꠥꠐꠤꠘꠣꠐꠤ ꠛꠄꠀꠘ ꠇꠞꠣ ꠅꠈꠘ ꠎꠞꠥꠞ ꠘꠣꠄ।

6 ꠁ ꠢꠇ꠆ꠇꠟꠔꠣ ꠎꠥꠁꠔ ꠇꠞꠣꠞ ꠛꠣꠖꠦ ꠁꠝꠣꠝ ꠅꠇꠟꠦ ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠢꠣꠝꠦꠡꠣ ꠙꠄꠟꠣ ꠇꠥꠑꠣꠞ ꠜꠤꠔꠞꠦ ꠢꠣꠝꠣꠁꠔꠣ। 7 ꠅꠁꠟꠦ ꠖꠥꠍꠞꠣ ꠇꠥꠑꠣꠔ, ꠝꠣꠘꠤ ꠢꠦꠞꠦꠝ ꠡꠞꠤꠚꠅ ꠈꠣꠟꠤ ꠙꠞꠗꠣꠘ ꠁꠝꠣꠝ ꠍꠣꠛꠦ ꠛꠍꠞꠅ ꠄꠇꠛꠣꠞꠃ ꠢꠣꠝꠣꠁꠔꠣ ꠙꠣꠞꠔꠣ, ꠔꠣꠁꠘꠅ ꠇꠥꠞꠛꠣꠘꠤꠞ ꠟꠃ ꠛꠤꠘꠣ ꠢꠤꠘꠅ ꠢꠣꠝꠣꠁꠔꠣ ꠙꠣꠞꠔꠣ ꠘꠣ। ꠔꠣꠘ ꠘꠤꠎꠞ ꠉꠥꠘꠣ ꠀꠞ ꠔꠣꠘ ꠇꠃꠝꠞ ꠘꠣ-ꠎꠣꠘꠣ ꠢꠇꠟ ꠉꠥꠘꠣꠞ ꠝꠣꠚꠤꠞ ꠟꠣꠉꠤ, ꠇꠥꠞꠛꠣꠘꠤꠞ ꠟꠃ ꠟꠁꠀ ꠢꠘꠅ ꠢꠣꠝꠣꠁꠔꠣ। 8 ꠔꠦ ꠙꠣꠇ ꠞꠥꠢꠦ ꠖꠦꠈꠣꠁꠀ ꠖꠤꠞꠣ, ꠁ ꠖꠥꠘꠤꠀꠞ ꠙꠄꠟꠣ ꠄꠛꠣꠖꠔ ꠈꠣꠘꠣ ꠎꠔꠖꠤꠘ ꠇꠣꠁꠝ ꠀꠍꠦ, ꠅꠔꠖꠤꠘ ꠢꠤ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠘꠤꠞ ꠙꠕ ꠈꠥꠟꠣ ꠅꠁꠔ ꠘꠣꠄ। 9 ꠢꠤ ꠄꠛꠣꠖꠔ ꠈꠣꠘꠣ ꠅꠁꠟ ꠁ ꠎꠝꠣꠘꠣꠞ ꠟꠣꠉꠤ ꠄꠇ ꠘꠤꠡꠣꠘꠣ, ꠁ ꠘꠤꠡꠣꠘꠣꠄ ꠀꠝꠞꠣꠞꠦ ꠛꠣꠔꠣꠁ ꠖꠦꠄ, ꠅꠃ ꠟꠣꠈꠣꠘ ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣꠄ ꠄꠛꠣꠖꠔꠇꠣꠞꠤꠞ ꠛꠤꠛꠦꠇꠞ ꠈꠥꠔꠈꠥꠔꠤ ꠜꠣꠛ ꠖꠥꠞ ꠇꠞꠔ ꠙꠣꠞꠦ ꠘꠣ। 10 ꠁꠔꠣ ꠔ ꠈꠣꠟꠤ ꠈꠣꠅꠀ-ꠖꠣꠅꠀ, ꠅꠎꠥ-ꠉꠥꠍꠟꠞ ꠛꠦꠙꠣꠞ, ꠢꠇ꠆ꠇꠟꠔꠣꠃ ꠈꠣꠟꠤ ꠎꠣꠁꠞꠣ ꠡꠞꠤꠅꠔ, ꠖꠤꠟꠞ ꠇꠥꠘ꠆ꠔꠣ ꠘꠣꠄ। ꠁ ꠡꠞꠤꠅꠔ ꠇꠣꠁꠝ ꠀꠍꠤꠟ, ꠀꠞꠅ ꠜꠣꠟꠣ ꠇꠥꠘꠥ ꠃꠍꠤꠟ꠆ꠟꠣ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ।

11 ꠅꠁꠟꠦ ꠅꠈꠘ ꠎꠔ ꠜꠣꠟꠣ ꠜꠣꠟꠣ ꠛꠦꠙꠣꠞ ꠀꠁꠍꠦ, ꠀꠟ-ꠝꠍꠤ ꠔ ꠅꠃ ꠘꠄꠀ ꠔꠞꠤꠇꠣꠞ ꠙꠞꠗꠣꠘ ꠁꠝꠣꠝ ꠅꠁꠍꠂꠘ। ꠔꠣꠁꠘ ꠀꠞꠅ ꠁꠎ꠆ꠎꠔꠤ ꠀꠞꠅ ꠛꠦꠡꠤ ꠇꠣꠝꠤꠟ ꠄꠛꠣꠖꠔ ꠈꠣꠘꠣ ꠅꠁꠀ ꠀꠁꠍꠂꠘ। ꠁ ꠄꠛꠣꠖꠔ ꠈꠣꠘꠣ ꠇꠥꠘꠥ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠘꠣꠄ, ꠁꠈꠣꠘ ꠁ ꠖꠥꠘꠤꠀꠞ ꠖꠥꠘꠤꠀꠛꠤ ꠇꠥꠘ꠆ꠔꠣ ꠘꠣꠄ। 12 ꠇꠥꠘꠥ ꠉꠞꠥ ꠛꠣ ꠍꠣꠉꠟꠞ ꠟꠃ ꠀꠔꠅ ꠟꠁꠀ ꠔꠣꠁꠘ ꠢꠤꠘꠅ ꠢꠣꠝꠣꠁꠍꠂꠘ ꠘꠣ। ꠈꠣꠟꠤ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤꠞ ꠟꠃ ꠖꠤꠀ ꠄꠇꠛꠣꠞꠃ ꠢꠤ ꠢꠦꠞꠦꠝ ꠡꠞꠤꠚꠈꠣꠘꠅ ꠢꠣꠝꠣꠁꠍꠂꠘ, ꠢꠣꠝꠣꠁꠀ ꠀꠝꠞꠣꠞꠦ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠈꠣꠟꠣꠍ ꠇꠞꠍꠂꠘ। 13 ꠀꠉꠦ ꠎꠦꠞꠣ ꠘꠣꠙꠣꠇ ꠛꠘꠤꠎꠤꠔ, ꠔꠣꠞꠣꠞ ꠟꠣꠉꠤ ꠉꠞꠥ ꠛꠣ ꠍꠣꠉꠟꠞ ꠟꠃ ꠀꠞ ꠒꠦꠇꠤ-ꠉꠞꠥꠞ ꠎꠣꠟꠣꠁꠟ ꠍꠣꠟꠤ ꠍꠤꠐꠣꠁꠀ ꠙꠣꠇ-ꠍꠣꠚ ꠇꠞꠣ ꠅꠁꠔ, ꠅꠁꠟꠦ ꠁꠔꠣꠄ ꠔ ꠄꠞꠣꠞ ꠡꠞꠤꠟꠞ ꠛꠣꠁꠞꠉꠣꠟꠣ ꠈꠣꠟꠤ ꠙꠣꠇ-ꠍꠣꠚ ꠅꠁꠔ। 14 ꠔꠦ ꠎꠦꠁꠘ ꠢꠞ-ꠢꠣꠝꠦꠡꠣꠇꠥꠞ ꠎꠤꠘ꠆ꠖꠣ ꠞꠥꠢꠥꠞ ꠝꠣꠎꠖꠤꠀ, ꠛꠦ-ꠉꠥꠘꠣ ꠇꠥꠞꠛꠣꠘꠤ ꠅꠁꠀ ꠔꠣꠘ ꠘꠤꠎꠞ ꠎꠣꠘꠞꠦ ꠀꠟ꠆ꠟꠣꠞ ꠘꠣꠝꠦ ꠡꠙꠤꠀ ꠖꠤꠟꠣꠁꠍꠂꠘ, ꠢꠤ ꠀꠟ-ꠝꠍꠤꠞ ꠟꠃꠄ ꠀꠝꠞꠣꠞ ꠖꠤꠟꠞꠦ ꠘꠣꠙꠣꠇꠤ ꠇꠣꠝ-ꠇꠣꠎ ꠕꠣꠇꠤ ꠀꠞꠅ ꠇꠔ ꠛꠦꠡꠤ ꠙꠞꠤꠝꠣꠘꠦ ꠙꠣꠇ-ꠍꠣꠚ ꠇꠞꠛ, ꠎꠣꠔꠦ ꠀꠝꠞꠣ ꠎꠤꠘ꠆ꠖꠣ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠔꠣꠝ ꠙꠣꠞꠤ।

15 ꠀꠞ ꠙꠄꠟꠣ ꠃꠍꠤꠟ꠆ꠟꠣ ꠌꠣꠟꠥ ꠕꠣꠇꠔꠦ ꠝꠣꠘꠡꠦ ꠎꠦꠔꠣ ꠉꠥꠘꠣ ꠇꠞꠍꠟꠣ, ꠅꠃ ꠉꠥꠘꠣꠞ ꠀꠔ ꠕꠣꠇꠤ ꠈꠣꠟꠣꠍ ꠇꠞꠣꠞ ꠘꠤꠅꠔꠦ, ꠇꠚꠞꠣ ꠢꠤꠡꠣꠛꠦ ꠀꠟ-ꠝꠍꠤꠞ ꠝꠃꠔ ꠅꠁꠍꠦ। ꠀꠟ꠆ꠟꠣꠄ ꠎꠦꠞꠣꠞꠦ ꠖꠣꠅꠔꠖꠤ ꠀꠘꠤꠀ ꠌꠤꠞꠇꠣꠟꠤꠘ ꠝꠃꠞꠡꠤ ꠡꠝ꠆ꠙꠖ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠀꠟ-ꠝꠍꠤ ꠔ ꠄꠞꠣꠞ ꠟꠣꠉꠤꠃ ꠘꠄꠀ ꠃꠍꠤꠟ꠆ꠟꠣꠞ ꠎꠤꠝ꠆ꠝꠣꠖꠣꠞ ꠅꠁꠍꠂꠘ। ꠅꠃ ꠝꠃꠞꠡꠤ ꠡꠝ꠆ꠙꠖ ꠅꠈꠘ ꠝꠣꠘꠡꠦ ꠙꠣꠁꠛꠣꠞ ꠡꠥꠎꠥꠉ ꠅꠁꠍꠦ, 16 ꠇꠣꠞꠘ ꠖꠥꠘꠤꠀꠛꠤ ꠘꠤꠅꠝꠦ ꠝꠃꠞꠡꠤ ꠡꠝ꠆ꠙꠖꠞ ꠇꠥꠘꠥ ꠅꠍꠤꠅꠔ-ꠘꠣꠝꠣ ꠇꠣꠝꠅ ꠟꠣꠉꠣꠁꠔꠦ ꠅꠁꠟꠦ, ꠙꠄꠟꠣ ꠅꠃ ꠅꠍꠤꠅꠔ ꠇꠞꠞꠣꠞ ꠝꠃꠔ ꠅꠁꠍꠦ ꠇꠞꠤ ꠙꠞꠝꠣꠘ ꠖꠞꠇꠣꠞ ꠅꠄ। 17 ꠝꠣꠘꠡꠞ ꠝꠃꠔꠞ ꠛꠣꠖꠦ ꠔꠣꠞ ꠅꠍꠤꠅꠔ-ꠘꠣꠝꠣ ꠇꠣꠝꠅ ꠟꠣꠉꠦ, ꠅꠍꠤꠅꠔ ꠇꠞꠞꠣ ꠎꠤꠘ꠆ꠖꠣ ꠕꠣꠇꠔꠦ ꠁꠔꠣ ꠇꠥꠘꠥ ꠇꠣꠝꠅ ꠟꠣꠉꠦ ꠘꠣ।

18 ꠑꠤꠇ ꠅꠃ ꠟꠣꠈꠣꠘꠃ, ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠙꠄꠟꠣ ꠃꠍꠤꠟ꠆ꠟꠣꠅ, ꠝꠃꠔꠞ ꠟꠃ ꠍꠣꠠꠣ ꠇꠣꠝꠅ ꠟꠣꠉꠣꠁꠟ ꠅꠁꠍꠦ ꠘꠣ। 19 ꠢꠎꠞꠔ ꠝꠥꠍꠣꠄ ꠡꠞꠤꠅꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠘꠤꠞ ꠛꠣꠖꠦ, ꠔꠣꠁꠘ ꠛꠤꠍꠣꠟ ꠀꠞ ꠍꠣꠉꠟꠞ ꠟꠃꠞ ꠟꠉꠦ ꠙꠣꠘꠤ ꠝꠤꠡꠣꠁꠟꠣ, ꠛꠣꠖꠦ ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠞꠥꠝꠣ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠖꠤ ꠀꠟ꠆ꠟꠣꠁ ꠡꠞꠤꠅꠔ ꠇꠤꠔꠣꠛꠞ ꠃꠙꠞꠦ, ꠀꠞ ꠢꠇ꠆ꠇꠟ ꠝꠣꠘꠡꠞ ꠉꠔꠞꠅ ꠍꠤꠐꠣꠁꠀ ꠖꠤꠟꠣ। 20 ꠝꠥꠍꠣꠄ ꠇꠁꠟꠣ, “ꠁ ꠟꠃ ꠅꠁꠟ ꠀꠟ꠆ꠟꠣꠁ ꠝꠤꠟꠘꠞ ꠢꠃ ꠃꠍꠤꠟ꠆ꠟꠣꠞ ꠟꠃ, ꠎꠦ ꠃꠍꠤꠟ꠆ꠟꠣ ꠝꠣꠚꠤꠇ ꠌꠟꠣꠞ ꠟꠣꠉꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ।” 21 ꠅꠃ ꠘꠝꠥꠘꠣꠄ ꠔꠣꠁꠘ ꠄꠛꠣꠖꠔ ꠈꠣꠘꠣ ꠀꠞ ꠄꠛꠣꠖꠔꠤ ꠇꠣꠝꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣꠞ ꠃꠙꠞꠦꠅ ꠟꠃ ꠍꠤꠐꠣꠁꠀ ꠖꠤꠟꠣ। 22 ꠀꠍꠟ ꠇꠕꠣ ꠅꠁꠟ, ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠛꠦꠡꠤꠞ ꠜꠣꠉ ꠎꠤꠘꠤꠡꠃ ꠟꠃ ꠖꠤꠀ ꠙꠣꠇ-ꠍꠣꠚ ꠅꠁꠔꠦ ꠅꠄ, ꠇꠥꠞꠛꠣꠘꠤꠞ ꠟꠃ ꠍꠣꠠꠣ ꠇꠥꠘꠥꠝꠘ꠆ꠔꠦꠃ ꠉꠥꠘꠣꠞ ꠝꠣꠚꠤ ꠙꠣꠅꠀ ꠎꠣꠄ ꠘꠣ।

23 ꠎꠦꠔꠣ ꠎꠤꠘꠤꠡ ꠅꠇꠟ ꠈꠣꠟꠤ ꠛꠦꠢꠦꠡ꠆ꠔꠤ ꠎꠤꠘꠤꠡꠞ ꠘꠤꠡꠣꠘꠣ, ꠅꠔꠣꠞꠦ ꠇꠥꠞꠛꠣꠘꠤꠞ ꠙꠡꠥꠞ ꠟꠃꠖꠤ ꠙꠣꠇ-ꠍꠣꠚ ꠇꠞꠣ ꠎꠞꠥꠞ ꠀꠍꠤꠟ, ꠅꠁꠟꠦ ꠎꠦꠔꠣ ꠎꠤꠘꠤꠡ ꠀꠍꠟ ꠛꠦꠢꠦꠡ꠆ꠔꠤ, ꠁꠔꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠔ ꠀꠞꠅ ꠝꠢꠣꠘ ꠇꠥꠞꠛꠣꠘꠤꠞ ꠎꠞꠥꠞ। 24 ꠀꠞ ꠀꠟ-ꠝꠍꠤ ꠔ ꠢꠃ ꠘꠤꠡꠣꠘꠣꠞ ꠎꠤꠘꠤꠡꠞ ꠟꠣꠈꠣꠘ, ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠇꠥꠘꠥ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠍꠂꠘ ꠘꠣ, ꠔꠣꠁꠘ ꠈꠣꠟꠤ ꠀꠍꠟ ꠛꠦꠢꠦꠡ꠆ꠔꠅ ꠢꠣꠝꠣꠁꠍꠂꠘ, ꠎꠣꠔꠦ ꠀꠝꠞꠣꠞ ꠘꠣꠎꠣꠔꠞ ꠟꠣꠉꠤ ꠀꠟ꠆ꠟꠣꠞ ꠍꠣꠝꠘꠦ ꠅꠈꠘ ꠀꠎꠤꠞ ꠅꠁꠔꠣ ꠙꠣꠞꠂꠘ। 25 ꠢꠇꠟ ꠙꠞꠗꠣꠘ ꠁꠝꠣꠝꠦ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠟꠁꠀ ꠎꠦꠟꠣ ꠙꠞꠔꠦꠇ ꠛꠍꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠘꠤ ꠟꠣꠉꠦ, ꠀꠟ-ꠝꠍꠤ ꠔ ꠁ ꠟꠣꠈꠣꠘ ꠛꠣꠞꠦ ꠛꠣꠞꠦ ꠇꠥꠞꠛꠣꠘꠤ ꠅꠀꠞ ꠟꠣꠉꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠤꠍꠂꠘ ꠘꠣ। 26 ꠁ ꠟꠣꠈꠣꠘ ꠅꠁꠟꠦ ꠔ ꠖꠥꠘꠤꠀ ꠙꠄꠖꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠔꠣꠁꠘ ꠛꠣꠞꠦ ꠛꠣꠞꠦ ꠇꠡ꠆ꠐ ꠙꠣꠁꠀ ꠇꠥꠞꠛꠣꠘꠤ ꠅꠁꠔꠦ ꠅꠁꠟ ꠅꠘꠦ। ꠅꠁꠟꠦ ꠔꠣꠁꠘ ꠔ ꠀꠈꠦꠞꠤ ꠎꠝꠣꠘꠣꠔ ꠀꠁꠀ ꠈꠣꠟꠤ ꠄꠇꠛꠣꠞꠃ ꠎꠣꠁꠞ ꠅꠁꠍꠂꠘ, ꠎꠣꠔꠦ ꠘꠤꠎꠞꠦ ꠇꠥꠞꠛꠣꠘꠤ ꠖꠤꠀ ꠔꠣꠝꠣꠝ ꠉꠥꠘꠣꠞ ꠇꠚꠞꠣ ꠅꠁꠘ। 27 ꠀꠟ꠆ꠟꠣꠄ ꠔ ꠑꠤꠇ ꠇꠞꠤꠀ ꠖꠤꠟꠣꠁꠍꠂꠘ, ꠢꠇ꠆ꠇꠟ ꠝꠣꠘꠡꠞ ꠈꠣꠟꠤ ꠄꠇꠛꠣꠞ ꠝꠞꠘ ꠅꠁꠛ, ꠀꠞ ꠝꠞꠘ ꠛꠣꠖꠦ ꠛꠤꠌꠣꠞ। 28 ꠑꠤꠇ ꠅꠃ ꠟꠣꠈꠣꠘ, ꠛꠃꠔ ꠝꠣꠘꠡꠞ ꠉꠥꠘꠣꠞ ꠛꠥꠏꠣ ꠛꠁꠛꠣꠞ ꠟꠣꠉꠤ ꠀꠟ-ꠝꠍꠤꠞꠦꠅ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠦ। ꠔꠣꠁꠘ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠛꠣ, ꠅꠁꠟꠦ ꠉꠥꠘꠣꠞ ꠇꠚꠞꠣ ꠛꠘꠣꠞ ꠟꠣꠉꠤ ꠀꠁꠔꠣ ꠘꠣꠄ। ꠈꠣꠟꠤ ꠎꠦꠞꠣ ꠀꠡꠤꠇ ꠅꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠞ, ꠔꠣꠞꠣꠞꠦ ꠙꠥꠞꠣꠙꠥꠞ ꠘꠣꠎꠣꠔ ꠇꠞꠣꠞ ꠟꠣꠉꠤ ꠖꠥꠍꠞꠣꠛꠣꠞ ꠀꠁꠛꠣ।