ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২০ ꠘꠝ꠆ꠛꠞ ꠍꠤꠙꠣꠞꠣ
ꠁꠀꠇꠥꠛ
ꠙꠞꠤꠌꠤꠔꠤ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠢꠣꠔꠘ ꠜꠣꠁ ꠢꠎꠞꠔ ꠁꠀꠇꠥꠛ (ꠞꠣ꠩)। ꠢꠎꠞꠔ ꠁꠍꠣ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ১৩-১৮ ꠛꠍꠞ ꠛꠣꠖꠦ ꠁꠈꠣꠘ ꠟꠦꠈꠣ ꠅꠁꠍꠦ। ꠅꠃ ꠟꠦꠈꠇ ꠔ ꠛꠘꠤ ꠁꠍꠞꠣꠁꠟ ꠈꠣꠘ꠆ꠖꠣꠘꠞ ꠝꠥꠟ ꠛꠣꠚ ꠢꠃ ꠢꠎꠞꠔ ꠁꠀꠇꠥꠛ (ꠀ꠩) ꠘꠣꠄ। ꠀꠞ ꠢꠎꠞꠔ ꠁꠍꠣꠞ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘꠞ ꠘꠣꠝ ꠀꠍꠤꠟ ꠎꠤꠛꠥꠖꠤꠀꠞ ꠙꠥꠀ ꠁꠀꠇꠥꠛ, ꠄꠁꠘꠅ ꠅꠃ ꠍꠤꠙꠣꠞꠣꠞ ꠟꠦꠈꠇ ꠘꠣꠄ। ꠅꠁꠟꠦ ꠅꠃ ꠟꠦꠈꠇ ꠔ ꠎꠦꠞꠥꠎꠣꠟꠦꠝ ꠎꠝꠣꠔꠞ ꠛꠠ ꠝꠥꠞꠛ꠆ꠛꠤ ꠘꠦꠔꠣ (ꠍꠣꠢꠣꠛꠤ ꠘꠣꠝꠣ ১৫ ꠞꠥꠇꠥ)। ꠔꠣꠁꠘ ꠀꠟ-ꠝꠍꠤꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠣꠞ ꠡꠝꠄ ꠘꠣꠚꠞꠝꠣꠘ ꠁꠢꠥꠖꠤ ꠅꠇꠟꠞ ꠀꠔꠅ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠡꠢꠤꠖ ꠅꠁꠍꠟꠣ।
ꠅꠃ ꠍꠤꠙꠣꠞꠣ ꠔꠤꠟꠣꠅꠔ ꠇꠞꠟꠦ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠦ ꠖꠥꠘꠤꠀꠛꠤ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ ꠇꠥꠘ ꠟꠣꠈꠣꠘ ꠁꠝꠣꠘ-ꠀꠇꠤꠖꠣ, ꠀꠝꠟ-ꠈꠣꠍꠟꠔ ꠇꠞꠣ ꠎꠞꠥꠞꠤ, ꠅꠃ ꠛꠦꠙꠣꠞꠦ ꠎꠣꠘꠣ ꠎꠣꠁꠛ। ꠄꠞ ꠔꠣꠟꠤꠝꠞ ꠟꠉꠦ ꠢꠎꠞꠔ ꠁꠍꠣꠞ “ꠙꠣꠠꠞ ꠃꠙꠞꠞ ꠔꠣꠟꠤꠝ” ꠅꠞ ꠟꠉꠦ ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚꠞ ꠝꠕꠤ ꠍꠤꠙꠣꠞꠣꠞ ৫-৭ ꠞꠥꠇꠥ ꠛꠃꠔ ꠝꠤꠟ ꠀꠍꠦ। ꠅꠃ ꠍꠤꠙꠣꠞꠣꠞ ১ ꠞꠥꠇꠥ ২৬ ꠀꠄꠀꠔꠅ ꠀꠍꠦ, “ꠎꠦ ꠝꠣꠘꠡꠦ ꠘꠤꠎꠞꠦ ꠙꠞꠦꠎꠉꠣꠞ ꠝꠘꠅ ꠇꠞꠦ, ꠅꠁꠟꠦ ꠘꠤꠎꠞ ꠎꠤꠚꠞꠣꠞꠦ ꠡꠣꠝꠟꠣꠄ ꠘꠣ, ꠢꠦ ꠔ ꠔꠣꠞ ꠘꠤꠎꠞꠦ ꠐꠉꠦ, ꠔꠣꠞ ꠢꠇ꠆ꠇꠟ ꠄꠛꠣꠖꠔꠤꠃ ꠝꠤꠍꠣ।”
ꠄꠞꠝꠣꠎꠦ ꠀꠍꠦ,
(ꠇ) ꠀꠍꠟ ꠁꠝꠣꠘ ꠀꠞ ꠀꠝꠟ ১—২ ꠞꠥꠇꠥ
(ꠈ) ꠎꠤꠚꠞꠣ ꠡꠣꠝꠟꠣꠘꠤ ꠀꠞ ꠀꠍꠟ ꠀꠈꠟ-ꠢꠦꠇꠝꠔ ৩ ꠞꠥꠇꠥ
(ꠉ) ꠝꠣꠁꠞ-ꠖꠞꠛꠣꠞ, ꠉꠤꠛꠔ, ꠛꠠꠣꠁ, ꠎꠥꠟꠥꠝ ꠘꠣ ꠇꠞꠣ ৪:১—৫:৬ ꠀꠄꠀꠔ
(ꠊ) ꠍꠛꠞ, ꠝꠥꠘꠣꠎꠣꠔ ꠀꠞ ꠢꠦꠖꠣꠄꠅꠔ ꠇꠞꠣ ৫:৭-২০
1
1 ꠀꠝꠤ ꠁꠀꠇꠥꠛ, ꠀꠟ꠆ꠟꠣ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ, ꠖꠥꠘꠤꠀꠞ ꠘꠣꠘꠣꠘ ꠖꠦꠡꠅ ꠍꠤꠔ꠆ꠞꠣꠁꠟ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞ ꠝꠣꠘꠡꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
ꠁꠝꠣꠘ ꠀꠞ ꠢꠦꠇꠝꠔ
2 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠛꠟꠣ ꠘꠣꠘꠣꠘ ꠎꠣꠔꠞ ꠙꠞꠤꠇ꠆ꠇꠣꠞ ꠝꠣꠎꠦ ꠙꠠꠅ, ꠁ ꠡꠝꠄ ꠁꠔꠣ ꠈꠥꠛ ꠈꠥꠡꠤꠞ ꠛꠦꠙꠣꠞ ꠝꠘꠅ ꠇꠞꠤꠅ। 3 ꠎꠣꠘ ꠔ, ꠁꠝꠣꠘꠞ ꠙꠞꠤꠇ꠆ꠇꠣꠄ ꠔꠥꠝꠞꠣꠞꠦ ꠕꠤꠞ ꠕꠣꠇꠣꠞ ꠈꠦꠝꠔꠣ ꠛꠣꠠꠣꠁ ꠖꠦꠄ। 4 ꠀꠞ ꠁ ꠕꠤꠞ ꠕꠣꠇꠣꠞ ꠈꠦꠝꠔꠣꠞꠦ ꠇꠣꠝꠅ ꠟꠣꠉꠣꠅ, ꠎꠣꠔꠦ ꠔꠥꠝꠞꠣ ꠇꠣꠝꠤꠟ ꠀꠞ ꠈꠣꠐꠤ ꠅꠁꠀ ꠔꠥꠝꠞꠣꠞ ꠇꠥꠘꠥ ꠇꠝꠔꠤ ꠘꠣ ꠞꠄ।
5 ꠔꠥꠝꠞꠣꠞ ꠝꠣꠎꠦ ꠇꠦꠃꠞꠞ ꠎꠥꠖꠤ ꠀꠈꠟꠞ ꠇꠝꠔꠤ ꠕꠣꠇꠦ, ꠔꠦ ꠢꠦ ꠎꠣꠘꠥ ꠀꠟ꠆ꠟꠣꠞ ꠉꠦꠍꠦ ꠌꠣꠄ, ꠔꠦꠃ ꠙꠣꠁꠛ। ꠔꠣꠁꠘ ꠇꠥꠘꠥ ꠛꠦꠎꠣꠞꠤ ꠜꠣꠛ ꠘꠣ ꠀꠘꠤꠀ ꠢꠇ꠆ꠇꠟꠞꠦꠃ ꠛꠦꠢꠤꠡꠣꠛ ꠖꠣꠘ ꠇꠞꠂꠘ, ꠈꠣꠟꠤ ꠀꠔꠦ ꠚꠤꠞꠣꠁꠘ ꠘꠣ। 6 ꠅꠁꠟꠦ ꠢꠦ ꠝꠘꠅ ꠇꠥꠘꠥ ꠡꠘ꠆ꠖꠄ ꠘꠣ ꠞꠣꠈꠤꠀ ꠄꠇꠤꠘ ꠇꠞꠤꠀ ꠌꠣꠁꠔꠦ ꠅꠁꠛ। ꠎꠦ ꠡꠘ꠆ꠖꠄ ꠇꠞꠦ ꠢꠦ ꠔ ꠖꠞꠤꠀꠞ ꠓꠦꠃꠞ ꠟꠣꠈꠣꠘ, ꠔꠣꠞꠦ ꠀꠃꠟꠣ-ꠎꠣꠃꠟꠣ ꠛꠣꠔꠣꠡꠦ ꠃꠠꠣꠁꠀ ꠟꠁꠀ ꠎꠣꠄ। 7 ꠁꠟꠣꠈꠣꠘ ꠝꠣꠘꠡꠦ ꠎꠣꠘꠥ ꠝꠣꠛꠥꠖꠞ ꠉꠦꠍ ꠕꠘꠦ ꠇꠥꠘ꠆ꠔꠣ ꠙꠣꠅꠀꠞ ꠀꠡꠣ ꠘꠣ ꠇꠞꠦ, 8 ꠢꠦ ꠔ ꠖꠥ-ꠖꠤꠟꠣ ꠝꠣꠘꠥꠡ, ꠔꠣꠞ ꠢꠇꠟ ꠇꠣꠝꠅꠃ ꠅꠡꠣꠘ꠆ꠔꠤ।
ꠉꠞꠤꠛ ꠀꠞ ꠗꠘꠤ
9 ꠎꠦ ꠁꠝꠣꠘꠖꠣꠞ ꠜꠣꠁ ꠉꠞꠤꠛ, ꠔꠣꠞꠦ ꠛꠠ ꠛꠣꠘꠣꠁꠍꠂꠘ ꠇꠞꠤꠀ ꠢꠦ ꠘꠤꠎꠞꠦ ꠝꠥꠛꠣꠞꠇ ꠝꠘꠅ ꠇꠞꠃꠇ। 10 ꠀꠞ ꠎꠦ ꠗꠘꠤ, ꠔꠣꠞꠦ ꠢꠥꠞꠥ ꠛꠣꠘꠣꠁꠍꠂꠘ ꠇꠞꠤꠀ ꠢꠦ-ꠅ ꠘꠤꠎꠞꠦ ꠝꠥꠛꠣꠞꠇ ꠝꠘꠅ ꠇꠞꠃꠇ, ꠇꠣꠞꠘ ꠢꠦ ꠊꠣꠡ ꠚꠥꠟꠞ ꠟꠣꠈꠣꠘ ꠏꠞꠤꠀ ꠙꠠꠤꠎꠤꠛ। 11 ꠡꠥꠞꠥꠎ ꠎꠦꠛꠟꠣ ꠃꠑꠦ, ꠁ ꠡꠝꠄ ꠔꠣꠞ ꠔꠦꠎꠦ ꠊꠣꠡ ꠢꠥꠇꠣꠁ ꠎꠣꠄ, ꠚꠥꠟ ꠏꠞꠤꠀ ꠙꠠꠤꠎꠣꠄ, ꠀꠞ ꠔꠣꠞ ꠡꠥꠘ꠆ꠖꠞ ꠘꠡ꠆ꠐ ꠅꠁꠎꠣꠄ। ꠗꠘꠤ ꠝꠣꠘꠥꠡꠅ ꠅꠟꠣꠈꠣꠘ ꠔꠣꠞ ꠛꠦꠡ꠆ꠔꠔꠣꠞ ꠝꠣꠎꠦ ꠏꠞꠤꠀ ꠙꠠꠤꠎꠤꠛ।
12 ꠝꠥꠛꠣꠞꠇ ꠢꠃ ꠎꠘ, ꠎꠦ ꠎꠘ ꠙꠞꠤꠇ꠆ꠇꠣꠞ ꠡꠝꠄ ꠝꠎꠛꠥꠔ ꠞꠄ। ꠙꠞꠤꠇ꠆ꠇꠣꠔ ꠇꠣꠝꠤꠀꠛ ꠅꠁꠟꠦ ꠎꠄꠅꠞ ꠝꠣꠟꠣ ꠢꠤꠡꠣꠛꠦ ꠢꠦ ꠀꠈꠦꠞ ꠙꠣꠁꠛ। ꠅꠃ ꠝꠣꠟꠣ ꠔꠣꠘ ꠀꠡꠤꠇ ꠅꠇꠟꠞꠦ ꠖꠤꠛꠣ ꠇꠞꠤ ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇꠦ ꠅꠀꠖꠣ ꠇꠞꠍꠂꠘ। 13 ꠇꠥꠘꠥ ꠝꠣꠘꠡꠦ ꠉꠥꠘꠣꠞ ꠛꠣꠄ ꠄꠡꠇꠤ ꠅꠁꠀ ꠎꠣꠘꠥ ꠘꠣ ꠇꠄ, ꠀꠟ꠆ꠟꠣꠄ ꠀꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠤꠞꠣ। ꠇꠥꠘꠥ ꠘꠣꠚꠞꠝꠣꠘꠤꠞ ꠙꠕꠦꠃ ꠀꠟ꠆ꠟꠣꠞꠦ ꠐꠣꠘꠣ ꠎꠣꠄ ꠘꠣ, ꠔꠣꠁꠘꠅ ꠇꠦꠃꠞꠞꠦ ꠁ ꠙꠕꠦ ꠘꠦꠁꠘ ꠘꠣ। 14 ꠅꠁꠟꠦ ꠝꠣꠘꠡꠞ ꠘꠤꠎꠞ ꠖꠤꠟꠦꠃ ꠐꠣꠘꠤꠀ ꠘꠤꠀ ꠔꠣꠞꠦ ꠚꠣꠘ꠆ꠖꠅ ꠚꠣꠟꠣꠄ। 15 ꠛꠣꠖꠦ ꠖꠤꠟꠞ ꠛꠖ ꠘꠤꠅꠔ ꠙꠥꠞꠣ ꠅꠁꠟꠦ ꠉꠥꠘꠣꠞ ꠛꠤꠌ ꠙꠦꠐꠅ ꠟꠄ, ꠀꠞ ꠉꠥꠘꠣ ꠛꠠ ꠅꠁꠀ ꠝꠃꠔꠞ ꠎꠘꠝ ꠖꠦꠄ।
16 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠔꠥꠝꠞꠣ ꠅꠃ ꠟꠣꠈꠣꠘ ꠜꠥꠟ ꠇꠞꠤꠅ ꠘꠣ। 17 ꠢꠇ꠆ꠇꠟ ꠜꠣꠟꠣ ꠀꠞ ꠘꠤꠈꠥꠔ ꠖꠣꠘ ꠔ ꠛꠦꠢꠦꠡ꠆ꠔ ꠕꠘꠦ ꠟꠣꠝꠤꠀ ꠀꠄ, ꠎꠦꠁꠘ ꠀꠍꠝꠣꠘꠤ ꠘꠥꠞ ꠅꠇꠟ ꠙꠄꠖꠣ ꠇꠞꠍꠂꠘ, ꠢꠃ ꠀꠟ꠆ꠟꠣꠞ ꠉꠦꠍ ꠕꠘꠦ ꠀꠄ। ꠅꠃ ꠘꠥꠞ ꠅꠇꠟ ꠍꠦꠛꠣꠞ ꠟꠣꠈꠣꠘ ꠒꠥꠟꠣꠒꠥꠟꠤ ꠇꠞꠟꠦꠅ, ꠔꠣꠁꠘ ꠁꠟꠣ ꠇꠞꠂꠘ ꠘꠣ। 18 ꠔꠣꠁꠘ ꠘꠤꠎꠞ ꠈꠥꠡꠤꠄ ꠀꠝꠞꠣꠞꠦ ꠢꠇ ꠇꠣꠟꠣꠝ ꠖꠤꠀ ꠔꠣꠘ ꠛꠘ꠆ꠖꠣ ꠛꠣꠘꠣꠁꠍꠂꠘ, ꠀꠝꠞꠣ ꠎꠣꠘꠥ ꠀꠡꠞꠣꠚꠥꠟ ꠝꠈꠟꠥꠇꠣꠔ, ꠡ꠆ꠞꠤꠡ꠆ꠐꠤꠞ ꠡꠦꠞꠣ ꠝꠣꠘꠥꠡ ꠅꠁ।
ꠇꠣꠟꠣꠝ ꠢꠥꠘꠤꠀ ꠀꠝꠟ ꠇꠞꠣ
19 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠝꠘꠅ ꠞꠣꠈꠤꠅ, ꠔꠥꠝꠞꠣ ꠀꠉꠦ ꠢꠥꠘꠅ ꠛꠣꠖꠦ ꠝꠣꠔꠅ, ꠎꠟꠖꠤ ꠉꠥꠍꠣ ꠇꠞꠤꠅ ꠘꠣ। 20 ꠝꠣꠘꠡꠦ ꠉꠥꠍꠣ ꠇꠞꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠘꠥ ꠜꠣꠟꠣ ꠇꠣꠝ ꠇꠞꠔ ꠙꠣꠞꠦ ꠘꠣ। 21 ꠉꠔꠤꠇꠦ ꠔꠥꠝꠞꠣ ꠢꠇꠟ ꠎꠣꠔꠞ ꠢꠣꠞꠣꠝ ꠀꠞ ꠘꠣꠚꠞꠝꠣꠘꠤ ꠇꠣꠝ ꠛꠣꠖ ꠖꠤꠟꠣꠅ। ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠦ ꠇꠣꠟꠣꠝ ꠞꠥꠀ ꠅꠁꠍꠦ, ꠘꠞꠝ ꠖꠤꠟꠦ ꠅꠃ ꠇꠣꠟꠣꠝ ꠇꠛꠥꠟ ꠇꠞꠅ। ꠔꠥꠝꠞꠣꠞꠦ ꠔꠞꠣꠘꠤꠞ ꠈꠦꠝꠔꠣ ꠁ ꠇꠣꠟꠣꠝꠞ ꠀꠍꠦ।
22 ꠀꠟ꠆ꠟꠣꠞ ꠇꠣꠟꠣꠝ ꠈꠣꠟꠤ ꠢꠥꠘꠟꠦꠃ ꠅꠁꠔ ꠘꠣꠄ, ꠅꠟꠣꠈꠣꠘ ꠀꠝꠟꠅ ꠇꠞꠅ। ꠇꠣꠟꠣꠝ ꠢꠥꠘꠤꠀ ꠎꠥꠖꠤ ꠀꠝꠟ ꠘꠣ ꠇꠞ, ꠔꠦ ꠔꠥꠝꠞꠣ ꠘꠤꠎꠞꠦ ꠐꠉꠤꠞꠣꠄ। 23 ꠇꠦꠃ ꠎꠥꠖꠤ ꠁ ꠇꠣꠟꠣꠝ ꠢꠥꠘꠤꠀ ꠀꠝꠟ ꠘꠣ ꠇꠞꠦ, ꠔꠦ ꠢꠦ ꠅꠃ ꠝꠣꠘꠡꠞ ꠟꠣꠈꠣꠘ, ꠎꠦ ꠀꠄꠘꠣꠔ ꠘꠤꠎꠞ ꠌꠦꠞꠣ ꠖꠦꠈꠤꠀ ꠎꠣꠄꠉꠤ, 24 ꠛꠣꠖꠦ ꠢꠞꠤꠀ ꠉꠤꠀ ꠚꠣꠃꠞꠤꠟꠣꠄ ꠔꠣꠞ ꠌꠦꠞꠣ ꠇꠤꠟꠣꠈꠣꠘ। 25 ꠅꠁꠟꠦ ꠎꠦ ꠈꠣꠐꠤ ꠀꠁꠘ ꠝꠣꠘꠡꠞꠦ ꠀꠎꠣꠖ ꠇꠞꠦ, ꠀꠞ ꠅꠃ ꠀꠁꠘꠞ ꠛꠣꠄ ꠘꠎꠞ ꠞꠣꠈꠤꠀ ꠎꠦꠞꠣ ꠢꠣꠝꠦꠡꠣ ꠎꠤꠀꠁꠟ ꠞꠄ, ꠁꠔꠣ ꠢꠥꠘꠤꠀ ꠢꠣꠞꠤ ꠚꠣꠃꠞꠦ ꠘꠣ, ꠀꠝꠟ ꠇꠞꠦ, ꠔꠣꠞꠣ ꠢꠇꠟ ꠇꠣꠝꠅ ꠝꠥꠛꠣꠞꠇ ꠅꠁꠛ।
26 ꠎꠦ ꠝꠣꠘꠡꠦ ꠘꠤꠎꠞꠦ ꠙꠞꠦꠎꠉꠣꠞ ꠝꠘꠅ ꠇꠞꠦ, ꠅꠁꠟꠦ ꠘꠤꠎꠞ ꠎꠤꠚꠞꠣꠞꠦ ꠡꠣꠝꠟꠣꠄ ꠘꠣ, ꠢꠦ ꠔ ꠔꠣꠞ ꠘꠤꠎꠞꠦ ꠐꠉꠦ, ꠔꠣꠞ ꠢꠇ꠆ꠇꠟ ꠄꠛꠣꠖꠔꠤꠃ ꠝꠤꠍꠣ। 27 ꠄꠔꠤꠝ ꠅꠇꠟꠞꠦ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞꠦ ꠛꠤꠙꠖꠞ ꠡꠝꠄ ꠡꠣꠄ-ꠡꠣꠁꠎ꠆ꠎ ꠇꠞꠣ, ꠄꠞꠟꠉꠦ ꠖꠥꠘꠤꠀꠞ ꠢꠇꠟ ꠘꠣꠚꠞꠝꠣꠘꠤ ꠕꠣꠇꠤ ꠘꠤꠎꠞꠦ ꠙꠣꠇ-ꠍꠣꠚ ꠞꠣꠈꠣꠃ ꠅꠁꠟ, ꠀꠟ꠆ꠟꠣꠞ ꠘꠎꠞꠅ ꠈꠣꠐꠤ ꠀꠞ ꠍꠢꠤ ꠄꠛꠣꠖꠔꠤ।