1 ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠝꠤꠃ ꠀꠍꠟ ꠀꠋꠉꠥꠞ ꠉꠣꠍ ꠀꠞ ꠀꠝꠣꠞ ꠛꠣꠛꠣ ꠉꠤꠞꠡ꠆ꠔ। 2 ꠀꠝꠣꠞ ꠎꠦꠔꠣ ꠒꠣꠟꠣꠁꠘ꠆ꠔꠅ ꠚꠟ ꠗꠞꠦ ꠘꠣ, ꠔꠣꠁꠘ ꠁꠔꠣꠞꠦ ꠇꠣꠐꠤꠀ ꠚꠣꠟꠣꠁ ꠖꠦꠁꠘ। ꠀꠞ ꠎꠦꠔꠣ ꠒꠣꠟꠣꠁꠘ꠆ꠔꠅ ꠚꠟ ꠗꠞꠦ, ꠔꠣꠁꠘ ꠁꠔꠣꠞꠦ ꠍꠣꠐꠤꠀ ꠍꠣꠚ-ꠍꠥꠔꠞꠣ ꠇꠞꠤ ꠞꠣꠈꠂꠘ, ꠎꠣꠔꠦ ꠀꠞꠅ ꠛꠦꠡꠤ ꠚꠟ ꠗꠞꠦ। 3 ꠔꠦ ꠀꠝꠤ ꠔꠥꠝꠞꠣꠞꠦ ꠎꠦ ꠇꠣꠟꠣꠝ ꠔꠣꠟꠤꠝ ꠖꠤꠍꠤ, ꠄꠞꠟꠣꠉꠤ ꠔ ꠔꠥꠝꠞꠣ ꠀꠉ ꠕꠣꠇꠤꠃ ꠍꠣꠐꠣ ꠅꠁꠀ ꠍꠣꠚ-ꠍꠥꠔꠞꠣ ꠅꠁꠍ। 4 ꠔꠥꠝꠞꠣ ꠀꠝꠣꠞ ꠝꠣꠎꠦ ꠞꠅ, ꠀꠝꠤꠅ ꠔꠥꠝꠞꠣꠞ ꠖꠤꠟꠅ ꠞꠁꠝꠥ। ꠀꠋꠉꠥꠞ ꠉꠣꠍꠞ ꠟꠉꠦ ꠒꠣꠟ ꠎꠥꠖꠤ ꠟꠣꠉꠣꠁꠟ ꠘꠣ ꠕꠣꠇꠦ, ꠔꠦ ꠒꠣꠟꠦ ꠎꠦꠟꠣ ꠘꠤꠎꠦ ꠘꠤꠎꠦ ꠚꠟ ꠗꠞꠣꠁꠔ ꠙꠣꠞꠦ ꠘꠣ, ꠅꠃꠟꠣ ꠔꠥꠝꠞꠣꠅ ꠀꠝꠣꠞ ꠝꠣꠎꠦ ꠘꠣ ꠞꠁꠟꠦ ꠘꠤꠎꠦ ꠘꠤꠎꠦ ꠚꠟꠀꠟꠣ ꠅꠁꠔꠣꠄ ꠙꠣꠞ ꠘꠣ। 5 ꠀꠝꠤꠃ ꠀꠋꠉꠥꠞ ꠉꠣꠍ, ꠀꠞ ꠔꠥꠝꠞꠣ ꠅꠁꠟꠣꠄ ꠒꠣꠟ-ꠙꠣꠟꠣ। ꠎꠦ ꠎꠘ ꠀꠝꠣꠞ ꠟꠉꠦ ꠟꠣꠉꠣꠁꠟ ꠕꠣꠇꠦ, ꠀꠝꠤꠅ ꠔꠣꠞ ꠟꠉꠦ ꠟꠣꠉꠣꠁꠟ ꠞꠁ, ꠔꠦꠃ ꠔꠣꠞ ꠎꠤꠘ꠆ꠖꠦꠉꠤꠔ ꠛꠃꠔ ꠚꠟ ꠗꠞꠦ। ꠀꠞ, ꠀꠝꠣꠞꠦ ꠍꠣꠠꠣ ꠔ ꠔꠥꠝꠞꠣ ꠇꠥꠘ꠆ꠔꠣꠃ ꠇꠞꠔꠣꠄ ꠙꠣꠞ ꠘꠣ।

6 “ꠀꠝꠣꠞ ꠟꠉꠦ ꠇꠦꠃ ꠟꠣꠉꠣꠁꠟ ꠘꠣ ꠞꠁꠟꠦ, ꠔꠣꠞꠦ ꠇꠣꠐꠣ ꠒꠣꠟꠞ ꠟꠣꠈꠣꠘ ꠚꠣꠟꠣꠁ ꠖꠦꠅꠀ ꠅꠄ ꠀꠞ ꠞꠂꠖꠦ ꠢꠥꠇꠣꠁ ꠎꠣꠄ। ꠛꠣꠖꠦ ꠢꠥꠇꠘꠣ ꠒꠣꠟꠣꠁꠘ ꠔꠥꠛꠣꠁꠀ ꠀꠉꠥꠁꠘꠅ ꠖꠦꠁꠘ, ꠔꠦꠃ ꠁꠔꠣ ꠎꠟꠤ-ꠙꠥꠠꠤ ꠎꠣꠄ। 7 ꠔꠥꠝꠞꠣ ꠎꠥꠖꠤ ꠀꠝꠣꠞ ꠟꠉꠦ ꠟꠣꠉꠣꠁꠟ ꠕꠣꠇ ꠀꠞ ꠀꠝꠣꠞ ꠇꠣꠟꠣꠝ ꠈꠣꠘꠣꠁꠘ ꠔꠥꠝꠞꠣꠞ ꠖꠤꠟꠅ ꠕꠣꠇꠦ, ꠔꠦ ꠔꠥꠝꠞꠣꠞ ꠎꠦꠔꠣ ꠁꠌ꠆ꠍꠣ ꠅꠔꠣꠃ ꠌꠣꠁꠅ, ꠁꠔꠣ ꠔꠥꠝꠞꠣꠞꠦ ꠖꠦꠅꠀ ꠅꠁꠛ। 8 ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔ ꠎꠥꠖꠤ ꠛꠃꠔ ꠚꠟ ꠗꠞꠦ, ꠀꠞ ꠅꠟꠣꠈꠣꠘ ꠔꠥꠝꠞꠣ ꠘꠤꠎꠞꠦ ꠀꠝꠣꠞ ꠃꠝ꠆ꠝꠔ ꠢꠤꠡꠣꠛꠦ ꠙꠞꠝꠣꠘ ꠇꠞꠤꠟꠣꠅ, ꠔꠦ ꠀꠝꠣꠞ ꠉꠣꠁꠛꠤ ꠛꠣꠚꠞ ꠔꠣꠞꠤꠚ ꠅꠁꠛ। 9 ꠛꠣꠚꠦ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ। ꠔꠥꠝꠞꠣ ꠀꠝꠣꠞ ꠝꠣꠄꠀꠞ ꠝꠣꠎꠦ ꠞꠅ। 10 ꠀꠝꠤ ꠀꠝꠣꠞ ꠛꠣꠚꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠎꠦꠟꠣ ꠔꠣꠘ ꠝꠣꠄꠀꠞ ꠝꠣꠎꠦ ꠞꠁꠍꠤ, ꠔꠥꠝꠞꠣꠅ ꠅꠃꠟꠣ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦ ꠀꠝꠣꠞ ꠝꠣꠄꠀꠞ ꠝꠣꠎꠦ ꠞꠁꠛꠣꠄ।

11 “ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠟꠣꠝ, ꠎꠣꠔꠦ ꠀꠝꠣꠞ ꠈꠥꠡꠤ ꠔꠥꠝꠞꠣꠞ ꠖꠤꠟꠅ ꠕꠣꠇꠦ ꠀꠞ ꠔꠥꠝꠞꠣꠞ ꠈꠥꠡꠤ ꠙꠥꠞꠣ ꠅꠄ। 12 ꠀꠝꠣꠞ ꠢꠥꠇꠥꠝ ꠅꠁꠟ, ꠀꠝꠤ ꠎꠦꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ, ꠔꠥꠝꠞꠣꠅ ꠅꠃꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠅ। 13 ꠇꠦꠃ ꠎꠥꠖꠤ ꠘꠤꠎꠞ ꠖꠥꠡ꠆ꠔꠞ ꠟꠣꠉꠤ ꠎꠣꠘ ꠛꠤꠟꠣꠁ ꠖꠦꠄ, ꠔꠦ ꠔꠣꠞ ꠕꠣꠇꠤ ꠀꠞ ꠛꠦꠡꠤ ꠝꠣꠄꠀ ꠇꠣꠞ ꠀꠍꠦ? 14 ꠀꠝꠣꠞ ꠖꠦꠅꠀ ꠢꠥꠇꠥꠝ ꠎꠥꠖꠤ ꠔꠥꠝꠞꠣ ꠀꠝꠟ ꠇꠞ, ꠔꠦ ꠔꠥꠝꠞꠣ ꠀꠝꠣꠞ ꠖꠥꠡ꠆ꠔ। 15 ꠀꠝꠤ ꠔꠥꠝꠞꠣꠞꠦ ꠀꠞ ꠉꠥꠟꠣꠝ ꠇꠁꠞꠣꠝ ꠘꠣ, ꠇꠣꠞꠘ ꠝꠥꠘꠤꠛꠦ ꠇꠤꠔꠣ ꠇꠞꠂꠘ ꠉꠥꠟꠣꠝꠦ ꠔ ꠁꠔꠣ ꠎꠣꠘꠦ ꠘꠣ, ꠛꠞꠋ ꠀꠝꠤ ꠔꠥꠝꠞꠣꠞꠦ ꠖꠥꠡ꠆ꠔ ꠇꠁꠍꠤ, ꠇꠣꠞꠘ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠀꠝꠤ ꠎꠔꠔꠣ ꠢꠥꠘꠍꠤ, ꠢꠇꠟꠔꠣꠃ ꠔꠥꠝꠞꠣꠞꠦ ꠎꠣꠘꠣꠁꠍꠤ।

16 “ꠀꠝꠣꠞꠦ ꠔ ꠔꠥꠝꠞꠣ ꠙꠍꠘ꠆ꠖ ꠇꠞꠍ ꠘꠣ, ꠛꠞꠋ ꠀꠝꠤꠃ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠤ ꠀꠞ ꠇꠣꠝꠅ ꠟꠣꠉꠣꠁꠍꠤ, ꠎꠣꠔꠦ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠚꠟꠀꠟꠣ ꠅꠄ ꠀꠞ ꠅꠃ ꠚꠟ ꠐꠤꠇꠤꠀ ꠞꠄ। ꠔꠦꠃ ꠀꠝꠣꠞ ꠘꠣꠝꠦ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠌꠣꠁꠛꠣꠄ, ꠔꠣꠁꠘ ꠔꠥꠝꠞꠣꠞꠦ ꠖꠤꠛꠣ। 17 ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠀꠞ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠅ।

18 “ꠖꠥꠘꠤꠀꠞ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠘ, ꠅꠁꠟꠦ ꠝꠘꠅ ꠞꠣꠈꠤꠅ, ꠄꠞ ꠀꠉꠦ ꠔꠣꠞꠣ ꠀꠝꠣꠞꠦꠃ ꠊꠤꠘ꠆ꠘꠣꠁꠍꠦ। 19 ꠔꠥꠝꠞꠣ ꠎꠥꠖꠤ ꠅꠃ ꠖꠥꠘꠤꠀꠞ ꠅꠁꠔꠣꠄ, ꠔꠦ ꠔꠣꠞꠣ ꠔꠥꠝꠞꠣꠞꠦ ꠘꠤꠎꠞ ꠢꠤꠡꠣꠛꠦ ꠜꠣꠟꠣ ꠙꠣꠁꠟ ꠅꠘꠦ। ꠔꠥꠝꠞꠣ ꠔ ꠁ ꠖꠥꠘꠤꠀꠞ ꠘꠣꠄ, ꠀꠝꠤ ꠔꠥꠝꠞꠣꠞꠦ ꠖꠥꠘꠤꠀꠞ ꠝꠣꠎ ꠕꠣꠇꠤ ꠙꠍꠘ꠆ꠖ ꠇꠞꠍꠤ ꠉꠔꠤꠇꠦ ꠔꠣꠞꠣ ꠔꠥꠝꠞꠣꠞꠦ ꠊꠤꠘ꠆ꠘꠣꠄ। 20 ꠀꠝꠣꠞ ꠇꠕꠣꠈꠣꠘ ꠝꠘꠅ ꠞꠣꠈꠤꠅ, ꠉꠥꠟꠣꠝ ꠔꠣꠞ ꠝꠥꠘꠤꠛ ꠕꠣꠇꠤ ꠛꠠ ꠘꠣꠄ। ꠄꠞꠟꠣꠉꠤ ꠝꠣꠘꠡꠦ ꠎꠥꠖꠤ ꠀꠝꠣꠞꠦ ꠎꠥꠟꠥꠝ ꠇꠞꠦ, ꠔꠦ ꠔꠥꠝꠞꠣꠞꠦꠅ ꠅꠟꠣ ꠇꠞꠛ। ꠔꠣꠞꠣ ꠀꠝꠣꠞ ꠇꠕꠣ ꠝꠣꠘꠟꠦ ꠔꠥꠝꠞꠣꠞ ꠇꠕꠣꠅ ꠝꠣꠘꠟ ꠅꠘꠦ। 21 ꠀꠝꠣꠞ ꠇꠣꠞꠘꠦꠃ ꠔꠣꠞꠣ ꠔꠥꠝꠞꠣꠞ ꠟꠉꠦ ꠅꠟꠣ ꠇꠞꠛ, ꠇꠣꠞꠘ ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ, ꠄꠘꠞꠦ ꠔꠣꠞꠣ ꠌꠤꠘꠦ ꠘꠣ।

22 “ꠀꠝꠤ ꠎꠥꠖꠤ ꠘꠣ ꠀꠁꠔꠣꠝ ꠀꠞ ꠔꠣꠞꠣꠞ ꠉꠦꠍꠦ ꠘꠍꠤꠅꠔ ꠘꠣ ꠇꠞꠔꠣꠝ, ꠔꠦ ꠔꠣꠞꠣ ꠉꠥꠘꠣꠉꠣꠞ ꠅꠁꠟ ꠘꠣ ꠅꠘꠦ, ꠅꠁꠟꠦ ꠅꠈꠘ ꠔ ꠔꠣꠞꠣꠞ ꠇꠥꠘꠥ ꠅꠎꠥꠀꠔ ꠘꠣꠁ। 23 ꠎꠦ ꠎꠘꠦ ꠀꠝꠣꠞꠦ ꠊꠤꠘ꠆ꠘꠣꠄ, ꠢꠦ ꠀꠝꠣꠞ ꠉꠣꠁꠛꠤ ꠛꠣꠚꠞꠦꠅ ꠊꠤꠘ꠆ꠘꠣꠄ। 24 ꠢꠥꠘꠅ, ꠎꠦꠔꠣ ꠇꠦꠞꠣꠝꠔꠤ ꠇꠦꠃ ꠇꠥꠘꠥꠖꠤꠘ ꠖꠦꠈꠣꠁꠍꠦ ꠘꠣ, ꠅꠔꠣ ꠇꠦꠞꠣꠝꠔꠤ ꠎꠥꠖꠤ ꠀꠝꠤ ꠘꠣ ꠖꠦꠈꠣꠁꠔꠣꠝ, ꠔꠦ ꠔꠣꠞꠣ ꠉꠥꠘꠣꠉꠣꠞ ꠅꠁꠟ ꠘꠣ ꠅꠘꠦ। ꠅꠁꠟꠦ ꠔꠣꠞꠣ ꠔ ꠀꠝꠣꠞꠦ ꠀꠞ ꠀꠝꠣꠞ ꠉꠣꠁꠛꠤ ꠛꠣꠚꠞꠦ ꠖꠦꠈꠍꠦ, ꠖꠦꠈꠤꠀꠅ ꠊꠤꠘ꠆ꠘꠣꠁꠍꠦ। 25 ꠁꠔꠣ ꠅꠁꠟ, ꠎꠣꠔꠦ ꠔꠣꠞꠣꠞ ꠇꠤꠔꠣꠛꠞ ꠅꠃ ꠇꠕꠣ ꠚꠟꠦ, ꠇꠤꠔꠣꠛꠅ ꠀꠍꠦ, ꠔꠣꠞꠣ ꠛꠤꠘꠣ ꠇꠣꠞꠘꠦ ꠀꠝꠣꠞꠦ ꠊꠤꠘ꠆ꠘꠣꠁꠍꠦ।

26 “ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠎꠦ ꠡꠣꠁꠎ꠆ꠎꠉꠤꠞ ꠞꠥꠢꠥꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ, ꠔꠣꠁꠘ ꠀꠁꠀ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣ। ꠔꠣꠁꠘ ꠅꠁꠟꠣ ꠢꠇ ꠞꠥꠢꠥ, ꠔꠣꠁꠘ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠀꠁꠛꠣ। 27 ꠀꠞ ꠔꠥꠝꠞꠣꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ, ꠔꠥꠝꠞꠣ ꠔ ꠙꠄꠟꠣ ꠕꠣꠇꠤꠃ ꠀꠝꠣꠞ ꠟꠉꠦ ꠟꠉꠦ ꠀꠍ।”