1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠘꠣ ꠎꠣꠘꠣꠞ ꠇꠣꠞꠘꠦ ꠇꠦꠃ ꠎꠥꠖꠤ ꠜꠥꠟ ꠇꠞꠤꠀ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠔꠦ ꠔꠣꠁꠘ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ।

3 “ꠄꠁꠘ ꠈꠦꠟꠣꠚꠔꠤ ꠙꠣꠅꠀ ꠙꠞꠗꠣꠘ ꠁꠝꠣꠝ ꠍꠣꠛ ꠅꠁꠟꠦ, ꠔꠣꠘ ꠉꠥꠘꠣꠞ ꠖꠣꠄ-ꠜꠣꠞ ꠢꠇꠟ ꠝꠣꠘꠡꠞ ꠃꠙꠞꠦ ꠛꠞ꠆ꠔꠦ, ꠄꠞꠟꠣꠉꠤ ꠔꠣꠁꠘ ꠘꠤꠈꠥꠔ ꠄꠉꠥ ꠛꠤꠍꠣꠟ ꠀꠘꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠛꠣ। 4 ꠅꠃ ꠛꠤꠍꠣꠟ ꠟꠁꠀ ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠁꠛꠣ, ꠀꠁꠀ ꠅꠉꠥꠞ ꠇꠟ꠆ꠟꠣ ꠀꠔꠣꠁ ꠖꠤꠀ, ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠛꠣ। 5 ꠇꠞꠤꠀ ꠅꠃ ꠛꠤꠍꠣꠟꠞ ꠕꠥꠠꠣ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠎꠣꠁꠛꠣ। 6 ꠉꠤꠀ ꠟꠃꠞ ꠝꠣꠎꠦ ꠘꠤꠎꠞ ꠀꠋꠉꠥꠟ ꠍꠥꠛꠣꠁꠀ ꠟꠃ ꠟꠣꠉꠣꠁꠀ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠛꠣꠄ ꠝꠣꠛꠥꠖꠞ ꠍꠣꠝꠘꠦ ꠡꠣꠔ ꠛꠣꠞ ꠍꠤꠐꠣꠁ ꠖꠤꠛꠣ। 7 ꠛꠣꠖꠦ ꠀꠞꠅ ꠕꠥꠠꠣ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠛꠥꠖꠞ ꠍꠣꠝꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠌꠣꠁꠞꠅ ꠇꠥꠘꠣꠞ ꠢꠤꠋ ꠅꠇꠟꠞ ꠝꠣꠎꠦ ꠟꠣꠉꠣꠁꠛꠣ। ꠀꠞ ꠛꠣꠖ-ꠛꠣꠇꠤ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। 8 ꠛꠣꠖꠦ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠦꠅꠀ ꠇꠥꠞꠛꠣꠘꠤꠞ ꠅꠃ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠛꠣ, ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠁꠔꠣꠞ ꠟꠉꠦ ꠟꠣꠉꠣꠁꠟ ꠢꠇꠟ ꠌꠞ꠆ꠛꠤ, 9 ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀ। 10 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠞꠥꠞ ꠌꠞ꠆ꠛꠤꠞ ꠟꠣꠈꠣꠘ, ꠅꠃ ꠇꠥꠞꠛꠣꠘꠤꠞ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤꠞꠦꠅ ꠅꠟꠣ ꠛꠣꠞ ꠇꠞꠛꠣ। ꠛꠣꠖꠦ ꠁꠝꠣꠝꠦ ꠅꠃ ꠌꠞ꠆ꠛꠤ ꠘꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟꠤꠛꠣ। 11 ꠅꠁꠟꠦ ꠅꠃ ꠛꠤꠍꠣꠟꠞ ꠇꠟ꠆ꠟꠣ, ꠈꠣꠟ, ꠉꠥꠡ꠆ꠔ, ꠑꠦꠋ, ꠀꠔ-ꠜꠠ, ꠉꠥꠚꠞ, 12 ꠢꠇꠟꠔꠣ ꠘꠤꠀ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠎꠦꠈꠣꠘꠅ ꠇꠥꠞꠛꠣꠘꠤꠞ ꠍꠣꠟꠤꠞ ꠐꠦꠇꠤ ꠕꠂꠘ, ꠢꠃ ꠙꠣꠇ-ꠍꠣꠚ ꠎꠣꠉꠣꠞ ꠍꠣꠟꠤꠞ ꠐꠦꠇꠤꠞ ꠃꠙꠞꠦ ꠅꠔꠣ ꠕꠁꠀ ꠢꠣꠞꠤ, ꠟꠣꠇꠠꠤꠞ ꠀꠉꠥꠁꠘꠖꠤ ꠎꠣꠟꠣꠁꠟꠤꠛꠣ।

13 “ꠀꠞ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠇꠣꠝ ꠇꠞꠤꠀ ꠖꠥꠡꠤ ꠛꠘꠤꠎꠣꠄ, ꠔꠦ ꠘꠣ ꠎꠣꠘꠤꠀ ꠇꠞꠟꠦꠅ ꠔꠣꠞꠣ ꠢꠇꠟꠃ ꠉꠥꠘꠣꠉꠣꠞ। 14 ꠛꠣꠖꠦ ꠎꠦꠛꠟꠣ ꠔꠣꠞꠣ ꠎꠣꠘꠛꠣ, ꠎꠣꠘꠤꠀ ꠢꠣꠞꠤ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠢꠇꠟꠞ ꠔꠞꠚ ꠕꠣꠇꠤ ꠄꠉꠥ ꠛꠤꠍꠣꠟ ꠇꠥꠞꠛꠣꠘꠤ ꠖꠤꠛꠣ, ꠅꠃ ꠛꠤꠍꠣꠟ ꠟꠁꠀ ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠎꠤꠞ ꠅꠁꠛꠣ। 15 ꠅꠁꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠤꠍꠣꠟꠞ ꠇꠟ꠆ꠟꠣ ꠀꠔꠣꠁ ꠖꠤꠛꠣ, ꠀꠞ ꠁꠝꠣꠝꠦ ꠝꠣꠛꠥꠖꠞ ꠍꠣꠝꠘꠦ ꠅꠇꠐꠣ ꠎꠛ ꠇꠞꠛꠣ। 16 ꠎꠛꠞ ꠛꠣꠖꠦ ꠈꠦꠟꠣꠚꠔꠤ ꠙꠣꠅꠀ ꠁꠝꠣꠝ ꠍꠣꠛꠦ ꠛꠤꠍꠣꠟꠞ ꠕꠥꠠꠣ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠛꠣ। 17 ꠢꠣꠝꠣꠁꠀ ꠅꠃ ꠟꠃꠞ ꠝꠣꠎꠦ ꠔꠣꠘ ꠀꠔꠞ ꠀꠋꠉꠥꠁꠟ ꠍꠥꠛꠣꠁꠀ, ꠕꠥꠠꠣ ꠟꠃ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠛꠣꠄ ꠡꠣꠔ ꠛꠣꠞ ꠝꠣꠛꠥꠖꠞ ꠍꠣꠝꠘꠦ ꠍꠤꠐꠣꠁꠛꠣ। 18 ꠛꠣꠖꠦ ꠀꠞꠅ ꠕꠥꠠꠣ ꠟꠃ ꠟꠁꠀ ꠝꠣꠛꠥꠖꠞ ꠍꠣꠝꠘꠦ ꠕꠅꠀ, ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠢꠤꠋ ꠅꠇꠟꠅ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠚꠥꠐꠣꠁꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। 19 ꠀꠞ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟꠤꠛꠣ। 20 ꠙꠞꠗꠣꠘ ꠁꠝꠣꠝꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠛꠤꠍꠣꠟꠞꠦ ꠎꠦꠟꠣ ꠇꠥꠞꠛꠣꠘꠤ ꠖꠦꠅꠀ ꠅꠄ, ꠁꠝꠣꠝꠦ ꠅꠃ ꠛꠤꠍꠣꠟꠞꠦꠅ ꠅꠟꠣ ꠇꠥꠞꠛꠣꠘꠤ ꠇꠞꠛꠣ। ꠔꠣꠁꠘ ꠅꠃ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠦ, ꠔꠣꠞꠣꠞ ꠉꠥꠘꠣꠞ ꠝꠣꠚꠤ ꠝꠤꠟꠛ। 21 ꠁꠝꠣꠝ ꠍꠣꠛꠦ ꠛꠤꠍꠣꠟꠞ ꠛꠣꠖ-ꠛꠣꠇꠤ ꠢꠇꠟꠔꠣ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠎꠣꠁꠛꠣ। ꠉꠤꠀ ꠔꠣꠘ ꠘꠤꠎꠞ ꠉꠥꠘꠣꠞ ꠇꠚꠞꠣꠞ ꠢꠃ ꠛꠤꠍꠣꠟꠞ ꠟꠣꠈꠣꠘ ꠅꠃ ꠛꠤꠍꠣꠟꠞ ꠢꠇꠟꠔꠣꠅ ꠇꠦꠝ꠆ꠙꠞ ꠛꠣꠞꠦ ꠅꠟꠣ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠀꠡ꠆ꠔꠣ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ।

22 “ꠀꠞ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠡꠞ꠆ꠖꠣꠞꠦ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠅꠟꠣ ꠉꠥꠘꠣ ꠇꠞꠤꠟꠣꠁꠘ, ꠔꠦ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠣꠝ ꠇꠞꠣꠄ ꠔꠣꠁꠘ ꠔ ꠖꠥꠡꠤ। 23 ꠔꠣꠁꠘ ꠎꠦꠛꠟꠣ ꠅꠃ ꠉꠥꠘꠣꠞ ꠛꠦꠙꠣꠞꠦ ꠎꠣꠘꠤꠟꠤꠛꠣ, ꠎꠣꠘꠣꠞ ꠛꠣꠖꠦ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠛꠣꠞ ꠟꠣꠉꠤ ꠘꠤꠈꠥꠔ ꠄꠉꠥ ꠙꠣꠑꠣ ꠍꠣꠉꠟ ꠟꠁꠀ ꠀꠁꠛꠣ। 24 ꠀꠁꠀ ꠅꠃ ꠙꠣꠑꠣꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠎꠛ ꠇꠞꠣꠞ ꠎꠣꠉꠣꠔ ꠘꠤꠀ ꠅꠉꠥꠞꠦ ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠛꠣ। ꠁꠔꠣ ꠔ ꠔꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ। 25 ꠛꠣꠖꠦ ꠁꠝꠣꠝ ꠍꠣꠛꠦ ꠅꠃ ꠙꠡꠥꠞ ꠕꠥꠠꠣ ꠟꠃ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠟꠁꠀ, ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। 26 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠌꠞ꠆ꠛꠤꠞ ꠟꠣꠈꠣꠘ ꠅꠉꠥꠞ ꠢꠇꠟ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠅꠃ ꠟꠣꠈꠣꠘ ꠁꠝꠣꠝꠦ ꠢꠃ ꠡꠞ꠆ꠖꠣꠞꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠇꠚꠞꠣ ꠀꠖꠣꠄ ꠇꠞꠟꠦ, ꠔꠣꠁꠘ ꠝꠣꠚꠤ ꠙꠣꠁꠛꠣ।

27 “ꠀꠞ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠡꠣꠗꠣꠞꠘ ꠎꠘꠦ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠝꠣꠛꠥꠖꠞ ꠘꠤꠡꠦꠗ ꠇꠞꠣ ꠇꠥꠘꠥ ꠇꠣꠝ ꠇꠞꠤꠀ ꠖꠥꠡꠤ ꠛꠘꠤꠎꠣꠄ, 28 ꠔꠦ ꠢꠦ ꠎꠦꠛꠟꠣ ꠔꠣꠞ ꠉꠥꠘꠣꠞ ꠛꠦꠙꠣꠞꠦ ꠎꠣꠘꠤꠟꠤꠛ, ꠎꠣꠘꠤꠀ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠢꠦ ꠘꠤꠈꠥꠔ ꠄꠉꠥ ꠍꠣꠉꠤ ꠟꠁꠀ ꠀꠁꠛ। 29 ꠀꠁꠀ ꠅꠃ ꠍꠣꠉꠤꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠎꠛꠞ ꠎꠣꠉꠣꠔ ꠘꠤꠀ ꠅꠉꠥꠞꠦ ꠎꠛ ꠇꠞꠛ। 30 ꠛꠣꠖꠦ ꠁꠝꠣꠝ ꠍꠣꠛꠦ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠅꠉꠥꠞ ꠕꠥꠠꠣ ꠟꠃ ꠟꠣꠉꠣꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। 31 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠌꠞ꠆ꠛꠤꠞ ꠟꠣꠈꠣꠘ ꠅꠉꠥꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ। ꠅꠃ ꠘꠝꠥꠘꠣꠄ ꠁꠝꠣꠝꠦ ꠢꠃ ꠎꠘꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠟꠦ, ꠔꠣꠞ ꠝꠣꠚꠤ ꠝꠤꠟꠛ।

32 “ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠇꠦꠃ ꠎꠥꠖꠤ ꠇꠥꠘꠥ ꠝꠦꠠꠣ ꠀꠘꠦ, ꠔꠦ ꠁꠐꠣ ꠘꠤꠈꠥꠔ ꠝꠦꠠꠤ-ꠛꠣꠁꠌ꠆ꠌꠣ ꠅꠁꠔꠦ ꠅꠁꠛ। 33 ꠢꠦ ꠅꠉꠥꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞ ꠎꠛꠞ ꠎꠣꠉꠣꠔ ꠘꠤꠀ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠅꠉꠥꠞꠦ ꠎꠛ ꠇꠞꠛ। 34 ꠛꠣꠖꠦ ꠁꠝꠣꠝ ꠍꠣꠛꠦ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠅꠃ ꠝꠦꠠꠤꠞ ꠕꠥꠠꠣ ꠟꠃ ꠟꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। 35 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠌꠞ꠆ꠛꠤ ꠎꠦꠟꠣ ꠛꠣꠞ ꠇꠞꠂꠘ, ꠅꠉꠥꠞ ꠢꠇꠟ ꠌꠞ꠆ꠛꠤꠞꠦꠅ ꠅꠟꠣ ꠛꠣꠞ ꠇꠞꠛꠣ। ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠇꠥꠞꠛꠣꠘꠤ ꠖꠦꠅꠀ ꠢꠇꠟꠔꠣꠞ ꠃꠙꠞꠦ ꠕꠁꠀ ꠅꠃ ꠌꠞ꠆ꠛꠤꠞꠦꠅ ꠎꠣꠟꠣꠁꠟꠤꠛꠣ, ꠅꠃ ꠘꠝꠥꠘꠣꠄ ꠁꠝꠣꠝꠦ ꠢꠃ ꠎꠘꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠢꠦ ꠝꠣꠚꠤ ꠙꠣꠁꠛ।