1 ꠈꠦꠟꠣꠚꠔꠤ ꠡꠝꠎꠤꠛꠣꠞ ꠝꠣꠢꠚꠤꠟꠞ ꠀꠐ ꠖꠤꠘꠞ ꠖꠤꠘ ꠝꠥꠍꠣ ꠘꠛꠤꠄ ꠁꠝꠣꠝ ꠢꠣꠞꠥꠘꠞꠦ, ꠔꠣꠘ ꠙꠥꠀꠂꠘ꠆ꠔꠞꠦ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦꠅ ꠀꠘꠣꠁꠟꠣ। 2 ꠀꠘꠣꠁꠀ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠣꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠔꠥꠝꠤ ꠄꠉꠥ ꠛꠤꠍꠣꠟ ꠀꠘꠅ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠅꠅ। ꠇꠥꠞꠛꠣꠘꠤꠞ ꠙꠡꠥ ꠉꠥꠁꠘ ꠙꠥꠞꠣꠙꠥꠞ ꠘꠤꠈꠥꠔ ꠅꠁꠔ। 3 ꠀꠞ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠎꠣꠘꠥ ꠝꠣꠛꠥꠖꠞ ꠘꠣꠝꠞ ꠇꠥꠞꠛꠣꠘꠤ ꠟꠁꠀ ꠀꠎꠤꠞ ꠅꠄ। ꠔꠣꠞꠣ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠍꠣꠉꠟ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠘꠤꠈꠥꠔ ꠄꠉꠥ ꠉꠞꠥ-ꠛꠣꠍꠥꠞ, ꠀꠞ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠦ, 4 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠞ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠀꠎꠤꠞ ꠅꠄ। ꠁꠔꠣꠞ ꠟꠉꠦ ꠔꠣꠞꠣ ꠔꠦꠟ ꠝꠣꠈꠣꠁꠟ ꠗꠣꠘ-ꠉꠝꠞ ꠍꠖꠉꠣꠅ ꠀꠘꠛꠣ। ꠝꠣꠛꠥꠖꠦ ꠔꠣꠞꠣꠞꠦ ꠀꠁꠎ ꠖꠤꠖꠣꠞ ꠖꠤꠛꠣ, ꠄꠞꠟꠣꠉꠤ ꠔꠣꠞꠣ ꠅꠔꠣ ꠟꠁꠀ ꠀꠎꠤꠞ ꠅꠃꠇ꠆ꠇꠣ।”

5 ꠝꠥꠍꠣ ꠘꠛꠤꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠢꠇ꠆ꠇꠟꠔꠣ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠁꠟꠣ। ꠢꠇꠟ ꠛꠘꠤ ꠁꠍꠞꠣꠁꠟ ꠝꠣꠛꠥꠖꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ। 6 ꠅꠃ ꠡꠝꠄ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠔꠥꠝꠞꠣꠞꠦ ꠁꠔꠣ ꠇꠞꠣꠞ ꠟꠣꠉꠤ ꠢꠥꠇꠥꠝ ꠖꠤꠍꠂꠘ, ꠁꠔꠣ ꠀꠖꠣꠄ ꠇꠞꠟꠦ ꠔꠥꠝꠞꠣꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠛ।”

7 ꠛꠣꠖꠦ ꠔꠣꠁꠘ ꠁꠝꠣꠝ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠉꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅ, ꠉꠤꠀ ꠔꠥꠝꠣꠞ ꠘꠤꠎꠞ ꠀꠞ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠅ। ꠀꠞ ꠝꠣꠘꠡꠞ ꠀꠘꠣ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠅ, ꠝꠣꠛꠥꠖꠦ ꠀꠝꠣꠞꠦ ꠅꠟꠣ ꠢꠥꠇꠥꠝ ꠖꠤꠍꠂꠘ।”

8 ꠔꠦꠃ ꠁꠝꠣꠝ ꠢꠣꠞꠥꠘ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠉꠤꠀ, ꠔꠣꠘ ꠘꠤꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠣꠍꠥꠞ ꠎꠛ ꠇꠞꠟꠣ। 9 ꠎꠛꠞ ꠛꠣꠖꠦ ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠟꠁꠀ ꠔꠣꠘ ꠗꠣꠞꠅ ꠉꠦꠟꠣ। ꠔꠣꠁꠘ ꠅꠃ ꠟꠃꠞ ꠝꠣꠎꠦ ꠀꠋꠉꠥꠟ ꠒꠥꠛꠣꠁꠀ ꠕꠥꠠꠣ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠅ ꠝꠣꠈꠣꠁꠟꠣ, ꠀꠞ ꠛꠣꠇꠤ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤꠟꠣ। 10 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠁꠝꠣꠝ ꠢꠣꠞꠥꠘꠦ ꠑꠤꠇ ꠅꠃ ꠟꠣꠈꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠣꠍꠥꠞꠞ ꠌꠞ꠆ꠛꠤ, ꠖꠥꠁꠅ ꠇꠤꠒꠘꠤ ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠘꠤꠀ ꠎꠣꠟꠣꠁꠟꠤꠟꠣ। 11 ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠌꠣꠝꠠꠣ ꠘꠤꠀ ꠔꠣꠁꠘ ꠇꠦꠝ꠆ꠙꠞ ꠛꠣꠞꠦ ꠎꠣꠟꠣꠁꠟꠣ।

12 ꠛꠣꠖꠦ ꠁꠝꠣꠝ ꠢꠣꠞꠥꠘꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠝꠦꠠꠣꠞꠦ ꠎꠛ ꠇꠞꠟꠣ। ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠘꠤꠀ ꠔꠣꠘ ꠀꠔꠅ ꠖꠤꠟꠣ, ꠔꠣꠁꠘ ꠅꠃ ꠟꠃꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁꠟꠣ। 13 ꠔꠣꠞꠣ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠝꠦꠠꠣꠞ ꠇꠟ꠆ꠟꠣ ꠀꠞ ꠉꠥꠡ꠆ꠔꠞ ꠐꠥꠇꠞꠣꠁꠘ ꠄꠇ ꠄꠇ ꠇꠞꠤ ꠢꠣꠞꠥꠘꠞ ꠀꠔꠅ ꠖꠤꠟꠣ, ꠔꠣꠁꠘ ꠁꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ। 14 ꠝꠦꠠꠣꠞ ꠑꠦꠋ ꠀꠞ ꠙꠦꠐꠞ ꠜꠤꠔꠞꠞ ꠢꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤ ꠙꠡꠥꠞ ꠟꠉꠦ ꠁꠔꠣ ꠢꠇ꠆ꠇꠟꠔꠣꠅ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ।

15 ꠛꠣꠖꠦ ꠔꠣꠁꠘ ꠡꠝꠣꠎꠞ ꠝꠣꠘꠡꠞ ꠟꠣꠉꠤ ꠇꠥꠞꠛꠣꠘꠤꠞ ꠙꠡꠥ ꠅꠇꠟ ꠀꠘꠣꠁꠟꠣ। ꠔꠣꠁꠘ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠍꠣꠉꠟ ꠎꠛ ꠇꠞꠟꠣ, ꠀꠞ ꠀꠉꠞ ꠟꠣꠈꠣꠘ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ। 16 ꠄꠞꠛꠣꠖꠦ ꠔꠣꠁꠘ ꠔꠣꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠥꠞꠛꠣꠘꠤ ꠖꠤꠟꠣ। 17 ꠀꠞ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠀꠘꠣ ꠍꠣꠝꠣꠘꠣ ꠕꠣꠇꠤ ꠄꠇ ꠝꠥꠁꠐ ꠘꠤꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠣ। ꠁꠔꠣ ꠍꠣꠠꠣꠅ ꠔꠣꠁꠘ ꠛꠤꠀꠘꠤ ꠛꠣꠟꠣꠞ ꠢꠣꠝꠦꠡꠣꠇꠥꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ। 18 ꠔꠣꠁꠘ ꠝꠣꠘꠡꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠅꠃ ꠉꠞꠥ ꠀꠞ ꠝꠦꠠꠣꠞꠦ ꠎꠛ ꠇꠞꠟꠣ। ꠎꠛꠞ ꠛꠣꠖꠦ ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠀꠘꠤꠀ ꠔꠣꠘ ꠀꠔꠅ ꠖꠤꠟꠣ, ꠟꠃ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠟꠣ। 19 ꠀꠞ ꠁꠝꠣꠝ ꠢꠣꠞꠥꠘꠞꠦ ꠢꠃ ꠉꠞꠥ ꠀꠞ ꠝꠦꠠꠣꠞ ꠟꠉꠦ ꠟꠣꠉꠣꠁꠟ ꠢꠇꠟ ꠌꠞ꠆ꠛꠤ, ꠝꠣꠘꠤ ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀꠅ ꠀꠘꠤꠀ ꠖꠤꠟꠣ। 20 ꠔꠣꠞꠣ ꠅꠃ ꠢꠇꠟ ꠌꠞ꠆ꠛꠤꠞꠦ ꠢꠃ ꠙꠡꠥꠞ ꠍꠤꠘꠣꠞ ꠃꠙꠞꠦ ꠕꠁꠟꠣ। ꠀꠞ ꠁꠝꠣꠝ ꠢꠣꠞꠥꠘꠦ ꠅꠃ ꠌꠞ꠆ꠛꠤ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠣ। 21 ꠝꠥꠍꠣ ꠘꠛꠤꠞ ꠢꠥꠇꠥꠝ ꠝꠣꠚꠤꠇ ꠢꠣꠞꠥꠘꠦ ꠛꠣꠖꠦ ꠇꠥꠞꠛꠣꠘꠤꠞ ꠙꠡꠥꠞ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠟꠣ।

22 ꠛꠣꠖꠦ ꠁꠝꠣꠝ ꠢꠣꠞꠥꠘꠦ ꠝꠣꠘꠡꠞ ꠛꠣꠄꠖꠤ ꠔꠣꠘ ꠀꠔ ꠛꠣꠠꠣꠁꠀ ꠔꠣꠞꠣꠞꠦ ꠖꠥꠀ ꠖꠤꠟꠣ। ꠔꠣꠁꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠟꠣꠝꠤꠀ ꠀꠁꠟꠣ। 23 ꠄꠞꠛꠣꠖꠦ ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠢꠣꠞꠥꠘ ꠉꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠟꠣ, ꠛꠣꠖꠦ ꠢꠘ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠢꠇꠟ ꠝꠣꠘꠡꠞꠦ ꠖꠥꠀ ꠖꠤꠟꠣ। ꠅꠃ ꠡꠝꠄ ꠢꠇꠟ ꠝꠣꠘꠡꠞ ꠍꠣꠝꠘꠦ ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠘꠥꠞ ꠎꠣꠁꠞ ꠇꠞꠟꠣ। 24 ꠝꠣꠛꠥꠖꠞ ꠉꠦꠍ ꠕꠣꠇꠤ ꠇꠥꠖꠞꠔꠤ ꠀꠉꠥꠁꠘ ꠀꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠀꠞ ꠢꠇ꠆ꠇꠟ ꠌꠞ꠆ꠛꠤꠞꠦ ꠎꠣꠟꠣꠁꠀ ꠍꠣꠟꠤ ꠇꠞꠤꠟꠤꠟ। ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠈꠥꠡꠤꠄ ꠍꠥꠛꠢꠣꠘ ꠀꠟ꠆ꠟꠣ ꠇꠁꠀ ꠌꠤꠇ ꠖꠤꠀ ꠍꠁꠎꠖꠣꠔ ꠙꠠꠟꠣ।