1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠣꠞꠥꠘꠞ ꠛꠋꠡꠞ ꠁꠝꠣꠝ ꠅꠇꠟꠞꠦ ꠇꠁꠅ, ꠔꠣꠞꠣꠞ ꠇꠥꠘꠥ ꠇꠥꠐꠥꠝ-ꠈꠦꠡꠞ ꠝꠃꠔꠞ ꠇꠣꠞꠘꠦ ꠝꠣꠔ꠆ꠔꠝ ꠇꠞꠤꠀ ꠔꠣꠞꠣ ꠎꠣꠘꠥ ꠘꠤꠎꠞꠦ ꠘꠣꠙꠣꠇ ꠘꠣ ꠛꠣꠘꠣꠄ। 2 ꠈꠣꠟꠤ ꠔꠣꠞꠣꠞ ꠘꠤꠎꠞ ꠝꠣ-ꠛꠣꠚ, ꠙꠥꠀ-ꠙꠥꠠꠤ ꠛꠣ ꠀꠙꠘ ꠜꠣꠁ ꠝꠣꠞꠣ ꠉꠦꠟꠦ ꠔꠣꠞꠣ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠘꠤ ꠎꠣꠁꠎ ꠀꠍꠦ। 3 ꠀꠞ ꠜꠣꠁꠞ ꠊꠞꠅ ꠞꠅꠞꠣ ꠀꠛꠤꠀꠔꠤ ꠇꠥꠘꠥ ꠛꠁꠘ ꠝꠣꠞꠣ ꠉꠦꠟꠦ ꠔꠣꠁꠞꠦ ꠖꠣꠚꠘ-ꠇꠣꠚꠘꠞ ꠟꠣꠉꠤ ꠔꠣꠁꠞ ꠜꠣꠁ ꠘꠣꠙꠣꠇ ꠛꠘꠣ ꠎꠣꠁꠎ। 4 ꠅꠁꠟꠦ ꠢꠃꠞ ꠛꠣꠠꠤꠞ ꠇꠥꠘꠥ ꠇꠥꠐꠥꠝ-ꠈꠦꠡꠞ ꠝꠃꠔꠞ ꠖꠣꠄ ꠇꠥꠘꠥ ꠁꠝꠣꠝ ꠍꠣꠛꠦ ꠘꠤꠎꠞ ꠙꠛꠤꠔ꠆ꠞ ꠢꠣꠟꠔ ꠕꠣꠇꠤ ꠘꠣꠙꠣꠇ ꠛꠘꠣ ꠎꠣꠁꠎ ꠘꠣꠄ।

5 “ꠁꠝꠣꠝ ꠍꠣꠛ ꠅꠇꠟꠞ ꠝꠣꠕꠣꠞ ꠌꠥꠟ ꠇꠣꠝꠣꠘꠤ, ꠖꠣꠠꠤꠞ ꠀꠉꠣ ꠍꠣꠐꠣ, ꠛꠣ ꠘꠤꠎꠞ ꠡꠞꠤꠟꠅ ꠇꠥꠘꠥꠎꠣꠔ ꠇꠣꠐꠣ-ꠌꠤꠞꠣ ꠇꠞꠣ ꠎꠣꠁꠎ ꠘꠣꠄ। 6 ꠔꠣꠞꠣ ꠎꠣꠘꠥ ꠀꠙꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠘꠣ ꠇꠞꠂꠘ, ꠀꠞ ꠙꠣꠇ-ꠙꠣꠇꠤꠎꠣ ꠞꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠘ। ꠅꠈꠣꠘ ꠝꠘꠅ ꠞꠣꠈꠂꠘ ꠎꠦꠘ, ꠅꠃ ꠁꠝꠣꠝ ꠅꠇꠟꠦꠃ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠍꠖꠉꠣ ꠀꠞ ꠇꠥꠞꠛꠣꠘꠤ ꠅꠇꠟ ꠀꠖꠣꠄ ꠇꠞꠂꠘ, ꠀꠞ ꠇꠥꠞꠛꠣꠘꠤꠞ ꠝꠣꠟ ꠔ ꠘꠤꠎꠞ ꠀꠟ꠆ꠟꠣꠞ ꠖꠞꠛꠣꠞꠞ ꠞꠤꠎꠦꠇ। 7 ꠁꠝꠣꠝ ꠅꠇꠟꠦ ꠇꠥꠘꠥ ꠛꠖꠝꠣꠁꠡ, ꠍꠤꠟꠣꠘ ꠛꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠛꠤꠀ ꠇꠞꠣ ꠎꠣꠁꠎ ꠘꠣꠄ। ꠇꠣꠞꠘ ꠔꠣꠞꠣꠞ ꠀꠙꠘ ꠀꠟ꠆ꠟꠣꠞ ꠘꠣꠝꠦ ꠔꠣꠞꠣ ꠙꠛꠤꠔ꠆ꠞ। 8 ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠁꠝꠣꠝ ꠍꠣꠛ ꠅꠇꠟꠞꠦ ꠢꠣꠝꠦꠡꠣ ꠙꠛꠤꠔ꠆ꠞ ꠢꠤꠡꠣꠛꠦ ꠝꠣꠘꠤꠅ, ꠔꠣꠞꠣꠃ ꠔ ꠔꠥꠝꠞꠣꠞ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠞꠛꠣꠘꠤꠞ ꠈꠣꠘꠤ ꠡꠙꠤꠀ ꠖꠦꠁꠘ। ꠄꠞꠟꠣꠉꠤꠃ ꠔꠣꠞꠣꠞꠦ ꠙꠛꠤꠔ꠆ꠞ ꠇꠁꠀ ꠝꠣꠘꠤꠅ, ꠝꠘꠅ ꠞꠣꠈꠤꠅ, ꠀꠝꠤꠃ ꠔꠥꠝꠞꠣꠞꠦ ꠙꠛꠤꠔ꠆ꠞ ꠛꠣꠘꠣꠁꠍꠤ, ꠀꠞ ꠀꠝꠤ ꠘꠤꠎꠦ ꠔ ꠙꠣꠇ-ꠙꠛꠤꠔ꠆ꠞ। 9 ꠇꠥꠘꠥ ꠁꠝꠣꠝꠞ ꠙꠥꠠꠤ ꠎꠥꠖꠤ ꠍꠤꠟꠣꠘꠤ-ꠛꠖꠝꠣꠁꠡꠤꠞ ꠙꠕꠦ ꠉꠤꠀ ꠘꠣꠙꠣꠇ ꠛꠘꠤꠎꠣꠄ, ꠔꠦ ꠔꠣꠁꠞ ꠛꠣꠚꠞꠦꠅ ꠔꠣꠁ ꠛꠦꠁꠎ꠆ꠎꠔ ꠇꠞꠤꠟꠣꠄ। ꠄꠞꠟꠣꠉꠤ ꠔꠣꠁꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ ꠝꠣꠞꠤꠟꠤꠛꠣꠄ।

10 “ꠀꠞ ꠁꠝꠣꠝ ꠙꠞꠤꠛꠣꠞꠞ ꠜꠣꠁꠀꠁꠘ꠆ꠔꠞ ꠝꠣꠎꠦ ꠢꠇꠟ ꠛꠠ ꠎꠦꠁꠘ, ꠄꠁꠘꠃ ꠔ ꠙꠞꠗꠣꠘ ꠁꠝꠣꠝ, ꠄꠘ ꠝꠣꠕꠣꠔ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ ꠓꠣꠟꠣ ꠅꠁꠍꠦ, ꠈꠦꠟꠣꠚꠔꠤ ꠡꠝꠎꠤꠀ ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠙꠛꠤꠔ꠆ꠞ ꠟꠦꠛꠣꠍ ꠚꠤꠘ꠆ꠖꠤꠛꠣꠞ ꠖꠣꠄꠁꠔ꠆ꠔ ꠙꠣꠁꠍꠂꠘ। ꠄꠞꠟꠣꠉꠤ ꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤꠀ ꠇꠣꠘ꠆ꠖꠘ-ꠀꠢꠣꠎꠣꠞꠤꠞ ꠘꠤꠅꠔꠦ ꠔꠣꠘ ꠝꠣꠕꠣꠞ ꠙꠣꠃꠉꠠꠤ ꠈꠥꠟꠤꠀ ꠌꠥꠟ ꠀꠃꠟꠣ-ꠎꠣꠃꠟꠣ ꠇꠞꠣ, ꠛꠣ ꠔꠣꠘ ꠚꠤꠘ꠆ꠘꠞ ꠟꠦꠛꠣꠍ ꠍꠤꠠꠣꠅ ꠎꠣꠁꠎ ꠘꠣꠄ। 11 ꠄꠁꠘ ꠇꠥꠘꠥ ꠝꠞꠣ ꠟꠣꠡꠞ ꠇꠣꠘ꠆ꠖꠣꠔ ꠎꠣꠅꠀ ꠎꠣꠁꠎ ꠘꠣꠄ। ꠘꠤꠎꠞ ꠝꠣ-ꠛꠣꠚ ꠝꠣꠞꠣ ꠉꠦꠟꠦꠅ ꠄꠁꠘ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠘꠤ ꠎꠣꠁꠎ ꠘꠣꠄ। 12 ꠎꠦꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤ ꠔꠣꠁꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠇꠣꠛꠣ ꠊꠞ ꠍꠣꠠꠤꠀ ꠇꠥꠘꠥꠈꠣꠘꠅ ꠉꠤꠀ ꠀꠟ꠆ꠟꠣꠞ ꠅꠃ ꠊꠞꠞꠦ ꠘꠣꠙꠣꠇ ꠛꠣꠘꠣꠘꠤ ꠔꠣꠘ ꠟꠣꠉꠤ ꠢꠣꠞꠣꠝ। ꠝꠘꠅ ꠞꠣꠈꠤꠅ, ꠔꠣꠘ ꠀꠙꠘ ꠀꠟ꠆ꠟꠣꠞ ꠘꠣꠝꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ ꠓꠣꠟꠤꠀ ꠔꠣꠘꠞꠦ ꠙꠛꠤꠔ꠆ꠞ ꠛꠣꠘꠣꠁꠟ ꠅꠁꠍꠦ। ꠀꠝꠤꠃ ꠔ ꠝꠣꠛꠥꠖ।

13 “ꠇꠥꠘꠥ ꠀꠛꠤꠀꠔꠤ ꠡꠔꠤ ꠇꠁꠘꠣꠞꠦ ꠡꠣꠖꠤ ꠇꠞꠣ ꠔꠣꠘ ꠟꠣꠉꠤ ꠎꠣꠁꠎ ꠀꠍꠦ। 14 ꠅꠁꠟꠦ ꠇꠥꠘꠥ ꠠꠣꠠꠤ ꠛꠦꠐꠤ, ꠛꠖꠝꠣꠁꠡ-ꠍꠤꠟꠣꠘ ꠛꠦꠐꠤ ꠛꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠁꠝꠣꠝ ꠍꠣꠛꠦ ꠡꠣꠖꠤ ꠇꠞꠣ ꠎꠣꠁꠎ ꠘꠣꠄ। ꠈꠣꠟꠤ ꠘꠤꠎꠞ ꠉꠥꠡ꠆ꠐꠤꠞ ꠇꠥꠘꠥ ꠀꠛꠤꠀꠔꠤ ꠡꠔꠤ ꠇꠁꠘꠣꠞꠦ ꠡꠣꠖꠤ ꠇꠞꠣ ꠔꠣꠘ ꠟꠣꠉꠤ ꠎꠣꠁꠎ। 15 ꠀꠞꠘꠣꠄ ꠔꠣꠘ ꠇꠣꠞꠘꠦ ꠔꠣꠘ ꠘꠤꠎꠞ ꠈꠣꠘ꠆ꠖꠣꠘꠞ ꠝꠣꠎꠦ ꠔꠣꠘ ꠀꠅꠟꠣꠖ ꠅꠇꠟ ꠙꠛꠤꠔ꠆ꠞ ꠢꠣꠟꠔ ꠕꠣꠇꠤ ꠘꠣꠙꠣꠇ ꠛꠘꠛ। ꠀꠝꠤꠃ ꠔ ꠝꠣꠛꠥꠖ, ꠀꠝꠤꠃ ꠔꠣꠘꠞꠦ ꠙꠣꠇ-ꠙꠛꠤꠔ꠆ꠞ ꠛꠣꠘꠣꠁꠍꠤ।”

16 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ, 17 “ꠔꠥꠝꠤ ꠁꠝꠣꠝ ꠢꠣꠞꠥꠘꠞꠦ ꠎꠣꠘꠣꠁ ꠖꠦꠅ, ꠔꠣꠘ ꠈꠣꠘ꠆ꠖꠣꠘꠞ ꠝꠣꠎꠞ ꠡꠞꠤꠟꠞ ꠈꠥꠔ ꠀꠟꠣ ꠇꠥꠘꠥ ꠎꠘꠦꠃ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ, ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠘꠤꠡꠦꠗ। 18 ꠎꠦ ꠎꠘꠞ ꠡꠞꠤꠟꠅ ꠈꠥꠔ ꠀꠍꠦ, ꠝꠣꠘꠤ ꠀꠘ꠆ꠖꠣ, ꠟꠦꠋꠠꠣ, ꠘꠣꠇ-ꠇꠣꠐꠣ, ꠀꠔ-ꠙꠣꠅ ꠘꠤꠅꠝꠞ ꠛꠦꠡꠤ ꠟꠣꠝ꠆ꠛꠣ-ꠛꠣꠐ꠆ꠐꠤ ꠛꠣ ꠀꠋꠉꠥꠁꠟ ꠇꠝ-ꠛꠦꠡꠤ, 19 ꠀꠔ ꠛꠣ ꠙꠣꠅ ꠜꠣꠋꠉꠣ, 20 ꠙꠤꠑ ꠉꠥꠎꠣ, ꠛꠣꠐ꠆ꠐꠤ ꠜꠦꠋꠉꠣꠁ ꠝꠣꠘꠥꠡ, ꠌꠃꠈꠞ ꠛꠦꠝꠣꠞꠤ, ꠖꠣꠃꠖ-ꠈꠣꠃꠎꠟꠤ, ꠙꠌꠣ-ꠊꠣ ꠛꠦꠝꠣꠞꠤ ꠛꠣ ꠅꠘ꠆ꠒꠇꠥꠡ ꠘꠡ꠆ꠐ, ꠁꠟꠣ ꠈꠥꠔ ꠀꠟꠣ ꠇꠥꠘꠥ ꠝꠣꠘꠥꠡ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠎꠣꠁꠎ ꠘꠣꠄ। 21 ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠡꠞꠤꠟꠞ ꠈꠥꠔ ꠀꠟꠣ ꠇꠥꠘꠥ ꠎꠘꠦ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠘꠤꠡꠦꠗ। ꠔꠣꠞ ꠉꠔꠞꠅ ꠈꠥꠔ ꠕꠣꠇꠣꠄ ꠢꠦ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠉꠤꠀ ꠀꠝꠣꠞ ꠘꠣꠝꠞ ꠈꠣꠘꠤꠞꠦ ꠇꠥꠞꠛꠣꠘꠤ ꠖꠦꠅꠀ ꠎꠣꠁꠎ ꠘꠣꠄ। 22 ꠅꠁꠟꠦ ꠅꠃ ꠇꠥꠞꠛꠣꠘꠤꠞ ꠈꠣꠘꠤ ꠈꠣꠅꠀ ꠔꠣꠞ ꠟꠣꠉꠤ ꠎꠣꠁꠎ, ꠁꠔꠣ ꠙꠛꠤꠔ꠆ꠞ ꠛꠣ ꠈꠣꠍ-ꠙꠛꠤꠔ꠆ꠞ ꠅꠁꠟꠦꠅ ꠎꠣꠁꠎ ꠀꠍꠦ। 23 ꠔꠣꠞ ꠡꠞꠤꠟꠅ ꠈꠥꠔ ꠕꠣꠇꠣꠄ ꠢꠦ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠇꠣꠘ꠆ꠖꠣꠔ ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠘꠤꠡꠦꠗ, ꠢꠦ ꠎꠣꠘꠥ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠎꠣꠉꠣ ꠅꠇꠟꠞꠦ ꠘꠣꠙꠣꠇ ꠘꠣ ꠛꠣꠘꠣꠄ। ꠝꠘꠅ ꠞꠣꠈꠤꠅ, ꠀꠝꠤꠃ ꠝꠣꠛꠥꠖ, ꠀꠞ ꠀꠝꠤꠃ ꠅꠃ ꠎꠣꠉꠣꠁꠘ꠆ꠔꠞꠦ ꠙꠛꠤꠔ꠆ꠞ ꠇꠞꠤ।”

24 ꠛꠣꠖꠦ ꠝꠥꠍꠣꠄ ꠉꠤꠀ ꠁꠔꠣ ꠢꠇꠟꠔꠣ ꠁꠝꠣꠝ ꠢꠣꠞꠥꠘ, ꠔꠣꠘ ꠙꠥꠀꠂꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ।