1 ꠟꠣꠘ꠆ꠘꠔꠤ ꠅꠃ ꠉꠎꠛ ꠕꠣꠝꠤ ꠎꠣꠅꠀꠞ ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠞꠦ ꠇꠁꠟꠣ, 2 “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠥꠖ꠆ꠖ ꠇꠞꠣꠞ ꠎꠁꠉ꠆ꠉ ꠎꠦꠞꠣ ꠅꠁꠉꠦꠍꠦ, ꠄꠞꠣꠞꠦ ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠉꠘꠅ।” 3 ꠄꠞꠟꠣꠉꠤ ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠅ ꠝꠥꠀꠛ ꠖꠦꠡꠞ ꠎꠦ ꠔꠟ ꠎꠣꠉꠣ ꠀꠍꠦ, ꠢꠘꠅ ꠝꠥꠍꠣ ꠘꠛꠤꠄ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠘꠦꠔꠣ ꠅꠇꠟꠞꠦ ꠇꠁꠟꠣ, 4 “ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠅꠃꠟꠣ ꠔꠥꠝꠞꠣ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠢꠇꠟ ꠛꠦꠐꠣꠁꠘ꠆ꠔꠞꠦ ꠉꠘꠅ।” ꠔꠦꠃ ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠎꠔ ꠛꠦꠐꠣꠁꠘ ꠛꠣꠞ ꠅꠁꠀ ꠀꠁꠍꠟꠣ, ꠉꠘꠣꠞ ꠡꠝꠄ ꠄꠞꠣꠞ ꠛꠋꠡꠗꠞꠞ ꠘꠣꠝ ꠟꠦꠈꠣ ꠅꠁꠟ। ꠄꠞꠣ ꠅꠁꠟꠣ:

5 ꠁꠀꠇꠥꠛ ꠃꠞꠚꠦ ꠁꠍꠞꠣꠁꠟꠞ ꠛꠠ ꠙꠥꠀ ꠞꠥꠛꠦꠘꠞ ꠌꠣꠁꠞꠅ ꠙꠥꠀꠞ ꠛꠋꠡꠗꠞ: ꠞꠥꠛꠦꠘꠞ ꠛꠠ ꠙꠥꠀ ꠢꠘꠥꠇ ꠕꠣꠇꠤ ꠢꠘꠥꠇꠤ ꠛꠋꠡ, ꠚꠣꠟꠥ ꠕꠣꠇꠤ ꠚꠣꠟꠥꠁ ꠛꠋꠡ, 6 ꠢꠣꠍꠤꠞ ꠕꠣꠇꠤ ꠢꠣꠍꠤꠞꠤ ꠛꠋꠡ, ꠀꠞ ꠇꠞ꠆ꠝꠤ ꠕꠣꠇꠤ ꠇꠞ꠆ꠝꠤꠀ ꠛꠋꠡ। 7 ꠄꠞꠣ ꠢꠇꠟꠃ ꠞꠥꠛꠦꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠔꠦꠔꠣꠟ꠆ꠟꠤꠡ ꠀꠎꠣꠞ ꠡꠣꠔ-ꠡ ꠔꠤꠡ ꠎꠘꠞꠦ ꠙꠣꠅꠀ ꠉꠦꠟ। 8 ꠚꠣꠟꠥꠞ ꠙꠥꠀꠞ ꠘꠣꠝ ꠁꠟꠤꠀꠛ, 9 ꠁꠟꠤꠀꠛꠞ ꠙꠥꠀꠂꠘ ꠅꠁꠟꠣ ꠘꠝꠥꠄꠟ, ꠖꠣꠕꠘ ꠀꠞ ꠀꠛꠤꠞꠣꠝ। ꠖꠣꠕꠘ ꠀꠞ ꠀꠛꠤꠞꠣꠝ ꠛꠘꠤ ꠁꠍꠞꠣꠁꠟꠞ ꠖꠥꠁꠎꠘ ꠘꠦꠔꠣ ꠀꠍꠟꠣ, ꠔꠣꠞꠣ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠙꠇ꠆ꠇꠦ ꠟꠣꠉꠟꠣ। ꠀꠞ ꠇꠥꠞꠣꠢꠞ ꠖꠟ ꠎꠦꠛꠟꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠀꠍꠤꠟ, ꠅꠃ ꠡꠝꠄ ꠄꠞꠣꠅ ꠇꠥꠞꠣꠢꠞ ꠖꠟꠅ ꠀꠍꠟꠣ। 10 ꠇꠥꠞꠣꠢꠞ ꠟꠉꠦ ꠅꠃ ꠖꠥꠁꠎꠘꠞꠦꠅ ꠝꠣꠐꠤꠄ ꠀ ꠇꠞꠤ ꠉꠤꠟꠤꠟꠤꠍꠤꠟ ꠀꠞ ꠔꠣꠞ ꠖꠟꠞ ꠀꠠꠣꠁ-ꠡ ꠎꠘ ꠀꠉꠥꠁꠘꠦ ꠎꠟꠤꠀ ꠝꠞꠍꠤꠟ। ꠁꠔꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠢꠥꠡꠤꠀꠞꠤꠞ ꠘꠤꠡꠣꠘꠣ ꠅꠁꠀ ꠞꠁꠟ। 11 ꠅꠁꠟꠦ ꠇꠥꠞꠣꠢꠞ ꠙꠥꠀꠂꠘ ꠢꠤ ꠡꠝꠄ ꠝꠞꠍꠂꠘ ꠘꠣ, ꠔꠣꠞꠣꠞ ꠛꠋꠡ ꠎꠣꠞꠤ ꠞꠁꠍꠦ।

12 ꠁꠀꠇꠥꠛꠞ ꠙꠥꠀ ꠡꠤꠝꠤꠅꠘꠞ ꠛꠋꠡꠗꠞ ꠅꠁꠟꠣ, ꠘꠝꠥꠄꠟ ꠕꠣꠇꠤ ꠘꠝꠥꠄꠟꠤ ꠛꠋꠡ, ꠎꠣꠝꠤꠘ ꠕꠣꠇꠤ ꠎꠣꠝꠤꠘꠤ ꠛꠋꠡ, ꠎꠣꠈꠤꠘ ꠕꠣꠇꠤ ꠎꠣꠈꠤꠘꠤ ꠛꠋꠡ, 13 ꠎꠣꠞꠣꠢ ꠕꠣꠇꠤ ꠎꠣꠞꠣꠢꠤ ꠛꠋꠡ ꠀꠞ ꠡꠃꠟ ꠕꠣꠇꠤ ꠡꠃꠟꠤ ꠛꠋꠡ। 14 ꠁꠔꠣ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠣꠁꠡ ꠀꠎꠣꠞ ꠖꠥꠁ-ꠡ ꠎꠘ ꠙꠣꠅꠀ ꠉꠦꠟ।

15 ꠁꠀꠇꠥꠛꠞ ꠙꠥꠀ ꠍꠣꠖꠥꠞ ꠛꠋꠡꠗꠞ ꠅꠁꠟꠣ, ꠍꠤꠚꠘ ꠕꠣꠇꠤ ꠍꠤꠚꠘꠤ ꠛꠋꠡ, ꠢꠉꠤ ꠕꠣꠇꠤ ꠢꠉꠤꠀ ꠛꠋꠡ, ꠡꠥꠘꠤ ꠕꠣꠇꠤ ꠡꠥꠘꠤꠀ ꠛꠋꠡ, 16 ꠅꠎꠘꠤ ꠕꠣꠇꠤ ꠅꠎꠘꠤꠀ ꠛꠋꠡ, ꠄꠁꠞꠤ ꠕꠣꠇꠤ ꠄꠁꠞꠤꠀ ꠛꠋꠡ, 17 ꠅꠞꠥꠖ ꠕꠣꠇꠤ ꠅꠞꠥꠖꠤ ꠛꠋꠡ, ꠀꠞ ꠅꠞꠦꠟꠤ ꠕꠣꠇꠤ ꠅꠞꠦꠟꠤꠀ ꠛꠋꠡ। 18 ꠄꠞꠣ ꠅꠁꠟꠣ ꠍꠣꠖꠥ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎꠦ ꠉꠘꠣ ꠝꠣꠘꠥꠡ ꠅꠁꠟꠣ ꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।

19 ꠁꠀꠇꠥꠛꠞ ꠙꠥꠀ ꠄꠢꠥꠖꠣꠞ ꠖꠥꠁ ꠙꠥꠀꠞ ꠘꠣꠝ ꠀꠍꠤꠟ ꠄꠁꠞ ꠀꠞ ꠅꠘꠘ, ꠇꠦꠘꠣꠘ ꠖꠦꠡꠅ ꠕꠣꠇꠣꠞ ꠇꠣꠟꠅ ꠄꠞꠣ ꠝꠣꠞꠣ ꠉꠦꠍꠤꠟ। 20 ꠅꠁꠟꠦ ꠄꠢꠥꠖꠣꠞ ꠀꠞꠅ ꠙꠥꠀꠂꠘ ꠀꠍꠟꠣ, ꠄꠞꠣꠞ ꠛꠋꠡꠗꠞ ꠅꠁꠟꠣ, ꠡꠦꠟꠣ ꠕꠣꠇꠤ ꠡꠦꠟꠣꠄꠁ ꠛꠋꠡ, ꠚꠤꠞꠥꠎ ꠕꠣꠇꠤ ꠚꠤꠞꠥꠎꠤ, ꠎꠣꠞꠣꠢ ꠕꠣꠇꠤ ꠎꠣꠞꠣꠢꠤ ꠛꠋꠡ। 21 ꠚꠤꠞꠥꠎꠞ ꠛꠋꠡꠗꠞ ꠅꠁꠟꠣ ꠢꠣꠍꠤꠞ ꠕꠣꠇꠤ ꠢꠣꠍꠤꠞꠤ ꠛꠋꠡ ꠀꠞ ꠢꠣꠝꠥꠟ ꠕꠣꠇꠤ ꠢꠣꠝꠥꠟꠤ ꠛꠋꠡ। 22 ꠄꠞꠣ ꠢꠇꠟꠃ ꠄꠢꠥꠖꠣ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠍꠤꠅꠔ꠆ꠔꠁꠞ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ।

23 ꠁꠀꠇꠥꠛꠞ ꠙꠥꠀ ꠁꠍꠣꠈꠞꠞ ꠛꠋꠡꠗꠞ ꠅꠁꠟꠣ, ꠔꠟꠣ ꠕꠣꠇꠤ ꠔꠟꠣꠄꠁ ꠛꠋꠡ, ꠚꠅꠀ ꠕꠣꠇꠤ ꠚꠅꠀꠁ ꠛꠋꠡ, 24 ꠎꠣꠡꠥꠛ ꠕꠣꠇꠤ ꠎꠣꠡꠥꠛꠤ ꠛꠋꠡ ꠀꠞ ꠡꠤꠝꠞꠘ ꠕꠣꠇꠤ ꠡꠝꠞꠘꠤ ꠛꠋꠡ। 25 ꠄꠞꠣ ꠢꠇꠟ ꠁꠍꠣꠈꠞ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠌꠃꠡꠐ꠆ꠐꠤ ꠀꠎꠣꠞ ꠔꠤꠘ-ꠡ ꠎꠘꠞꠦ ꠙꠣꠅꠀ ꠉꠦꠟ।

26 ꠁꠀꠇꠥꠛꠞ ꠙꠥꠀ ꠍꠛꠥꠟꠘꠞ ꠛꠋꠡꠗꠞ ꠅꠁꠟꠣ ꠍꠦꠞꠦꠖ ꠕꠣꠇꠤ ꠍꠦꠞꠦꠖꠤ ꠛꠋꠡ, ꠄꠟꠘ ꠕꠣꠇꠤ ꠄꠟꠘꠤ ꠛꠋꠡ ꠀꠞ ꠎꠢꠟꠦꠟ ꠕꠣꠇꠤ ꠎꠢꠟꠦꠟꠤ ꠛꠋꠡ। 27 ꠄꠞꠣ ꠢꠇꠟ ꠍꠛꠥꠟꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠡꠣꠁꠐ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ।

28 ꠁꠀꠇꠥꠛꠞ ꠙꠥꠀ ꠁꠃꠍꠥꠚꠞ ꠙꠥꠀꠂꠘ ꠅꠁꠟꠣ ꠝꠣꠘꠡꠣ ꠀꠞ ꠀꠚꠞꠣꠁꠝ। 29 ꠄꠞꠣꠞ ꠝꠣꠎꠦ, ꠝꠣꠘꠡꠣꠞ ꠛꠋꠡꠗꠞ ꠅꠁꠟꠣ, ꠝꠣꠈꠤꠞ ꠕꠣꠇꠤ ꠝꠣꠈꠤꠞꠤ ꠛꠋꠡ, ꠀꠞ ꠝꠣꠈꠤꠞꠞ ꠙꠥꠀ ꠉꠤꠟꠤꠅꠖ ꠕꠣꠇꠤ ꠉꠤꠟꠤꠅꠖꠤ ꠛꠋꠡ। 30 ꠉꠤꠟꠤꠅꠖꠞ ꠛꠋꠡꠗꠞ ꠅꠁꠟꠣ ꠁꠀꠎꠤꠞ ꠕꠣꠇꠤ ꠁꠀꠎꠤꠞꠤ ꠛꠋꠡ, ꠢꠦꠟꠇ ꠕꠣꠇꠤ ꠢꠦꠟꠇꠤ ꠛꠋꠡ, 31 ꠅꠍꠞꠤꠄꠟ ꠕꠣꠇꠤ ꠅꠍꠞꠤꠄꠟꠤ ꠛꠋꠡ, ꠡꠦꠈꠝ ꠕꠣꠇꠤ ꠡꠦꠈꠝꠤ ꠛꠋꠡ, 32 ꠡꠤꠝꠤꠖꠣ ꠕꠣꠇꠤ ꠡꠤꠝꠤꠖꠣꠁ ꠛꠋꠡ ꠀꠞ ꠢꠦꠚꠞ ꠕꠣꠇꠤ ꠢꠦꠚꠞꠤ ꠛꠋꠡ। 33 ꠢꠦꠚꠞꠞ ꠙꠥꠀ ꠎꠟꠣꠙꠈꠣꠖ, ꠔꠣꠞ ꠇꠥꠘꠥ ꠙꠥꠀꠂꠘ ꠀꠍꠟꠣ ꠘꠣ, ꠈꠣꠟꠤ ꠙꠥꠠꠤꠘ ꠀꠍꠟꠣ। ꠙꠥꠠꠤꠘ꠆ꠔꠞ ꠘꠣꠝ ꠅꠁꠟ, ꠝꠢꠟꠣ, ꠘꠥꠀ, ꠢꠉꠟꠣ, ꠝꠤꠟꠇꠣ ꠀꠞ ꠔꠤꠞꠎꠣ। 34 ꠄꠞꠣ ꠢꠇꠟꠃ ꠝꠣꠘꠡꠣ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠣꠄꠀꠘ꠆ꠘ ꠀꠎꠣꠞ ꠡꠣꠔ-ꠡ ꠎꠘꠞꠦ ꠙꠣꠅꠀ ꠉꠦꠟ।

35 ꠁꠀꠇꠥꠛꠞ ꠙꠥꠀ ꠀꠚꠞꠣꠁꠝꠞ ꠛꠋꠡꠗꠞ ꠅꠁꠟꠣ, ꠡꠥꠔꠟꠢ ꠕꠣꠇꠤ ꠡꠥꠔꠟꠢꠤ, ꠛꠦꠈꠞ ꠕꠣꠇꠤ ꠛꠦꠈꠞꠤ ꠀꠞ ꠔꠢꠘ ꠕꠣꠇꠤ ꠔꠢꠘꠤ ꠛꠋꠡ। 36 ꠡꠥꠔꠟꠢꠞ ꠛꠋꠡ, ꠄꠞꠘ ꠕꠣꠇꠤ ꠄꠞꠘꠤ ꠛꠋꠡ। 37 ꠄꠞꠣ ꠢꠇꠟ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠔ꠆ꠔꠤꠡ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ। ꠈꠣꠘ꠆ꠖꠣꠘ ꠢꠤꠡꠣꠛꠦ ꠄꠞꠣ ꠢꠇꠟꠃ ꠁꠃꠍꠥꠚꠞ ꠛꠋꠡꠗꠞ।

38 ꠁꠀꠇꠥꠛꠞ ꠙꠥꠀ ꠛꠤꠘ-ꠁꠀꠝꠤꠘꠞ ꠛꠋꠡꠗꠞ ꠅꠁꠟꠣ, ꠛꠦꠟꠣ ꠕꠣꠇꠤ ꠛꠦꠟꠣꠄꠁ ꠛꠋꠡ, ꠅꠡꠛꠦꠟ ꠕꠣꠇꠤ ꠅꠡꠛꠦꠟꠤ ꠛꠋꠡ, ꠀꠢꠤꠞꠣꠝ ꠕꠣꠇꠤ ꠀꠢꠤꠞꠣꠝꠤ ꠛꠋꠡ, 39 ꠡꠥꠚꠝ ꠕꠣꠇꠤ ꠡꠥꠚꠝꠤ ꠛꠋꠡ, ꠀꠞ ꠢꠥꠚꠝ ꠕꠣꠇꠤ ꠢꠥꠚꠝꠤ ꠛꠋꠡ। 40 ꠛꠦꠟꠣꠞ ꠙꠥꠀꠂꠘ ꠅꠞ꠆ꠖ ꠀꠞ ꠘꠣꠝꠣꠘꠞ ꠝꠣꠎꠖꠤ ꠛꠦꠟꠣꠞ ꠛꠋꠡꠗꠞ ꠅꠁꠟꠣ, ꠅꠞ꠆ꠖ ꠕꠣꠇꠤ ꠅꠞ꠆ꠖꠤ ꠛꠋꠡ ꠀꠞ ꠘꠣꠝꠣꠘ ꠕꠣꠇꠤ ꠘꠣꠝꠣꠘꠤ ꠛꠋꠡ। 41 ꠄꠞꠣ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠙꠄꠔꠣꠟ꠆ꠟꠤꠡ ꠀꠎꠣꠞ ꠍꠄ-ꠡ ꠎꠘꠞꠦ ꠙꠣꠅꠀ ꠉꠦꠟ।

42 ꠁꠀꠇꠥꠛꠞ ꠙꠥꠀ ꠖꠣꠘꠞ ꠛꠋꠡꠗꠞ ꠅꠁꠟꠣ, ꠡꠥꠢꠝ ꠕꠣꠇꠤ ꠡꠥꠢꠝꠤ ꠛꠋꠡ। ꠄꠞꠣꠃ ꠀꠍꠟꠣ ꠖꠣꠘ ꠈꠣꠘ꠆ꠖꠣꠘꠞ ꠝꠣꠘꠥꠡ। 43 ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠌꠃꠡꠐ꠆ꠐꠤ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।

44 ꠁꠀꠇꠥꠛꠞ ꠙꠥꠀ ꠀꠡꠤꠞꠞ ꠛꠋꠡꠗꠞ ꠅꠁꠟꠣ, ꠁꠝꠘꠣ ꠕꠣꠇꠤ ꠁꠝꠘꠣꠄꠁ ꠛꠋꠡ, ꠎꠤꠍꠛꠤ ꠕꠣꠇꠤ ꠎꠤꠍꠛꠤꠀ ꠛꠋꠡ ꠀꠞ ꠛꠞꠤꠀ ꠕꠣꠇꠤ ꠛꠞꠤꠀꠄꠁ ꠛꠋꠡ। 45 ꠛꠞꠤꠀꠞ ꠛꠋꠡꠗꠞ ꠅꠁꠟꠣ ꠢꠦꠛꠞ ꠕꠣꠇꠤ ꠢꠦꠛꠞꠤ ꠛꠋꠡ, ꠀꠞ ꠝꠟꠇꠤꠄꠟ ꠕꠣꠇꠤ ꠝꠟꠇꠤꠄꠟꠤ ꠛꠋꠡ। 46 ꠀꠡꠤꠞꠞ ꠙꠥꠠꠤꠞ ꠘꠣꠝ ꠀꠍꠤꠟ ꠍꠦꠞꠣ। 47 ꠄꠞꠣ ꠢꠇꠟꠃ ꠀꠡꠤꠞ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠔꠦꠙ꠆ꠙꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।

48 ꠁꠀꠇꠥꠛꠞ ꠙꠥꠀ ꠘꠙ꠆ꠔꠣꠟꠤꠞ ꠛꠋꠡꠗꠞ ꠅꠁꠟꠣ, ꠎꠢꠡꠤꠄꠟ ꠕꠣꠇꠤ ꠎꠢꠡꠤꠄꠟꠤ ꠛꠋꠡ, ꠉꠥꠘꠤ ꠕꠣꠇꠤ ꠉꠥꠘꠤꠀ ꠛꠋꠡ, 49 ꠁꠎꠦꠞ ꠕꠣꠇꠤ ꠁꠎꠦꠞꠤ ꠛꠋꠡ, ꠀꠞ ꠡꠤꠟ꠆ꠟꠦꠝ ꠕꠣꠇꠤ ꠡꠤꠟ꠆ꠟꠦꠝꠤ ꠛꠋꠡ। 50 ꠄꠞꠣ ꠢꠇꠟꠃ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠙꠄꠔꠣꠟ꠆ꠟꠤꠡ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।

51 ꠔꠦ ꠉꠘꠣꠞ ꠛꠣꠖꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠅꠁꠟ, ꠝꠥꠐ ꠍꠄ ꠟꠣꠈ ꠄꠇ ꠀꠎꠣꠞ ꠡꠣꠔ-ꠡ ꠔꠤꠡ ꠎꠘ।

52 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 53 “ꠉꠘꠣ ꠅꠃ ꠝꠣꠘꠥꠡ ꠝꠣꠚꠤꠇ ꠀꠡ꠆ꠔꠣ ꠖꠦꠡꠞ ꠎꠝꠤꠘ ꠛꠣꠐꠤꠀ ꠖꠤꠔꠦ ꠅꠁꠛ, ꠎꠣꠔꠦ ꠢꠇꠟꠦ ꠎꠣꠞꠎꠤꠞ ꠛꠣꠐ ꠙꠣꠄ। 54 ꠎꠦ ꠈꠣꠘ꠆ꠖꠣꠘꠞ ꠝꠣꠘꠥꠡ ꠛꠦꠡꠤ ꠅꠃ ꠈꠣꠘ꠆ꠖꠣꠘꠞꠦ ꠛꠦꠡꠤ ꠀꠞ ꠎꠦ ꠈꠣꠘ꠆ꠖꠣꠘꠞ ꠝꠣꠘꠥꠡ ꠇꠝ, ꠅꠃ ꠈꠣꠘ꠆ꠖꠣꠘꠞꠦ ꠇꠝ ꠎꠣꠉꠣ ꠖꠤꠛꠣꠄ। ꠙꠞꠔꠦꠇ ꠈꠣꠘ꠆ꠖꠣꠘꠞ ꠝꠣꠘꠡꠦ ꠔꠣꠞ ꠝꠣꠘꠥꠡ ꠢꠤꠡꠣꠛꠦ ꠎꠣꠉꠣ-ꠎꠝꠤꠘ ꠙꠣꠁꠛ। 55 ꠀꠞ ꠇꠥꠘ ꠈꠣꠘ꠆ꠖꠣꠘꠦ ꠇꠥꠘ ꠎꠣꠉꠣꠔ ꠎꠝꠤꠘ ꠙꠣꠁꠛ, ꠁꠔꠣ ꠟꠐꠣꠞꠤ ꠝꠣꠞꠤꠀ ꠑꠤꠇ ꠇꠞꠣ ꠅꠁꠛ। ꠙꠞꠔꠦꠇ ꠛꠋꠡꠞ ꠙꠣꠅꠘꠣ ꠅꠋꠡ ꠔꠣꠞ ꠈꠣꠘ꠆ꠖꠣꠘꠞ ꠘꠣꠝꠦ ꠖꠦꠅꠀ ꠄꠟꠣꠇꠣꠞ ꠝꠣꠎꠦꠃ ꠕꠣꠇꠛ। 56 ꠈꠣꠘ꠆ꠖꠣꠘꠞ ꠝꠣꠘꠥꠡ ꠇꠝ ꠛꠣ ꠛꠦꠡꠤ ꠎꠦꠐꠣꠃ ꠅꠃꠇ, ꠟꠐꠣꠞꠤ ꠝꠣꠞꠤꠀ ꠎꠣꠉꠣ ꠑꠤꠇ ꠇꠞꠣ ꠅꠁꠛ।”

57 ꠢꠇꠟ ꠢꠦꠡꠦ ꠟꠦꠛꠤ ꠈꠣꠘ꠆ꠖꠣꠘꠞ ꠛꠋꠡꠗꠞ ꠉꠘꠣ ꠅꠁꠟ। ꠄꠞꠣ ꠅꠁꠟꠣ, ꠎꠣꠞꠍꠥꠘ ꠕꠣꠇꠤ ꠎꠣꠞꠍꠥꠘꠤ ꠉꠥꠡ꠆ꠐꠤ, ꠇꠣꠢꠣꠔ ꠕꠣꠇꠤ ꠇꠣꠢꠣꠔꠤ ꠉꠥꠡ꠆ꠐꠤ ꠀꠞ ꠝꠣꠞꠣꠞꠤ ꠕꠣꠇꠤ ꠝꠣꠞꠣꠞꠤꠀ ꠉꠥꠡ꠆ꠐꠤ। 58 ꠟꠦꠛꠤ ꠈꠣꠘ꠆ꠖꠣꠘꠞ ꠇꠤꠍꠥ ꠘꠣꠝꠇꠞꠣ ꠙꠞꠤꠛꠣꠞ ꠀꠍꠤꠟ, ꠄꠞꠣꠞ ꠝꠥꠟ ꠛꠣꠚꠞ ꠘꠣꠝ ꠅꠁꠟ ꠟꠤꠛꠘꠤ, ꠢꠦꠛꠞꠘ, ꠝꠢꠟꠤ, ꠝꠥꠡꠤ ꠀꠞ ꠇꠥꠞꠣꠢ।

ꠇꠣꠢꠣꠔꠞ ꠄꠇ ꠙꠥꠀꠞ ꠘꠣꠝ ꠀꠍꠤꠟ ꠁꠝꠞꠣꠘ। 59 ꠁꠝꠞꠣꠘꠞ ꠛꠃꠞ ꠘꠣꠝ ꠁꠃꠈꠣꠛꠦꠎ, ꠝꠤꠡꠞ ꠖꠦꠡꠅ ꠕꠣꠇꠔꠦ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠦ ꠄꠘ ꠎꠘꠝ ꠅꠁꠍꠤꠟ। ꠄꠘ ꠙꠦꠐ ꠕꠣꠇꠤ ꠁꠝꠞꠣꠘꠞ ꠙꠥꠀꠂꠘ ꠢꠣꠞꠥꠘ ꠀꠞ ꠝꠥꠍꠣ ꠀꠞ ꠔꠣꠞꠣꠞ ꠛꠁꠘ ꠝꠞꠤꠅꠝꠞ ꠎꠘꠝ ꠅꠁꠍꠤꠟ। 60 ꠢꠣꠞꠥꠘꠞ ꠙꠥꠀꠂꠘ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ। 61 ꠅꠁꠟꠦ ꠝꠣꠛꠥꠖꠞ ꠢꠥꠇꠥꠝ ꠜꠣꠋꠉꠤꠀ ꠖꠥꠍꠞꠣ ꠀꠉꠥꠁꠘ ꠖꠤꠀ ꠄꠛꠣꠖꠔ ꠇꠞꠣꠔ ꠉꠤꠀ ꠘꠣꠖꠣꠛ ꠀꠞ ꠀꠛꠤꠢꠥ ꠅꠃ ꠖꠥꠁ ꠎꠘꠞ ꠝꠞꠘ ꠅꠁꠍꠤꠟ।

62 ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠟꠦꠛꠤ ꠈꠣꠘ꠆ꠖꠣꠘꠞ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠀꠍꠤꠟ ꠔꠦꠁꠡ ꠀꠎꠣꠞ। ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠄꠞꠣꠞꠦ ꠇꠥꠘꠥ ꠎꠣꠉꠣꠞ ꠝꠣꠟꠤꠇꠣꠘꠣ ꠖꠦꠅꠀ ꠅꠁꠍꠦ ꠘꠣ ꠉꠔꠤꠇꠦ ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘꠣꠁꠘ꠆ꠘ ꠈꠣꠘ꠆ꠖꠣꠘꠞ ꠟꠉꠦ ꠄꠞꠣꠞꠦ ꠄꠇꠟꠉꠦ ꠉꠘꠣꠅ ꠅꠁꠍꠦ ꠘꠣ।

63 ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛꠞ ꠔꠟ ꠎꠣꠉꠣꠔ ꠖꠥꠍꠞꠣꠛꠣꠞ ꠝꠣꠘꠥꠡ ꠉꠘꠣꠞ ꠡꠝꠄ ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠛꠘꠤ ꠁꠍꠞꠣꠁꠟꠞꠦ ꠉꠘꠟꠣ। 64 ꠅꠁꠟꠦ ꠙꠄꠟꠣ ꠛꠣꠞ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠥꠍꠣ ꠀꠞ ꠁꠝꠣꠝ ꠢꠣꠞꠥꠘꠦ ꠛꠘꠤ ꠁꠍꠞꠣꠁꠟꠞ ꠎꠣꠞꠣꠞꠦ ꠉꠘꠤꠍꠟꠣ, ꠅꠃ ꠖꠥꠍꠞꠣꠛꠣꠞ ꠉꠘꠣꠞ ꠡꠝꠄ ꠄꠞꠣꠞ ꠝꠣꠎꠞ ꠄꠇꠎꠘꠅ ꠎꠤꠘ꠆ꠖꠣ ꠞꠁꠍꠂꠘ ꠘꠣ। 65 ꠀꠍꠟꠦ ꠅꠔꠣ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠝꠣꠛꠥꠖꠦ ꠀꠉꠦꠃ ꠇꠁꠍꠟꠣ, ꠔꠣꠞꠣ ꠘꠤꠌ꠆ꠌꠄ ꠅꠃ ꠝꠞꠥꠜꠥꠝꠤꠔ ꠝꠣꠞꠣ ꠎꠣꠁꠛꠣ। ꠀꠞ ꠢꠣꠍꠣꠃ ꠈꠣꠟꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠀ ꠁꠃꠍꠣ ꠍꠣꠠꠣ ꠔꠣꠞꠣꠞ ꠝꠣꠎꠞ ꠖꠥꠍꠞꠣ ꠇꠦꠃ ꠎꠤꠘ꠆ꠖꠣ ꠞꠁꠍꠤꠟ ꠘꠣ।