ꠀꠟ-ꠎꠛꠥꠞ ৩৭
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
א ꠀꠟꠦꠚ
1 ꠘꠣꠚꠞꠝꠣꠘꠞ ꠃꠘ꠆ꠘꠔꠤ ꠖꠦꠈꠤꠀ ꠝꠘ ꠈꠣꠞꠣꠙ ꠇꠞꠤꠅ ꠘꠣ,
ꠔꠣꠞꠣꠞ ꠜꠣꠟꠣꠁ ꠖꠦꠈꠤꠀ ꠢꠣꠞꠤ ꠇꠞꠤꠅ ꠘꠣ ꠁꠋꠡꠣ।
2 ꠔꠣꠞꠣ ꠔ ꠊꠣꠡꠞ ꠟꠣꠈꠣꠘ ꠎꠟꠖꠤ ꠢꠥꠇꠣꠁ ꠎꠤꠛ,
ꠛꠘ꠆ꠖꠞ ꠙꠣꠔꠣ-ꠍꠣꠔꠣꠞ ꠟꠣꠈꠣꠘ ꠁꠔꠣꠞ ꠛꠦꠢꠣꠟꠔ ꠅꠁꠛ।
ב ꠛꠦꠕ
3 ꠝꠣꠛꠥꠖꠞ ꠃꠙꠞꠦ ꠜꠞꠡꠣ ꠇꠞꠤ ꠘꠦꠇ ꠇꠣꠝ ꠇꠞꠅ,
ꠢꠇ-ꠢꠣꠟꠣꠟ ꠞꠁꠀ ꠢꠣꠞꠤ ꠛꠡꠔ ꠇꠞꠅ ꠖꠦꠡꠅ।
4 ꠈꠥꠡꠤ-ꠛꠣꠡꠤ ꠇꠞꠅ ꠔꠥꠝꠤ ꠝꠣꠛꠥꠖꠞꠦ ꠟꠁꠀ,
ꠔꠣꠁꠘꠃ ꠔꠥꠝꠣꠞ ꠝꠘꠞ ꠀꠡꠣ ꠙꠥꠞꠘ ꠇꠞꠤꠛꠣ।
ג ꠉꠤꠝꠦꠟ
5 ꠔꠥꠝꠣꠞ ꠎꠤꠘ꠆ꠖꠦꠉꠤꠞ ꠢꠇꠟ ꠜꠣꠞ ꠝꠣꠛꠥꠖꠞ ꠀꠔꠅ ꠍꠣꠠꠅ,
ꠔꠣꠁꠘꠃ ꠌꠣꠟꠣꠁꠛꠣ ꠢꠇꠟꠔꠣ, ꠘꠤꠌ꠆ꠌꠤꠔ ꠜꠞꠡꠣ ꠞꠣꠈꠅ।
6 ꠔꠣꠁꠘ ꠔꠥꠝꠣꠞ ꠙꠞꠦꠎꠉꠣꠞꠤꠞꠦ ꠇꠞꠛꠣ ꠃꠎꠤꠟꠣ,
ꠔꠥꠝꠣꠞ ꠘꠤꠞ꠆ꠖꠥꠡꠤꠔꠣ ꠎꠣꠁꠞ ꠇꠞꠛꠣ ꠖꠥꠁꠚꠞꠞ ꠟꠣꠈꠣꠘ ꠌꠇꠌꠇꠣ।
ד ꠖꠣꠟꠦꠕ
7 ꠝꠣꠛꠥꠖꠞ ꠍꠣꠝꠘꠦ ꠘꠤꠞꠣꠁ ꠞꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠁꠅ,
ꠚꠘ꠆ꠖꠤꠛꠣꠎꠞ ꠃꠘ꠆ꠘꠔꠤ ꠖꠦꠈꠤꠀ ꠛꠦꠎꠣꠞ ꠘꠣ ꠅꠁꠅ।
ה ꠢꠦ
8 ꠉꠥꠍꠣꠞꠦ ꠖꠝꠘ ꠇꠞꠤꠀ ꠕꠣꠝꠣꠅ ꠝꠤꠎꠣꠎ ꠖꠦꠈꠣꠘꠤ,
ꠛꠦꠎꠣꠞ ꠅꠁꠅ ꠘꠣ ꠔꠥꠝꠤ, ꠈꠣꠞꠣꠙꠤꠃ ꠁꠔꠣꠞ ꠚꠟ ꠈꠣꠟꠤ।
9 ꠝꠣꠛꠥꠖꠞ ꠜꠞꠡꠣ ꠇꠞꠞꠣꠄ ꠖꠦꠡꠞ ꠝꠃꠞꠡꠤ-ꠝꠣꠟꠤꠇ ꠛꠘꠤꠛ,
ꠘꠣꠚꠞꠝꠣꠘ ꠅꠇꠟꠞ ꠔ ꠘꠤꠌ꠆ꠌꠤꠔ ꠡꠞ꠆ꠛꠘꠣꠡ ꠅꠁꠛ।
ו ꠛꠣꠃ
10 ꠕꠥꠠꠣ ꠖꠤꠘ ꠛꠣꠖꠦꠃ ꠘꠣꠚꠞꠝꠣꠘ ꠅꠁꠛ ꠘꠤꠙꠣꠔ,
ꠔꠥꠇꠣꠁꠟꠦꠅ ꠝꠤꠟꠔ ꠘꠣꠄ ꠀꠞ ꠔꠣꠞꠣꠞ ꠎꠣꠉꠣꠔ।
11 ꠘꠞꠝ ꠖꠤꠟꠞ ꠝꠣꠘꠡꠦ ꠙꠣꠁꠛꠣ ꠖꠦꠡꠞ ꠝꠣꠟꠤꠇꠣꠘꠣ,
ꠡꠣꠄ-ꠡꠣꠘ꠆ꠔꠤꠄ ꠞꠁꠀ ꠔꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣ।
ז ꠎꠣꠁꠘ
12 ꠘꠣꠚꠞꠝꠣꠘꠦ ꠍꠟ-ꠌꠔꠥꠞꠤ ꠇꠞꠦ ꠙꠞꠦꠎꠉꠣꠞꠞ ꠛꠤꠙꠇ꠆ꠇꠦ,
ꠖꠥꠡꠝꠘꠤ ꠇꠞꠤꠀ ꠔꠣꠞꠣ ꠖꠣꠔ ꠇꠤꠠꠤꠝꠤꠠꠤ ꠇꠞꠦ।
13 ꠔꠣꠞꠣꠞ ꠢꠣꠟꠔ ꠖꠦꠈꠤꠀ ꠢꠣꠞꠤ ꠝꠣꠛꠥꠖꠦ ꠔ ꠀꠡꠂꠘ,
ꠘꠣꠚꠞꠝꠣꠘꠞ ꠖꠤꠘ ꠡꠦꠡ ꠁꠔꠣ ꠔꠣꠁꠘ ꠖꠦꠈꠂꠘ।
ח ꠢꠦꠕ
14 ꠖꠥꠈꠤ-ꠇꠣꠋꠉꠣꠟꠞꠦ ꠙꠣꠅꠖꠤ ꠃꠠꠤꠀ ꠈꠥꠘꠞ ꠈꠤꠀꠟꠦ,
ꠘꠣꠚꠞꠝꠣꠘꠦ ꠔꠟꠥꠀꠞ ꠈꠥꠟꠤꠀ ꠔꠤꠞ-ꠗꠘꠥꠇ ꠢꠣꠎꠣꠁ ꠞꠣꠈꠦ।
15 ꠅꠃ ꠔꠟꠥꠀꠞ ꠔꠣꠞꠣꠞ ꠘꠤꠎꠞ ꠇꠟꠤꠎꠣꠔꠃ ꠢꠣꠝꠣꠁꠛ,
ꠔꠣꠞꠣꠞ ꠔꠤꠞ-ꠗꠘꠥꠇꠅ ꠜꠣꠋꠉꠤꠀ ꠢꠣꠞꠤ ꠛꠦꠇꠣꠝꠣ ꠅꠁꠛ।
ט ꠐꠦꠕ
16 ꠘꠣꠚꠞꠝꠣꠘꠞ ꠛꠦꠡꠤ ꠗꠘ-ꠖꠃꠟꠔ ꠕꠣꠇꠤꠀ,
ꠙꠞꠦꠎꠉꠣꠞꠞ ꠕꠥꠠꠣ ꠗꠘꠃ ꠛꠃꠔ ꠜꠣꠟꠣ।
17 ꠘꠣꠚꠞꠝꠣꠘꠞ ꠀꠔ ꠔ ꠎꠣꠁꠛꠉꠤ ꠜꠣꠋꠉꠤꠀ,
ꠙꠞꠦꠎꠉꠣꠞꠞꠦ ꠛꠣꠌꠣꠁꠘ ꠘꠤꠌ꠆ꠌꠄ ꠝꠣꠛꠥꠖꠦ ꠗꠞꠤꠀ।
י ꠁꠃꠗ
18 ꠝꠣꠛꠥꠖꠦ ꠖꠦꠈꠂꠘ ꠖꠤꠘꠖꠣꠞꠞ ꠎꠤꠘ꠆ꠖꠦꠉꠤꠞ ꠢꠣꠟꠔ,
ꠌꠤꠞꠇꠣꠟ ꠎꠣꠞꠤ ꠞꠁꠛ ꠔꠣꠞꠣꠞ ꠝꠃꠞꠡꠤ ꠖꠃꠟꠔ।
19 ꠝꠍꠤꠛꠔꠞ ꠖꠤꠘꠅ ꠔꠣꠞꠣ ꠅꠁꠔ ꠘꠣꠄ ꠡꠞꠝꠤꠘ꠆ꠖꠣ,
ꠀꠇꠣꠟ-ꠘꠤꠖꠣꠘꠞ ꠇꠣꠟꠅ ꠔꠣꠞꠣ ꠙꠦꠐ ꠜꠞꠣ ꠈꠣꠘꠤ ꠙꠣꠁꠛꠣ।
כ ꠇꠣꠚ
20 ꠘꠣꠝ-ꠘꠤꠡꠣꠘꠣ ꠝꠤꠐꠤꠎꠤꠛ ꠎꠣꠞꠣ ꠘꠣꠚꠞꠝꠣꠘ,
ꠝꠣꠛꠥꠖꠞ ꠖꠥꠡꠝꠘ ꠢꠥꠇꠣꠁ ꠎꠤꠛ ꠀꠅꠞꠤ ꠚꠥꠟꠞ ꠟꠣꠈꠣꠘ,
ꠖꠦꠈꠛꠣꠄ ꠔꠣꠞꠣꠞ ꠢꠇ꠆ꠇꠟꠔꠣ ꠚꠥꠠꠣꠁ ꠎꠤꠛ,
ꠗꠥꠝꠣꠞ ꠟꠣꠈꠣꠘ ꠁꠔꠣ ꠛꠣꠔꠣꠡꠅ ꠝꠤꠡꠤꠛ।
ל ꠟꠣꠝꠦꠗ
21 ꠘꠣꠚꠞꠝꠣꠘꠦ ꠇꠞ꠆ꠎ ꠘꠤꠀ ꠚꠤꠞꠔ ꠘꠣ ꠖꠤꠟꠣꠄ,
ꠙꠞꠦꠎꠉꠣꠞꠦ ꠖꠣꠘ ꠛꠤꠟꠣꠄ ꠝꠣꠄꠀ-ꠝꠝꠔꠣꠄ।
22 ꠝꠣꠛꠥꠖꠞ ꠞꠢꠝꠔꠤ ꠎꠘ ꠎꠣꠞꠣ ꠖꠦꠡꠞ ꠝꠣꠟꠤꠇ ꠅꠁꠛ ꠔꠣꠞꠣ,
ꠔꠣꠘ ꠟꠣꠘ꠆ꠘꠔꠤ ꠎꠘꠞ ꠔ ꠝꠤꠐꠤꠎꠤꠛ ꠘꠣꠝ-ꠘꠤꠡꠣꠘꠣ।
מ ꠝꠦꠝ
23 ꠎꠣꠞꠣꠞ ꠌꠣꠟ-ꠌꠟꠘ ꠖꠦꠈꠤꠀ ꠝꠣꠛꠥꠖ ꠅꠁꠘ ꠈꠥꠡꠤ,
ꠔꠣꠁꠘꠃ ꠝꠎꠛꠥꠔ ꠇꠞꠂꠘ ꠔꠣꠞꠣꠞ ꠌꠟꠣꠞ ꠉꠔꠤ।
24 ꠡ꠆ꠛꠄꠅꠋ ꠝꠣꠛꠥꠖꠦ ꠔꠣꠞꠣꠞ ꠀꠔꠅ ꠗꠞꠤꠀ ꠞꠣꠈꠣꠄ,
ꠃꠡ꠆ꠐꠣ ꠈꠣꠁꠟꠦꠅ ꠔꠣꠞꠣ ꠙꠠꠤꠀ ꠞꠁꠔ ꠘꠣꠄ।
נ ꠘꠥꠘ
25 ꠀꠝꠤ ꠀꠉꠦ ꠎꠥꠀꠘ ꠀꠍꠟꠣꠝ ꠅꠈꠘ ꠛꠥꠠꠣ ꠅꠁꠍꠤ,
ꠙꠞꠦꠎꠉꠣꠞꠞꠦ ꠍꠣꠠꠤꠀ ꠎꠣꠁꠔꠦ ꠀꠝꠤ ꠘꠣ ꠖꠦꠈꠍꠤ,
ꠔꠣꠞꠣꠞ ꠀꠅꠟꠣꠖꠞꠦꠅ ꠇꠥꠘꠥꠖꠤꠘ ꠜꠤꠇ ꠇꠞꠣꠔ ꠘꠣ ꠙꠣꠁꠍꠤ।
26 ꠖꠄꠀ-ꠝꠣꠄꠀ ꠇꠞꠦ ꠝꠣꠘꠡꠞꠦ ꠞꠤꠘ ꠖꠦꠄ ꠢꠣꠝꠦꠡꠣ,
ꠔꠣꠞꠣꠞ ꠀꠅꠟꠣꠖꠦꠅ ꠔ ꠞꠢꠝ-ꠛꠞꠇꠔ ꠙꠣꠁꠛꠣ।
ס ꠡꠣꠝꠦꠈ
27 ꠛꠖ ꠇꠣꠝ ꠍꠣꠠꠅ ꠘꠦꠇ ꠇꠣꠝ ꠇꠞꠅ,
ꠔꠦꠃ ꠔꠥꠝꠤ ꠌꠤꠞꠇꠣꠟ ꠛꠡꠔ ꠇꠞꠛꠣꠄ ꠅꠘꠅ।
28 ꠝꠣꠛꠥꠖꠦ ꠔ ꠜꠣꠟꠣ ꠙꠣꠁꠘ ꠢꠇ ꠁꠘꠍꠣꠚ,
ꠔꠣꠁꠘ ꠘꠤꠎꠞ ꠀꠡꠤꠇꠣꠘꠞꠦ ꠇꠞꠂꠘ ꠘꠣ ꠔ ꠔꠤꠀꠉ।
ע ꠀꠁꠘ
ꠘꠣꠚꠞꠝꠣꠘꠞ ꠛꠤꠘꠣꠡ ꠅꠁꠛ ꠌꠤꠞꠇꠣꠟꠞ ꠟꠣꠉꠤ,
ꠔꠣꠞꠣꠞ ꠛꠋꠡ-ꠛꠥꠘꠤꠀꠖ ꠝꠤꠐꠤꠎꠤꠛ ꠖꠥꠘꠤꠀ ꠕꠣꠇꠤ।
29 ꠖꠦꠡꠞ ꠝꠣꠟꠤꠇꠣꠘꠣ ꠙꠣꠁꠛꠣ ꠙꠞꠦꠎꠉꠣꠞꠦ,
ꠌꠤꠞꠇꠣꠟ ꠞꠁꠛꠣ ꠔꠣꠞꠣ ꠅꠃ ꠎꠣꠉꠣꠞ ꠝꠣꠎꠦ।
פ ꠙꠦ
30 ꠙꠞꠦꠎꠉꠣꠞꠞ ꠝꠥꠈꠖꠤ ꠛꠣꠞ ꠅꠄ ꠉꠤꠀꠘꠞ ꠛꠥꠟꠤ,
ꠢꠇ ꠛꠤꠌꠣꠞꠞ ꠝꠣꠔ ꠛꠣꠞ ꠅꠄ ꠔꠣꠞꠣꠞ ꠎꠤꠚꠞꠣꠖꠤ।
31 ꠀꠟ꠆ꠟꠣꠞ ꠢꠥꠇꠥꠝ ꠉꠣꠕꠣ ꠀꠍꠦ ꠔꠣꠞꠣꠞ ꠖꠤꠟꠅ,
ꠙꠤꠍꠟꠤꠔ ꠘꠣꠄ ꠔꠣꠞꠣꠞ ꠙꠣꠅ ꠝꠎꠛꠥꠔ ꠞꠁꠛ।
צ ꠍꠣꠗꠦ
32 ꠘꠣꠚꠞꠝꠣꠘꠦ ꠃꠔ ꠙꠣꠔꠤꠀ ꠞꠄ ꠙꠞꠦꠎꠉꠣꠞꠞ ꠛꠣꠄ,
ꠄꠘꠞꠦ ꠈꠥꠘꠞ ꠀꠡꠣꠄ ꠢꠦ ꠡꠥꠎꠥꠉ ꠔꠥꠇꠣꠄ।
33 ꠝꠣꠛꠥꠖꠦ ꠔꠣꠘꠞꠦ ꠍꠣꠠꠔꠣ ꠘꠣꠄ ꠘꠣꠚꠞꠝꠣꠘꠞ ꠀꠔꠅ,
ꠔꠣꠘ ꠡꠣꠎꠣ ꠅꠁꠔꠦ ꠖꠤꠔꠣ ꠘꠣꠄ ꠀꠖꠣꠟꠔꠞ ꠛꠤꠌꠣꠞꠅ।
ק ꠇꠚ
34 ꠝꠣꠛꠥꠖꠞ ꠟꠣꠉꠤ ꠛꠣꠞ ꠌꠣꠅ, ꠔꠣꠘ ꠖꠦꠈꠣꠁꠟ ꠙꠕꠦ ꠌꠟꠅ,
ꠔꠣꠁꠘ ꠔꠥꠝꠞꠣꠞꠦ ꠇꠞꠛꠣ ꠛꠠ, ꠖꠦꠡꠞ ꠖꠈꠟ ꠙꠣꠁꠛꠣꠄ,
ꠘꠣꠚꠞꠝꠣꠘ ꠖꠟꠞ ꠛꠤꠘꠣꠡ ꠘꠤꠎꠞ ꠌꠃꠈꠦ ꠖꠦꠈꠛꠣꠄ।
ר ꠞꠦꠡ
35 ꠙꠣꠡꠣꠘ ꠘꠣꠚꠞꠝꠣꠘꠞꠦ ꠖꠦꠈꠟꠣꠝ ꠛꠃꠔ ꠛꠠ ꠁꠎ꠆ꠎꠔꠤ,
ꠔꠞꠔꠣꠎꠣ ꠉꠣꠍꠞ ꠟꠣꠈꠣꠘ ꠒꠣꠟ-ꠙꠣꠟꠣ ꠔꠣꠞ ꠌꠣꠁꠞꠅꠛꠣꠄꠖꠤ।
36 ꠢꠤꠞꠛꠣꠞ ꠉꠦꠟꠣꠝ ꠀꠝꠤ ꠔꠣꠞꠦ ꠀꠞ ꠙꠣꠁꠟꠣꠝ ꠘꠣ,
ꠔꠥꠇꠣꠁꠟꠣꠝ ꠛꠃꠔ ꠀꠝꠤ ꠈꠥꠎ-ꠈꠛꠞ ꠝꠤꠟꠟ ꠘꠣ।
ש ꠡꠤꠘ
37 ꠘꠤ-ꠅꠙꠞꠣꠗꠤꠞ ꠛꠣꠄ ꠌꠣꠅ ꠖꠦꠈꠅ ꠢꠇ ꠝꠣꠘꠡꠞ ꠛꠣꠄ,
ꠐꠤꠇꠤꠀ ꠞꠄ ꠔꠣꠞ ꠀꠅꠟꠣꠖ ꠡꠣꠄ-ꠡꠣꠘ꠆ꠔꠤ ꠎꠦ ꠜꠣꠟꠣ ꠙꠣꠄ।
38 ꠢꠇ꠆ꠇꠟ ꠈꠣꠞꠣꠙ ꠝꠣꠘꠡꠞ ꠅꠁꠛ ꠡꠞ꠆ꠛꠘꠣꠡ
ꠘꠣꠚꠞꠝꠣꠘꠞ ꠛꠋꠡ-ꠛꠥꠘꠤꠀꠖ ꠅꠁꠛ ꠛꠤꠘꠣꠡ।
ת ꠔꠣꠃ
39 ꠙꠞꠦꠎꠉꠣꠞꠞ ꠘꠣꠎꠣꠔ ꠀꠄ ꠝꠣꠛꠥꠖꠞ ꠉꠦꠍ ꠕꠣꠇꠤ,
ꠔꠣꠞꠣꠞ ꠝꠍꠤꠛꠔꠞ ꠇꠣꠟꠅ ꠔꠣꠁꠘ ꠞꠂꠘ ꠛꠣꠋꠇꠣꠞ ꠛꠘꠤ।
40 ꠝꠣꠛꠥꠖꠦ ꠡꠣꠁꠎ꠆ꠎ ꠇꠞꠤꠀ ꠘꠤꠡ꠆ꠔꠣꠞ ꠖꠦꠁꠘ ꠔꠣꠞꠣꠞꠦ,
ꠔꠣꠘ ꠀꠡꠞꠄ ꠟꠅꠀꠄ ꠘꠣꠚꠞꠝꠣꠘꠞ ꠇꠛꠎꠣ ꠕꠣꠇꠤ ꠎꠣꠘꠦ ꠛꠣꠌꠣꠁꠘ ꠄꠞꠣꠞꠦ॥