1 ꠀꠝꠤ ꠙꠣꠃꠟꠥꠍ ꠔ ꠀꠟ꠆ꠟꠣ ꠙꠣꠇꠞ ꠉꠥꠟꠣꠝ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠀꠝꠣꠞ ꠖꠣꠄꠁꠔ꠆ꠔ ꠅꠁꠟ, ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠁꠝꠣꠘꠞ ꠙꠕꠦ ꠀꠘꠣ, ꠀꠞ ꠀꠟ꠆ꠟꠣꠞꠦ ꠝꠣꠘꠤꠀ ꠌꠟꠣꠞ ꠝꠣꠎꠦ ꠎꠦ ꠢꠇꠤꠇꠔ ꠀꠍꠦ, ꠅꠃ ꠢꠇꠤꠇꠔꠞꠦ ꠌꠤꠘꠣꠁ ꠖꠦꠅꠀ। 2 ꠀꠝꠤ ꠀꠟ-ꠝꠍꠤꠞ ꠈꠦꠎꠝꠔ ꠇꠞꠤꠀꠞ, ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠀꠡꠣꠄ। ꠎꠦ ꠀꠟ꠆ꠟꠣꠄ ꠇꠥꠘꠥ ꠝꠤꠍꠣ ꠝꠣꠔꠂꠘ ꠘꠣ, ꠢꠃ ꠀꠟ꠆ꠟꠣꠄ ꠁ ꠎꠤꠘ꠆ꠖꠦꠉꠤ ꠖꠦꠅꠀꠞ ꠅꠀꠖꠣ ꠇꠞꠍꠂꠘ, ꠖꠥꠘꠤꠀ ꠙꠄꠖꠣ ꠅꠀꠞ ꠀꠉꠦꠃ। 3 ꠔꠣꠁꠘ ꠔꠣꠘ ꠇꠣꠟꠣꠝ ꠡꠑꠤꠇ ꠡꠝꠄꠄ ꠎꠣꠁꠞ ꠇꠞꠍꠂꠘ, ꠀꠞ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠁꠔꠣ ꠔꠛꠟꠤꠉ ꠇꠞꠣꠞ ꠜꠣꠞ ꠀꠝꠣꠞ ꠀꠔꠅ ꠖꠦꠅꠀ ꠅꠁꠍꠦ।

4 ꠀꠝꠣꠞ ꠢꠃ ꠈꠣꠍ ꠀꠅꠟꠣꠖ ꠔꠤꠔꠣꠍꠞ ꠉꠦꠍꠦ ꠟꠦꠈꠞꠣꠝ, ꠀꠝꠞꠣ ꠖꠥꠁꠅꠎꠘꠃ ꠄꠇꠁ ꠁꠝꠣꠘꠦ ꠀꠟ-ꠝꠍꠤꠞ ꠃꠝ꠆ꠝꠔ ꠅꠁꠍꠤ।

ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠄ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।

5 ꠔꠤꠔꠣꠍ ꠢꠥꠘꠅ, ꠀꠝꠤ ꠔꠥꠝꠣꠞꠦ ꠅꠃ ꠇ꠆ꠞꠤꠔꠤ ꠖꠤꠙꠅ ꠕꠁꠀ ꠀꠁꠍꠤ, ꠎꠣꠔꠦ ꠎꠦꠔꠣ ꠇꠣꠝ ꠅꠈꠘꠅ ꠛꠣꠇꠤ ꠞꠁꠍꠦ, ꠔꠥꠝꠤ ꠅꠔꠣ ꠙꠥꠞꠣꠙꠥꠞ ꠀꠖꠣꠄ ꠇꠞ। ꠀꠞ ꠀꠝꠤ ꠎꠦꠟꠣ ꠢꠥꠇꠥꠝ ꠖꠤꠍꠟꠣꠝ, ꠑꠤꠇ ꠅꠃꠟꠣ ꠔꠥꠝꠤ ꠙꠞꠔꠦꠇ ꠐꠣꠃꠘꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠣꠝꠅ ꠛꠅꠀꠁꠟ ꠇꠞꠅ। 6 ꠝꠘꠅ ꠞꠣꠈꠤꠅ, ꠎꠦ ꠝꠥꠞꠛ꠆ꠛꠤ ꠅꠇꠟ ꠛꠖꠘꠣꠝ ꠍꠣꠠꠣ ꠘꠤꠈꠥꠔ, ꠎꠦꠞꠣꠞ ꠈꠣꠟꠤ ꠄꠇꠎꠘ ꠛꠃ ꠀꠍꠂꠘ, ꠎꠦꠞꠣꠞ ꠙꠥꠀ-ꠙꠥꠠꠤꠘ ꠁꠍꠣꠄꠁ ꠁꠝꠣꠘꠖꠣꠞ, ꠎꠦꠞꠣ ꠛꠦꠙꠞꠥꠀ ꠜꠣꠛꠦ ꠎꠤꠘ꠆ꠖꠦꠉꠤ ꠇꠣꠐꠣꠄ ꠘꠣ, ꠛꠞꠋ ꠝꠣ-ꠛꠣꠚꠞ ꠛꠣꠁꠖ꠆ꠖ ꠀꠍꠦ, ꠅꠃ ꠝꠥꠞꠛ꠆ꠛꠤꠞꠦ ꠔꠥꠝꠤ ꠛꠅꠀꠁꠟ ꠇꠞꠅ। 7 ꠀꠟ꠆ꠟꠣꠁ ꠇꠣꠝꠞ ꠎꠤꠝ꠆ꠝꠣꠖꠣꠞꠤ ꠙꠣꠅꠀꠄ ꠎꠦꠇꠥꠘꠥ ꠌꠣꠟꠇꠖꠣꠞ ꠎꠣꠘꠥ ꠛꠖꠘꠣꠝ ꠍꠣꠠꠣ ꠘꠤꠈꠥꠔ ꠅꠁꠘ। ꠔꠣꠁꠘ ꠎꠣꠘꠥ ꠡ꠆ꠛꠂꠞꠣꠌꠣꠞ, ꠛꠖꠞꠣꠉꠤ, ꠘꠤꠡꠣꠈꠥꠞ, ꠝꠣꠞꠣ-ꠝꠣꠞꠤ ꠇꠞꠞꠣ ꠛꠣ ꠢꠣꠞꠣꠝ ꠞꠥꠎꠤ-ꠞꠥꠎꠉꠣꠞꠞ ꠟꠣꠟꠌꠤ ꠘꠣ ꠅꠁꠘ। 8 ꠄꠞ ꠛꠖꠟꠣ ꠔꠣꠁꠘ ꠎꠣꠘꠥ ꠝꠦꠝꠣꠘꠖꠣꠞꠤ ꠇꠞꠞꠣ, ꠘꠦꠇ ꠜꠣꠛꠞ ꠀꠡꠤꠇ, ꠢꠇ-ꠢꠣꠟꠣꠟꠤ, ꠀꠞ ꠀꠟ꠆ꠟꠣꠞ ꠛꠣꠁꠖ꠆ꠖ ꠎꠘ ꠅꠁꠘ। ꠔꠣꠘ ꠜꠣꠟꠣ ꠛꠤꠌꠣꠞ-ꠛꠥꠖ꠆ꠖꠤ ꠕꠣꠇꠦ, ꠀꠞ ꠘꠤꠎꠞꠦ ꠙꠥꠞꠣꠙꠥꠞ ꠡꠣꠝꠟꠣꠁꠀ ꠞꠣꠈꠔꠣ ꠙꠣꠞꠂꠘ। 9 ꠀꠟ꠆ꠟꠣ ꠙꠣꠇꠞ ꠎꠦ ꠢꠇ ꠇꠣꠟꠣꠝ ꠔꠣꠟꠤꠝ ꠙꠣꠁꠍꠂꠘ, ꠔꠣꠁꠘ ꠁꠔꠣꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠂꠘ, ꠀꠞ ꠑꠤꠇ ꠅꠃ ꠟꠣꠈꠣꠘ ꠈꠣꠐꠤ ꠔꠣꠟꠤꠝ ꠔꠛꠟꠤꠉ ꠇꠞꠔꠣ ꠙꠣꠞꠂꠘ। ꠄꠞꠟꠉꠦ ꠎꠦꠞꠣ ꠔꠣꠘ ꠛꠤꠙꠇ꠆ꠇꠦ ꠀꠍꠦ, ꠔꠣꠞꠣꠞ ꠜꠥꠟ-ꠛꠦꠀꠈꠟꠤꠅ ꠗꠞꠣꠁ ꠖꠦꠁꠘ।

10 ꠇꠣꠞꠘ ꠛꠃꠔ ꠛꠦꠡꠣꠝꠣꠟ ꠝꠣꠘꠥꠡ ꠀꠍꠂꠘ, ꠎꠦꠔꠣꠄ ꠇꠦꠃꠞꠞꠦ ꠝꠣꠘꠂꠘ ꠘꠣ, ꠛꠦꠇꠣꠝꠣ ꠝꠣꠔ ꠝꠣꠔꠂꠘ, ꠍꠟ-ꠌꠔꠥꠞꠤ ꠇꠞꠂꠘ। ꠎꠦꠔꠣꠄ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠟꠣꠉꠤ ꠎꠥꠞꠣ-ꠎꠥꠞꠤ ꠇꠞꠂꠘ, ꠀꠝꠤ ꠈꠣꠍ ꠇꠞꠤ ꠅꠔꠣꠞ ꠇꠕꠣꠃ ꠇꠁꠞꠣꠝ। 11 ꠁꠔꠣꠞ ꠝꠥꠈ ꠛꠘ꠆ꠖ ꠇꠞꠣ ꠎꠞꠥꠞ। ꠁꠔꠣꠄ ꠇꠥ-ꠙꠕꠦ ꠐꠦꠇꠣ ꠇꠣꠝꠣꠘꠤꠞ ꠀꠡꠣꠄ ꠅꠟꠣ ꠔꠣꠟꠤꠝ ꠖꠦꠁꠘ, ꠎꠦ ꠔꠣꠟꠤꠝ ꠖꠦꠅꠀ ꠔꠣꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠁ ꠔꠣꠟꠤꠝ ꠖꠤꠀ ꠇꠥꠘꠥ ꠇꠥꠘꠥ ꠙꠞꠤꠛꠣꠞꠞꠦ ꠛꠤꠉꠠꠣꠁꠟꠤꠞꠣ। 12 ꠄꠞꠟꠣꠉꠤ ꠔꠣꠞꠣꠞ ꠘꠤꠎꠞ ꠖꠦꠡꠞ ꠄꠇꠎꠘ ꠙꠘ꠆ꠒꠤꠔꠦ ꠇꠁꠍꠂꠘ, “ꠇ꠆ꠞꠤꠔꠤ ꠖꠤꠙꠞ ꠝꠣꠘꠡꠦ ꠢꠣꠝꠦꠡꠣ ꠝꠤꠍꠣ ꠝꠣꠔꠂꠘ, ꠁꠉꠥꠁꠘ ꠔ ꠎꠋꠟꠤ ꠎꠣꠘꠥꠀꠞꠞ ꠟꠣꠈꠣꠘ, ꠇꠥꠠꠤꠀ ꠀꠞ ꠙꠦꠐꠥꠀ।” 13 ꠁꠔꠣ ꠔ ꠄꠇꠖꠝ ꠢꠣꠍꠣ, ꠄꠞꠟꠣꠉꠤ ꠔꠥꠝꠤ ꠈꠥꠛ ꠉꠞꠝ ꠅꠁꠀ ꠔꠣꠞꠣꠞ ꠀꠁꠛ ꠖꠦꠈꠣꠁꠀ ꠖꠦꠅ, ꠎꠣꠔꠦ ꠔꠣꠞꠣꠞ ꠁꠍꠣꠄꠁ ꠁꠝꠣꠘ ꠡꠥꠟ꠆ꠟꠀꠘꠣ ꠘꠤꠈꠥꠔ ꠅꠄ। 14 ꠁꠢꠥꠖꠤ ꠅꠇꠟꠞ ꠛꠣꠘꠣꠁꠟ ꠇꠤꠌ꠆ꠍꠣ-ꠇꠣꠢꠤꠘꠤ, ꠀꠞ ꠎꠦꠔꠣ ꠝꠣꠘꠥꠡ ꠀꠟ꠆ꠟꠣꠁ ꠢꠇꠤꠇꠔ ꠕꠣꠇꠤ ꠛꠦ-ꠙꠕꠦ ꠉꠦꠍꠦꠉꠤ, ꠔꠣꠞꠣ ꠎꠣꠘꠥ ꠁꠔꠣꠞ ꠢꠥꠇꠥꠝ-ꠃꠙꠖꠦꠡ ꠇꠣꠘꠅ ꠘꠣ ꠟꠂꠘ।

15 ꠎꠦꠞꠣꠞ ꠖꠤꠟ ꠙꠣꠇ-ꠙꠛꠤꠔ꠆ꠞ, ꠔꠣꠞꠣꠞ ꠉꠦꠍꠦ ꠢꠇꠟꠔꠣꠃ ꠙꠛꠤꠔ꠆ꠞ। ꠅꠁꠟꠦ ꠎꠦꠞꠣꠞ ꠖꠤꠟ ꠘꠣꠙꠣꠇꠤꠄ ꠜꠞꠣ, ꠀꠞ ꠎꠦꠔꠣ ꠛꠦꠁꠝꠣꠘ, ꠁꠔꠣꠞ ꠉꠦꠍꠦ ꠇꠥꠘ꠆ꠔꠣꠃ ꠙꠛꠤꠔ꠆ꠞ ꠘꠣꠄ। ꠁꠔꠣꠞ ꠝꠘ ꠀꠞ ꠛꠤꠛꠦꠇ ꠢꠇꠟꠔꠣꠃ ꠛꠞꠛꠣꠖ। 16 ꠔꠣꠞꠣ ꠝꠥꠈꠖꠤ ꠖꠣꠛꠤ ꠇꠞꠂꠘ ꠀꠟ꠆ꠟꠣꠞꠦ ꠝꠣꠘꠂꠘ, ꠅꠁꠟꠦ ꠔꠣꠞꠣꠞ ꠇꠣꠝꠞ ꠝꠣꠎꠖꠤ ꠔꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠂꠘ। ꠁꠉꠥꠁꠘ ꠔ ꠘꠚꠞꠔꠤ ꠀꠞ ꠅꠛꠣꠁꠖ꠆ꠖ। ꠁꠔꠣꠞꠦ ꠇꠥꠘꠥ ꠜꠣꠟꠣ ꠇꠣꠝꠅ ꠟꠣꠉꠣꠁꠟ ꠎꠣꠄ ꠘꠣ।