Ye Ju Alué Apeli Napu Oséliru Alué Esukristo Oyérame Napu Ebreo Ra'íchame Nílige
1
Jena ruwimela Esukristo 'we najtékame ko me'tigá alué santo ánjeli
Kuira suwábaga 'emi ralámuli.
'We 'ya we'ká bamí alué ralámuli napu ruwime nile napu anele Onorúgame we'sá ruyele ramué rijimala* E'nesi glosario «ancestor». napu anele Onorúgame. Yolí ra'íchaga «profeta» anilime nile alué ralámuli. 'Lige a'kinana Onorúgame bo'né Inolá júlale napurigá ralámuli benírimala uché bilé nuebo ra'íchali. 'We 'ya, tabilé 'cho sébachi Onorúgame Inolá jena wijchimoba ta'chó i'tégichi gawí, Onorúgame nulele bo'né Inolá napurigá newámala gawí 'lige rewagátiri pe bo'né 'nátaga. 'Liko 'ma suwábaga bo'né nila ju, napu ekí nerú jena wijchimoba 'lige 'pa rewagachi. Onorúgame Inolaka wa'lú a'walí nígame ju Onorúgame a'walila, 'lige a'chigóriga napurigá Onorúgame alarigá nulame ju. Alué a'walila gite nabí repuka ajtí suwábaga tábiri. Napu'lige jena wijchimoba sebasa, alueka mukúlekuru napurigá ralámuli 'ma a'rémala chátiri 'nátili. 'Lige napu'lige 'ma sébali olasa, 'ma ku 'pa rewagachi simile Wa'lula Onorúgame si asimea wajtoná napu ajtí Onorúgame napurigá nulámala.
'La nérékuru Onorúgame Inolá abé najtékame ko me'tigá alué santo ánjeli. Onorúgame Inolaka abé najtékame nóchali nígame ju. Onorúgameka tabilé siné che anele bilé santo ánjeli regá:
Mué ne Inolá júkuru.
Jípeko ne mué O'nola júkuru.
Ye ra'íchali anele Onorúgame bo'né Inolá. Abiena regá anele Onorúgame:
Neka ju alué O'nola,
'lige alué ne Inolá ju. E'nesi Salmos 2:7.
Onorúgameka tabilé siné alarigá anele bilé santo ánjeli.
Abiena napu'lige Onorúgame júlale bo'né Inolá jena gawichí, regá anile:
Neka najkíguru napurigá suwábaga alué santo ánjeli
'la niraga etémala ne Inolá, 'lige napurigá animela:
«Wa'lú a'walí nígame ju 'lige 'we najtékame ju.»
Aminami Onorúgame regá anile alué santo ánjeli olagá:
Napurigá bilé eká 'lige na'í alarigá ju alué santo ánjeli,
alueka Onorúgame gu'írame ju.
Aminami Onorúgame regá anile bo'né Inolá olagá:
Mué Onorúgame ne Inolá, mueka senibí nulámili júkuru.
'We a'lá semáriga nulámili júkuru 'we a'lá sébali.
Tabilé siné suwibámala alué nulalí.
Mueka nabí 'la 'nátaga ilírome júkuru
napurigá ralámuli
'we a'lá semáriga na'támala Onorúgame 'yuga,
'lige mueka ayónime júkuru alué ralámuli
alué tabilé Onorúgame oyérame 'yuga,
alekeri ne Onorúgame mué O'nola
'we a'lá nóchali 'ya ne mué
asíriga najtékame me'tigá alué mué gompaniérola.
Mueka asíriga ra'sálagá asimela alué nóchali niga.§ Yolí ra'íchaga ka «untado con el aciete de alegría». E'nesi Salmos 45:6-7.
10 Onorúgame abiena regá anele bo'né Inolá:
'We 'yasi mué júkuru nulame,
mué 'sílekuru gawí newá 'lige rewagátiri pe bo'né 'nátaga.
11 'Lige abé i'libeko tabilé i'télamala ye gawí nibilé rewagátiri,
'ma suwibámala suwábaga, mueka abisibi asimela.
Alué gawika pe o'chéraga suwibámili júkuru
'lige alué rewagátiri a'chigóriga,
napurigá o'pacha iwime ju o'chéraga
alarigá i'kimela.
12 Mueka pe ro'minámala ye gawí 'lige rewagá abiénachigó,
pe alarigá olámala mué,
napurigá nokame ju ralámuli
napu'lige 'ma tabilé gemanálasaká alué gemate,
a'maná ajchame kárigó ro'míniga.
Mueka se'wí ajchámala napurigá nokame ju ralámuli.
O'pacha bujisá se'nú o'pachátime ju
a'maná ajchame kárigó,
alarigá olámala mué ye gawí 'lige rewagá.
Mueka peba alarigá rejpímili júkuru
'lige senibí bejtega asimeli júkuru mué.
Alarigá anele Onorúgame bo'né Inolá.* E'nesi Salmos 102:25-27.
13 Onorúgameka tajsiné che anele bilé santo ánjeli ye ra'íchali:
Jena asibóká ne'chí 'yuga wajtoná napu ne ajtí
napurigá wa'lula neraga napusí ne ro'aba mué saíla. E'nesi Salmos 110:1.
14 Alué santo ánjelika pe napurigá bilé alawá niraga ju 'mimi julálime ju ralámuli gu'íriniliga, alué ralámuli napu Onorúgame buinámala alé resítiri bowechi.

*1:1 E'nesi glosario «ancestor».

1:1 Yolí ra'íchaga «profeta» anilime nile alué ralámuli.

1:5 E'nesi Salmos 2:7.

§1:9 Yolí ra'íchaga ka «untado con el aciete de alegría». E'nesi Salmos 45:6-7.

*1:12 E'nesi Salmos 102:25-27.

1:13 E'nesi Salmos 110:1.