23
येशूसे यहूदी धर्मगुरुदेन फरिसीगदेला दोष उन्बा
मर्कूस १२:३८-४०; लूका ११:३९-५२; २०:४५-४७
1 जमाहेन्से येशूसे ह्राङला चेलागदेदेन थेरी मुबा म्हिला हुलदा चुह्रङ् भिसी सुङ्जी, 2 “च्यागो, यहूदी धर्मगुरुदेन फरिसीगदेसे मोशाला ठिम लोप्बा अधिकार याङ्बा मुला। 3 थेतबासेलमा थेनीगदेसे पाङ्बा ताम एनीगदेसे ङ्यान्गो, तर थेनीगदेसे लबा ह्रङ्बान गे चा थालउ। तिग्दा भिसम थेनीगदेसे एनीगदेदा लोप्बाम लोप्मुला, तर लोप्बा अन्छारला गे चा आलमुला। 4 ओच्छे म्हिगदेदा थेनीगदेसे पुइनोन आखम्बा धोइ काप्सी पिन्मुला। तर थेनीगदेसे भिसम थे धोइ थीबाला लागिरी या जुम्बीसेनोन आथुर्मुला।
5 “थेनीगदेसे जम्मान गे म्हिदा उन्बाला लागिरी लमुला। तिग्दा भिसम थेनीगदेसे परमेश्वरसे मोशादा पिन्बा ठिम कागजरी भ्रिसी घ्रेन घ्रेन जन्तर स्होसी ङोदेन नारीरी खीमुला। ओच्छे थेनीगदेसे क्वान्बा क्वान्ना जोरी ह्रेङ्बा ह्रेङ्बा फुर्गा कार्मुला।*मत्ती ६:१; गन्ती १५:३८; व्यव ६:८ 6 थेनीगदेसे भोजरीदेन यहूदीगदे ह्रुप तबा दिमला मुल ठिरी चिबारी सेम लमुला। 7 बजाररी निमाएनोन म्हिगदेसे फ्या लगै भिसी म्हन्मुला, ओच्छे ‘गुरु’ भिसीएनोन पाङ्गै भिसी म्हन्मुला। 8 तर एनीगदेदा खालैसेन ‘गुरु’ भिसी थाभिगै। तिग्दा भिसम एनीगदे ज्योज्यो आले हिन्ना। एनीगदेला गुरु चा गिक जे मुला।†ख्रीष्टियानगदे न्हङरीनोन गुरुगदे तखम्ला (याकूब ३:१; एफिसी ४:११)। तर ख्रीष्ट चा जम्मालान मुल गुरु हिन्ना। 9 जम्बुलिङरी एनीगदेसे खालैदान आबा थापाङ्गो। तिग्दा भिसम स्वर्गरी एनीगदे जम्मालान आबा गिक जे मुला।†येशूसे ह्राङला आबादा मान थालउ भिसी सुङ्बा आहिन। तर परमेश्वरदा पिन्तोःबा मान जम्बुलिङरी स्य्हान्दो म्हिदा थालउ भिबा हिन्ना। 10 ओच्छे एनीगदेदा खालैसेन ‘मालिक’ थाभिगै। तिग्दा भिसम एनीगदे जम्मालान मालिक थार्बा पिन्बा ख्रीष्ट जे हिन्ना। 11 एनीगदे न्हङला जुन म्हि घ्रेन मुला, थेसे चा एनीगदे जम्मालान सेवा लतोःला।*मत्ती २०:२६-२७; मर्कू ९:३५; लूका २२:२६ 12 ओच्छे जुन म्हिसे ह्राङसे ह्राङदान घ्रेन स्होला, थे म्हि चा जजा दोला। तर ह्राङसे ह्राङदान जजा स्होबा म्हि चा घ्रेन दोला।*लूका १४:११; १८:१४
13 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। तिग्दा भिसम एनीगदेसे म्हिगदेला ङाच्छा स्वर्ग य्हुल्साला म्राप ढुङ्मुला। ओच्छे एनीगदे ह्राङएनोन आनिमुला निबारी म्हाइबा म्हिदाएनोन निआपुङ्मुला।
14 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। तिग्दा भिसम एनीगदेसे ह्रेम्बो सिबा म्रिङम्हेमेगदेला दिमनाम ब्यन्मुला। ओच्छे म्हिदा उन्बाला लागिरी ह्रेङ्बा ह्रेङ्बा प्रार्थना लबा स्होमुला। थेतबासेलमा स्य्हान्दोगदेसे भन्दा एनीगदेसे ल्हाना सजाय याङ्ला।†चु पदला ताम ल्हाना ह्रङ्बा ग्रीक बाइबलरी भ्रिबा आरे, कोइ कोइ बाइबलरी जे भ्रिबा मुला। चु ताम मर्कूस १२:४० स्हीगो।
15 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। तिग्दा भिसम एनीगदे गङ स्योङ थासी भ्रसै कोर्सी कोर्सी स्य्हान्दो म्हिदा ह्राङलान ग्यामरी भ्रपुङ्मुला। ओच्छे तिगै लसी स्य्हान्दो म्हि गिक एनीगदेदेन छ्याम ढिक्जी भिसम एनीगदेसे थे म्हिदा ह्राङ भन्दा आज्यबा स्होसी नर्गरी नितोःबा म्हि स्होमुला।
16 “स्य्हान्दोदा लोप्बा काना म्हिगदे, एनीगदेसे परमेश्वरग्याम गाते सजाय याङ्ला। एनीगदेसे म्हिगदेदा लोप्बा धुइरी ‘परमेश्वरला मन्दिरला मिन किन्सी घ्रान फासैनोन तिगै आतमुला। तर परमेश्वरला मन्दिररी मुबा म्हरला मिन किन्सी घ्रान फाजी भिसम चा थे घ्रानसेन चमुला’ भिसी लोप्मुला। 17 मूर्ख कानागदे, खजिबा चा घ्रेन? म्हरदा चोखो तना लबा परमेश्वरला मन्दिर घ्रेन कि म्हर घ्रेन? 18 ओच्छे ‘खालै म्हिसे बलि फुल्बा ग्लाला मिन किन्सी घ्रान फाजी भिसम तिगै आतमुला, तर थेरी फुल्बा भेटीला मिन किन्सी घ्रान फाजी भिसम चा थे घ्रानसेन चमुला’ भिसीनोन एनीगदेसे लोप्मुला। 19 कानागदे, खजिबा चा घ्रेन हिन्ना। भेटीदा चोखो तना लबा ग्ला घ्रेन कि भेटी घ्रेन? 20 थेतबासेलमा च्यागो, परमेश्वरला मन्दिररी बलि फुल्बा ग्लाला मिन किन्सी घ्रान फाबा म्हिसे थेथोरी मुबा जम्मान स्हेला मिन किन्सी घ्रान फाबा तला। 21 ओच्छे परमेश्वरला मन्दिरला मिन किन्सी घ्रान फाबासे थेरी धन्छ्याबाला मिन किन्सी घ्रान फाबा तला। 22 थेह्रङ् लसीन स्वर्गला मिन किन्सी घ्रान फाबासे परमेश्वरला ठिदेन थेथोरी धन्छ्याबाला मिन किन्सी घ्रान फाबा तला।*यशै ६६:१; मत्ती ५:३४
23 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। तिग्दा भिसम एनीगदेसे बाबरीदेन सोँप ओच्छे जिराला भो च्युइला भो गिक चा पिन्मुला। तर ठीक निसाफ, दयादेन विश्वासला बारेरी परमेश्वरसे मोशादा पिन्बा ठिमला मुल तामदा चा आङ्यान्मुला। तर एनीगदेसे चु गे न्हीनोन लतोःबा मुबा।*लेवी २७:३० 24 तर एनीगदेसे भुसुना ह्रङ्बा जजा स्हे चा म्राङ्बा, तर ऊँट ह्रङ्बा घ्रेन स्हेदा चा आम्राङ्बा, एनीगदे मी कानान हिन्ना।†चु पदरी येशूसे चुह्रङ् भिसी लोप्बारी छ्याइजी, फरिसीगदेसे जजाबा भुसुना ह्रङ्बा तामदा चा वास्ता लमुला, तर थेनीगदेसे परमेश्वरसे मोशादा पिन्बा ठिमरी मुबा घ्रेन तामदा चा तिगै वास्ता आलमुला।
25 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। एनीगदेसे खोरेदेन खार्बाला पाखापट्टि जे म्याप्मुला। तर न्हङपट्टि चा चीबुन थान्बा ह्रङ् लसी एनीगदेसे ह्राङला सेमरी लोभदेन म्हिदा ठगब लबा ह्रङ्बा नइबा ताम थान्मुला। 26 काना फरिसीगदे, ङाच्छा खार्बादेन खोरे न्हङपट्टि ज्यना लसी म्याप्गो। जमाहेन्से जे थे खार्बादेन खोरे पाखापट्टि ज्यना लसी धाला।
27 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। एनीगदे तार साप्रासे च्युर्सी थान्बा धुर्सा ह्रङ्बान मुला। थे धुर्साला पाखापट्टि च्यामा चा जेबा म्राङ्मुला। तर न्हङरी भिसम सिबा म्हिला नख्रुदेन नइबा स्हेगदेसे प्लिङ्बा मुला।*मुल २३:३ 28 थेह्रङ् लसीन एनीगदे म्हिला ओन्छाङरी ‘ङनी परमेश्वरला ङाच्छा ज्यबा म्हि हिन्ना’ भिसी भ्रमुला। तर एनीगदेला सेम चा छलकपटदेन पापसे प्लिङ्बा मुला।
29 “परमेश्वरग्याम सजाय याङ्तोःबा यहूदी धर्मगुरुदेन फरिसीगदे, एनीगदे मी कप्टीगदे हिन्ना। तिग्दा भिसम एनीगदेसे अगमवक्तागदेला धुर्सा स्होमुला, ओच्छे परमेश्वरला ङाच्छा ज्यबा म्हिगदेला धुर्सा जेना लसी थान्मुला। 30 ओच्छे ‘ङन्ना आखे म्हेमेसे अगमवक्तागदेदा साइबा धुइरी ङनीएनोन थेनीगदेदेन छ्याम मुबा हिन्सम थेनीगदेसे ह्रङ् चा ङन्से आलसेला मुबा’ भिसी एनीगदेसे पाङ्मुला। 31 एनीगदेसे पाङ्बा चुह्रङ्बा तामग्यामसेन एनीगदे अगमवक्तागदेदा साइबागदेला सन्तान हिन्ना भिसी था तना लबा मुला। 32 दाहेन्से एनीगदेला आखे म्हेमेसे शुरु लबा पाप गे एनीगदेसे पूरा लउ।
33 “पुख्रीदेन पुख्रीला कोलागदे, नर्गरी नातोःबा दुखग्याम एनीगदे खाह्रङ् लसी जोगब तला?*मत्ती ३:७; १२:३४; लूका ३:७ 34 थेतबासेलमा एनीगदेसे ङाला ताम ङ्यान्गो, दाहेन्से ङाइ अगमवक्तागदेदेन बुद्धि मुबा म्हिगदेदा ओच्छे सत्य ताम लोप्बा धर्मगुरुगदे एनीगदे मुबा ग्लारी पुइखला। थेनीगदेदा एनीगदेसे कोइदा साइला, कोइदा क्रुसरी टाँगब लसी साइला, कोइदा एनीगदे ह्रुप तबा दिमगदेरी भोर्सी कोर्रासे तोःला ओच्छे कोइदा शहर शहरग्याम ताप्ला। 35 थेतबासेलमा परमेश्वरला ङाच्छा ज्यबा म्हि हाबिलदा साइबा धुइहेन्से बेरेक्याहला झा जकरियादा साइबा धुइधोना जम्बुलिङरी मुबा जम्मान ज्यबा म्हिगदेदा साइबा पापला दोष एनीगदेसेन नातोःला। एनीगदेसे बेरेक्याहला झा जकरियादाएनोन परमेश्वरला मन्दिरदेन बलि फुल्बा ग्लाला गुङरी साइजी। 36 च्यागो, एनीगदेसे ङाला ताम ङ्यान्गो, चु जम्मान पापला सजाय दान्देला म्हिगदेथोरीन खला।
यरूशलेमला म्हिगदे म्राङ्सी येशूदा दुख ङ्हम्बा
लूका १३:३४, ३५
37 “यरूशलेमला म्हिगदे, एनीगदेसे अगमवक्तागदेदा साइला ओच्छे परमेश्वरसे एनीगदे मुबा ग्लारी पुइखबागदेदा युङबासे तोला। ङाइ एनीगदेला कोलागदेदा नागा मामासे ह्राङला कोलागदेदा भ्याप्से घप्बा ह्रङ् लसी पोप लबारी म्हाइमा एनीगदेसे आङ्यान्नी। 38 थेतबासेलमा दाहेन्से परमेश्वरसे एनीगदेला शहर ख्लाला।*यर्मि २२:५ 39 ङाला ताम ङ्यान्गो, एनीगदेसे ‘परमप्रभुला मिनरी फेप्खबादा मोलम याङ्बा म्हि’ आभितेधोना ङादा आम्राङ्।”*भजन ११८:२६
*23:5 मत्ती ६:१; गन्ती १५:३८; व्यव ६:८
†23:8 ख्रीष्टियानगदे न्हङरीनोन गुरुगदे तखम्ला (याकूब ३:१; एफिसी ४:११)। तर ख्रीष्ट चा जम्मालान मुल गुरु हिन्ना।
†23:9 येशूसे ह्राङला आबादा मान थालउ भिसी सुङ्बा आहिन। तर परमेश्वरदा पिन्तोःबा मान जम्बुलिङरी स्य्हान्दो म्हिदा थालउ भिबा हिन्ना।
*23:11 मत्ती २०:२६-२७; मर्कू ९:३५; लूका २२:२६
*23:12 लूका १४:११; १८:१४
†23:14 चु पदला ताम ल्हाना ह्रङ्बा ग्रीक बाइबलरी भ्रिबा आरे, कोइ कोइ बाइबलरी जे भ्रिबा मुला। चु ताम मर्कूस १२:४० स्हीगो।
*23:22 यशै ६६:१; मत्ती ५:३४
*23:23 लेवी २७:३०
†23:24 चु पदरी येशूसे चुह्रङ् भिसी लोप्बारी छ्याइजी, फरिसीगदेसे जजाबा भुसुना ह्रङ्बा तामदा चा वास्ता लमुला, तर थेनीगदेसे परमेश्वरसे मोशादा पिन्बा ठिमरी मुबा घ्रेन तामदा चा तिगै वास्ता आलमुला।
*23:27 मुल २३:३
*23:33 मत्ती ३:७; १२:३४; लूका ३:७
*23:38 यर्मि २२:५
*23:39 भजन ११८:२६